Read basketo ሮሜ 12 Bible Online

ሮሜ 12 - basketo bible

ሮሜ 12

¹ዪዚ ቴ ኢሺንታን! ዪንታ̇ ኣሲቲ̈ንዶ ጾ̈ሳ̇̇ ኡፋይሲዝ ጌ̈ሽ ማ̈ቂ̇ኖ ሼምፓባሮ ዣርሻ ማ̈ሃሪ ጾ̈ሳ̇̈̇ቦ ሺ̈ሻ̇ምፔ̈ኒ ጾ̈ሳ̇ ኣሽኪቲምባራ ቴ ዪንታ̇ ጌሻ̈ሬ። ዪንቲ̇ ጾ̈ሳ̇̇̈ቦ ጎሽታ̇ንዳብ ኮሺ̇ዝ ኪን ጎይን ዓና̇ ኢዞ።

²ኮሽ̇ ማ̈ቂኖንዲኬ፥ ኡፋ̈ይሳዚን ማ ማዛ ኢዝ ጋልዳ ባዮ̇ን ጾ̈ሳ̇ ቆፊን ኤራንዳ̇ቦ ዪንታ̇ ቡ̈ዲን ኦ̈ራሙታ̇ዶ̈ሪ ዪንታ̇ ኣሲቲንባር ላ̈ሚንቲ̇ብትዶኬ ዓና ኣላሚን ጋልዳ ዎ ኣሳን ማይጻፒ̇ቴ።

³ማ ዪንቲ̇ ዎይን ጾ̈ሲ ዪንታ̇̇ቦ ኢሚ̇ኖ ኣማ̇ኒንዲፌ̈ን ዪንታ̇ ዪርክ ዎታሪ ቤቂ̇ብትዶኬ ዪንታ̇̇ቦ ኮሻ̇ዚምፖ ኣ̈̇ሪ ኦቲራ ቆፊ ቆፓካዮ̈ዲፌ̈ኒ ጾ̈ሲ̇ ታ̈ብ ኢሚ̇ኖ ኤሪቲንባራ ዪንታ̇̇ቦ ሶ̈ላ̈ሬ።

⁴ፔቲ̇ ኣሳ ጋልዳ ዱማ ዱማ ጋሊ̇ ዎ፤ ዪ̈ን ጋላ̇ን ኢንታ ኦ̈ሲንዳሬ ዱማ ዱማ።

⁵ዪና ኢዝፌ̈ን ኑ̈ናሬ ዱማ ዱማ ኣስዶ̈ን ክርስቶ̈ሳባራ ዎል ፔታ̇ኔ፤ ኑ̈ኒ ዎይን ፔቲ̈ ጋ̈ል ጋልዳ ዎ ጊሻ̇ቦ ዎልዎልኣ ኤ̈ንቲ̇ኔ።

⁶ጾ̈ሳ̇ ፌ ኣሽኪቲንዲፌ̈ኒ ኑ̈ቦ ዱማ ዱማ ኪልስ ኢሚ̇ኔ፤ ኑ̈ቦ ኢሚንቲ̇ኖን ጾ̈ሳ̇̇ ቃ̈ሊን ሶ̈ሊኮ ኑ ኣማ̇ኒንዲፌ̈ኒ ቃ̈ላ ሶ̈ሊስቶ።

⁷ኑ̈ቦ ኢሚንቲ̇ኖንዳ ሜ̈ላን ማ̈ዲ̇ዝባዝኮ ሚ̈ጛር ማ̈ዲስቶ̇፤ ታ̈ማር̇ሲኮ ሚ̈ጛር ታማ̈ርሲስቶ̇፤

⁸ኣስ ዞሪኮ ዞሪሲቶ̈፤ ሜላንቦ ኢሚ̇ ማ̈ዲዝባዝኮ ኑ ቡ̈ዳፖ ኢሚ̇ስቶ፤ ኣስ ኣቂሲኮ ኮ̈ሽንቺ̇ ኣቂሲቶ፤ ኣሳብ ሚጪንቲ̇̈ርኮ ቡ̈ዳ ጋርታፖ ሚጪንቲ̇ስቶ̇።

⁹ዪንታ̇ ካንንዳ ሲሊ̇ፖ̇ ፉዳ ማ̈ቃፖ̇ጋ̈ቤ። ኢ̈ት ባዝ ሺርንቲ̇ብቴ፤ ኮሽ̇ ባዚን ሚ̈ንር ኤ̈ብቴ̇፤

¹⁰ዎል ዎልኣ ኢሺክ ጌ̈ዲክፌ̈ን ዶ̈ሲንቲ̈ብቴ፤ ዎልዎልኣ ቦንቺ̇ንቲ̇ብቴ።

¹¹ዳ̈ቡራካ̇ይዶር ኡፋይስባር ኩሚኖ ቡ̈ዳባራ ጎዳ̈ቦ ኦ̈ብቴ።

¹²ዪንታ̇ብ ዎ ታስፊንባራ ኡፋይቲ̇ብቴ፤ ሜታ ዪ̈ንታ ዬ̈ሌ̇ጌይን ጋ̈ርዢብቴ፤ ዎይ ጋላስ ዎ̈ሲ̇ብቴ።

¹³ኣማ̇ኒኖ ኣሳን ኢንታ̇ ሜቲን ጋ̈ርታ ኢንታ̇ ማ̈ዲ̇ብቴ፤ ዛቃ̇ ማ̈ቂ̇ ዬይዛን ሞኪ̇ ኤኪ̇ብቴ̇።

¹⁴ዪንታ̇ ዳኪ̇ዛን ኣንጂ̇ብቴ፤ ኣንጂ̇ብቴዶኬ ባ̈ዳፒ̇ቴ።

¹⁵ኡፋይቲ̇ዛንባራ ኡፋይቲ̇ብቴ፤ ዬ̈ኪ̇ዛንባራ ዬ̈ኪ̇ብቴ።

¹⁶ዪንቲ̇ ዎል ዎልኣ ፔቲ̇ ቡ̈ዳባር ማ̈ቃ̇ር ዶኢብቴ̇፤ ዪንቲ ኦቲርቂ̇ዛ ኣሻ̇ሪ ዎርባያንባር ዎልኣ ዬ̇ንዳቦ ኢጻፒ̇ቴ፤ ኑ̈ኒ ኤራ ጋ̈ሪ ዪንታ̇ ሾክ ሾክ ዎታፒ̇ቴ።

¹⁷ኣስ ጌ̈ይዛ ዎይ ቲ̈ን ኮሽ ማ̈ቂ̇ኖ ባዝ ኦ̈ብቴዶ̈ኬ ኣሲ ዪንታ̇ ጋልዳ ኢ̈ታባዝ ኦ̈ጌይን ኢንታ̇ቦ ኢ̈ት ኦ̈ር ማሃፒ̇ቴ።

¹⁸ዪንታ̇̇ብ ዳንዳኢንቴጌይንዶ ኣስ ዎ̈ይባር ሳሪቲባራ ዶኣንዳ̇ቦ ኮሺ̇ዝ ባዝ ዎይሲ ዎቲብቴ̇።

¹⁹ታ ላጋን! “ኣሳብ ኣሳ ኦ̈ሳፌ̈ኒ ጪጊ̇ዛ ታ̈ና ጌይሬ ጎዳ ጾ̈ሳ̇̇̈ዲ” ጌዪ ጻ̈ፊንቲ̇ኖኮታ̇ቦ፥ ጎይላ ጾ̈ሳ̇̇ብ ኣሺ̇ብቴ፤ ኣሲ ዪንታ̇̇ቦ ኢ̈ት ኦ̈ኖ ባዚምቦ̇ ዪንቲ̇ ኢ̈ት ኦ̈ ማሃንዳ ጋ̈ፒ̇ቴ።

²⁰ዪኖ̇ ዎታናፖ̇ ኔ̈ብ ኢ̈ት ኦ̈ኖ ና̈ሳ ጋፊቴጌይን ኢያ ሙሳቤ፤ ባ̈ርሲንቴጌይን ኢያ ኡሻ̇ቤ፤ ኔ̈ኒ ዪኖ̇ ዎቴጌይን ዬሎ̇ ታማ ዬርጭፌ̈ን ኢያ ሚቺ̇̈ሬ።

²¹ኢ̈ት ማ̈ቂ̇ኖ ባዚን ኮሽ ባዝባራ ጋማብዶኬ ኢ̈ት ባዝባራ ጋሚንታ̇ፔ̇።