Read basketo ሮሜ 13 Bible Online

ሮሜ 13 - basketo bible

ሮሜ 13

¹ኣሳብ ሲልጣ̈ና ኢሚ̇ዛ̈ዲ ጾ̈ሴ፤ ዓት ሲልጣ̈ና ጋልዳ ዎ ኣሳን ሹ̈ሚኖ̈ዳር ጾ̈ሳ̇̇̈ዳ፤ ዪ̈ኮታ̇ቦ ኣሲ ዎይ ሲ̈ልጣ̈ና ዎ ኣሳንቦ ኪ̈ቲንታ̇ንዳብ ኮሺ̈ሬ።

²ዪዚ ሲልጣ̈ና ዎ ኣሳን ኢጺ̇ዛንሲ ዎይ ጾ̈ሳ̇ ኪ̈ቲን ኢጺ̈̇ሬ፤ ኢንታ̇ብ ኪ̈ቲንትባ̈ዳ ጌይዝ ኣሲ ዎይ ፌ ጋልዳ ፊርዳ ኤሄይሬ።

³ጋድ ኣቂሲዝ ኣሳብ ኢ̈ጪ̇ዛ̈ዲ ኢ̈ት ኦ̈ኖ ኣስዶኬ ኮሽ̇ ኦ̈ኖ ኣስ ጊዳካ̇ዬ፤ ሲልጣ̈ና ዎ ኣሳብ ኢጫ̇ብዳ ጋዶኮ ኮሽ̇ ባዝ ኦቤ፤ ኢ ኔ̈ና ኣንጂ̈ሬ።

⁴ሲልጣና ዎ ኣሲ ኔ̈ቦ ኮ̈ሽ ባ̈ዝ ኦምፔ̈ኒ ጾ̈ሲ̇ ኢያ ጋዲ̇ኖ ኣሴ፤ ኢ ማሳ̇̈ራ ጊጺ̇ኖ̈ዲ ሜላ̇ ጊዳካ̇ዬ፥ ኔ̈ኒ ኢ̈ት ባዝ ኦ̈ርኮ ኢ̈ብ ኢ̈ጫ̇ቤ፤ ኣጊሻ̇ቦ ጌይን ኢ ኢ̈ት ኦ̈ዝ ኣሳን ቃ̈ጣ̇ኣንዳ̇ብኬ ጾ̈ሳ̇ ጎይሊን ቤይሲሙታ̇ ኢ̈ብ ኦ̈ንዳብ ዶኢኖ ኣሴ።

⁵ዪንቲ ኪ̈ቲንታ̇ዚንዳ ቂጣ̈ታብ ኢ̈ጫ̇ር ሙ̈ታ ጊዳካይዶን ዪንታ̇ ቡ̈ዲን ዪንታ̇ ዞራዚምቦ ሲልጣ̈ና ዎ ኣሳቦ ኪ̈ቲንታ̇ንዳብ ኮሺ̈̇ሬ።

⁶ጋድ ኣቂሲዛን ፌ ኦ̈ሲን ዎይ ጋላስ ኦ̈ንዚንዳ ጾ̈ሳ̇̈̇ቦ ኦ̈ዛኮታ̇ቦ ዪንታ̇̇ር ጊ̈ራ ጊ̈ራንዳብ ኮሻ̇ዚንዳ ዪና̇ ኢዝቦ።

⁷ዪዚ ዎይንቦ ኢማ̇ንዳብ ኮሻ̇ዝ ባዚን ኢሚ̇ብቴ፤ ጊ̈ራ ኮሺ̇ዛ̈ቦ ጊ̈ሪብቴ̇፤ ቃራጻ̈ ኮሺ̇ዛ̈ቦ ቃራጻ ቃጺ̇ብቴ፤ ኢ̈ጫ̇ንዳብ ኮሺ̇ዛ̈ቦ ኢ̈ጪ̇ብቴ፤ ቦንቺ̇ ኮሺ̇ዛ̈ቦ ቦንች ኢሚ̇ብቴ።

⁸ኦ̈ባካር ኣጫ ዪንታ̇ ጋልዳ ዶኣፖ̇ጋ̈ቤ፤ ዪንቲ ዎል ዎልኣ ካንታዚን ሙታ̇ ዪንታ̇̇ቦ ኣጫፌ̈ን ማ̈ቆ̇ጋ̈ቤ፤ ኣስ ካዝ ኣሲ ሂጊ̇ን ና̈ጊኔ።

⁹“ኦሎላ ጋዳፔ̇፤ ዎፔ̇፤ ዉ̈ቃፔ̇፤ ኣሳ ባዝ ጌይዛ ዎይ ኢኒ̇ታፔ̇” ጌይዝ ኪ̈ታንኬ ሜላ ኪ̈ታን ዎ̈ይ “ኔ ኔና ካ̈ዚንዲፌ̈ን ኣስ ሜላ ካቤ” ጋ̈ዝ ፔ̈ቲ ኪ̈ቲን ጋ̈ርታ ዎይ ኢና ዎ።

¹⁰ኣስ ካዝ ኣሲ ኣሳ ጋልዳ ኢ̈ታ ባዝ ኦ̈ባ̈ሴ፤ ዪ̈ኮታ̇ቦ ኣስ ካዝ ኣሲ ዎይ ሂጊ̇ን ና̈ጊኔ ጌንቴ።

¹¹ዪዚ ዪንቲ̇ ኬሊ̇ን ኤሪ ሙታ̇ ዪኖ̇ ኦ̈ብቴ̇። ሱርስ ጋርታ̇ፖ ባርኪ̇ዝ ሳኣ̈ቲን ዓት ዬሊ̇ኖን ዪንቲ ኤሪብቴ፤ ኑ̈ኒ ቲ̈ን ኣማ̇ኒኖ ቃ̈ሚንፖ ሺ ኑ ፋጻዝ ቃሚ̇ን ኑ̈ክ ኡኪ̇ኔ።

¹²ቃሚ̇ኖ ቃሚ̇ን ኣ̈ኔ፤ ጋላሲ̇ን ኡኪ̇ኔ፤ ዪዚ ም̇ ጋርታ ኦ̈ዝ ኦ̈ሲን ኣሻ̇ሪ ፎኢን ጋርታ̇ ኦሊንታ̇ንዳቦ ኦላ ማሳ̇̈ሪን ጊጺ̇ስቶ።

¹³ጋላስ̇ ፎኢንባራ ዬዝ ኣስፌ̈ኒ ኑ̈ናር ጌ̈ሺቲባራ ዬስቶ̇። ዎልኣ ሺ̈ቃር ኡሽኪ̇ ዬጺ̇ ዶ̈ንባራ፣ ማሲቲባራ፣ ኦሎ̈ላ ጋዲባርኬ ዲርጊ̇̈ስባራ ማ̈ቃፖ፤ ዋችባርኬ ቂና̈ታባራ ማ̈ቃፖጋ̈ቤ።

¹⁴ዪዚ ኣሲ ኣፊላ ማኢን ኢ ጋልዳ ቤንታ̇ዚንዲፌ̈ኒ ጎዳ ዬሱ̈ሲ ዪንታ̇ ጋልዳ ቤንቶ̇ጋ̈ብዶኬ ዪንታ̇ ኢ̈ታ ኢኒ̇ን ኩምንዳብ ቆፓ̇ፒ̇ቴ።