Read basketo ሮሜ 16 Bible Online

ሮሜ 16 - basketo bible

ሮሜ 16

¹ኪንኪ̇ራ ካታማ ጋርታ ዎ ዎ̈ሳ ኬ̈ን ጋርታ̇ ጾ̈ሳ̇̇̈ብ ኦ̈ዝ ኑ ሚሺን ፌ̈ቤና ኮሽ ኣስ ማ̈ቂ̇ኖን ዪንቲ̇ ኤራምፔ̈ን ቴ ኮያ̈ሬ።

²ኢዛ ታና̈ኬ ሜላር ዎይሊን ኣስ ማ̈ዲ̇ኖኮታ̇ቦ ኣማ̇ኒዝ ኣስ ዛቃ ሞኪ̇ ኤካ̇ዚንዲፌ̈ኒ ዪንታ̇̇ሬ ኢዞ ዪና̇ ኢዝፌ̈ን ጾ̈ሳ̇̇ ሱምባራ ሞካ̇ምፔ̈ንኬ ኢዝቦ ኮሺ̇ዝ ባዝ ዎይባራ ማ̈ዳ̇ምፔ̈ን ቴ ዪንታ̇̇ቦ ዓዳራ ጋ̈ሬ።

³ታባር ዎልኣ ዬሱ̈ስ ክርስቶ̈ሳ ኦ̈ሲን ኦ̈ዛን ጲርስቂ̈ላኬ ኣቂ̈ላክ ሳሮ ጌብቴ።

⁴ኢንቲ̇ ዚቃንታ̇ ቴ ጊሽ̇ ዓይቂ̈̇ርካር ካ ጊ̈ጊንቲ̇ኖ ኣሴ፤ ዪ̈ኮታ̇ቦ ቴ ኢንታ̇ ኣንጃ̈ሬ፤ ቴ ሙታ̇ ጊዳካ̇ይዶን ክሪስታ̈ና ማ̈ቂ̇ኖ ኣይሁድ ዜርስ ባዮ̇ ኣሳን ዎይ ኢንታ ኣንጂ̈ሬ።

⁵ኢንታ̇ ኣ̈ል ዎ̈ሳቦ ሺ̈ቂዝ ኣማ̇ኒኖ ኣሳን ታ̈ብ ሳሮ ጌብቴ̇። ኢ̈ሳ ጋዳ̇ ዎይፖ ቲ̈ን ዬሱ̈ሳ ኣማ̇ኒኖ ቴ ካዛ ጴንጦ̈ሳ ሳሮ ጌብቴ̇።

⁶ዪንታ̇̇ብ ዎይሊን ዋያ ዳ̈ቡሪኖን ማ̈ራሞ ሳሮ ጌብቴ̇።

⁷ታባር ቃቺ̇ንቲ ዋ̈ዪኖንብኬ ሃዋራ̈ታን ጊዳ̇ ኤሪንቲ̇ኖ ኣይሁድ ዜር ማ̈ቂ̇ኖ ታ ዳባ̇ን፥ ኣንዲርና̈ቆሳኬ ዩ̈ናሳ ሳሮ ጌብቴ̇፤ ኢንቲ̇ ክርስቶ̈ሳ ታ̈ፖ ቲ̈ን ኣማ̇ኒኖ ኣሴ።

⁸ጎዳባር ቴ ኢያ ካዛ ኣምጲላጦ̈ሳ ሳሮ ጌብቴ̇።

⁹ክርስቶ̈ሳ ኦ̈ሲን ኑባር ዎልኣ ኦ̈ዛ ኡርባ̈ኖ̈ሳ̈ኬ ቴ ካዛ ኢስጣኩ̈ሳ ሳሮ ጌብቴ̇።

¹⁰ክርስቶ̈ሳባር ኢ̈ብ ዎ ኣማ̇ኒንዳ̇ ፋታ̇ኒንታ̇ራ ሚ̈ን ማ̈ቂ̇ኖን ኤሪንቲ̇ኖ ኣጳሊ̈ሳ ሳሮ ጌብቴ̇፤ ኣሪጣቡ̈ላ̈ሳ ኣ̈ሎ ኣሳን ሳሮ ጌብቴ̇።

¹¹ቴ ዳባ̇ ሄሮዳ̈ና ሳሮ ጌብቴ̇። ናርሲሳ ኣ̈ሎ ኣሳን ጋርታ̇ፖ ጎዳ ኣማ̇ኒኖ ሳሮ ጌብቴ̇።

¹²ጎዳ ኦ̈ሳ ኦ̈ ዳ̈ቡሪኖን ቱርፋ̈ናኬ ቱርፎ̈ሳ ሳሮ ጌብቴ̇። ጎዳ ኦ̈ሳ ኦ̈ ዎይሊን ዳ̈ቡሪኖን ጎዳ ሱምባራ ቴ ኢዞ ካዝ ቴ ሚሺን ፓርሲሶ ሳሮ ጌብቴ̇።

¹³ጎዳ̈ ኦ̈ሳብ ማራ̇ጺንቲ̇ኖ ሩ̈ፎሳ ሳሮ ጌብቴ። ማ ታ̈ና ፌ ናእፌን ካዝ ኢ ኢንዲ̇ን ሳሮ ጌብቴ̇።

¹⁴ኣሳንክሪቶ̈ሳ፣ ፊላጎ̈ና፣ ሄርማ̈ሳ፣ ፓትሮ̈ባ፣ ሄርማ̈ሳኬ ኢንታ̇ባር ዎ ኣማ̇ኒዝ ኣሳን ሳሮ ጌብቴ̇።

¹⁵ፊላላ̈ጎ̈ሳ፣ ዩ̈ላ፣ ኔ̈ራኬ ኢ ሚ̈ሺን ታ̈ብ ሳሮ ጌብቴ፥ ማ ኦሉምፓ̇ኬ ኢንታ̇ባር ዎ ኣማ̇ኒዝ ኣሳን ዎይ ሳሮ ጌብቴ̇።

¹⁶ኮሽ ቡ̈ዳባር ዎል ዎልኣ ዬርቃ̇ር ሳሪብቴ̇። ዎይ ቤስ̇ ጋርታ̇ ዎ ዬሱስ ክርስቶ̈ሳ ኣማ̇ኒዝ ኣሳን ዎይ ዪንታ̇ ሳሮ ጌይኔ።

¹⁷ቴ ኢሺንታ̇ን! ዪንቲ̇ ታማ̈ሪኖ ቲሚርቲ̇ን ኢጺ̇ሙታ̇ ዪንታ̇ ጊዳ̇ ፋጊቲ ኤሄዪሙታ̇ ዪንታ̇ ኣማ̇ኒን ጋልዳፖ ዪንታ̇ ቶጛንዳቦ ኮዪዝ ኣሳን ጋልዳፖ ዪንታ̇ ና̈ጊብቴ፤ ኢንታ ጋልዳፖ̇ ጎቲ̇ብቴ̇።

¹⁸ዪንፌ̈ኖ ኣሳን ፌ̈ብ ማ̈ቂ̇ዝ ባዛብ ኦ̈ርዶኬ ኑ ጎዳ ዬሱ̈ስ ክርስቶ̈ሳብ ኦ̈ባ̈ሴ። ኖ̈ናባር ማጺና ማ̈ቃ̇ር ኣባክ ኤሪባ̈ሶ ኣሳን ቡ̈ዲን ባሊ̈ሬ።

¹⁹ዪንቲ̇ ዎጛላቦ ኪቲንታ̈ዚን ኣስ ዎይቦ ኤሪንቲ̇ኖኮታ̇ቦ ታ̈ኒ ኡፋይቲ̇ኔ፥ ዎቲናካር ዪንቲ ኮሽ̇ ባዛብ ኤጫ ማ̈ቃ̇ምፔ̈ኒ ኢ̈ት ባዛቦ ኣሽካ ማ̈ቃ̇ኒፔ̈ን ቴ ኮያ̈ሬ።

²⁰ዪንቲ ዪኖ ዎቴጌይንዶ ሳሪቲ ኢሚ̇ዝ ጾ̈ሳ̇̇̈ዲ ኤሊ̇ሪ ሴ̈ጣ̈ና ዪንታ̇ ቶ̈ሂን ጻ̈ና ቶጛሪ ቡኪ̇ ዲልኢ̈ሬ። ጎዳ ዬሱ̈ስ ክርስቶ̈ሳ ኮሺቲ ዪንታ̇ባር ማ̈ቆ̇።

²¹ጾ̈ሳ̇ ኦ̈ሳ ታባር ዎልኣ ኦ̈ዛ ጢማ̈ቶ̈ሲ ዪንታ̇ ሳሮ ጌይኔ፤ ማ ቴ ዳባ̇ን ሉቆ̈ሳ፣ ሉ̈ሶ̈ናኬ ሶ̈ሲጴ̈ጥሮ̈ሳ ዪን ዎይ ዪንታ̇ ሳሮ ጌይኔ።

²²ዓና̇ ኪ̈ቲን ጻ̈ፊኖ ታ ጣርጦ̈ሲ ዪንታ̇ ሳሮ ጋ̈ሬ።

²³ታ̈ናኬ ዓንዳ ዎ ዎ̈ሳብ ሺ̈ቂዝ ኣሳን ዎይ ሞኪ̇ዛ ጋ̈ዮ̈ሲ ዪንታ̇ ሳሮ ጌይኔ። ካታሚንቦ ሹ̈ማ ማ̈ቂ̇ኖ ኤራስጦ̈ሳ፤ ማ ኑ ኢሻ ቆርጦ̈ሳር ዪንታ̇ ሳሮ ጌይኔ።

²⁴[ኑ̈ ጎዳ ዬሱ̈ስ ክርስቶ̈ሳ ኮሺቲን ዪንታ̇ ዎይንባራ ማ̈ቆ̇! ኣሚንኤ።]

²⁵ታ̈ኒ ዬሱስ ክርስቶ̈ሳባዝ ሳባ̇ኪኖ ቃ̈ሊንባርኬ ሚናፖ̇ ኣ̈ቺንታ̇ር ጋምኢኖ ዎቲናካር ዓት ፋላ̇ጋልዳ ኬስኪ̇ኖ ኪን ሚስጢሪን ጎይባራ ዪንቲ̇ ዪንታ̇ ኣማ̇ኒንባራ ሚ̈ጚ ዶኣምፔ̈ኒ ዎታንዳብ ዳንዳኢ̈ዛ ጾ̈ሳ̇̇̈ቦ ቦንች ማ̈ቆ̇።

²⁶ዎቲናካር ዓት̇ ዓና̇ ኪን ባዚንዳ ፋላ̇ ጋል ኬስኪ̇ኔ፤ ሜናብ ዶኢዝ ጾ̈ሳ̇̇ ኪ̈ትባራ ዎርዣን ዎይ ኣማ̇ናር ኪ̈ቲንታ̇ምፔ̈ኒ ናባን ጻ̈ፊኖ ማጻ̈ፋ ጎይባራ ጾ̈ሲ̇ ኢንቲ̇ ዎይ ኢያ ኤራምፔ̈ኒ ዎቲኔ።

²⁷ኢ ሙታ̇ ኤራ ማ̈ቂ̇ኖ ፔቲ̇ ጾ̈ቦ፥ ዬሱስ ክርስቶ̈ሳ ጎይባራ ሜናብ ጋላታ ኢ̈ብ ማ̈ቆ̇! ኣሚንኤ።