Read basketo ሮሜ 3 Bible Online

ሮሜ 3 - basketo bible

ሮሜ 3

¹ዪዚ ኣይሁዳን ኣይሁድ ባዮንፖ̇ ኣብዝባር ሺ̈ራ? ኣሲ ጋራዚንታ̈ዚን ኣብዝ ማ̈ዳ̇̈ራ?

²ኣይሁድ ማ̈ቃ̇ዚንዳ ዎይሊን ጎይባራ ሺሬ፤ ዎይፖ̇ ቲ̈ን፥ ጾ̈ሳ̇̈ዲ ፌ ቃ̈ሊንዶ ኣይሁዳንቦ ዓዳራ ኢሚ̇ኔ።

³ኣይሁዳን ጋርታፖ̇ ፔታ̇ን ፔታ̇ናን ኣማ̇ናካ̇ይ ኣቲ̇ኒሼ? ኢንቲ̇ ኣማ̇ናካ̇ይ ኣቲ̇ኖንዳ ጾ̈ሳ̇̇̈ዲ ኣማ̇ኒንቲ̇ኖ ማ̈ቃ̇ዚን ካያ̈ራ?

⁴ዉ̈ርሳ ካያባሴ! “ኔ ሶ̈ላዝ ቃ̈ሊንዳ ኔ ኪን ማ̈ቂ̇ኖን ኤርሳ̈ሬ፤ ኔ ጻላ̈ታዳር ኔ ሞ̈ታ ዎ̈ሬ” ጋ̈ሪ ጻ̈ፊንቲ̇ኖንዲፌ̈ን ኣሲ ዎይ ዎርዳ ማ̈ቂናካሬ ጾ̈ሳ̇̇̈ዲ ኪን ማ̈ቂ̇ኖን ኤሪንቶ̇።

⁵ዎቲናካሬ ኑ ናጋራ̈ዲ ጾ̈ሳ̇̇̈ ጺሊቲን ኮሺንቺ̇ ቤይሲ̈ርኮ ዪዚ ኑ ኣብዝ ጋ̈ኔ? ጾ̈ሳ̇̇̈ ኑ ናጋሪምቦ ኑ ጋልዳ ጎይላ ኤሄጌይንዶ ኢ ኪን ፊርዲባ̈ሴ ጌንታ? ዪኒ ጋልዳ ቴ ኣሳ ቆፊፌ̈ን ሶ̈ላ̈ሬ።

⁶ዪ̈ፌ̈ን ማ̈ቃ̇ንዳቦ ዳንዳኢባ̈ሴ። ዪ̈ፌ̈ን ማ̈ቄ̇ጌዪን ጾ̈ሲ ኣላሚን ጋርታ ዎ ኣሳን ጋልዳ ዎዛርታ̇ር ፊርዳንዳብ ዳንዳኢ̈ራ?

⁷“ታ̈ኒ ማቃ ማቂ̇ዝ ኣስ ማ̈ቂ̇ኖንዳ ጾ̈ሳ̇̈ ኪንቲን ቤይሳ ኢ̈ቦ ቦንች ጉጃ̈̇ርኮ፤ ታ̈ና ናጋራንቻ̇ ጌዪ ጾ̈ሲ̇ ኣባቦ ታ ጋልዳ ፊርዲ̈ራ?” ጋ̈ሪ ዋጪዝ ኣሲ ዶኣንዳ̇ብ ዳንዳ̇ኢ̈ሬ።

⁸ዓት ዪ̈ዶኮ “ኮሽ ባዚ ዬ̈ምፔ̈ን ኢ̈ት ባዝ ኦ̈ስቶ” ጋ̈ሪ ኑ̈ኒ ሶ̈ሊባ̈ሳ? ኪን ፔቲ̇ ፔቲ̇ ኣሳን “ኢንቲ̇ ዪ̈ዲፌ̈ን ጌዪ ታማ̈ርሲ̈ሬ” ጋ̈ሪ ኑ̈ና ቆ̈̈ሬ፤ ዪ̈ኮታ̇ቦ ዪን ኣሳን ጋልዳ ዬይዝ ፊሪዳ̈̇ዲ ኪን።

⁹ዪዚ ኑ ኣብዝ ጋኔ? ኑ̈ኒ ኣይሁድ ባዮ̇ ኣሳንፖ ሺራ? ኣባካር ሺባሴ! ኣይሁዳር ማ̈ቆ̇ ኣይሁድ ባዮ̇ንር ማ̈ቆ̇ ዎይን ናጋራንቻ̇ ማ̈ቂ̇ኖን ታ̈ኒ ቲኒታ̇ር ኤርሲኔ።

¹⁰ጌ̈ሻ ማጻ̈ፋ ጋልዳ ጻ̈ፊንቲ̇ኖንዲፌ̈ኒ፥ “ጺላ ኣሲ ኦ̈ናካር ባዬ̇፤ ሜላ ኣቲን ፔታ̇ናር ባዬ̇።

¹¹ቆፒ̇ዝ ኣሲ ባዬ̇፤ ጾ̈ሳ̇̈ ኮዪዝ ኣሲ ፔታ̇ና̇ር ባዬ̇።

¹²ዎ̈ይን ባሊቲ̇ኔ፤ ዎይን ዎልኣ ፔታ̇ን ማዲባሶ ማ̈ቂ̇ኔ። ኮሽ ባዝ ኦ̈ዝ ኣሲ ኦ̈ናካር ባዬ̇ ሜላ ኣቲ̇ን ፔታ̇ናር ባዬ።

¹³ኢንታ̇ ኖ̈ና ጋርታፖ ኬስኪ̇ዝ ሶ̈ላዲ ጋራፌ̈ን ጫጚ̈ሬ። ኢንቲ̇ ዎይ ጋላስ ማቃ ማ̈ቂ̇ሬ። ኢንታ̇ ኖ̈ና ጋርታ ሾ̈ሽ ማርዛ ዎ።

¹⁴“ኢንታ̇ ኖ̈ና ሳዳ፤

¹⁵“ኢንቲ̇ ኣስ ዎንዳቦ ባርቢታ̇ር ሉኪ̈̇ሬ።

¹⁶ኢንቲ̇ ኣ̈̇ኖ ቤስ̇ ዎይ ኣሳ ጋልዳ ይሲኬ ማኒ̇ሲ ዬልሬ።

¹⁷ኢንቲ̇ ሳ̈ሪቲ ቆፊ ቆፒ̇ ኤሪባ̈ሴ።

¹⁸ኢንቲ̇ ጾ̈ሳ̇ቦ ዉርሲ ኢ̈ጪ̇ባሴ።”

¹⁹ሂጊ̇ን ጋርታ ሶ̈ሊንቲ̇ኖ ባዚን ዎይ ሂጊ̇ን ጻና ዎ ኣሳንብ ሶ̈ሊንቲ̇ኖን ኑ̈ኒ ኤሪሬ። ኢዛ ኬስኪ̇ኖንዳ̇ ኣሲ ዎይ ሶ̈ሊ ማሂዝ ባዚ ኢንታ̇ ዪን ዚም ጋምፔ̈ንኬ ሳ̈ዝ ጋልዳ ዎ ኣሲ ዎይ ጾ̈ሳ̇ ቲ̈ን ፊርዳብ ሺ̈ቃምፔ̈ኒዬ።

²⁰ዪ̈ኮታ̇ቦ ኦ̈ናካር ኣሲ ጾ̈ሳ̇ ቲ̈ን ሂጊ̇ን ጋ̈ዚን ኦ̈ ፎታ̇ሪ ጺሊ̇ባ̈ሴ፤ ሂጊ̇ንዳ ኣሲ ዎይ ናጋራቻ̇ ማ̈ቂ̇ኖን ቤይሳ̈ሬ።

²¹ዎቲናካሬ ዓት̇ ኣሲ ጺላ̇ ማ̈ቂ̇ዛ̈ዲ ሂጋ̇ ና̈ጊ ፎታር ጊዳካ̇ይዶ̈ን ጺሊ̇ቲ ጾ̈ሳ̇̇̈ ጋልዳፖ ቤንቲ̇ዛ ኤሪንቲ̇ኔ። ዪ̈ዳሬ ሙ̈ሳ ማጻ̈ፋ ጋልዳኬ ናባን ማጻ̈ፋ ጋልዳ ጻ̈ፊንቲ̇ኔ።

²²ዪኖ̇ ጺሊ̇ቲን ጾ̈ሲ ኦ̈ናካር ኣስ ፋጋካ̇ይዶር ዬሱ̈ስ ክርስቶ̈ሳ ኣማ̇ኒዛን ዎይንቦ ኢሚ̈̇ሬ።

²³ኣሲ ዎይ ናጋራ ኦ̈ኔ፤ ጾ̈ሳ̇̇ ቦንቺ̇ን ኢንታ ጋልዳፖ ፋኪ̇ኔ።

²⁴ዪዚ ዬሱ̈ስ ክርስቶ̈ሲ ኣስ ፋንዳቦ ማስቃላ ጋልዳ ዓይቂ̇ኖ ዓይቂንባርኬ ጾ̈ሳ̇ ካንንባር ኣባክ ጪጋካ̇ይ ሜላ̇ ዓሪ ጺሊ̇̈ሬ።

²⁵ኢያ ኣማ̇ኒኖ ኣሳን ዎይ ኢ ሱ̈ባር ኢንታ̇ ናጋሪን ኢንታ̇ብ ኣቶ̇ ጌዪንታ̇ምፔ̈ኒ ጾ̈ሳ̇̇̈ዲ ዬሱ̈ስ ክርስቶ̈ሳ ዣርሻ ኣ̈ ኢሚ̇ኔ። ጾ̈ሲ ዪኖ̇ ዎቲኖንዳ ኢ ፌ ዳንዳኣባራ ሚን ኦ̈ንቲ̇ኖ ናጋራን ባዮ̈̇ዲፌ̈ን ማሃር ፋይዳሪ ኢ ኪን ፊርዳ ፊርዲ̇ዛ ማ̈ቂ̇ኖን ቤይሳንዳ̇ቦ።

²⁶ዎቲናካር ዓቶ̇ ኬ̈ሊንባራ ኢ ፌ̈ ጺሊ̇ቲን ቤይሲዛ̈ዲ፥ ዬሱ̈ሳ ኣማ̇ኒኖ ኣሳን ጺላ̇ ማሃዝ ጎይንባራ።

²⁷ዓት ዪ̈ዶኮ ኑ̈ና ኦቲርሲ̇ዝ ባዚ ኣብዚ ዎ? ኑ̈ና ኣባካር ኦቲርሲ̇ዝ ባዚ ባዬ! ኑ̈ና ኦቲርሳ̇ዚን ኣብዛ? ሂጊ̇ን ፎታ̇ዚን ኮታ̇? ጊዳካዬ! ኑ̈ኒ ኣማ̇ኒኖኮታ̇።

²⁸ጾ̈ሲ ኣስ ጺላ̇ ማሂዛ̈ዲ ኣሲ ሂጊ̇ን ጋ̈ዚን ፎቲኖ ጊሽ ጊዳካ̇ይዶ̈ን ኣማ̇ናባር ማ̈ቂ̇ኖን ኑ̈ኒ ኤሪ̈ሬ።

²⁹ዎይ ጾ̈ሳ̇ዲ ኣይሁዳንቦ ሙታ̇ ጾ̈ሳ̇? ኣይሁድ ማ̈ቃ̇ካዮንቦ ጾ̈ስ ጊዳካያ? ኢ ኣይሁድ ባዮ̇ንባሬ ጾ̈ሴ̇።

³⁰ጾ̈ሲ ፔታ̇ኔ፤ ኣይሁዳር ማ̈ቆ̇ ኣይሁድ ባዮ̇ ኣሳንር ማ̈ቆ̇ ዎይን ኢ ጺላ̇ ማሂዛ̈ዲ ኣማ̇ና ጎይባራ።

³¹ዓት̇ ዪዶኮ ኣማ̇ናጊሻ̇ቦ ኑ̈ኒ ሂጊ̇ን ቡጊድ ቶጛር ኣሺ̇̈ራ? ጊዳካ̇ዬ! ሂጊ̇ን ሚን ኤ̈̈ርዶኬ።