Read basketo 1 ቆሮ 13 Bible Online

1 ቆሮ 13 - basketo bible

1 ቆሮ 13

¹ኣሳ ኖ̈ናባርኬ ኪታ̇ንቻን ኖ̈ናባራ ሶ̈ሊዝ ኤራ ታ̈ብ ዶኤጌይናሬ ታ̈ኒ ኣስ ካባስኮ ቴ ሜላ̇ ጊርቂ̇ዝ ሉ̈ሊፌኒ ዎይ ቅቃፌ̈ኔ።

²ካ̈ያ ካ̈ዪዝ ኪልሲ ታ̈ብ ዶኤጌይናሬ፥ ኣሳብ ኣ̈ቺ̇ንቲኖ ባዝ ዎይ ቴ ኤሪዝ ባዝ ማ̈ቄጌይናሬ፥ ኤሪቲ ጌይዛ ዎይ ታ̈ብ ዶኤጌይናሬ፥ ፔቲ̇ ኢንዳ ኢዝ ቤሲ̇ን ጋልዳፖ ዲንራ ሜላ ቤስ̇ ኣ̈ዝ ኣማ̇ና ታ̈ብ ዶኤጌዪናር ካን ታ̈ብ ባዪ ማ̈ቄ̇ጌዪን ዪ ዎይ ሜላ̇ ዓሪዬ።

³ታ̈ብ ዎ ባዝ ዎይ ዎርባያንቦ ፋጌጌይናር፥ ሜላ ኣቲን ታማ ጋርታ ሚቻ̇ምፔን ቴ ታ̈ና ኣ̈ር ኢሜ̇ጌይናር ካን ታ̈ብ ባዪ ማ̈ቄ̇ጌዪን ታ̈ና ኣባካር ማ̈ዳ̇ባሴ።

⁴ካን ጋርዢሺሬ፤ ካን ኮሽ̇ ባዝ ኦ̈ሬ፤ ካን ቃና̇ኢባሴ፤ ካን ዎ ኣሲ ኬርፊባሴ፤ ካን ዎ ኣሲ ኦቲርቂ̇ባ̈ሴ።

⁵ካን ኮሺ̇ባ̈ሶ ባዝ ኦ̈ባ̈ሴ፤ ዎይ ባዝ ታ̈ብ ሙታ̇ ማቆ ጋ̈ባሴ፤ ኤሊ̇ባር ሼኒቲባ̈ሴ፤ ጉልማ ኤባ̈ሴ፤

⁶ካን ኪን ባዝባራ ኡፋይቲ̇̈ርዶኬ ኢ̈ታ ባዝባር ኡፋይቲ̇ባ̈ሴ።

⁷ካን ዎይ ባዝ ዳንዳኢ̈ሬ፤ ዎይ ጋላስ ኣማ̇ኒሬ፤ ዎይ ጋላስ ታስፋባር ና̈ጊ̈ሬ፤ ሜታ ጋርታ̇ር ዎይ ሚ̈ጛር ኤቂ̈̇ሬ።

⁸ካ̈ያ ካዪዝ ኪልሲ ኣቲ̇̈ሬ፤ ኦራ ኖ̈ናባር ሶ̈ላዝ ኪልሲንዳ ኣታ̇̈ሬ፤ ኤሪቲር ማ̈ቂ̇ን ኣቲ̇̈ሬ፤ ካን ኣባካር ጌይን ዪ ኣቲ̇ባሴ።

⁹ኤራ ጋርታፖ ኑ ኤራዚንዳ ዎይንድ ጊዳካ̇ዬ። ኑ ካ̈ያ ካ̈ዪ̈ርዶራር ዎይን ካዪ ዳንዳኢባ̈ሴ።

¹⁰ኩም ማ̈ቂ̇ኖ ኤሪን ዬዬጌይን ኩም ማ̈ቃካ̇ዮን ኣታ̇̈ሬ።

¹¹ቴ ሚን ናእዶ̈ራ ናኢፌ̈ን ሶ̈ላ̈ሬ፤ ናኢፌ̈ን ቆፓ̇̈ሬ፤ ናኢ ኣቂሊፌ̈ን ኦ̈ሬ፤ ዎቲናካር ታ̈ኒ ቡ̈ዳ ኤሪኖፖ̇ ዎሃ ናኢ ኣቂሊፌ̈ን ኦ̈ዚን ኣሺ̇ኔ።

¹²ዓት ኑ̈ኒ ዲል̇ ጌይኖ ማስቶ̈ታ ጋርታ ኑ ኑ̈ና ቤቃ̇ዚንዲፌ̈ን ቤቂ̈̇ሬ። ዎቲናካሬ ጊዳክ ዪና̇ ኢዝባራ ፋላ̇ጋል ቤቂ̇̈ሬ፤ ቴ ዓት ኤራዚንዳ ዶኪ̇ን ሙታ፤ ዎቲናካር ጊዳን ጾ̈ሲ ታ̈ና ኤሪኖንዲፌ̈ን ማ̈ቂ̇ኖ ኩም ኤራ ታ̈ብ ዶኢ̈ሬ።

¹³ዪዚ ኣማ̇ና፣ ካን፣ ታስፋ ዪን ዓይዛን ሚ̈ጛር ዶኢ̈ሬ ዎቲናካሬ ዪን ጋርታፖ̇ ሺዚንዳ ካን።