Read basketo 1 ቆሮ 14 Bible Online

1 ቆሮ 14 - basketo bible

1 ቆሮ 14

¹ዪዚ ዪንቲ̇ ካን ጎይ ዬብቴ። ማ ጌ̈ሻ ኣያ̇ና ዪንታ̇̇ብ ኢማ̇ዝ ኪልሲን ሚ̈ጛር ኮዪብቴ̇፤ ዎይ ኪልሳን ጋርታ̇ፖ ሺሻሪ ካ̈ያ ካ̈ዪዝ ኪልሲን ጾ̈ሲ̇ ዪንታ̇ብ ኢማ̇ምፔ̈ኒ ሚ̈ጛር ጌሺብቴ̇።

²ኦራ ኖ̈ናባር ሶ̈ሊዛ̈ዲ ጾ̈ሳ̇̇̈ቦ ሙታ̇ ሶ̈ሊ̈ርዶኬ ኣሳብ ሶ̈ሊባ̈ሴ፤ ኣሳብ ጌ̈ማ ማ̈ቂ̇ኖ ባዚ ጌ̈ሻ ኣያ̇ናባር ማ̈ቃ̇ሪ ሶ̈ሊዛኮታ̇ቦ ኢ ሶ̈ሊኖን ኤሪዝ ኣሲ ባዬ።

³ዎቲናካር ካ̈ያ ካ̈ዪዛን ሜላ ኣሳን ሚ̈ን ኤሳ̇ንዳቦ፥ ሚ̈ንንዳብኬ ዞራንዳቦ ኣሳብ ሶ̈ሊ̈ሬ።

⁴ኦራ ኖ̈ናባር ሶ̈ሊዝ ኣሲ ፌ̈ና ሙ̈ታ ሚ̈ንሬ፤ ዎቲናካር ካ̈ያ ካ̈ዪዝ ኣሲ ኣማ̇ኒዝ ኣሳን ዎይ ሚ̈ንሬ።

⁵ዪንቲ̇ ዎይን ኦራ ኖ̈ናባር ሶ̈ሊ̈ርኮ ቴ ዶሳ̈ርዶኒ፥ ዪኒ̇ፖ ዪንቲ̇ ካ̈ያ ካ̈ዪርኮ ቴ ሺ ዶሳ̈ሬ። ዎሳ ኬን ሚ̈ጛምፔ̈ኒ ኦራ ኖ̈ናባር ሶ̈ሊኖዲ ፌ ሶ̈ሊኖን ቢርቺባ̈ስኮ ኦራ ኖ̈ናባር ሶ̈ሊዛ̈ፖ ካ̈ያ ካ̈ዪዝ ኣሲ ሺ̈ሬ።

⁶ዪዚ ቴ ኢሺንታ̇ን! ቴ ዪንታ̇̇ክ ዬ̈ርዶራ ኦራ ኖ̈ናባራ ሶ̈ላ ሙታ̇ ዬዬጌዪን ዪንታ̇ ኣ ማዳ̇̈ራ? ዪኒፖ̇ ሺ ታ̈ኒ ጾ̈ሳ̇ ሚስጢሪን ጌ̈ሚቲኖን ኤርሳዚንዶ፣ ኤራ፣ ካ̈ያኬ ዎይ ቲሚርታ̇ ኤካ̇ር ዬይኖኮ ዪንታ̇̇ብ ኮሼ̇።

⁷ዚምቢ̇ ሼምፓ ባዮ̇ ባዝዶኒ ኣሲ ኮሺንቺ̇ ፉጋካ̇ይ ኣቴ̇ጌይንዶ ካ̈ኢዝ ና̈ሳ ካልዲባባ ዎይ ባ̈ጪ ዎይ ኣ̈ክ ዋሶ ዪ̈ን ጋርታ̇ፖ̇ ዎኖ̇ ካ̈ኢ ሙታ̇ ዎኮ ኣሲ ኣባር ኤሪ̈ራ?

⁸ሞይዛ ፉጋዚን ኣሳ ዋይታ ኣካይ ኣቴ̇ጌዪን ኦ̈ኖ ዬ̈ፊብ ጊ̈ጊንቲ̇ዛዲ?

⁹ዪና̇ ኢዝፌ̈ኒ ዪንቲ̇ ዪንታ̇ ኖ̈ናባር ሶ̈ሊንቲ̇̈ርዶሪ ኣሳ ዋይታ ኣ̈ር ሶ̈ላካ̇ይ ኣቴ̇ጌይን ዪንቲ̇ ሶ̈ሊንታዚን ኦ ኤራንዳ ዳንዳኢራ? ዪንቲ̇ ሜላ̇ ኣይጊ ጋልዳ ሶ̈ሊንቲ̇ዛ ማ̈ቃ̇̈ሬ።

¹⁰ኣላሚን ጋልዳ ዎይሊን ኖ̈ና ዎ። ዪን ጋርታፖ ኢዝቦ ቢርሺቺ̇ ባዮ̇ ኖ̈ና ባ̈ዬ።

¹¹ዪዚ ፔቲ̇ ኣሲ ኢ ሶ̈ላዝ ኖ̈ኒን ኢዝ ቢርሺቺ̇ን ቴ ኤራባስፌ̈ንኮ፤ ናሳ ሶ̈ሊዛ̈ቦ ታ̈ኒ ዛቃ̇ ማ̈ቃ̇̈ሬ፥ ኢያሬ ታ̈ብ ዛቃ̇ ማ̈ቂ̈̇ሬ።

¹²ዪንታ̇̇ሬ ጌ̈ሻ̇ ኣያ̇ና ኢማ̇ዝ ኪልሲን ኤካ̇ንዳብ ሚ̈ጛር ኮዪዝ ኣስ ማ̈ቂ̇ኖኮታ̇ቦ፤ ዪንቲ̇ ዎይፖ̇ ሺ ኣማ̇ኒኖ ኣሳን ሚ̈ንንዳብ ዳንዳኣዝ ኪልሲን ዪንታ̇̇ብ ዎይላንፔ̈ኒ ኮዪብቴ̇።

¹³ዪ̈ኮታ̇ቦ ኦራ ኖ̈ናባር ሶ̈ሊዝ ኣሲ ሶ̈ሊኖን ቢርቻ̇ንዳብ ዳንዳኣምፔን ዎ̈ሳ̇ጋቤ።

¹⁴ታ̈ኒ ኦራ ኖ̈ናባር ዎሳ̇ምባራ ቴ ዚምጋር ዎ̈ሳ̇ርዶኬ ታ ኣብዝ ጋ̈ርኮ ታ̈ብ ኤሪንታባሴ።

¹⁵ዪዚ ታ ኣብዝ ዎታንዳብ ኮሻ̇̈ራ? ታ̈ኒ ቴ ዎ̈ሳ̇ዚን ታ̈ብ ኤሪንታ̇ካ̇ይዶናር ዎሳ̇̈ሬ፤ ማ ታ ጋ̈ዚን ታ̈ብ ኤሪንቲን ዎሳ̇̈ሬ፤ ቴ ዬጻ̇ዚን ታ̈ብ ኤሪንታ̇ካ̇ይዶናር ዬጻ̇̈ሬ ማ ቴ ጋ̈ዚን ታ̈ብ ኤሪንቲ̇ን ዬጻ̇̈ሬ።

¹⁶ዪዚ ዪ̈ፌ̈ን ማ̈ቃካ̇ይ ኣቴ̇ጌይን ኔ ኔ ኦራ ኖ̈ኒንባር ጾ̈ሳ̇ ጋላታ̈ርዶራ ኔ ጋ̈ዚን ኤሪባ̈ሶ ዛቃ̇ ኣሲ ኔ ጋላታ ዎሲምቦ “ኣሚንኤ” ጋ̈ንዳ̇ብ ዎዛርታ̇ር ዳንዳኢ̈ራ?

¹⁷ኔ̈ኒ ኮሺ̇ንቻ̇ ዎ̈ሳ̇ ጋላቲኖ ማ̈ቃ̇ንዳብ ዳንዳኣ̈ሬ ዎቲናካሬ ኔ ዎ̈ሳ̇ ጋላቲኖንዳ ና̈ሳ ሜላ ማ̈ዳ̇ባሴ።

¹⁸ቴ ዪንቲ̇ ዎይንፖ̇ ሺ ኦራ ኖ̈ናባር ሶ̈ሊዛኮታ̇ቦ ጾ̈ሳ̇ ጋላታ̈ሬ።

¹⁹ዎቲናካሬ ዎ̈ሳ ኬ̈ ጋርታ ዎ ሜላ ኣሳን ታማ̈ርሳንዳቦ ታጳ ሙኩላ ቃ̈ላ ኦራ ኖ̈ናባር ሶ̈ላናፖ̇ ኢሺ̇ን ቃ̈ላ ዎይቦ ኤሪንቲ̇ዝ ኖ̈ናባር ቴ ኤራር ሶ̈ላ̈ርኮ ዶሳ̈ሬ።

²⁰ቴ ኢሺንታ̇ን! ኢ̈ት ባዛቦ ኣቂሊ ናኢፌ̈ን ማ̈ቂ̇ብትዶኬ ዪንቲ̇ ቆፒ̇ርዶሪ ኣቂሊ ናኢፌ̈ን ማ̈ቃፒ̇ቴ፤ ዪንታ̇ ቆፊንባራ ቡ̈ዳ ኤሪኖ ኣስ ማ̈ቂ̇ብቴ።

²¹ዪ̈ዳሬ “ኤሪንቲ̇ባ̈ሶ ኖ̈ና ሶ̈ሊዝ ኣሳን ጎይባርኬ ኣሳ ጋዶ̇ ኣስ ኖ̈ናባራ ዓ ዎርዣቦ ቴ ሶ̈ላንዳ። ዪፌ̈ን ማ̈ቂ̇ናካሬ ኢንቲ̇ ታ̈ኮን ሲስኪ̇ባ̈ሴ ጌይሬ ጎዳ ጾ̈ሳ̇̇̈ዲ” ጋ̈ሪ ሂጋ̇ ማጻ̈ፋ ጋልዳ ጻ̈ፊንቲ̇ኔ።

²²ዪዚ ኦራ ኖ̈ናባር ሶ̈ላዚንዳ ኣማ̇ኒባሶ ኣሳንቦ ማላ̇ ማ̈ቃ̇ምፔ̈ንዶኬ ኣማ̇ኒዝ ኣሳንቦ ጊዳካ̇ዬ፤ ዎቲናካር ካ̈ያ ካ̈ያዚንዳ ኣማ̇ኒዝ ኣሳንቦዶኬ ኣማ̇ኒባ̈ሶ ኣሳንቦ ጊዳካ̇ዬ።

²³ዪዚ ኣማ̇ኒዝ ኣሳን ፔቲ̇ ቤስ̇ ሺ̈ቂኖን ጋርታ̇ ኢንቲ̇ ዎይ̈ን ኦራ ኖ̈ናባር ሶ̈ላምባ̇ራ ባዝ ዪን ኤሪባሶ ኣሳን ዎይ ኣማ̇ኒባሶ ኣሳን ዪ ቤሳ̇ ጋርታ ዬዪ ጌላሪ “ዓን ኣሳን ዣ̈ሽቲ̇ኔ” ጋ̈ባሳ?

²⁴ዎቲናካሬ ዎይን ካ̈ያ ካ̈ዪርኮ ኣማ̇ኒባሶ ኣሲ ዎይ ባዝ ዪን ኤሪባ̈ሶ ኣሲ ኢና ጌላሪ ካ̈ያ ሶ̈ላዚን ሲስካ̇ሪ ኢ ናጋሪን ኢ̈ብ ኤሪንታ̈̇ሬ፤ ኢ ሲስኪ̇ኖ ቃ̈ሊን ኢ ጋልዳ ፊርዳ̈̈ሬ።

²⁵ኢ ቡ̈ዲን ጋርታ ጌ̈ሚቲኖ ባዚ ኢብ ቤንታ̇ሬ፤ ዪዚ ዪኒ̇ባራ “ኪን ጾ̈ሳ̇ዲ ዪንታ̇ ጊዳ ዎ!” ጋ̈ሪ ጾ̈ሳ̇ቦ ጎይኒ̈ሬ።

²⁶ቴ ኢሺንታን! ዪዚ ኣብዝ ዎታ̇ንዳ ኮሺ̇̈ራ? ዪንቲ̇ ዎሳ̇ንዳብ ሺ̈ቃምባ̇ራ ዪንታ̇ ጋርታ̇ፖ ፔታ̇ና̈ቦ ማዝሙራ ዬጺ̇̈ዝ፤ ሜላ̈ቦ ኣስ ታማ̈ርሲ̈ዝ፤ ፔታ̇ና̈ቦ ኣሳብ ጌ̈ሚቲኖ ባዝ ፋላ̇ ጋልዳ ኬሲ̇ዝ፤ ፔታ̇ና̈ቦ ኦራ ኖ̈ናባር ሶ̈ሊዝ፤ ማ ሜላ̈ቦ ኦራ ኖ̈ናባር ሶ̈ሊኖን ቢሊ̇ዝ ኪልሲ ዎ፤ ዪዚ ዪን ዎይ ኪልሳን ኣማ̇ኒኖ ኣሳን ሚ̈ንር ኤሲ̇ዝ ባዝ ማ̈ቃ̇ንዳብ ኮሺ̈̇ሬ።

²⁷ኦራ ኖ̈ናባር ሶ̈ሊዝ ኣሲ ዎኮ ናምኢ ዎይ ዎይሊዴ ጌይን ዓይዚ̇ ኣስ ማ̈ቃ̇ሪ ዎልኣ ታራባር ሶ̈ላጋ̈ቤ። ኢንቲ̇ ሶ̈ላዚንዶ ሜላ ኣሲ ቢርቻ̇ጋቤ።

²⁸ቢርቺ̇ዝ ኣሲ ባዪኮ ኦራ ኖ̈ናባር ሶ̈ሊዝ ኣሳን ኣሳ ጋርታ ዚምዶኣጋቤ፤ ዚምዶኣሪ ፌ̈ብኬ ጾ̈ሳ̇ብ ሙታ̇ ሶ̈ላጋቤ

²⁹ካ̈ያ ካ̈ዪዝ ኣሳን ና̈ምኢ ዎይ ዓይዚ̇ ማ̈ቃ̇ሪ ሶ̈ላጋ̈ቤ፤ ሜላን ሶ̈ሊንቲኖን ሲስካ̇ሪ ኮሺንቺ̇ ማሊ̇ ቤቃ̇ጋቤ።

³⁰ሺ̈ቃሪ ዶኢኖ ኣሳን ጋርታፖ̇ ፔቲ̇ ኣሲ ሳጻ ኢ̈ብ ቤንቴጌይን ቲ̈ን ሶ̈ሊሙታ̇ ዎ ና̈ሳ̈ዲ ዚም ዶኣጋ̈ቤ።

³¹ዎይ̈ን ታማ̈ራንፔ̈ንኬ ሚጛምፔ̈ን ዎይን ታራባር ታራባር ጾ̈ሳ̇̇ ኪቲ̇ን ሶ̈ላንዳብ ዳንዳኢ̈ሬ።

³²ናባን ጾ̈ሳ̇̈ ጋልዳፖ̇ ሲስኪ̇ኖንዶ ኮዬጌይን ዓት ዓንዳ ኢና ሶ̈ላንዳቦ ሜላ ኣሲ ሶ̈ሊሙታ̇ ዎኮ ኢ ውርሳምባር ሶ̈ላንዳ ጋ̈ሪ ና̈ጋንዳብ ዳንዳኢ̈ሬ።

³³ጾ̈ሳ̇̇̈ዲ ሳ̈ሪቲ ጾ̈ስዶኬ ዉይሳ ዶሲዝ ጾ̈ስ ጊዳካ̇ዬ። ዎይ ዎ̈ሳ ኬ̈ን ጋርታ ዎታዚንዲፌ̈ኒ፥

³⁴ኣማ̇ኒዝ ኣሳን ዎ̈ሳብ ሺቂኖ ኬ̈ልባራ ማጫ̇ን ዚምዶኦጋቤ። ሂጊ̇ን ኪ̈ታ̇ዚንዲፌ̈ኒ ኪ̈ቲ̇ንታምፔ̈ንዶኬ ሶ̈ላምፔን ኢንታ̇ብ ፋቃ̇ዳካ̇ዬ።

³⁵ማጫ̇ን ፔቲ̇ ፔቲ̇ ባዝ ኤራንዳብ ኮዬጌዪን ፌ ኣስኒንታ̇ን ፌ ኣ̈ል ኦይጫ̇ጋቤ፤ ኣባ ጌይን ማጮ̇ ኣሲ ዎ̈ሳብ ሺ̈ቂኖ ቤስ̇ ጋርታ ሶ̈ላዚንዳ ዬ̈ሊ̇̇̈ሬ።

³⁶ጾ̈ሳ̇ ቃ̈ላ ዪንታ̇ ጋልዳፖ ኬስኪ̇ና? ዎይ ጾ̈ሳ̇ ቃ̈ሊን ዬሊ̇ኖንዳ ዪንታ̇̇ክ ሙታ̇?

³⁷ኦ̈ናካሬ ፌ̈ና ናቢ ጌይዝ ኣሲ ዎይ ጌ̈ሻ ኣያ̇ና ኢሚ̇ኖ ኪልሲ ታ̈ብ ዎ ጌይዝ ኣሲ ዎኮ፤ ዓና̇ ቴ ዪንታ̇̇ብ ጻ̈ፊኖንዳ ጎዳ ኪ̈ታ ማ̈ቂ̇ኖን ኤራጋ̈ቤ።

³⁸ዪኖ̇ ሲስካ̇ብዳ ጌይዝ ኣሲ ኢ̈ኮንዳር ሲስኪ̇ዝ ኣሲ ባዬ̇።

³⁹ዪ̈ኮታ̇ቦ ቴ ኢሺንታ̇ን ካ̈ያ ካ̈ያንዳቦ ኮሺንቻ̇ር ኮዪብቴ፤ ኦራ ኖ̈ናባር ሶ̈ላዚን ካያፒ̇ቴ።

⁴⁰ዎቲናካሬ ዎይ ባዚ ዎጋባር ማ̈ቆ̇ጋ̈ቤ።