Read basketo 1 ቆሮ 16 Bible Online

1 ቆሮ 16 - basketo bible

1 ቆሮ 16

¹ኣማ̇ኒኖ ኣሳን ማ̈ዳ̇ንዳብ ኬሳ̇ዝ ሚ̈ሺን ጎይ ጋላ̈ታ ጋዳ ዎ ኣማ̇ኒኖ ኣሳንቦ ቴ ኢሚ̇ኖ ኪ̈ቲንዲፌ̈ን ዪንታ̇̇ር ዪና ኢዝፌ̈ን ዎቲብቴ̇።

²ቴ ዪንታ̇̇ክ ኢና ዬይን ዪንቲ̇ ሚ̈ሺ̇ ሺ̈ሻ̇ናፖ ዎይ ጋላስ ሳ̈ሚንታባር ዎጊ̇ ዎጊ̇ ጋላስ ኣሲ ዎይ ፌ ዲጛዚንዲፌ̈ን ኬሳ̇ሪ ዱማ ጋዳ̇ጋቤ።

³ቴ ዪንታ̇̇ክ ዬ̈ዚምባራ ዪንቲ ማራ̇ጺ̇ኖ ኣሳን ዪንቲ̇ ኬሲ̇ኖ ሚ̈ሺ̇ን ዬሩሳ̈ላም ኤጛር ዬልምፔ̈ን ቴ ኢንታ̇ብ ዳብዳ̈ቢ ኤይር ሚሻንዳ።

⁴ታ̈ና ኤ̈ጚሲዝ ባዝ ማ̈ቄ̇ጌይን ኢንቲ ታባር ዎልኣ ሉኪ̇̈ሬ።

⁵ታ̈ኒ ሜቂዶ̈ና ጎይባራ ሉካ̇ንዳቦ ቆፒ̇ኖኮታ̇ቦ ቴ ኢዝባር ኣርዶራ ጎይ ኢዝባራ ዪንታ̇ክ ሉካ̇ንዳ፤

⁶ቴ ሉኪ̇ዝ ቤስ̇ ዎይዲካር ማ̈ቂ̇ን ጎይብ ማ̈ቂ̇ዝ ባዝ ዪንቲ̇ ታ̈ቦ ኢማ̇ምፔ̈ኒ ቴ ዪንታ̇ክ ሙቃ̇ ጋምኣንዳብ ዳንዳኣ̈ሬ ዎይ ባርጊንዳር ቴ ዪንታ̇ባር ኣ̈ሲ ኣታ̇ባሴ።

⁷ታ̈ኒ ዓት ጎይ ኢዝባር ኣ̈ርዶራ ዪንታ̇̇ክ ጋምኣንዳብ ዳንዳኣባሶ ባዛቦ ሜላ̇ ዪንታ̇ክ ሉካ̇ንዳብ ኮያባሴ፤ ጎዲ ጌዬጌይንዶ ዎይሊን ቃም̇ ዪንታ̇ባር ጋምኣንዳብ ቆፓ̇̈ሬ።

⁸ዎቲናካሬ ጴ̈ንጣቆ̈ስጣ ባ̈ሊን ዬሊ̇ዝ ዲራስ ታ̈ኒ ዓንዳ ኤፍሶ̈ና ካታሚን ጋርታ ጋምኣንዳ።

⁹ኣባ ጌይን ታ̈ኒ ጎዳ̈ቦ ዎይሊን ኦ̈ሳ ኦ̈ምፔ̈ኒ ሻክ ካሮ ታ̈ብ ፊርቂንቲ̇ኔ፤ ዎቲናካሬ ቴ ኦ̈ሲን ኢጺ̇ዝ ዎይሊን ኣሲ ዎ።

¹⁰ጢማ̈ቶ̈ሲ ዪንታ̇̇ክ ዬዬጌዪን ኢ̈ች ቤይ ዪንታ̇̇ባር ዶኣምፔ̈ን ኢያ ማ̈ዲ̇ብቴ፤ ኢያሬ ታናፌ̈ን ጎዳ ኦ̈ሲን ኦ̈ሬ።

¹¹ዪ̈ኮታ̇ቦ ኦ̈ናካር ኢያ ሌቃ̇ሪ ኢ̈ኮን ሲስካ̇ብዳ ጋ̈ካ̇ዮ̈ዲፌ̈ኒ። ቴ ኢያ ና̈ጊዛኮታ̇ቦ ኢ ኣማ̇ኒኖ ኣሳንባራ ዎልኣ ማ̈ቃ̇ሪ ኮሽባር ታክ ማ̈ቂ̇ ዬምፔ̈ን ኢ̈ብ ጎይብ ማ̈ቃ̇ምፔ̈ኖ ባዝባር ኢያ ማ̈ዲ̇ብቴ።

¹²ኑ ኢሻ ኣጵሎ̈ሲ ኣማ̇ኒኖ ኣሳንባር ዎልኣ ማ̈ቃ̇ሪ ሉካ̇ር ዪንታ̇ ኦይጫ̇ምፔ̈ን ታ̈ኒ ኮሺንቻ ኢያ ጌሺንዶን ኢ ዓት ዪንታ̇ክ ሉካ̇ንዳብ ኮያካ̇ዬ፤ ዎቲናካር ኢ̈ብ ማ̈ቂ̇ኖ ቃምባራ ዪንታ̇̇ክ ሉኪ̇̈ሬ።

¹³ባርኪ̇ብቴ፤ ዪንታ̇ ኣማ̇ኒንባር ሚ̈ጛር ኤቂ̇ብቴ፤ ሚ̈ጚብቴ።

¹⁴ዪንቲ ኦ̈ዝ ባዝ ዎይ ካንባር ኦ̈ብቴ።

¹⁵ቴ ኢሺንታ̇ን! ኢስጣፋ̈ኖሳ ኣ̈ሎ ኣሳንሲ ኣካያ ጋዲን ጋርታ ዎይ̈ፖ ቲ̈ን ዬሱ̈ሳ ኣማ̇ኒኖን ኢንታ̇ ማ̈ቂ̇ኖንዲኬ ማ ኢንቲ̇ ኣማ̇ኒኖ ኣሳን ማ̈ዳ̇ንዳብ ፌ̈ና ኣ̈ ኢሚ̇ኖን ዪንቲ̇ ኤሪ̈ሬ።

¹⁶ዪንፌ̈ኖ ኣሳንኬ ኢንታባር ዎልኣ ኦ̈ሳባር ዳ̈ቡሪዛን ዎይንቦ ኪ̈ቲንታ̇ምፔ̈ኒ ቴ ዪንታ̇ ሚ̈ን ቆፊሳ̈ሬ።

¹⁷ኢስጣፋ̈ኖሳ፣ ፌርዶና̈ጦ̈ሳኬ ኣካይቆ̈ሳክ ዎልኣ ታ̈ክ ዬይኖንኮታ ታ̈ና ኡፋይሲ̇ኔ፤ ዪንቲ̇ ታባር ዓንዳ ባዪዶን ኢንቲ̇ ዪንታ̇ ቤሲ̇ን ማ̈ቃ̇ር ታ̈ብ ዲሪጚኖ ባዝ ኩሚኔ።

¹⁸ኢንቲ ዪንታ̇ ሚ̈ንኖንዲፌ̈ኒ ታ̈ናር ሚ̈ንኔ ዪ̈ኮታ̇ቦ ዪንፌ̈ኖ ኣሳን ዪንቲ̇ ኤራሪ ኢንታ̇ ቦንቺ̇ብቴ።

¹⁹ኢ̈ሳ ጋዳ ዎ ኣማ̇ኒኖ ኣሳን ዪንታ̇ ሳሮ ጌይኔ፤ ኣቂ̈ላኬ ጲርስቂ̈ላክ ማ ኢንታ ኣል ሺ̈ቂዝ ኣማ̇ኒዝ ኣሳን ዎይ ቡዳ ጋርታፖ ጎዳ ሱ̈ምባራ ዪንታ̇ ሳሮ ጌይኔ።

²⁰ዓይዲ ዎ ኣማ̇ኒኖ ኣሳንር ዎይ ዪንታ̇ ሳ̈ሮ ጌይኔ፤ ኮሽ ቡ̈ዳባር ዎል ዎልኣ ዬርቃ̇ር ሳሪብቴ̇።

²¹ታ ጳውሎ̈ሲ ዓና ሳራቲን ዪንታ̇ብ ቴ ኩሽ ጌቲምባር ጻ̈ፊኔ።

²²ጎዳ ካባሶ ኣሲ ዎኮ ኢ ባ̈ዲንቲ̇ኖ ማቆ! ኑ ጎዳ̈ዶ! ዬ̈ቤ።

²³ጎዳ ዬሱ̈ስ ክርስቶ̈ሳ ኮሺ̇ቲ ዪንታ̇ባር ማ̈ቆ̇።

²⁴ዪንታ̇̇ብ ዎ ታ ካንንዳ ዬሱ̈ስ ክርስቶ̈ሳ ጎይባራ ዪንቲ̇ ዎይንባር ማ̈ቆ̇፤ ኣሚንኤ!