Read basketo 1 ቆሮ 2 Bible Online

1 ቆሮ 2 - basketo bible

1 ቆሮ 2

¹ቴ ኢሺንታን! ታ̈ኒ ጾ̈ሳ̇ ቃሊ̇ን ዪንታ̇̇ብ ሶ̈ላንዳብ ዬይኖምባ̇ራ ቴ ሶ̈ላ ኤራዚንዲኬ ጴች ኤራ ዪንታ̇ ቤይሳሙታ̇ ዬ̈ካ̇ዬ።

²ቴ ዪንታ̇ባር ዎ ኬል̇ባራ ዬሱ̈ስ ክርስቶ̈ሳኬ ኢ ማስቃላ ጋልዳ ሶ̈ቲንታ̇ር ዓይቂኖንፖ ሜላ ባዝ ኣባካር ኤራንዳ ኮያባሴ ጋ̈ራ ዎሳ̇ናዴ።

³ዪ̈ኮታ̇ቦ ቴ ዪንታ̇ባር ዎምባራ ዳ̈ቡርስባርኬ ኢ̈ችባር ዎይሊን ጋንዳሙታ̇ ጋምኢ̇ኔ።

⁴ቴ ሶ̈ሊንዲኬ ቴ ሳባ̇ኪኖንዳ ቴ ቴ ኤራባርኬ ሜላ̇ ሶ̈ላ ቆይሲሳር ጊዳካ̇ይዶን ጾ̈ሳ̇̇ ኣያ̇ና ዎልቃ̇ ቤይሳሙታ̇ ሶ̈ሊኔ።

⁵ዪኖ̇ ቴ ዎቲኖንዳ ዪንታ̇ ኣማ̇ኒንዳ ኣሳ ኤሪቲ ጋልዳ ጊዳካይዶን ጾ̈ሳ̇̇ ጋልዳ ኣጚቲ̇ኖ ማቃ̇ምፔ̈ኔ።

⁶ዎቲናካሬ ኑ̈ኒ ኣማ̇ናባር ሚ̈ጚኖንቦ ኢንታ̇ብ ማ̈ቃ̇ምፔ̈ኖ ኤራ ቃ̈ላባር ሶ̈ሊ̈ሬ፤ ዪና̇ሬ ኑ ሶ̈ላዚንዳ ዓኒ̇ ሳ̈ዚን ጋል̇ዳ ዎ ኤሪንባራ ዎይ ዉርሲ ጋልዳ ያንዳብ ዎ ዓኒ ኣላሚንቦ ላ ኢ ኤሪንባር ጊዳካ̇ዬ።

⁷ኑ̈ኒ ሶ̈ላዚንዳ ጾ̈ሲ ኣላሚን ኮቻ̇ናፖ ቲ̈ን ዎ ኬል̇ባራ ኑ ቦንቻ̇ቦ ጌዪ ጊ̈ጊሲኖንዲኬ ኣ̈ቺንታ̇ር ዎ ጾ̈ሳ̇ ሚስጢራ ኤሪን ሶ̈ሊ̈ሬ።

⁸ዓኒ̇ ኣላሚን ላ̈̇ን ጋርታ̇ፖ ዓና̇ ጾ̈ሳ̇̇ ኤሪን ኤሪኖ ኦ̈ናካር ባዬ̇፤ ኢንቲ̇ ዎን ዪኖ̇ ኤሪኖኮ ቦንቺንቲ̇ኖ ጎዳ ሶቲ̇ባ̈ስዶ̈ን።

⁹ማ̈ቂ̇ናካሬ ጌ̈ሻ̇ ማጻ̈ፋ ጋልዳ፥ “ኣሳ ኣ̈ፊ ቤቃካ̇ዮን፥ ኣሳ ዋይ ሲስካካ̇ዮን፥ ኣሳ ቡ̈ዳ ጋርታ ቆፒ̇ንታ̇ካ̇ዮን፥ ጾ̈ሲ̇ ፌ ካዝ ኣሳንቦ ጊ̈ጊሲኔ” ጌይሬ።

¹⁰ዎቲናካሬ ጌ̈ሚቲኖ ባዛን ጾ̈ሳ̇̇ ፌ ኣያ̇ናባራ ኑ̈ቦ ፋላ̇ ጋልዳ ኬሳ̇ር ቤይሲኔ፤ ጾ̈ሳ̇̇ ኣያ̇ና̈ዲ ሜላ ኣቲ̇ን ኦ̈ናካር ኤራንዳብ ዳንዳኢባ̈ሶ ጾ̈ሳ̇̇ ባዝ ኣታካ̇ይ ዎይ ባዝ ቤቂ̇ ዲጚ̈ሬ።

¹¹ኣሳ ጋርታ̇ ዎ ቆፊ ኢ ና̈ሳ ፌ̈ብ ኤሪ̈ርዶኬ ሜላ ኦ̈ናካር ኤሪዝ ኣሲ ባዬ። ዪና̇ ኢዝፌ̈ኒ ጾ̈ ቆፊንዶ ጾ̈ሳ̇̇ ኣያ̇ና ኤሪ̈ርዶኬ ሜላ ኦ̈ናካር ኤራንዳብ ዳንዳኢባ̈ሴ።

¹²ጾ̈ሳ̇̇ ጋልዳፖ̇ ኑ̈ብ ሜላ̇ ኢሚ̇ንቲ̇ኖ ባዛን ኣብዝኮ ኑ̈ኒ ኤራምፔ̈ኒ ጾ̈ሲ̇ ኑ̈ቦ ፌ ኣያ̇ና ኢሚ̇ዶኬ ዓኒ̇ ኣላሚን ጋልዶ ኣያ̇ና ኑ̈ብ ኢማ̇ካ̇ዬ።

¹³ኑ̈ኒ ሶ̈ላዚንዳ ኣሳ ጋልዳፖ̇ ኤኪ̇ኖ ኤራባር ጊዳካ̇ይዶን ጾ̈ሳ̇̇ ኣያ̇ና ጋልዳፖ ታማ̈ሪኖ ቃ̈ላ ሶ̈ሊ̈ሬ። ጾ̈ሳ̇̇ ኣያ̇ና ጋልዳፖ ቤንታ̇ዝ ኪን ቲሚርቲ̇ንዶ ኑ̈ኒ ጾ̈ሳ̇ ኣያ̇ና ጋልዳፖ ቤንቲ̇ዝ ቃ̈ላባር ታማ̈ርሲ̈ሬ።

¹⁴ጾ̈ሳ̇ ኣያ̇ና ኢ ጋልዳ ባዮ̇ ኣሲ ጾ̈ሳ̇ ጋልዳ̇ፖ ኢሚ̇ንቲ̇ዝ ባዝ ኤካ̇ንዳ̇ብ ዳንዳኢባ̈ሴ።

¹⁵ጾ̈ሳ̇̇ ኣያ̇ና ኢ ጋርታ ዎ ኣሲ ዎይ ባዝ ቤቂ̇ ማራማ̇ሪ ኤሪ̈ሬ፤ ዎቲናካር ኢያ ኣሲ ኦ̈ናካር ማራማ̇ራር ኤራንዳብ ዳንዳ̇ኢባ̈ሴ።

¹⁶ዪ̈ዳሬ፥ “ጎዳ ቆፋ ኦ ኤራንዳ̇ብ ዳንዳኢ̈ራ? ኢያ ዞራንዳ̇ብ ዳንዳ̇ኢዛ ኦ̈ኖ?” ጋ̈ሪ ጻ̈ፊንቲ̇ኖንዲፌ̈ኔ። ዎቲናካር ኑ̈ኒ ክርስቶ̈ሲ ቆፓ̇ዚንዲፌ̈ኒ ቆፒ̈ሬ።