Read basketo 1 ቆሮ 5 Bible Online

1 ቆሮ 5 - basketo bible

1 ቆሮ 5

¹ዪንታ̇ ጊዳ̇ ኦሎላ ጋዲ̇ዝ ኣሲ ዎ ጌዪ ሶ̈ሊንቲ̇̈ሬ፤ ዪ̈ዲፌኖ ኣስ ዬ̈ሊ̇ዝ ኦ̈ሳ̈ዲ ኑ ኣቲ̇ን ጾ̈ሳ̇̇ ኤሪባ̈ሶ ኣሳን ጊዳ̇ር ማ̈ቂ̇ን ኦ̈ንቲ̇ባ̈ሶ ባዜ፤ ዪ̈ዳር ኣብዛ ጌዪን ፌ ባ̈ባ̈ ማጪ̇ን ፌ̈ብ ማጫ̇ ማ̈ሃር ዎ ኣሲ ዎ።

²ዪዚ ዪንታ̇ ጊዳ̇ ዓ̈ፌን ኣስ ዬሊ̇ዝ ባዚ ዶኣምባራ ዪንታ̇ ኦቲርሳ̇ዚን ኣብዛ? ዓኒ̇ፌ̈ኖ ባዚምቦ ዪንቲ̇ ሙርማ̇ንዳ̇ብ ኮሺ̇̈ባ̈ሳ? ዪኒ̇ፌኖ ኦ̈ሲን ኦ̈ኖ ና̈ሳ ዪንታ̇ ጊዳ̇ፖ̇ ኢያ ኣባቦ ኬሲ ፋይካ̇ይ ኣቲ̇ቴ?

³ቴ ዓት̇ ዪንታ̇ ጊዳ̇ ባዪካርዶናሬ ቆፊባር ቴ ዪንታ̇ባር ዎ፤ ቴ ዪንታ̇̇ክ ኢና ዪንታ̇ባር ዎልኣ ዎ ኣስፌ̈ን ማ̈ቃ̇ራ ዪ̈ዲፌኖ ኢታ̇ ኦ̈ሳ ኦ̈ኖ ና̈ሳ ጋልዳ ጎዳ ዬሱ̈ስ ክርስቶ̈ሳ ሱምባራ ኢ ጋልዳ ፋራ̇ዲኔ።

⁴ዪንቲ ዎልኣ ሺ̈ቃዚምባ̇ራ ታ̈ኒ ቴ ቆፊንባራ ዪንታ̇ባር ኢና ዎ፤ ዬሱ̈ሳ ዎልቃ̈ዳሬ ኢና ዎኮታ̇ቦ፥

⁵ናጋራ ኦ̈ኖ ና̈ሳ ዓ̈ዳ ኢያ ናጋራ ኦ̈ ኦ̈ ጋ̈ዝ ኢኒ̇ን ያምፔ̈ኒ ሴ̈ጣናብ ኢያ ኣ̈ር ኢሚ̇ብቴ፤ ዪና̇ ዪንቲ ዎታዚንዳ ጎዳ ዬሱ̈ሲ ፊርዳብ ዬ̈ዝ ቃሚ̇ን ኢ ሼምፒ̇ን ፋጻምፔ̈ኔ።

⁶ዪዚ ዪንታ̇ ኦቲሪንዳ ኮሽ̇ ጊዳካ̇ዬ፤ ጊላ̇ ኢርሺ̇ንዳ̇ ሙኑቂን ዎይ ሹ̈ጚቻ̇ዚን ዪንቲ ኤሪባ̈ሳ?

⁷ዪንቲ̇ ዓት ኢርሻ ዪንታ̇ ጋርታ ባዪስ ኮሽ̇ ዎንዲፌ̈ኒ ኢርሻ ኢዝ ጋርታ̇ ሚሻካ̇ዮ ቢርት ሙኑቂኖ ሙኑቃፌ̈ኒ ማ̈ቃ̇ንዳቦ ጋምኢኖ ኢርሺን ፋይብቴ። ኣባ ጌይን ኑ ፋሲጋ ዶራ ዬሱ̈ሲ ኑ̈ብ ሹኪንቲ̇ኔ።

⁸ዪ̈ኮታ̇ቦ ዉጫኬ ኢ̈ቲቲ ኩሚኖ ጋምኢ̇ኖ ኢርሻባር ጊዳካ̇ይዶን ኢርሻ ባዮ̇ ኮሺቲኬ ኪን ሳልዳ ቂጻባራ ባ̈ሊን ቦንቺ̇ስቶ̇።

⁹ዓኒ̇ፖ ቲ̈ን ቴ ዪንታ̇ብ ጻ̈ፊኖ ኪ̈ቲን ጋልዳ ኦሎላ ጋዲ̇ዝ ኣሳንባራ ዎል ዬፒቴ ጌይኔ።

¹⁰ዪና̇ ታ ጋ̈ዚንዳ፥ ዪንቲ̇ ዓኒ̇ ኣላሚን ጋልዳ ዎ ኦሎላ ጋዲ̇ዝ ኣሳን፣ ዎይ ዎይ ባዚ ታ̈ብ ማ̈ቆ̇ ጌይዝ ኣሳን፣ ዎይ ኣሳባዝ ቡሪዛን፣ ዎይ ጻላሃብ ጎሽቲ̇ዝ ኣሳንባር ዎይ ዬፒቴ ጌንት ጊዳካዬ፤ ዪፌኖ ባዝ ማ̈ቄጌዪን ዪንቲ̇ ዓኒ ሳ̈ዚን ጋልዳፖ ፋካ̇ንዳብ ኮሺ̇̈ሬ ጌንቴ።

¹¹ዎቲናካር ታ ዓት ዪንታ̇̇ብ ጻ̈ፊኖንዳ ፌ̈ና ኣማ̇ኒዝ ኣሴ ጌዪሙታ̇ዶ̈ሪ ኦሎላ ጋዲ̇ዛን፣ ዎይ ባዚ ዎይ ታ̈ብ ማ̈ቆ̇ ጌይዛን፣ ጻላሃብ ጎሽቲዛን፣ ዎይ ኣሳ ሱም ይሲ̇ዛን፣ ዎይ ማሲቲዛን፣ ዎይ ኣሳ ባዝ ቡሪዛንባር ዬፒቴ ጋ̈ራ ጻ̈ፊኔ፤ ዪንፌኖ ኣሳንባራ ዎልኣ ኮትሚ ሞ̈ፒ̇ቴ።

¹²ኣማ̇ናካ̇ዮ ኣሳን ጋልዳ ፊርዳንዳ̇ቦ ቴ ኦ̈ኖ? ኣማ̇ና̇ር ኑባር ዎልኣ ዎ ኣሳን ጋልዳ ማ̈ቄጌይንዶ ዪንታ̇ር ፊርዳንዳብ ዳንዳ̇ኢባ̈ሳ?

¹³ኣማ̇ናካ̇ዮ ኣሳን ጋልዳ ፋራ̇ዲዛ̈ዲ ጾ̈ሳ̇̇̈ዳ፤ ዪዚ ጌ̈ሻ̇ ማጻ̈ፋ ጋልዳ ጌይዛዲፌ̈ን “ና̈ሳ ኢ̈ታ ዪንታ̇ ጊዳፖ ዳኪ̇ ፋይብቴ።”