Read basketo 1 ቆሮ 8 Bible Online

1 ቆሮ 8 - basketo bible

1 ቆሮ 8

¹ማ ኤ̈ቃብ ሹ̈ኪንቲ̇ኖ ኣይሽ ጎይ ዪንቲ̇ ጌይኖንዲፌ̈ኒ ኪን ኑ ዎይንቦ ኤራ ዎ፤ ማ̈ቂ̇ናካሬ ኤሮ ኣስ ኦቲርሲ̇̈ሬ፤ ካን ኣስ ሚ̈ን ኤሲ̇̈ሬ።

²“ታ̈ብ ኤራ ዎ” ጌይዝ ኣሲ ዎኮ ኢ ኤራንዳ̇ብ ኮሻ̇ዝ ባዚን ዎይ ቢርት ኤራካ̇ዬ።

³ጾ̈ሳ̇̇̈ ካዝ ኣሲ ኢ ጾ̈ሳ̇ ቲ̈ን ኤሪንቲ̇ኖ ማ̈ቂ̇̈ሬ።

⁴ዪዚ ኤ̈ቃብ ሹ̈ኪንቲ̇ኖ ኣይሽ ሙይዝ ጎይ ቴ ጌይዝ ባዚ ዎ፦ ዓና̇ ኣላሚን ጋልዳ ጻላሆ ሜላ̇ ዓሪ ፋባሶ ባዝ ማ̈ቂ̇ኖንዲኬ ማ ጾ̈ሳ̇ ፔታ̇ናፖ ሜላ ጾ̈ሲ̇ ባዮ̇ን ኑ ኤሪ̈ሬ።

⁵ጾ̈ስ ባይዶር ኣሲ ኢንታ ጾ̈ሴ̇ ጌዪ ጼይጊዛን ዎይሊን ማቃ ጾ̈ስ̇ኬ ዎይሊን ላ̈ን ኣፋር ማቂን ሳ̈ዳ̇ር ዎ ጌይናካሬ፥

⁶ኑ ጾ̈ሳ̇̇̈ዲ ዎይ ባዝ ኮ̈ቺ̇ኖ ኢያ ማ̈ቂ̇ኖንዲኬ ኑ̈ናር ኢዬይ ማ̈ቂ̇ኖ ፔታ̇ና ጾ̈ሳ̇̇፥ ባ̈ባ̈ ኢ ሙ̈ታ̇፤ ማ ዎይ ባዝ ኮ̈ቺ̇ኖ̈ዲኬ ኑ̈ናር ሼምፓባር ጋዲ̇ኖ ፔታ̇ና ጎዳ ዬሱ̈ስ ክርስቶ̈ሳ ሙ̈ታ̇።

⁷ዎቲናካሬ ዪኖ̇ ኤሪዛን ዎይን ጊዳካ̇ዬ፤ ፔቲ̇ ፔቲ̇ ኣሳን ዓኖ̇ ዬሊ̇ዝ ዲራስ ኤ̈ቃብ ጎሽቲ̇ ሎሲኖኮታ̇ቦ ዪኒ̇ፌኖ ኣይሽ ሞ̈ምባ̇ራ ኣይሺን ኢዛ ኤ̈ቃብ ሹኪንቲ̇ኖ ኣይሽ ኢንታ̇ክ ማይጻ̈ሬ፤ ኢንቲ̇ ኮሽ ማ̈ቂ̇ኖንዲኬ ኢ̈ታ ማ̈ቂ̇ኖ ባዚን ቆሪ ኤሪባ̈ሶኮታ̇ቦ ኢዞ ሞ̈ምባ̇ራ ባዝ ኢዛ ኢንታ̇ ቄ̈ሬ።

⁸ዎቲናካሬ ፊሺ ኑ̈ና ጾ̈ሳ̇̇̈ባር ዳቢባ̈ሴ፤ ኑ ሞ̈ካ̇ይ ኣቴጌይናር ኑ ጋልዳፖ ዲሪጚዝ ባዚ ባዬ̇፤ ኑ ሞ̈ራር ጉ̈ጂዝ ባዚ ባዬ̇።

⁹ኪንባር ዪንቲ̇ ኮዪኖ ባዝ ሞ̈ንዳብ ዳንዳኢ̈ሬ። ዎቲናካሬ ዪንቲ̇ ዎታ̇ዚን ቤቃ̇ር ኣማ̇ናባር ሚ̈ጛካዮ ኣሳን ናጋራ ጋርታ ጌላካ̇ዮ̈ዲፌ̈ን ና̈ጊንቲ̇ብቴ̇።

¹⁰ኔ̈ኒ “ታ̈ብ ኤራ ዎ” ጌያሙታ̇ ዛባ̇ ጋርታ ዶኣራ ኤ̈ቃብ ሹኪ̇ኖባዝ ሞ̈ዚምባራ ኢ̈ቲንዲክ ኮሺ̇ንዲክ ቆሪ ኤሪባ̈ሶ ኣሲ ኔ̈ና ቤቃ̇ሪ ኤ̈ቃብ ሹኪ̇ኖ ኣይሽ ሞ̈ንዳብ ኢጪ̇ባ̈ሴ።

¹¹ዪዚ ክርስቶ̈ሲ ኢ ጊሻ̇ብ ዓይቂ̇ኖ ዪ̈ ኣማ̇ናባር ሚ̈ጛካ̇ዮ ና̈ሳ ኔ ኤሪን ኢያ ይሲ̇ኔ ጌንቴ̇።

¹²ዪዚ ዪኒ̇ፌ̈ን ዎቲሙታ̇ ዪንታ̇ ኢሺንታን ጋልዳ ናጋራ ኦ̈ሙታ̇ኬ ኢንቲ ̇“ዓና̇ ናጋራ ኦ̈ሳ” ጌዪ ቆፓ̇ዝ ባዚን ኦ̈ምፔ̈ን ዎቲሙታ̇ ክርስቶ̈ሳ ባሊ̈ሬ።

¹³ዪዚ ቴ ሞ̈ዝ ባዚንዳ ቴ ኢሻ̈ ና̈ጋራ ኦ̈ሳ̈ርኮ ቴ ኢሻ ናጋራ ኦ̈ሳካዮ̈ዲፌ̈ን ቴ ዉርሳ ኣይሽ ጌይዝ ባዝ ሞ̈ብዳ።