Read basketo 2 ቆሮ 11 Bible Online

2 ቆሮ 11 - basketo bible

2 ቆሮ 11

¹ታ ኣባካር ዳሽ ኣስፌ̈ን ማ̈ቂ̇ናካሬ ዪንቲ̇ ታ̈ኮን ጊላ̇ ጋርዣር ሲስኪ̈ሬ ጌያ ኣማ̇ና̈ሬ፤ ዋ̈ዲቴ ጋርዢብቴ።

²ፔቲ̇ ዉዲሪንዳ ፔቲ ኣቲና̈ባር ሳ̈ ኤ̈ዚንዲፌ̈ኒ ታ̈ናር ዪንታ̇ ክርስቶ̈ሳብ ሳ̈ ኤይኖኮታ̇ቦ ዪንቲ̇ ሜላ̈ክ ሉኪ̈ሬ ጌያ ቂና̈ታ ቴ ጋርታ̇ ጌሊኔ።

³ሾ̈ሺ̇ ፌ ዉጪ̇ምባራ ሄዋ̈ኖ ባሊኖንዲፌ̈ኒ ዪንታ̇ ቆፊንዳር ኢ̈ታራ ዪንቲ̇ ኣሽካኬ ኮሽ ማ̈ቂ̇ኖ ቡ̈ዳባራ ክርስቶ̈ሳብ ኣማ̇ኒንታዚንዶ ኣሺ̇ዝዳ ጌያ ኢ̈ጫ̇̈ሬ።

⁴ፔቲ̇ ኣሲ ዪንታ̇ክ ዬ̈ሪ ኑ ዪንታ̇ ሳባ̇ኪኖ ጊዳካ̇ይዶን ሜላ ዬሱ̈ሳ ዪንታ̇ ሳባኬጌዪን ዎይ ዪንቲ̇ ኤኪ̇ኖ ጌ̈ሻ ኣያ̇ና ጊዳካዶን ሜላ ኣያ̇ና ዪንቲ̇ ኤኬ̇ጌይን ዎይ ዪንቲ̇ ኣማ̇ናር ኤኪ̇ኖ ዎጛሊን ጊዳካ̇ይዶን ሜላ ዎጛላ ኤኬ̇ጌዪን ዪንቲ̇ ጋሚንታር ዚምዶኢኔ ጌንቴ።

⁵ዎቲናካሬ ታ̈ኒ ዪን ጴቻ ሃዋ̈ራታንፖ ኣባካር ጉ̈ጺዛ ታ̈ክ ማይጺባ̈ሴ።

⁶ታ̈ኒ ሶ̈ሊዝ ሶ̈ላባራ ኤጫ ማ̈ቃካ̇ይካሬ ኤራ ታ̈ብ ጉጻካ̇ዬ፤ ዪና̇ሬ ዎይ ጋላስ ዎይ ጎይባራ ኑ ዪንታ̇ ፋል̇ ታማ̈ርሲኔ።

⁷ታ̈ኒ ጾ̈ሳ̇ ዎጛላ ታ̈ብ ኣባክ ጪጊ̇ዝ ባዚ ባይዶን ዪንታ̇̇ብ ሳባ̇ኪኖምቤኬ ዪንታ̇ ሾክ̇ ዎታ̇ንዳቦ ጋራ ታ ታ̈ና ዪርክ ዎቲኖንዳ ታ̈ብ ናጋራ ማ̈ቃ̇ ፋይዲንታንዳዶኔ?

⁸ዪንታ̇ብ ኦ̈ንዳቦ ጋ̈ራ ሜላ ዎሳ ኬ̈ፖ̇ ማ̈ዲ ሚ̈ሺ̇ ቴ ኤኪ̇ኖንዳ ቴ ኢንታ̇ ጋልዳፖ̇ ቡሪኔ።

⁹ቴ ዪንታ̇̇ባር ዎዶን ታ̈ና ጊላ̇ ሜቲንዶ̈ን ሜቂዶ̈ናፖ ዬይኖ ቴ ኢሺንታን ታ̈ብ ኮሺ̇̈ዝ ባዝ ዎይባራ ታ̈ና ማዲ̇ኖኮታ̇ቦ ቴ ኦ̈ናካር ዋ̈ዪካ̇ዬ፤ ዓኖ̇ ዬላ̇ር ዪንታ̇ ኣባካባር ዋዪካዬ ዓት ዎሃባር ዪንታ̇ ዋ̈ይንዳባዬ̇።

¹⁰ክርስቶ̈ሳ ኪንቲን ታ ጋርታ ዎ! ቴ ኦቲርቃካይፌ̈ን ዎቲዝ ኣሲ ኣካ̈ያ ጋዳ̇ ዎ ጋዳን ጋርታ̇ ኦ̈ናካር ባዬ̇።

¹¹ቴ ዪና̇ ኣባብ ጌዬ? ቴ ዪንታ̇ ካባሶምቢያ? ቴ ዪንታ̇ ካዚን ጾ̈ሲ ኤሪ̈ሬ።

¹²ዪን ሜላ ሃዋራታን “ኑ̈ናር ኢንታ̇ፌን ኦሬ” ጌዪሙታ̇ ኦቲርቃ̇ዝ ጎይን ይሳ̇ንዳቦ ቴ ዓት ዎታዚን ዎሃር ዎታንዳ።

¹³ዪንፌ̈ኖ ኣሳን ክርስቶ̈ሳ ሃዋራ ማይጻንዳቦ ፌ̈ና ኦ̈ሂዝ ማቃ ሃዋ̈ራኬ ማቃባር ኦ̈ዝ ኣሴ።

¹⁴ዪ̈ዲ ጋራ̇ሚሲዝ ባዝ ጊዳካ̇ዬ። ሜላ ኣቲ̇ን ሴ̈ጣኖ ኣስ ባሊንዳቦ ፌ̈ና ጾ̈ሳ̇ ኪ̈ታንቻ ማይጺሲ̈ሬ።

¹⁵ዪዚ ዪን ሴ̈ጣና ኣሽካራን ጾ̈ሳ̇ ኣሽካራ ማይጻንዳቦ ፌ̈ና ኦሄጌይን ጋራ̇ሚሲባ̈ሴ፤ ዉርሲ ጋልዳ ኢንቲ̇ ፌ ኦ̈ሲ̇ን ጋቲን ዲጚ̈ሬ።

¹⁶ታ ዓታ̇ር ማሃ ሶ̈ላ̈ሬ፤ ኦ̈ናካር ኣሲ ታ̈ና ዳሻፌ̈ን ፋይዳፖ̇ጋቤ፤ ዪንቲ̇ ታ̈ና ቦ̈ዛ ጌዪ ፋይዲ̈ርኮ ታ̈ናሬ ጊላ̇ ኬርፋምፔ̈ኒ ዳሻ ኣስፌ̈ን ፋይዳር ታ̈ኮን ሲስኪ̇ብቴ።

¹⁷ታ̈ኒ ዓ̈ዲፌ̈ን ኬርፋ ሶ̈ሊዛ̈ዲ ጎዳ ቆፊፌ̈ን ጊዳካይዶን ዳሻ ማ̈ቃ̇ራ ሶ̈ላ̈ሬ።

¹⁸ዎይሊንን ዓና̇ ኣላሚን ጋልዶ ባዝባር ኬርፊዛኮታ̇ቦ ታ̈ናሬ ኬርፋ̈ሬ።

¹⁹ዪንቲ̇ ቆፒ ቢሪንዝ ኣስ ማ̈ቂ̇ኖኮታ̇ቦ ዳሻንኮን ኡፋይስባር ጋርዣር ኤኪ̇̈ሬ።

²⁰ኦ̈ናካር ዪንታ̇ ኣይላፌ̈ን ማሄጌዪን፣ ኦ̈ናካር ዪንታ̇ ባዚን ዎይ ኤኬ̇ጌይናር፣ ኦ̈ናካር ፌ̈ና ማ̈ዳ̇ንዳብ ጋ̈ሪ ዪንታ̇ክ ኡኬ̇ጌይን፣ ኦ̈ናካር ዪንታ̇ ሌቄ̇ጌይን፣ ኦ̈ናካር ዪንታ̇ ኣ̈ፊን ጋርታ ባቄ̇ጌይናር ዪንቲ̇ ጋርዢ̈ሬ።[2]

²¹ታ̈ና ዬ̈ሊ̇ዝ ባዝ ማ̈ቄ̇ጌይናሬ ቴ ዪንታ̇̇ብ ሶ̈ላዚንዳ፥ ዪን ባዛን ኦ̈ንዳቦ ኑ̈ኒ ዳንዳኢዝ ኣስ ጊዳካ̇ዬ። ኦ̈ናካሬ ኬርፋንዳቦ ኮዬ̈ጌይን ታ̈ናር ኢፌ̈ን ዬ̈ልቃካ̇ይ ኬርፋንዳ፤ ዪና ታ ጋዚንዳ ዓታ̇ር ቦዛፌ̈ን ማ̈ቃ̇ር ሶ̈ላ̈ሬ።

²²ኢንቲ̇ ኣይሁድ ዜር? ታ̈ናር ኣይሁድ ዜርሴ፤ ኢንቲ̇ ኢስሬ̈ላ ጋዶ̇ ኣሳ? ታ̈ናር ኢስሬ̈ላ ጋዶ̇ ኣሴ፤ ኢንቲ̇ ኣብራሃ̈ማ ዜር? ታ̈ናር ኣብራሃማ ዜር።

²³ኢንቲ̇ ክርስቶ̈ሳ ኣሽካራ? (ቴ ዣ̈ሾትፌ̈ን ማ̈ቃ̇ር ሶ̈ላ̈ሬ) ቴ ኢንታ̇ፖ ሺ ክርስቶ̈ሳ ኣሽካ̇ራ። ቴ ኢንታ̇ፖ̇ ሺ ኦ̈ሳባር ዳቡሪኔ፤ ዎይሊን ጎይ ቃቺ̇ንቲኔ፤ ዎይሊን ጎይ ቴ ቡኪ̇ንቲ̇ኔ፤ ዎይሊን ጎይ ዓይቃብ ዬላ̇ር ኣቲ̇ኔ።

²⁴ኣይሁዳን ኣላጛባራ ዓይዚ̇ ታ̈ጶ ሳ̈ካሊ ኣላጛ ኢሺ̇ን ቶ̈ህ ታ̈ና ቡኪ̇ኔ።

²⁵ዓይዚ̇ ቶ̈ህ ጉፋባር ቡኪ̇ንቲ̇ኔ፤ ፔቲ̇ ቶ̈ህ ሹችባር ቆጺንቲ̇ኔ፤ ባሃራ ጋልዳ ማርካ̇ባባር ሉካ̇ምባራ ዓይዚ̇ ቶህ ቴ ዎ ማርካ̇ባን ሜቂ̇ኔ። ማርካቢ ሜቂ̇ን ፔቲ̇ ቃ̈ምኬ ጋላስኬ ኩም ባሃ̈ራ ጋርታ̇ ኣቂኔ።

²⁶ታ̈ኒ ዎይሊን ቤስ̇ ዬ ቢሪንታ ዳ̈ቡሪኔ፤ ዋ̈ ኪጻ̇ር ታ̈ና ዋ̈ዪኔ ማ ፋ̈ና̇ሬ ታ ጋልዳ ዎይሊን ሜታ̇ ዬልኔ፤ ቴ ዜር ኣይሁዳንሬ ማ ኣይሁድ ባዮ̇ ኣሳንሬ ሜታ ታ ጋልዳ ዬልኔ። ካታማ ጋርታ̇ሬ ባራሃ ጋርታ̇ሬ ባሃራ ጋልዳሬ ሜታ ታ̈ና ዬሊ̇ኔ፤ ማ ማቃባር ፌ̈ና ኣማ̇ና ጌይዝ ኣሳንሬ ሜታ ታ ጋልዳ ዬልኔ።

²⁷ዎይሊን ኦ̈ሳባር ዳቡሪኔ፤ ሱ̈ርቃካ̇ይ ዎይሊን ኣቂኔ፤ ዋ̈ ዎይሊን ታ̈ና ባርሲኔ ጋፋር ታ̈ና ዎኔ፤ ዎይሊን ጋላስ ፊ̈ሺ ታ̈ና ዪኔ፤ ዛ̈ክኬ ካሊ̇ቲር ታ̈ና ዬሊ̇ኔ።

²⁸ቴ ጋልዳ ዬሊ̇ኖ ባዝ ዪን ጋልዳ ጉጃ̇ሪ ዎይ ጋላስ ዎሳ ኬ̈ ባዛቦ ቆፓ̇ሙታ ሜቲ̇ንታ̈ሬ።

²⁹ፔቲ̇ ኣሲ ዳ̈ቡራምባራ ታ̈ናር ኢባር ዳ̈ቡራካይ ኣቲ̇ኖን ኣ̈ንታ̇? ፔቲ̇ ኣሲ ናጋራ ጋርታ̇ ኬዳ̇ምባራ ቴ ሼኒታካ̇ይ ኣቲ̇ኖን ኣ̈ንታ̇?

³⁰ኬርፋንዳብ ኮሺ̇ዝ ባዝ ማ̈ቄ̇ጌዪን ታ̈ኒ ቴ ዳቡርሲን ቤይሲዝ ባዛንባራ ኬርፋ̈ሬ።

³¹ሜናብ ጋላቲንቲ̇ኖ ኑ ጎዳ ዬሱ̈ሳ ባ̈ባ̈ ጾ̈ሳ̇̇ዲ ታ̈ኒ ማቃ̇ባሶን ኤሪ̈ሬ።

³²ታ̈ኒ ዳማ̈ስቃ ካታሚን ጋርታ̇ ዎዶራ ካ̈ታ ኣራ̈ታ̈ሳፖ̇ ጻና ዎ ጋዲን ኣቂሲዝ ና̈ሳ ታ̈ና ኤ̈ንዳብ ኮያሪ ካታ̇ሚን ና̈ጊዝ ኣሳንባር ና̈ጊሲዴ።

³³ዎቲናካሬ ኣሳን ዳ̈ቻ̇ ጋርታ̇ ታ̈ና ጋዳ̇ሪ ኣጺሪምቦ ማስኮ̈ታ ካሪንባር ሶቢሲን ኢ ኩሽታፖ ቡ̈ታ̇ዴ።