Read basketo 2 ቆሮ 2 Bible Online

2 ቆሮ 2 - basketo bible

2 ቆሮ 2

¹ዪዚ ቴ ዪንታ̇̇ ሺን̇ ዎታብዳ ጋ̈ር ቆፓ̇ራ ዪንታ̇ ኦይጫ̇ንዳብ ማ̈ቃ ዬ̈ብዳ ጋ̈ር ዎሳ̇ናዴ።

²ዎይሊን ቴ ዪንታ̇ ሺን̇ ዎቲናካርዶን ቴ ሺን̇ ዎቲኖን ዪንታ̇ዶኬ ሜላ ታ̈ና ኡፋይሲ̇ዛ ኦ̈ኖ?

³ቴ ዪኒ̇ፌ̈ን ዪንታ̇̇ብ ጻ̈ፊኖንዳ ቴ ዪንታ̇̇ክ ዬ̈ዚምባራ ታ̈ና ኡፋይሳንዳብ ኮሺ̇ዝ ኣሳን ታ̈ና ሺን̇ ዎታካ̇ዮ̈ዲፌ̈ኔ፤ ቴ ኡፋይሲ̇ንዳ ዎይን ኡፋይስ ማ̈ቂ̇ኖን ታ ኣማ̇ና̈ሬ።

⁴ዎይሊን ኣዛ̇ናሙታ̇ኬ ጫና̇ቂንታ̇ሙታ̇ ማ ዎይሊን ኣብባራ ዪንታ̇̇ብ ዓና̇ ጻ̈ፊኖንዳ ቴ ዪንታ̇ ዎይሊን ካዛ ማ̈ቂ̇ኖን ዪንቲ̇ ኤራምፔ̇ንዶኬ ቴ ዪንታ̇ ሺን̇ ዎታንዳብ ኮያር ጊዳካ̇ዬ።

⁵ኣስ ሺን̇ ዎቲኖ ኣሲ ኦ̈ናካር ዎኮ ኢ ሺን̇ ዎቲኖንዳ ታ̈ና ሙታ̇ ጊዳካ̇ዬ፤ ቴ ሶ̈ሊን ዴጺሳንዳ ጊዳካ̇ይዶን ጊላ̇ካር ማ̈ቂ̇ን ዪንታ̇̇ ዎይን ሺን̇ ዎቲኔ።

⁶ዪ̈ፌ̈ኖ ና̈ሳ̈ቦ ዪንታ̇ ጋርታፖ̇ ዎይሊንን ፊርዲኖ ፊርዲን ኢ̈ብ ጊዳ̈ሬ።

⁷ዪ̈ኮታ̇ቦ ዪ̈ ና̈ሳ̈ዲ ዎይሊን ሺን̇ ጋ̈ሪ ፌ ኣማ̇ኒን ጋልዳፖ ኬዳካ̇ዮ̈ዲፌ̈ኒ ዪንቲ̇ ኢ̈ብ ኣቶ̇ ጋ̈ሪ ኢያ ሚን̇ንዳብ ኮሺ̈̇ሬ።

⁸ማ ዪንቲ̇ ኢያ ካዚን ኢ ኤራምፔ̈ን ዎቲብቴ ጋ̈ር ቴ ዪንታ̇ ጌሻ̈ሬ።

⁹ቴ ዪንታ̇̇ብ ጻ̈ፊኖንዳ ዪንቲ̇ ዎይ ባዝባራ ኤኤ ጋ̈ር ኪ̈ቲንቲ̇ዝ ኣስ ማ̈ቂ̇ኖን ማላ̇ር ቤቃ̇ንዳቦ።

¹⁰ዪንቲ̇ ኢ̈ብ ኣቶ̇ ጌይዝ ና̈ሳዲ ታ̈ናር ኢ̈ብ ኣቶ̇ ጋ̈ንዳ፤ ኪን ቴ ኢ̈ብ ኣቶ̇ ጋምፔ̈ኖ ባዚ̇ ዎኮ ክርስቶሳ ቲ̈ን ዪንታ̇ ጊሻ̇ቦ ጋ̈ራ ቴ ኢ̈ብ ኣቶ̇ ጋ̈ሬ።

¹¹ዪኖ̇ ቴ ዎታዚንዳ ሴ̈ጣናኮን ውጫ ኦ̈ሲ̇ን ኑ ኤሪ̈ዛኮታ̇ቦ ኢ ኑ̈ና ባሊ̇ካ̇ዮ̈ዲፌ̈ኒዬ።

¹²ታ̈ኒ ክርስቶ̈ሳ ዎጛሊን ታማ̈ርሳ̇ንዳቦ ጢሮኣዳ ካታሚን ጋርታ ሉኪ̇ን ጎዳ̈ዲ ታ̈ቦ ሻክ̇ ኦ̈ሳ̇ ካራ ፊርቂንዶ̈ን፤

¹³ዎቲናካሬ ታ̈ኒ ቴ ኢሻ ቲ̈ታ̇ ዬላ̇ካዮኮታ̇ቦ ታ̈ና ኡፋይሳካ̇ዬ። ዪ̈ኮታ̇ቦ ኢና ዎ ኣማኒ̇ኖ ኣሳን ሳሪራ ሜቂዶ̈ና ሉካ̇ዴ።

¹⁴ዎቲናካሬ ኑ̈ና ዎይ ጋላስ ክርስቶ̈ሳባር ጋሚዝ ኣስ ማሃር ቲ̈ኒዛ̈ብኬ ኮሽ ሳዉቂ̇ዝ ሺታ̇ፌ̈ን ክርስቶ̈ሳ ባዝ ኑ ኤራዚን ዎይ ዎይ ቤስ̇ ዬልምፔ̈ን ኑ̈ና ማ̈ዲ̇ዝ ጾ̈ሳ̇̇̈ቦ ጋላቲ ዬሎ̇።

¹⁵ኑ̈ኒ ፋጺዝ ኣሳንባር ማ̈ቂ̇ን ይዛንቦ ኮሽ̇ ሳዉቂ̇ዝ ሺታፌ̈ን ማ̈ቃ̇ር ክርስቶ̈ሳ ጎይባር ጾ̈ሳ̇ቦ ሺ̈ቂኖ ኣሴ።

¹⁶ኑ̈ኒ ዪዛንቦ ዎዝ ዓይቃ ሺታ፤ ፋጺዛንቦ ሼምፓ ኢሚ̇ዝ ሼምፓ ሺታ̇። ዪዚ ዪ̈ዲፌ̈ኖ ጴች ኦ̈ሳቦ ማ̈ቂ̇ዛ ኦ̈ኖ?

¹⁷ኑ̈ኒ ጾ̈ሳ̇ ቃ̈ሊን ዛላ ባዝፌ̈ን ማሂዝ ዎይሊን ኣሳንፌ̈ን ጊዳካዬ። ዎቲናካሬ ጾ̈ሳ̇ ቲ̈ናፖ̇ ኪ̈ቲንታ̇ር ዬይኖ ኮሽ̇ ኪ̈ታ̇ንቻ̇ንፌ̈ኒ ክርስቶ̈ሳባር ማ̈ቃ̇ር ጾ̈ሳ̇ ቲ̈ን ኪን ቡ̈ዳፖ̇ ሶ̈ሊ̈ሬ።