Read basketo 2 ቆሮ 5 Bible Online

2 ቆሮ 5 - basketo bible

2 ቆሮ 5

¹ዓና̇ ዉዳፌ̈ኖ ሜናብ ዶኣባሶ ኑ ኣይሺ̇ንዳ ዓይቃ̇ር ዬጌዪን ኣሳ ኩሽባር ጊዳካይዶን ጾ̈ሳ̇ ኩሽባር ኬ̈ጺንቲ̇ኖ ሜናብ ዶኢዝ ኬ̈ ኑብ ኣፋ ዎን ኑ ኤሪ̈ሬ።

²ኑ̈ኒ ጾ̈ሲ ኢማ̇ዝ ኣፎ ጋሊ̇ን ማኣንዳቦ ሹ̈ናባር ዳ̈ቡራር ና̈ጊ ዎ።

³ኑ̈ኒ ዪኖ̇ ኢዞ ዬላ̇ር ማኤጌይን ካላ̇[1] ማ̈ቃ̇ር ቤንቲ̇ባ̈ሴ።

⁴ዓና ዉዳፌ̈ኖ ሜናብ ዶኣባሶ ኑ ኣይሺ̇ንባር ዶኣምባራ ኑ̈ና ዴጺ̇ን ጪኪ̇ጚ̈ሬ። ኑ̈ኒ ዴጺ̇ን ጪኪ̇ጛዚንዳ ዓይቆ ሼምፓባር ኦ̈ሂንቲ̇ን ጾ̈ሲ̇ ኢማ̇ዝ ኣፎ ጋሊ̇ን ሺ ማኣንዳብዶኬ ዓና̇ ሳ̈ዝ ጋልዶ ኑ ኣይሺ̇ን ጋልዳፖ̇ ፋጊንታ̇ንዳብ ኮያር ጊዳካ̇ዬ።

⁵ዪዲፌ̈ኖ ባዛብ ኑ̈ና ጊ̈ጊሲኖ̈ዲ ጾ̈ሳ̇̇̈ዳ፤ ዪኒፓር ሺ ኑ̈ብ ጊዳን ኢሚንቲ̇ዝ ባዝ ዎይ̈ቦ ቃብዳ ማ̈ቃ̇ምፔ̇ን ፌ ኣያ̇ና ኑ̈ብ ኢሚ̇ዴ።

⁶ኑ ኣይሺ̇ንባር ዓይቃካ̇ይ ዎ ኬል̇ባር ኑ̈ኒ ጎዳ ጋልዳፖ̇ ጎታ̇ር ዎን ኤሪናካሬ ዎይ ጋላስ ኑ ኢባር ኣማ̇ኒንቲ̇̈ሬ።

⁷ኑ ዶኣዚን ኣማ̇ባርዶኬ ኣ̈ፍባር ቤቃ̇ር ጊዳካ̇ዬ።

⁸ኑ̈ኒ ሳ̈ዝ ጋልዶ ኑ ኣይሺ̇ን ጋልዳፖ̇ ፋጊንታ̇ሪ ጎዳ̈ባር ዶኣንዳ̇ቦ ኢኒ̇ቲ̈ሬ፤ ዪ̈ኮታ̈ቦ ኑ̈ኒ ኣማ̇ኒንታ̇ር ዶኢ̈ሬ።

⁹ዓና̇ ሳ̈ዶ ኑ ኣይሺ̇ንባራ ኑ ዶኢናር ዎይ ኢዝ ጋልዳፖ̇ ፋጊንቲናካሬ ኑ̈ኒ ጎዳ ኡፋይሳ̇ንዳብ ሙታ̇ ቆፒ̈̇ሬ።

¹⁰ኣባ ጌይን ኣሲ ዎይ ሳ̈ዝ ጋልዶ ፌ ዶኢምባራ ኦ̈ኖ ኢ̈ታ ባዛር ማቆ ኮሽ̇ ባዛቦ ፌ ኦ̈ሲንዲፌ̈ን ኤካ̇ንዳቦ ኑ ዎይ̈ን ክርስቶ̈ሳ ቲ̈ን ፊርዳብ ሺ̈ቃንዳ ኮሺ̇̈ሬ።

¹¹ኑ̈ኒ ጎዳ̈ቦ ኢ̈ጫ̇ዚን ኣብዝኮ ኤሪዛኮታ̇ቦ ኣሳንቦ ሶ̈ሊ ኣማ̇ንንዳቦ ቡቲቲ̈ሬ፤ ማ ኑ ኦ̈ብዝኮ ጾ̈ሲ ኑ̈ና ኤሪ̈ሬ። ዪንታ̇̇ር ዪንታ̇ ቡ̈ዳባራ ኑ ኣብዝኮ ኑ̈ና ኤሪ̈ሬ ጌያ ቆፓ̇̈ሬ።

¹²ቴ ዪና̇ ጌይኖንዳ ኑ ኑ̈ና ዪንታ̇ ቲ̈ን ኣንጃ̇ንዳብ ጊዳይካ̇ይዶን፤ ዪንቲ̇ ኑባር ኬርፋምፔ̈ኒ ጎይ ዪንታ̇̇ብ ፊርቂ̈ሬ፤ ዪ̈ዳሬ ቡ̈ዳ ጋርቶ̇ ባዝባር ጊዳካ̇ይዶን ዛ̈ና ቤንቲ̇ዝ ባዝባር ኬርፊዛንቦ ዪንቲ̇ ሶ̈ሊ ማሃንዳብ ዳንዳኣምፔ̈ኒዬ።

¹³ኑ ዣ̈ሾት ማ̈ቄጌዪናር ጾ̈ሳ̇ ጊሻ̇ቦ፤ ዣ̈ሾት ባዪ ኮሽ̇ ኣስ ማ̈ቄ̇ጌይናር ዪንታ̇ ጊሻ̇ቦ።

¹⁴ክርስቶ̈ሳ ካንንዳ ዎልቃባር ኑ ኢያ ካር ኢ̈ብ ኦ̈ምፔ̈ን ኑ̈ና ዎታ̈ሬ ኣባ ጌይን ፔቲ̇ ቶ̈ህ ክርስቶ̈ሲ ዎይንቦ ዓይቂ̇ኖንዶ ኑ ኤሪኔ፤ ዪ̈ኮታ̇ቦ ኑ ዎይ̈ን ኢባር ዓይቂ̇ኔ።

¹⁵ሼምፓባር ዎን ዎይ ኢንታ̇ ጊሻ̇ብ ዓይቂ̇ኖ̈ብኬ ዓይቃ ጋርታፖ̇ ዲንዲኖ̈ ኢያ ኡፋይሳ̇ንዳብዶኬ ዓኒፖ̇ ጌዳ ፌ̈ና ኡፋይሳ̇ንዳብ ዶኣካዮዲፌ̈ኒ ክርስቶ̈ሲ ዎይ̈ቦ ዓይቂኔ።

¹⁶ዓኒ̇ፖ̇ ጌዳ ኑ̈ኒ ኦ̈ናካር ማ̈ቂ̇ን ኣስ ጌይዛ ዎይ ኣሳ ቆፊፌ̈ን ቤቃ̇ንዳ ባዬ። ዓኒፖ̇ ቲ̈ን ኑ̈ኒ ኣስ ሜላንፌ̈ኒ ክርስቶ̈ሳ ኣሳ ቆፊባራ ቤቂ̇ኔኮ ዓኒፖ̇ ጌዳ ኑ ዪኒ̇ፌን ዎታንዳባዬ̇።

¹⁷ዪ̈ኮታ̇ቦ ኦ̈ናካር ኣሲ ክርስቶ̈ሳ ኣማ̇ኔጌይን ኦራ ሜንቴ፤ ቲ̈ኖ ሲላ ሜቲን ኣቲ̇ኔ ኢዝ ቤሲ̇ን ኦራ ሜቲ ዬይኔ።

¹⁸ዪ̈ ዎይ ማ̈ቂ̇ኖ̈ዲ ኑ̈ና ክርስቶ̈ሳ ጎይባራ ፌባር ኢጊንኖ ማ ሜላን ኢጊንዝ ኦ̈ሳ ኑ̈ብ ኢሚ̇ኖ ጾ̈ሳ̇ ጎይባራ።

¹⁹ዪ̈ዳሬ ጾ̈ሲ ክርስቶ̈ሳ ጎይባራ ኣላሚን ጋልዳ ዎ ኣስ ዎይ ፌባር ኢጊንኔ ጌንቴ፤ ማ ኢንታ̇ ናጋሪንዳ̇ር ፋይዳካይ ኣሺ̇ኔ። ኑ̈ባሬ ኣስ ጎዳባር ኢጊንምፔ̈ን ቃ̈ላ ኢሚ̇ኔ።

²⁰ኑ̈ኒ ክርስቶ̈ሳ ቤስ̇ ማ̈ቃ̇ሪ ኢ ባዝ ሶ̈ላንዳብ ኪ̈ቲንቲ̇ኖ ኣሴ፤ ጾ̈ሲ ኑባር ማ̈ቃ̇ሪ ዪንታ̇ ጼይጊ̈ሬ፤ ኑ̈ናሬ “ዪንቲ̇ ጾ̈ሳ̇̇̈ባር ኢጊንቲ̇ብቴ!” ጋ̈ሪ ክርስቶ̈ሳ ሱምባር ዪንታ̇ ጌሺ̈ሬ።

²¹ኑ̈ኒ ክርስቶ̈ሳ ጎይባር ጾ̈ሳ̇ ጺሊቲን ኤኪ̇ዛ ማ̈ቃ̇ምፔ̈ኒ ጾ̈ሲ ናጋራ ባዮ̇ ክርስቶ̈ሳ ናጋራንቻፌ̈ን ፋይዲዴ።