Read basketo 2 ቆሮ 7 Bible Online

2 ቆሮ 7 - basketo bible

2 ቆሮ 7

¹ታ ላጋ̇ን! ጾ̈ሲ̇ ዪ̈ ዎይ ታስፋ ኑ̈ብ ኢሚ̇ኖኮታ̇ቦ ኑ ኣሲቲን ቄ̇ዝ ባዝ ዎይ ጋልዳፖ̇ ኑ ኑ̈ና ጌ̈ሺ̇ስቶ፤ ጾ̈ሳ̇̇̈ቦ ኢ̈ጪ̇ሙታ̇ዶ̈ሪ ኑ ዉርሲ ጌ̈ሽ ማ̈ቃ̇ር ዶኢስቶ።

²ዪንታ̇ ቡዲን ኑ̈ብ ፊርቂ̇ብቴ፤ ኑ̈ኒ ኦ̈ባካር ኢ̈ት ኦ̈ካዬ፤ ኑ ኦ̈ባካር ባላ ባዝ ኦ̈ካዬ፤ ኑ̈ኒ ኦ̈ናካር ማቃ̇ር ባሊካ̇ዬ።

³ቴ ዪኖ̇ ጋ̈ዚንዳ ዪንታ̇ ጋልዳ ፊርዳንዳ̇ብ ጊዳካ̇ዬ። ዓኒፖ̇ ቲ̈ን ቴ ዪንታ̇̇ብ ሶ̈ሊኖንዲፌ̈ን ኑ ዪንታ̇ ዎይሊን ካ̈ሬ፤ ዪ̈ኮታ̇ቦ ኑ̈ኒ ሼምፓባር ዶኢ̇ር ማ̈ቂ̇̇ን ዓይቃ ኬ̈ልባራር ኑ ዪንታ̇̇ባር ዎ።

⁴ቴ ዪንታ̇̇ባር ኣማ̇ኒንታ̈ሬ፤ ዪንታ̇ባር ጴች ኦቲርቃ̈ሬ፤ ዪንታ̇̇ባር ሚ̈ጚንታ̈ሬ፤ ኑ̈ና ዬላ̇ዝ ሜቲ̇ን ዎይምባራ ዎይሊን ኡፋይታ̇̈ሬ።

⁵ኑ ሜላ ኣቲ̇ን ማቂዶ̈ና ዬላ̇ሪ ዎይሊን ጎይባራ ሜታ ኑ̈ና ዬሊ̇ንዶኬ ኣባካር ሼምፓካ̇ዬ፤ ኣማ̇ናካ̇ዮ ኣሳን ጋርታ ጎይሊ ኑ̈ብ ዎ፤ ማ ኑ ቡ̈ዲን ጋርታ̇ሬ ኢ̈ቺ̇ ኑ̈ብ ዎ።

⁶ዎቲናካሬ ኣዛኒኖን ሚ̈ንዝ ጾ̈ሲ ቲ̈ታ ኑ̈ክ ዬይኖ ጎባራ ኑ̈ና ሚ̈ንዴ።

⁷ኑ ሚ̈ጚንቲ̇ኖንዳሬ ኢ ዬንቲ̇ምባር ሙታ̇ ጊዳካ̇ይዶን ዪንቲ̇ ኢያ ሚ̈ንኖን ኑ ሲስኪ̇ኖንቦ፤ ዪንቲ̇ ታ̈ና ሹኒቲኖንዲኬ ታ̈ብ ዎይሊን ኣዛ̇ኒ ቆፒ̇ሙታ ዎን ኢ ታ̈ብ ሶ̈ሊን ሲስካ̈ራ ቲ̈ኖምፖ̇ ሺ ጴች ኡፋይታ̇ዴ።

⁸ዓኒፖ̇ ቲ̈ን ቴ ዪንታ̇ብ ጻ̈ፊኖ ኪቲ̇ን ዪንታ̇ ኣዛ̇ንሲኔካሬ “ቴ ዪኖ̇ ኣባቦ ጻ̈ፋዶ̇ኔ?” ጋ̈ራ ኣዛ̇ናባሴ። ቴ ኣዛ̇ኒናካሬ ታ̈ና ኣዛንኖንዳ ቴ ዪንታ̇̇ብ ጻ̈ፊኖ ኪ̈ቲንዳ ጊላ̇ ጊዛብ ዪንታ̇̇ ኣዛንኖኮታ̇ቦ።

⁹ዓት ዎቲናካሬ ቴ ኡፋይቲ̇ኔ። ቴ ኡፋይቲ̇ኖንዳ ቴ ዪንታ̇̇ ኣዛንኖን ጊሻ̇ብ ጊዳካ̇ይዶን ኣዛኒንዳ ዪንቲ̇ ማ̈ሪቲ ጌላሪ ላ̈ሚንታ̇ምፔ̈ን ዎቲኖንኮታ̇ቦ። ዪዚ ዪንታ̇ ኣዛኒ̇ንዳ ጾ̈ሳ̇ ቆፊፌ̈ን ማ̈ቂ̇ኖኮታ̇ቦ ኑ̈ኒ ዪንታ̇ ባላካ̇ዬ።

¹⁰ጾ̈ሳ̇ፖ̇ ማ̈ቂ̇ኖ ኣዛኒ ፋቲ ጎይ ዬልዝ ማ̈ሪቲብ ዬል̈ሬ፤ ኢዝ ጋርታ “ዓና ኣባብ ማ̈ቃ̇ዶ̇ኔ?” ጌይዝ ኣዛ̇ኒ ዶኢባ̈ሴ። ጾ̈ሳ̇̇̈ፖ ማ̈ቃካ̇ዮ ኣዛ̇ኖ ዓይቃ ኤሄይሬ።

¹¹ዪና ጾ̈ሲ ቆፊፌ̈ን ዪንታ̇ ዬሊ̇ኖ ኣዛኒንዳ ዎዛርፌ̈ኖ ሚ̈ንቲ፣ ዎዛርፌ̈ኖ ሶ̈ላር ኣማ̇ንንዳብ ማ̈ቂ̇ዝ ኤራ፣ ዎዛርፌ̈ኖ ጎይል፣ ዎዛርፌ̈ኖ ኢች፣ ዎዛርፌ̈ኖ ሹ̈ና፣ ዎዛርፌ̈ኖ ኮሻ ቂናታ̇፣ ናጋራ ጋልዳ ጾ̈ሲ ፊርዲን ቤቃ̇ንዳቦ ዎዛርፌ̈ኖ ኢና̇ ዪንታ̇̇ብ ኤሄይኖኮ ዪንቲ̇ ቤቂ̇ብቴ፤ ዪንቲ̇ ዪኒ̇ ጎይባራ ጌ̈ሻ̇ን ማ̈ቂ̇ኖን ዎይ ጎይባራ ዪንቲ̇ ማርኪሲኔ።

¹²ዪ̈ኮታ̇ቦ ቴ ዪንታ̇̇ብ ጻ̈ፊናካሬ ቴ ጻ̈ፊኖንዳ ዪንቲ̇ ኑ̈ና ዎዛርፌ̈ን ካ̈ርኮ ጾ̈ሳ̇ ቲ̈ን ዪንታ̇̇ብ ቤንታምፔ̈ን ጋ̈ርዶኬ ቴ ኢ̈ት ኦ̈ኔ ጋ̈ራ ዎይ ኢ ጋልዳ ኢ̈ት ኦ̈ንቲ̇ኖ ና̈ሳ̈ቦ ጋ̈ር ጊዳካ̇ዬ።

¹³ኑ̈ኒ ዪ ዎይ̈ባራ ሚ̈ንቲ ዲጚኔ። ኑ ሚ̈ንቲ ዲጚኖንፓሬ ሺ ቲ̈ታ̇ ኡፋይቲ̇ኖምቦ ኑ ሺ ኡፋይቲ̇ኔ፤ ኑ ኡፋይቲ̇ኖንዳሬ ዪንቲ̇ ዎይን ኢያ ሼምፒቺ̇ኖምቦ።

¹⁴ቴ ዪንታ̇̇ባር ኬርፋሙታ̇ ዎን ቴ ቲ̈ታ̇ብ ሶ̈ሊኔ፤ ዪንታ̇ር ታ̈ና ዬ̈ሊ̇ካዬ፤ ዎይ ጋላስ ኑ ዪንታ̇̇ብ ኪንን ሶ̈ሊ̈ሬ ዪ̈ዳሬ ኑ ዪንታ̇ ባዝ ቲ̈ታ̇ብ ሶ̈ሊኖ ኬራፊንዳ ኪን ማ̈ቂ̇ኖን ኤሪንቲ̇ኔ።

¹⁵ዪንቲ̇ ዎይን ኪቲ̇ንቲዝ ኣስ ማ̈ቂ̇ኖንዲኬ ኢ̈ጪ̇ ጋንዲሙታ̇ ኢያ ሞኪ̇ ኤኪ̇ኖን ቲ̈ቶ ኤልቅ ዎቲሙታ ኢ ዪንታ̇ ዎይሊን ካሬ።

¹⁶ታ̈ናር ዎይ ጎይባራ ዪንታ̇̇ባር ኣማ̇ኒንታንዳብ ዳንዳኢኖኮታ̇ቦ ሺ ታ̈ና ኡፋይሲ̇ኔ።