Read basketo 2 ቆሮ 8 Bible Online

2 ቆሮ 8 - basketo bible

2 ቆሮ 8

¹ኑ ኢሺንታ̇ን! ሜቂዶ̈ና ጋዳ̇ ዎ ዎ̈ሳ ኬ̈ንቦ ጾ̈ሲ̇ ፌ ኮሺ̇ቲባር ኦ̈ኖ ኦ̈ሲን ዪንቲ̇ ኤራምፔ̈ን ኑ ኮዪ̈ሬ።

²ኢንቲ̇ ዎሊን ሜታ ቤቂ̇ኔ፤ ማ̈ቂናካሬ ኢንታ̇ ኡፋይሳ̇̈ዲ ጴቼ̇፤ ኢንቲ̇ ዎርባያ ማ̈ቂ̇ናካሬ ዶሳሪ ዎይሊን ኢሚ̇ኔ።

³ፌ̈ብ ዳንዳኢንቲ̇ኖንዲፌ̈ንኬ ማ ኢዝፓር ሺ ዶሳር ኢሚ̇ኖምቦ ታ̈ኒ ኢንታ̇ብ ማርካ።

⁴ኢንቲ̇ “ዪሁዳ ዎ ኣማ̇ኒዝ ኣሳን ኑ ኢንታ̇ ማ̈ዳ̇ዚን ኑ̈ና ካያፒ̇ቴ” ጋ̈ሪ ሚ̈ንር ኑ̈ና ጌሺዴ።

⁵ኢንቲ̇ ኦ̈ኖ ኦ̈ሳ̈ዲ ኑ̈ኒ ቆፒ̇ኖምፖ̇ ሺ፤ ኢንቲ̇ ቲ̈ኒታር ፌ̈ና ጾ̈ሳ̇̇̈ቦ ኣ̈ ኢሚ̇ዴ። ኢናፖ̇ ጾ̈ሲ ጌዪኖንዲፌ̈ን ኑ̈ብ ፌ̈ና ኣ̈ ኢሚ̇ዴ።

⁶ዓና̇ ኦሲ̇ን ቲ̈ኒታር ኤ̈ኖዲ ቲ̈ታ̇ ማ̈ቂ̇ኖኮታ̇ቦ ኦ̈ሲ̇ን ዉርሲን ዬልምፔ̈ን ኑ ኢያ ጌሺኔ።

⁷ዪንቲ̇ ኣማ̇ናባራ፣ ሶ̈ላባራ፣ ኤራባራ፣ ሚ̈ጛር ኦ̈ሳባራ፣ ኑ̈ብ ዎ ካንምባራ ዎይ ባዝባር ሺር ቤንቲ̇ኖንዲፌ̈ኒ ዓታ̇ር ዓና̇ ሚሻ̇ባር ኣስ ማ̈ዲ̇ዝ ኦ̈ሲምባራሬ ዎይፖ̇ ሺር ቤንቲ̇ብቴ።

⁸ዓት̇ ዓና̇ ታ ጋ̈ዚንዳ ዪንታ̇ ኪ̈ታ̇ባሴ። ዎቲናካሬ ሜላን ኢማ̇ዚን ቤቃ̇ንዳብኬ ዪንቲ̇ ኢማ̇ዚን ቤቃ̇ምባራ ዪንታ̇ኮ ካንን ኪን ማቂ̇ኖን ኤራንዳቦ።

⁹ኑ ጎዳ ዬሱ̈ስ ክርስቶ̈ሳ ኮሺ̇ቲን ዪንቲ̇ ኤሪ̈ሬ። ኢ ዎርባያ ማ̈ቂ̇ን ዪንቲ̇ ዱር ማ̈ቃ̇ምፔ̈ን፤ ኢ ዱርዶሪ ዪንታ̇ ጊሻ̇ቦ ጋ̈ሪ ዎርባያ ማ̈ቂ̇ኔ።

¹⁰ዪ̈ኮታ̇ቦ ዓኒ̇ ጎይባር ዪንታ̇ ማ̈ዳ̇ምፔ̈ኖ ዞራ ቴ ዪንታ̇̇ብ ኢሞ፤ ዚኔቤር ዪንቲ̇ ኢማ̇ንዳብ ሙታ̇ ጊዳካ̇ይዶን ዓኖ̇ ኦ̈ንዳቦ ቲ̈ኒታር ቆፒ̇ኖን ዪንታ̇̇።

¹¹ዓታ̇ር ዪንቲ̇ ኤ̈̇ኖ ኦ̈ሲ̇ን ፎቲብቴ፤ ዪንቲ̇ ኢማ̇ንዳ ጌይ ቆፒ̇ኖን ዎይ ኦ̈ሳ ጋል ፌ̈ሺ̇ብቴ።

¹²ፔቲ̇ ኣሲ ፔ̇ቲ̇ ባዝ ኢማ̇ንዳ ጌይዝ ኮሻ̇ ቆፊ ኢ̈ብ ዎኮ ጾ̈ሲ ና̈ሳ̈ዲ ፌ̈ብ ዎንዲፌ̈ን ኢሞ̇ ጌይርዶኬ ባዮ̇ ባዝ ኢሞ̇ ጋ̈ባሴ።

¹³ዪና̇ ታ ጋ̈ዚንዳ ዎይን ዎልፌ̈ን ማ̈ቃ̇ምፔ̈ንዶኬ ዪንቲ̇ ኢማ̇ንዳ̇ብ ሜቲንቲን ሜላን ሼምፖ ጋ̈ር ጊዳካ̇ዬ።

¹⁴ጊዳን ዪንቲ̇ ሜቲንታ̇ምባራ ኢንታ̇ ቆሊን ዪንታ̇ ሜታ̇ብ ፌ̈ሽካ̇ምፔ̈ኒ ዓት ማ ዪንታ̇ ቆሊን ኢንታ̇ ሜታብ ፌ̈ሽካጋ̈ቤ። ዪዚ ዪኒ̇ባራ ዪንቲ̇ ኢንታ̇ባር ዎልፌ̈ን ማ̈ቂ̇ሬ።

¹⁵ዪዳሬ “ዎይሊን ሺ̈ሺ̇̈ኖ̈ባሬ ሺካዬ፤ ጊላ̇ ሺ̈ሺ̇̈ኖ̈ባር ጉ̈ጻካዬ” ጋ̈ሪ ጻ̈ፊንቲ̇ኖንዲፌ̈ኔ።

¹⁶ቴ ዪንታ̇̇ብ ቆፓ̇ዚንዲፌ̈ኒ ቲ̈ታ̇ሬ ዪንታ̇̇ብ ፌ ቡ̈ዳ ጋርታፖ̇ ቆፓ̇ምፔ̈ን ዎቲኖ ጾ̈ሳ̇̇̈ቦ ጋላቲ ዬሎ̇።

¹⁷ቲ̈ቶ ዪንታ̇̇ክ ዬ̈ዚንዳ ፌ ቡ̈ዳባር ቆፓ̈ሪ ኡፋይስባር ዬይርዶኬ ኑ ኢያ ጌሺኖንኮታ̇ብሙታ̇ ጊዳካ̇ዬ።

¹⁸ዎጛላ ኦ̈ሳባራ ዎ̈ሳኬ̈ ዎይ ጋርታ ኣንጂንቲ̇ኖ ኑ ኢሻ̈ዳር ኢባር ኑ ዪንታ̇̇ብ ሚሻንዳ።

¹⁹ዪፖ̇ ኣ̈ሪ ዪ̈ ኑ ኢሻ̈ዲ ኑባር ሉካ̇ሪ ኑ ኦ̈ዝ ኦ̈ሲን ኑባር ኦ̈ምፔ̈ኒ ዎ̈ሳ ኬ̈ን ኢያ ማራ̇ጺኔ። ኑ̈ኒ ዪኖ̇ ኮሻ̇ ኦ̈ሲ̇ን ኦ̈ዚንዳ ጾ̈ሳ̇ ቦንቻ̇ብኬ ኢንታ̇ ማ̈ዳ̇ንዳብ ኑ̈ብ ዎ ኢኒ̇ን ቤይሳንዳቦ።

²⁰ዪኖ̇ ኣሳን ዶሳር ኢሚ̇ኖ ሚ̈ሺ̇ን ኣሳንቦ ፋጊ ኢማ̇ምባራ ኣሲ ኑ ጋልዳ ኢ̈ታ ሱም ጋዳካ̇ይፌ̈ኒ ኑ ኑ̈ና ና̈ጊ̈ሬ።

²¹ኑ̈ኒ ጎዳ ቲ̈ን ሙታ̇ ጊዳካ̇ይዶን ኣሳ ቲ̈ናሬ ኮሽ ማ̈ቂ̇ኖ ባዝ ኦ̈ንዳቦ ቆፒ̈ሬ።

²²ዎይ ጋላስ ዎይ ጎይባራ ማሊ̇ ቤቃ̇ምባራ ኦ̈ሳብ ሚ̈ን ማ̈ቂ̇ኖ ኑ ኢሻ ዓ̈ዳ ኑ ኢያ ቲ̈ታ̇ባሮንባር ሚሺኖን ዪኒኮታ̇ቦ፤ ኢ ዪንታ̇ባር ዎይሊን ኣማ̇ኒንቲ̇ዛኮታ̇ቦ ዓኒ ኦ̈ሲ̇ምባራ ማ̈ዳንዳቦ ኢ̈ብ ዎ ሚ̈ንቲንዳ ቲ̈ኖንፖ̇ ሺ̈ሬ።

²³ቲ̈ታ̇ ባዝ ኤራንዳ ኮዬጌዪን፥ ኢ ዪንታ̇ ማ̈ዳ̇ንዳብ ታባር ዎልኣ ኦ̈ዛ ታ ላጋ̈̇ዳ። ኢባር ዬይዛን ሜላን ኣማ̇ኒኖ ኢሺንታ̇ንር ማ̈ቂ̇ን ኢንቲ̇ ዎ̈ሳ ኬ̈ ሱምባራ ኪ̈ቲንቲ̇ኖ ክርስቶ̈ሳ ቦንቻ̇ብ ኤቂ̇ኖ ኣሴ።

²⁴ዪ̈ኮታ̇ቦ ዪንታ̇ ካንን ኢንታ̇ብ ቤይሲብቴ፤ ዪኒባራ ዪንታ̇ ካንዲኬ ኑ ዪንታ̇ ጋልዳ ኦቲርቃዚን ሜላ̇ ባይ ማ̈ቂ̇ኖን ዎ̈ሳ ኬ̈ን ኤርሲብቴ።