Read basketo ጋላ̈ 2 Bible Online

ጋላ̈ 2 - basketo bible

ጋላ̈ 2

¹ታ̈ጶ ኦይዲ̇ ላይፖ̇ ዎሃ ባርናባ̈ሳባር ዎልኣ ዬሩሳ̈ላማ ማ̈ቃ̇ ሉካ̇ዴ፤ ቲ̈ታ̇ር ታባር ኤካ̇ር ሉካ̇ዴ።

²ቴ ዬሩሳ̈ላም ሉኪ̇ኖንዳ ጾ̈ሳ̇̇̈ዲ ቴ ኢና ሉካ̇ምፔ̈ኒ ሳጻባር ታ̈ና ቤይሲኖኮታ̇ቦ። ኣይሁድ ባዮ̇ ኣሳንብ ሳባ̇ካዝ ዎጛሊን ዎዛርፌንኮ ዎ̈ሳ ኬ̈ን ቲ̈ኒዝ ኣሳን ጋርታ̇ፖ̇ ኤሪንቲ̇ኖ ኣሳን ሺ̇̈ሻ̇ራ ኢንታ̇ብ ዱማ ሶ̈ላዴ። ዪና̇ሬ ዓኒ̇ፖ̇ ቲ̈ን ቴ ኦ̈ኖ ኦ̈ሳንር ማ̈ቂ̇ን ዓት ኦ̈ዝ ኦ̈ሳን ሜላ̇ ኣታካ̇ይፌ̈ኔ።

³ታባር ዎ ቲ̈ቶ̇ ጊሪ̈ክ ጋዶ̇ ኣስ ማ̈ቂ̇ናካሬ “ኢ ጋራ̇ዚንቶ̇” ጋ̈ሪ ኢያ ዋ̈ዪኖ ኣሲ ባዬ̇።

⁴ዎቲናካሬ ኪን ኣማ̇ኒዝ ኣስ ማይጻር ፌ̈ና ኤሪሳካይዶር ኣ̈ቺንታ̇ር ኑ ጊዳ̇ ጌሊኖ ኣስ ባሊዝ ፔቲ̇ ፔቲ̇ ኣሳን ኢ ጋራ̇ዚንታምፔ̈ን ኮዪንዶን። ዪን ኣሳን ኑ ጊዳ̇ ጌሊኖንዳ ዬሱ̈ስ ክርስቶ̈ሳባር ኑ̈ኒ ናጻ ኬስኪ̇ኖን ጋርታ̇ፖ̇ ማሃር ኑ̈ና ኣይላ ማሃንዳ̇ብ ቆፓ̇ር ዎቲኔ።

⁵ኑ ዪንታ̇ብ ሶ̈ሊኖ ኪን ዎጛሊን ዪንታ̇ባር ሚ̈ጛር ዶኣምፔ̈ኒ ሜል ኣቲ̇ን ጊላ̇ ሳኣ̈ታብ ዪና̇ ኢንታ̇ ቆፊን ኤኤ ጌዪ ኤካካ̇ዬ።

⁶ዓን ዎ̈ሳ ኬ̈ን ቲ̈ኒዝ ኣሳን ቴ ሶ̈ላዝ ዎጛሊን ጋልዳ ኣባካር ኦራ ባዝ ጉጃካ̇ዬ። ጾ̈ሲ ኣሳ ኣ̈ፋብ ዬ̈ልቃ̇ር ኦ̈ባ̈ሶኮታ̇ቦ፤ ኢንቲ ኦ̈ናካር ማ̈ቂናካሬ ኢንታ ባዚ ታ̈ና ሜቲባ̈ሴ።

⁷ዎቲናካር ጾ̈ሳ̇̇̈ዲ ጴ̈ጥሮ̈ሳ ኣይሁዳንቦ ጾ̈ሳ̇ ቃሊን ሶ̈ላምፔን ዓዳራ ኢሚ̇ኖንዲፌ̈ኒ ታ̈ናር ማ ኣይሁድ ባዮ̇ ኣሳንቦ ጾ̈ሳ̇ ቃ̈ሊን ሶ̈ላምፔ̈ን ዓዳራ ኢሚ̇ኖን ኢንቲ ኤሪዴ።

⁸ጴጥሮ̈ሳ ኣይሁዳንቦ ሃዋ̈ራ ማ̈ቃ̇ምፔ̈ን ዎቲኖ ጾ̈ሳ̇̇̈ዲ ታ̈ናሬ ኣይሁድ ባዮ̇ ኣሳንቦ ሃዋ̈ራ ማ̈ቃ̇ር ኦ̈ሳ̇ምፔ̈ን ዎቲኔ።

⁹ዎ̈ ኬ̈ን ቲ̈ኒዛን ቱ̈ሳፌ̈ን ማ̈ቃ̇ር ዎን ዓይቆ̈ባ፣ ጴ̈ጥሮ̈ሳኬ ዋ̈ኒ̇ሳሬ ጾ̈ሲ ኑ ኦ̈ሲን ዎዛርፌ̈ን ኣንጂኖኮ ቤቃ̇ሪ ታባርኬ ባርናባ̈ሳባራ ኦ̈ንዳብ ዶሲኖን ቤይሲዝ ማላ̇ ፌ ኡሻ̇ቻ ኩሺን ኑ̈ብ ኢሚ̇ዴ። ኢናፖ̇ ኑ̈ኒ ኣይሁድ ባዮ̇ ኣሳን ጋርታ̇ ሉካ̇ምፔ̈ኒ ኢንቲ ማ ኣይሁዳን ጋርታ ሉካ̇ንዳቦ ዎልኣ ሶ̈ሊንቲ̇ዴ።

¹⁰ኢንቲ ኑ̈ና ሚ̈ን ጌሺኖንዳ ኑ̈ኒ ኢና ዎ ዎርባያን ቦቲጛካይፌ̈ን ሙታ̇። ዪኖ̇ ታ̈ናር ኢዞ ኦ̈ንዳብ ዎይሊን ኢና̇ ታ̈ብ ዎ።

¹¹ፔቲ̇ ጋላስ ጴ̈ጥሮ̈ሲ ኣንጾ̈ካ ካታማ ዬይን ኢ ባሊቲ̇ኖኮታ̇ቦ ፋል̇ ኢያ ጎይላዴ።

¹²ዓይቆ̈ቢ ኪ̈ታ̇ር ሚሺኖ ፔቲ̇ ፔቲ̇ ኣሳን ኣንጾ̈ካ ዬ̈ዚምፖ̇ ቲ̈ን ጴ̈ጥሮ̈ሲ ኣይሁድ ባዮ̇ ኣሳንባር ዎልኣ ሙይርዶን፤ ኢንቲ ዬዪኖፖ̇ ዓኒ “ኣይሁድ ባዮ̇ ኣሳን ጋራ̇ዚንታ̇ንዳብ ኮሺ̇̈ሬ” ዪዝ ጌይዝ ኣይሁዳንቦ ኢ̈ጫ̇ር ጋስ ዴጫሪ ኣይሁድ ባዮ̇ ኣሳን ጋልዳፖ̇ ፋጊንቲ̇ዴ።

¹³ፔቲ̇ ፔቲ̇ ኣማ̇ኒዝ ኣይሁድ ኣሳን ጴ̈ጥሮ̈ሲ ዎቲኖንዲፌ̈ኒ ኢንታ̇ር ማይጺሲ ኤ̈̇ዴ። ሜል ኣቲ̇ን ባርናባ̈ሳር ኣታካ̇ይዶር ዪኒ̇ፌ̈ኖ ማይጺስ ኦ̈ሲን ጋርታ ቡሺንቲ̇ዴ።

¹⁴ኢንታ ኦ̈ሲንዳ ኪን ዎጛሊምባር ሉካ̇ባሶን ቤቃ̇ራ ጴ̈ጥሮሳኮ “ኔ̈ኒ ኣይሁድ ኣስዶራ ኣይሁዳን ዎጊን ኣሻ̇ራ ኣይሁድ ባዮ̇ ኣሳንፌ̈ን ዶኣርዶራ፥ ኣይሁድ ባዮ̇ ኣሳን ኣይሁዳን ዎጊንባራ ዶኣምፔ̈ን ኣባብ ዋዪ̈ራ?” ጋ̈ራ ኢንታ ዎይን ቲ̈ን ኢያ ጎይላዴ።

¹⁵“ኑ ዜርንዳ̇ ኣይሁዴ፤ ኑ̈ኒ ናጋራንቻ ጌዪ ኢንታ̇ ጼይጊዝ ኣይሁድ ባዮ̇ ኣሳንፌ̈ን ጊዳካ̇ዬ።

¹⁶ዎቲናካር ኣሲ ጺላ̇ዚንዳ ዬሱ̈ስ ክርስቶ̈ሳ ኣማ̇ናርዶኬ ሙ̈ሳ ሂጊ̇ን ኦ̈ ፎታር ጊዳካ̇ዮን ኑ ኤሪ̈ሬ። ኑ̈ናር ሂጊ̇ን ኦ̈ ፎታር ጊዳካይዶን ክርስቶ̈ሳ ኣማ̇ናር ጺላ̇ንዳቦ ኢያ ኣማ̇ኒኔ። ኣባጌዪን ኣሲ ኦ̈ናካር ሙ̈ሳ ሂጊ̇ን ኦ̈ ፎታር ጺሊ̇ባ̈ሴ።

¹⁷“ዪዚ ኑ̈ኒ ክርስቶ̈ሳ ኣማ̇ናር ጺላ̇ንዳብ ኮዪዛኮታ̇ቦ ኑ ኣይሁዳንር ማ̈ቂ̇ን ናጋራንቻ̇ ማ̈ቂ̇ኖን ቤይሳ̈ሬ፥ ዪዚ ዪ̈ዶኮ ኑ̈ና ናጋራ ኦ̈ሲዛ̈ዲ ክሪስቶ̈ሲያ? ዋኣኬ ዉርሲ ኢያ ጊዳካ̇ዬ!

¹⁸ቲ̈ን ታ ኣሺ̇ኖ ሂጋ̇ ዎጊን ማሃር ኦ̈ዛ ማ̈ቄ̇ጌዪን ቴ ቴ ቆሚ̇ን ሂጊ̇ን ላ̈ሊ̇ኖ ኣስ ማ̈ቂ̇ኖን ቴ ቴ ጋልዳ ማርኪታ̈ሬ።

¹⁹ኣባጌዪን ታ̈ኒ ጾ̈ሳ̇̈ብ ዶኣንዳ ጋ̈ራ ሂጊ̇ን ጎይባራ ኣሲ ዓይቃባር ፋጊንታ̇ዚንዲፌ̈ን ቴ ሂጊ̇ን ጋልዳፖ̇ ፋጊንቲ̇ኔ።

²⁰ቴ ታ̈ና ክርስቶ̈ሳባር ሶቲንቲ̇ኖ̈ዲፌ̈ን ማሃ ፋይዳ̈ሬ። ዓኒፖ̇ ጌዳ ክርስቶ̈ሲ ታባር ዶኢ̈ርዶኬ ዓት ሼምፓ̇ባራ ዎ̈ዲ ታ̈ና ጊዳካ̇ዬ። ታ ዓት ሼምፓ̇ባር ሳ̈ዝ ጋልዳ̇ ዶኣዝ ዶኢንዳ ታ̈ና ካሪ ቴኮታ̇ቦ ፌ̈ና ኣ̈ር ኢሚ̇ኖ ጾ̈ሳ̇ ና̈ኣ ኣማ̇ናር ዲጚኖ ሼምፓባር ዎ ዶኢ።

²¹ታ̈ኒ ጾ̈ሳ̇ ኮሺ̇ቲንዶ ሜላ ዓሪ ቡጊዴ ኣሻ̇ባሴ፤ ኣሲ ሙ̈ሳ ሂጊ̇ን ኦ̈ ፎታር ጺሊ̇̈ርፌ̈ንኮ ክሪስቶሲ ዓይቂ̇ኖ̈ዲ ሜላ̇ ዓሪዬ።