Read basketo ጋላ̈ 3 Bible Online

ጋላ̈ 3 - basketo bible

ጋላ̈ 3

¹ጋላ̈ታ ኣሳን ቦ̈ዛን! ዪንታ̇ ቢቲኖ ኦ̈ኖ? ዬሱ̈ስ ክርስቶ̈ሲ ዪንታ̇ቦ ጋ̈ሪ ማስቃ̇ላ ጋልዳ̇ ሶቲንቲ̇ኖንዶ ቴ ዪንታ̇ ኮሺንቻ ታማ̈ርሳካ?

²ቴ ዪንታ̇ ጋልዳፖ̇ ፔቲ̇ ባዝ ሙታ̇ ኤራንዳ ኮያ̈ሬ፤ ዪንታ̇ብ ጌ̈ሻ̇ ኣያ̇ና ኢሚ̇ንቲ̇ኖ̈ዲ ዪንቲ ሂጊ̇ን ና̈ጊ ፎቲኖን ጊሻብቤ̇ ዎይ ኑ ዪንታ̇ብ ጾ̈ሳ̇ ቃ̈ሊን ሶ̈ሊኖን ሲስካ̇ር ዪንቲ̇ ኣማ̇ኒኖምቢ̇ያ?

³ዪንቲ ጌ̈ሻ̇ ኣያ̇ናባራ ኣማ̇ና ማ̈ቂ̇ዴ፤ ዓት ዪንቲ̇ ዪንታ̇ ዎልቃ̇ባራ ዲጫ̇ንዳብ ኮዪ̈ራ? ዪን̇ቲ ፌብ ዓፌን ዎይ ዳሻባያ!

⁴ዪንቲ ኤኪ̇ኖ ዓ ዎይ ሜታ̈ ሜላ̇ ዓሪ ኣቴ̇? ዪ̈ፌን ዪንቲ ዎቲዝ ባዝ ማ̈ቄጌይን ኪን ሜላ̇ ኣቲ̇ኔ።

⁵ጾ̈ሲ ፌ ኣያ̇ና ዪንታ̇ብ ኢማ̇ዚንዲክ ዪንታ̇ ጊዳ̇ ታ̈ሚ̇ራ̈ታ ኦ̈ዚንዳ ዪንቲ ሂጊ̇ን ፎቲኖንኮታ̇ብቤ̇ ዪንቲ ዎጛላ ሲስካ̇ሪ ኣማ̇ኒኖን ኮታ̇ቢያ?

⁶ዪ̈ዳሬ “ኣብራሃ̈ሚ ጾ̈ሳ̇ ኣማ̇ኒዴ፤ ጾ̈ሳ̇̇ዳር ኢያ ጺላ̇ ኣስ ማ̈ሳር ፋይዲዴ” ጋ̈ር ጻ̈ፊንቲ̇ኖንዲፌ̈ኔ።

⁷ዪዚ ኣማ̇ኒዝ ኣሳን ኣብራሃ̈ማብ ናኢ ማ̈ቂ̇ኖን ዪንቲ̇ ኤሪብቴ።

⁸ኣይሁድ ባዮ̇ ኣሳን ኣማ̇ናባር ጺላ̇ዚን ጾ̈ሳ̇ ቲ̈ኒታር ጌ̈ሻ̇ ማጻ̈ፋ ጋልዳ “ዎርዣ ዎይ ኔ ጎይባር ኣንጂንቲሬ̈” ጋ̈ር ኣብራሃ̈ምቦ ዎጛላ ሶ̈ሊኔ።

⁹ዪ̈ኮታ̇ቦ ኣማ̇ኒዝ ኣሲ ዎይ ኣማ̇ኒኖ ኣብራሃ̈ማባር ኣንጂንቲ̈̇ሬ።

¹⁰“ሙ̈ሳ ሂጋ̇ ማጻ̈ፋ ጋልዳ ጻ̈ፊንቲ̇ኖ ኪ̈ታን ዎይ ና̈ጊ ፎቲባ̈ሶ ኣሲ ዎይ ባ̈ዲንቲኖ̈ዳ” ጋ̈ሪ ጻ̈ፊንቲኖኮታ̇ቦ “ኑ̈ኒ ሂጋ̇ ና̈ጊ ፎታር ጺላ̇ንዳ” ጌይዛን ዎይ ባ̈ዲንቲኖን።

¹¹“ኣማ̇ናባር ጺሊ̇̈ኖ ኣሲ ሼምፒ̇ ዲጚ̈ሬ” ጌዪ ጻ̈ፊንቲ̇ኖኮታ̇ቦ ኦ̈ናካር ኣሲ ሂጋ̇ ና̈ጊ ፎታሪ ጾ̈ሳ̇ ቲ̈ን ጺላ̇ንዳ ዳንዳኢባ̈ሴ።

¹²ሂጋ̇ ኦ̈ሳኬ ኣማ̇ናኬ ዱማ ዱማ፤ ኢንታ ዎል ዬልዝ ባዚ ባዬ፤ “ኣሲ ሂጋ̇ባር ዶኣንዳብ ዳንዳኢዛ̈ዲ ሂጊ̇ን ኪ̈ቲን ዎይ ፎቴ̇ጌዪንዶ” ጋ̈ሪ ጻ̈ፊንቲኔ።

¹³ጌ̈ሻ̇ ማጻ̈ፋ ጋልዳ ̇“ሚ ጋልዳ ሶቲ̇ንታ̇ር ዓይቂ̇ዝ ኣሲ ዎይ ባ̈ዲንቲ̇ኔ” ጌዪ ጻ̈ፊንቲ̇ኖኮታ̇ቦ ክርስቶ̈ሲ ኑኮታ̇ቦ ባ̈ዲንቲ̇ኖ ማ̈ቃ̇ር ሂጊ̇ ኑ̈ና ባዲ̇ኖን ጋልዳፖ̇ ኑ̈ና ዎዚኔ።

¹⁴ዪና̇ ማ̈ቂ̇ኖንዳ ጾ̈ሲ ኣብራሃ̈ማብ ኢሚ̇ኖ ኣንጃ̇̈ዲ ዬሱ̈ስ ክርስቶ̈ሳ ጎይባር ኣይሁድ ባዮ̇ ኣሳንቦ ዬላ̇ምፔ̈ንኬ ጾ̈ሲ ኢማ̇ንዳ ጌዪ ቃ̈ላ ጌሊኖ ጌ̈ሻ̇ ኣያ̇ና ኑ ኣማ̇ናባር ኤካ̇ምፔ̈ኔ።

¹⁵ቴ ኢሺንታ̇ን! ዪዚ ኑ ዎይ ኤሪዝ ባዝ ጋርታ̇ፖ̇ ፔቲ̇ ባዝ ሚሳ̇̈ሊ ኤካ̇ስቶ፤ ፔቲ̇ ኣሲ ኣባክ ኢማ̇ንዳ ጋ̈ር ቃ̈ላ ጌሊኖ ባዚን፥ ቃላ ጌሊኖፖ̇ ዓኒ ኣሻ̇ንዳቦ ዎይ ኢዝ ጋልዳ ጉጃ̇ንዳቦ ዳንዳኢባ̈ሴ።

¹⁶ጾ̈ሳ̇̇̈ዳሬ ኣብራሃ̈ማብኬ ኢ ዜርቦ ኢማ̇ንዳ ጋ̈ሪ ቃ̈ላ ጌሊኖንዳ ዪ̈ና̇ ኢዝፌ̈ኔ። ጾ̈ሲ̇ ዎይሊን ኣሳብ ሶ̈ሊዛ̈ዲፌ̈ን ማሃሪ “ኔ ዜርንቦ” ጋ̈ባሴ፥ ፔቲ̇ ኣሳቦ ሙታ̇ ሶ̈ሊዛ̈ዲፌ̈ኒ ማሃሪ “ኔ ዜርቦ” ጌዪ ሶ̈ሊ̈ሬ። ዪ̈ዲ “ኔ ዜር” ጌዪንቲ̇ኖ̈ዲ ክርስቶ̈ሳ።

¹⁷ዪዚ ቴ ጋ̈ዚንዳ፥ ኦይዲ ጼ̈ታክ ዓይዚ̇ ታ̈ጳ ላይፖ̇ ዎሃ ዬይኖ ሂጊ̇ንዳ ቲ̈ን ጾ̈ሲ̇ ጫ̈ቂ̇ኖ ጫ̈ቂን ኣሺሻራ ኢ ኢሚ̇ኖ ታስፋ ቃ̈ሊን ይሳ̇ንዳብ ዳንዳኣባሴ።

¹⁸ዪዚ ጾ̈ሲ̇ ኣሳብ ፔቲ̇ ባዝ ኢሚ̇ዛ̈ዲ ኣሲ ሂጋ̇ ና̈ጊኖ̈ኮታ̇ቦ ጊዳካ̇ይዶ̈ን ኢ ኢማ̇ንዳ ጌዪ ቃ̈ላ ጌሊኖኮታ̇ቦ ኢሚ̇̈ሬ። ዪና̇ ኢዝፌ̈ኒ ጾ̈ሲ̇ ኣብራሃ̈ማቦ ኢማ̇ንዳ ጌይኖን ኢሚ̇ኖ̈ዲ ጾ̈ሲ ቲ̈ን ኢ̈ቦ ታስፋ ቃ̈ላ ጌሊኖኮታ̇ቦ።

¹⁹ዓት ዪዶኮ ሂጎ̇ ኣብዛብ ኬስኪ̇ና? ሂጎ̇ ዎሃ ኬስኪ̇ኖንዳ̇፥ ኢታ ኦ̈ሳ ጌይዛን ዎንኮ ኤርሳንዳቦ። ዪና̇ ሂጊ̇ን ማ̈ዲ̇ኖንዳ̇ ጾ̈ሲ ኣብራሃ̈ማብ ዎሃ ኢማ̇ንዳ ጌይኖ ዜር ዬይዝ ዲራሴ። ሂጎ̇ ጾ̈ሳ̇̇ብኬ ኣሳብኬ ጊዳ̇ ጌላሪ ኢንታ̇ ዎል ዬልዛ ሙ̈ሳቦ ጾ̈ሳ̇̇ ኪ̈ታንቻ̇ን ጎይባራ ኢሚ̇ንታ̇ሪ ኦ̈ሳ ጋልዳ ፌ̈ሽኪ̇ኔ።

²⁰ዪዚ ጊዳ̇ ጌላሪ ኢጊንዝ ኣሲ ጌዳር ዓናር ዎይን ኡፋይሳ̇ንዳብዶኬ ፔታ̇ና ሙታ̇ ኡፋይሳ̇ንዳብ ጊዳካ̇ዬ፤ ዎቲናካር ጾ̈ሳ̇̇̈ዲ ፔታ̇ኔ።

²¹ዪዚ ሂጎ̇ ጾ̈ሲ ኢሚ̇ኖ ታስፋ ቃ̈ሊን ኣሺሻ̈ራ? ዉርሲ ኣሺሻባሴ! ሼም̇ፓ ኢሚ̇ዝ ሂጋ̇ ኬስኪኖኮ ዎኒ ጺሊቲ ሂጋ̇ ጎይባር ቤንቲርዶ̈ን።

²²ዎቲናካር ጌ̈ሻ ማጻ̈ፋ ጋልዳ̇ ጻ̈ፊንቲ̇ኖ̈ዲፌ̈ኒ ኣሲ ዎይ ናጋራባር ቃቺንቲ̇ኔ ዪ̈ኮታ̇ቦ ኣሲ ዬሱ̈ስ ክርስቶ̈ሳ ኣማ̇ናር ኤኪ̇ዛ ታስፋ ቃ̈ላ ኢሚ̇ንቲ̇ኖ̈ዲ ኣማ̇ኒዝ ኣሳንቦ።

²³ኣሲ ቃሺ ኣ̈ል ቃቺንታ̇ር ዶኣዚንዲፌ̈ኒ ኣማ̇ና ዬናፖ̇ ቲ̈ን ሙ̈ሳ ሂጊ̇ንዳ̇ ኑ̈ና ቃቻ̇ ጋዲ̇ኔ። ኣማ̇ኒን ዓና ኤሪንቲ̇ዝ ዲራስ ኑ̈ኒ ሂጋ̇ ጻና ኣቂኔ።

²⁴ዪ̈ኮታ̇ቦ ኑ̈ኒ ኣማ̇ናባር ጺላ̇ምፔ̈ን ሂጎ̇ ኑ̈ና ክርስቶ̈ሳክ ዬልንዳቦ ና̈ጊ ጋዲ̇ኔ።

²⁵ዓት ዎቲናካሬ ኣማ̇ና ዬይኖኮታ̇ቦ ዓኒፖ̇ ጌዳ ሂጎ̇ ኑ̈ና ና̈ጊ ኣቂሲባ̈ሴ።

²⁶ዪንቲ̇ ዎይን ዬሱ̈ስ ክርስቶ̈ሳ ኣማ̇ኒኖኮታ̇ቦ ዪንቲ̇ ጾ̈ሳ̇ ናኤ።

²⁷ዪንቲ̇ ክርስቶ̈ሳባር ፔታ̇ን ማ̈ቃ̇ምፔ̈ን ጻማ̇ቂንቲ̇ኖን ዎይን ዪንቲ ክርስቶ̈ሳ ኣፊላፌ̈ኒ ማኢኔ።

²⁸ዪንቲ̇ ዎይ ክርስቶ̈ሳባር ፔታ̇ን ማ̈ቂ̇ኖኮታ̇ቦ ዪንታ̇ ጊዳ̇ ኣይሁዳ፣ ኣይሁድ ባዮ̇ ኣሲ፣ ኣይላ፣ ኣይላ ጊዳካዮ̇ ኣሲ፣ ኣቲና ማጫ̇ ጌዪ ፋጊዝ ባዚ ባዬ̇።

²⁹ዪዚ ዪንቲ̇ ክርስቶ̈ሳይኮ ዪንቲ ኣብራሃ̈ማ ዜር፤ ጾ̈ሲ ኢሚ̇ኖ ታስፋ ቃ̈ሊንዲፌ̈ኒ ኢብ ኢማ̇ንዳ ጌይኖን ዪንቲ̇ ኤኪ̇̈ሬ።