Read basketo ጋላ̈ 6 Bible Online

ጋላ̈ 6 - basketo bible

ጋላ̈ 6

¹ቴ ኢሺንታ̇ን! ኣሲ ኦ̈ናካሬ ናጋራባር ኬዴ̇ጌይንዶ̇፥ ዪንቲ̇ ጌ̈ሻ̇ ኣያ̇ናባር ዬ̇ዛን ዪ̈ዲፌ̈ኖ ና̈ሳ̈ዳ ኣሽኪቲባራ ኢያ ማሂብቴ̇። ማ ኔ̈ናር ናጋራ ጋርታ ኬዳካ̇ዮ̈ዲፌ̈ን ኔ ቆሚ̇ን ና̈ጋቤ።

²ፔታ̇ና ሜላኮን ዴ̈ጺ̇ዝ ቶ̈ፊን ቶ̈ካ̇ጋ̈ቤ፤ ዪንቲ̇ ዪኖ̇ ኦ̈ዚንዳ ክርስቶ̈ሳኮን ሂጊ̇ን ፎቲ̈ሬ።

³ኦ̈ናካር ኣሲ ኢ ሜላ̈ፖ̇ ሺዝ ባዚ ባይዶ̈ን ፌ̈ና “ቴ ሜላንፖ̇ ሺ̈ሬ” ጋ̈ሪ ቆፔ̇ጌዪን ኢ ፌ̈ና ማቂ̇̈ሬ።

⁴ኣሲ ዎይ ፌ ፌ̈ብ ፌ ኦ̈ሲ̇ን ፋ̈ጪ̇ ቤቃ̇ጋቤ፤ ዪኒ̇ፖ̇ ዓኒ ፌ ቆሚ̇ን ሜላ ኣሳንባር ካሚሳር ጊዳካ̇ይዶሪ ፌ ኦ̈ሲን ጋርታ̇ፖ̇ ፌ̈ና ኬርፊሲዝ ባዝ ዲጚ̈ሬ።

⁵ኣሲ ዎይ ፌ ቶ̈ፊን ቶ̈ካ̇ንዳብ ኮሺ̇̈ሬ።

⁶ጾ̈ሳ̇̇ ቃ̈ላ ታማ̈ሪዝ ኣሲ ኦ̈ናካር ማ̈ቂ̇ን ኮሽ̇ ማ̈ቂ̇ኖ ባዝ ዎይ ፌ ኣስታማ̈ራባር ፋጊንቲ ኤኮ̇።

⁷ዪንቲ̇ ዪንታ̇ ቆሚ̇ን ዳሺቻ̇ፒቴ̇፤ ኦናካር ጾ̈ሳ̇ ጋልዳ ቃልዳንዳብ ዳንዳኢባ̈ሴ። ኣሲ ፌ ዜርቂ̇ኖን ኢዞ ማሂ ቴይሲ̇̈ሬ።

⁸ናጋራ ኣሲቲን ኡፋይሳ̇ንዳብ ዜርቂዝ ኣሲ ኢዝ ጋርታፖ̇ ዓይቃ ቴይሲ̇ ኤኪ̇̈ሬ፤ ጌ̈ሻ̇ ኣያ̇ና ኡፋይሳ̇ንዳብ ዜርቂዝ ኣሲ ጌ̈ሻ̇ ኣያ̇ና ጋልዳፖ̇ ሜናብ ሼምፓባር ዶኢ ቴይሲ̇ ኤኪ̇̈ሬ።

⁹ኮሻ̇ ባዝ ኦ̈ንዳቦ ዳቡርባ̈ዳ፤ ኑ ቦ̈ዛካ̇ይዶር ኦ̈ጌዪን ኬ̈ሊን ዬላ̇ምባራ ዜርቂኖን ቴይሲ̇ ኤኪ̇̈ሬ።

¹⁰ዪ̈ኮታ̇ቦ ኑ̈ኒ ኮሽ̇ ባዝ ኦ̈ንዳቦ ኑ̈ብ ዳንዳኢንቲ̇ኖ ኬል̇ባር ዎይ ኣስ ጌይዛ ዎይ̈ቦ ማ ዎይፖ̇ ሺ ክርስቶ̈ሳ ኣማ̇ኒዝ ኣሳንቦ ኮሽ̇ ባዝ ኦ̈ስቶ።

¹¹ታ̈ኒ ቴ ኩሽ ጌ̈ቲምባር ዪንታ̇ብ ዎዛርፌ̈ን ጴች ፊዳላባራ ጻ̈ፊኖኮ ቤቂ̇ብቴ።

¹²ዪንቲ ጋራ̇ዚንታ̇ምፔ̈ን ዪንታ̇ ዋ̈ዪዝ ኣሳን ኣሳ ቲ̈ን ኮሽ ማይጻር ቤንታ̇ንዳብ ኮዪዝ ኣሴ። ዪኖ̇ ዎቲዛን ክርስቶ̈ሳ ማስቃሊንኮታ̇ቦ ዳ̈ሲ̇ ኢንታ̇ ዬላ̇ካዮ̈ዲፌ̈ኒ ጋ̈ሪ ዎቲ̈ሬ።

¹³ዪንቲ ጋራ̇ዚንቴ̇ጌይን ኢንቲ̇ ዪ̈ኒባራ ኬርፋንዳቦ ጋ̈ሪ ዎቲ̈ርዶኬ ጋራ̇ዚ̇ንቲ̇ኖ ኣሳን ፌ ቆሚ̇ንዳር ሂጊ̇ን ና̈ጊባ̈ሴ።

¹⁴ኑ ጎዳ ዬሱ̈ስ ክርስቶ̈ሲ ማስቃላ ጋልዳ ዓይቃ̇ር ታ̈ብ ኦ̈ኖ ኦ̈ሲምፖ̇ ሜላ ታ̈ና ኬርፊሲዝ ባዚ ዎኮ ታ ጋልዳፖ̇ ጎቶ̇። ዬሱ̈ሲ ማስቃላ ጋልዳ̇ ኦ̈ኖ ኦ̈ሲን ጎይባራ ታ̈ኒ ኣላሚን ጋልዳፖ ፋጊንቲ̇ኔ ኣላሚንዳር ታጋልዳፖ ፋጊንቲ̇ኔ።

¹⁵ጋራ̇ዚንቲ̇ናር ጋራ̇ዚንታ̇ካይ ኣቴጌይናር ኣባካር ማ̈ዲ̇ባ̈ሴ፤ ዬሱ̈ስ ክርስቶ̈ሳባር ኦራ ኣስ ማ̈ቃ̇ዚን ሙታ̇ ማ̈ዳ̇̈ሬ።

¹⁶ኪ̈ቲን ዓኖ̇ ና̈ጊዝ ኣሳን ዎይንብኬ ጾ̈ሳ̇̇ ኣስ ማ̈ቂ̇ኖ ኢስሬ̈ል ናኣንቦ ጾ̈ሳ̇̇ ሳሪቲዲኬ ማ̈ሪቲ ኢንታ̇ብ ማ̈ቆ̇።

¹⁷ዉርሲ ጋልዳ ቴ ሶ̈ላንዳብ ኮያዚንዳ̇፥ ታ̈ኒ ዬሱ̈ሳ ኣይላ ማ̈ቃ̇ር ኢ ጊሻ̇ብ ቡኪንቲ̇ኖን ኤርሲዝ ዲ̈ ቴ ጋልዳ ዎኮታ̇ቦ ዓኒ̇ፖ̇ ጌዳ ኦ̈ናካር ታ̈ ጋልዳ ሜላ ሜታ ጉጃፖጋ̈ቤ።

¹⁸ቴ ኢሺንታ̇ን! ኑ ጎዳ ዬሱ̈ስ ክርስቶ̈ሳ ኮሺቲ ዪንታ̇ባር ማ̈ቆ̇! ኣሚ̇ንኤ።