Read basketo ኤፍ 3 Bible Online

ኤፍ 3 - basketo bible

ኤፍ 3

¹ዪ̈ኮታ̇ቦ ታ ጳ̈ውሎ̈ሲ ኣይሁድ ባዮ̇ን ዪንታ̇ቦ ዬሱ̈ስ ክርስቶ̈ሳ ዎጛሊን ሳባ̇ካ̈ሬ ጋ̈ራ ቃሺ ኣ̈ል ጌሊኔ።

²ቴ ዪንታ̇ ማ̈ዳምፔ̈ኒ፤ ጾ̈ሳ̇ ፌ ኮሺ̇ቲንባራ፤ ዪኖ̇ ኦ̈ሲን ታ̈ብ ኢሚ̇ኖን ዪንቲ̇ ኮሺንቺ̇ ሲስኪ̇ኔ።

³ዪ̈ዳሬ ቲ̈ን ቴ ዪንታ̇ብ ቃቢንባር ጻ̈ፊኖንዲፌ̈ኒ፥ ጾ̈ሳ̇̈ዲ ኣ̈ቺ̇ንታር ዎ ሚስጢ̇ሪን ሳጻባር ታ̈ና ቤይሲኔ።

⁴ቴ ዪንታ̇ብ ጻ̈ፊኖን ዪንቲ ናባ̇ባሪ ታ̈ኒ ክርስቶ̈ሳ ሚስጢ̇ሪን ዎዛርፌ̈ን ጴች ኤራ̈̈ርኮ ዪንቲ ኤራንዳብ ዳንዳ̇ኢ̈ሬ።

⁵ዪ̈ ሚስጢራ̈ዲ ጾ̈ሳ̇ ኣያ̇ና ጎይባር ጌ̈ሻ ሃዋ̈ራታንብኬ ናባን ዓቶ̇ንቦ ቤንቲ̇ኖንዲፌ̈ኒ ሚኖ ኣሳንቦ ቤንታ̇ካዬ።

⁶ዪ̈ዳሬ ዎጛላ ጎይባራ ኣይሁድ ባዮ̇ ኣሳን ኣይሁዳንባር ዎልኣ ፔታ̇ን ጾ̈ሳ̇ ኣንጃ̇ ኤኪ̇ዝ ኣስ ማ̈ቃ̇ዚንዲኬ፤ ፔቲ̇ ኣሳ ጋል̇ፌን ማ̈ቂ̇ኖንዶ፥ ማ ጾ̈ሲ ኢማ̇ንዳ ጌይኖ ታስፋ ቃ̈ሊን ዬሱ̈ስ ክርስቶ̈ሳ ጎይባራ ዎልኣ ኤኪ̇ዝ ኣስ ማ̈ቂ̇ኖንዶ።

⁷ጾ̈ሲ̇ ፌ ዎልቃ ታባር ማ̈ቃ̇ር ኦ̈ምፔ̈ን ዎቲኖኮታ̇ቦ ታ̈ኒ ኢ ታ̈ብ ኢሚ̇ኖ ፌ ኮሺ̇ቲንባራ ዓና̇ ዎጛላ ኦ̈ሲን ኦ̈ዝ ኣስ ማ̈ቃ̇ዴ።

⁸ታ̈ኒ ጾ̈ሳ̇ ኣሳን ዎይንፖ̇ ጉ̈ጺዝ ኣስ ማ̈ቂ̇ናካሬ፤ ዎሳሊ ባዮ̇ ክርስቶ̈ሳ ዱሪቲ ኣይሁድ ባዮ̇ ኣሳንቦ ሶ̈ላምፔ̈ን ጾ̈ሲ ዓና̇ ኢዲ̇ሊን ታ̈ብ ኢሚ̇ዴ።

⁹ዎይ ባዝ ኮቺ̇ኖ ጾ̈ሳ̇̇̈ዲ ዚቃንታ ኣ̈ኖ ላይ ጋርታ ኢ ኣቻ̇ር ጋዲ̇ኖ ሚስጢ̇ሪን ኦ̈ሲን ኣብዝኮ ታ̈ኒ ዎይ̈ቦ ቤይሳምፔ̈ን ታ̈ብ ኢሚ̇ኔ።

¹⁰ኢ ዪኖ̇ ዎቲኖ̈ዲ ዎሳሊ ባዮ̇ ፌ ኤሪንዶ ዓቶ̇ ኬ̈ሊ̇ን ጋርታ ዎ̈ሳ ኬ̈ ጎይባራ ኣፋ ዎ ኣላቃንብኬ ጋዣንቦ ኤሪንታምፔ̈ኒ ዎታንዳብ ቆፓ̇ሪዬ።

¹¹ጾ̈ሳ̇̈̇ዲ ኑ ጎዳ ዬሱ̈ስ ክርስቶ̈ሳ ጎይባራ ዪኖ̇ ኦ̈ኖ̈ዲ ኢ ዓላሚን ዓና̇ ኮቺንታ̇ካይዶን ቆፒ̇ኖ ቆፊንዲፌ̈ኒዬ።

¹²ኑ̈ኒ ዬሱ̈ሳይ ማ̈ቂ̇ኖኮታ̇ብኬ ኢያ ኣማ̇ኒኖኮታ̇ቦ ኢ̈ች ቤዪኬ ዬ̈ላ̇ ቤዪ ጾ̈ሳ̇ ቲ̇ን ኡካ̇ንዳብ ዳንዳኢ̈ሬ።

¹³ዪና̇ ቴ ዪንታ̇ ጊሻ̇ብ ኤካ̇ዝ ሜቲንዳ ዪንታ̇ብ ቦንቼ̇። ዪ̈ኮታ̇ቦ ታ ጋልዳ ዬሊ̇ኖ ሜቲን ቤቃ̇ሪ ዪንቲ̇ ታስፋ ቃጻካ̇ይፌ̈ኒ ቴ ዪንታ̇ ጌሻ̈ሬ።

¹⁴ዪዚ ታ̈ኒ ኣፋሬ ሳ̈ዳ̇ሬ ዎ ኢ ኣ̈ል ኣሳን ዎይ ኪን ሱ̈ም ኢ ጋልዳፖ ዲጚዛ ጾ̈ሳ̇ ባ̈ባ̈ ቲ̈ን ቡቂንታ̇ር ዎ̈ሳ̇ዚንዳ ዓኒ̇ኮታ̇ቦ።

¹⁶ዪንታ̇ ጋርቶ ኣሲቲን ጾ̈ሳ̇̇̈ባር ሚ̈ንምፔ̇̈ኖ ዎልቆ ጾ̈ሳ̇ ፌ ኣያ̇ና ጎይባር ፌ ቦንቻ̇ ዎይሊን ጋልዳፖ̇ ዪንታ̇ብ ኢማ̇ምፔን ቴ ኢያ ዎ̈ሳ̇̈ሬ።

¹⁷ማ ኣማ̇ናባር ክርሲቶ̈ሲ ዪንታ̇ ቡ̈ዲን ጋርታ ዶኣምፔ̈ንኬ ዪንቲ̇ ጻ̈ጳ ሚሻር ካንባራ ሚጛምፔ̈ን ታ̈ኒ ጾ̈ሳ̇ ዎሳ̇̈ሬ።

¹⁸ማ ክርስቶ̈ሲ ኑ̈ና ዎዛርፌ̈ን ጴች ካ̈ርኮ ዪንቲ̇ ጾ̈ሳ̇ ዎርዣንባር ዎልኣ ማ̈ቃ̇ር ኤራንፔ̈ንኬ፥

¹⁹ኣሲ ክርስቶ̈ሳ ካንን ፎቲ ኤራንዳብ ዳንዳኢባ̈ስካሬ ዪንቲ ኢዞ ኤራምፔ̈ንኬ ማ ዪንቲ ጾ̈ሳ̇̇̈ ማይጻምፔ̈ን ቴ ዪንታ̇ብ ዎ̈ሳ̇̈ሬ።

²⁰ዪ̈ኮታ̇ቦ ኑ ጋርታ̇ ኦ̈ዛ ኢ ዎልቃ ጎይባራ ኑ ጌሻዚምፔኬ ቆ̈ፓ̇ዚምፖ̇ ዎይሊን ሺሻሪ ኦ̈ንዳብ ዳንዳኢዝ ጾ̈ሳ̇̇̈

²¹ኢ̈ቦ ዎ̈ሳ ኬ̈ ጋርታ̇ኬ ዬሱ̈ስ ክርስቶ̈ሳ ጎይባራ ናኣ ናኣፖ ኤ̈ር ዓጛር ናኣ ናእ ዬሊ̇ዝ ዲራስ ዎይ ጋላስ ቦንች̇ ኢ̈ብ ማ̈ቆ፤ ኣሚንኤ።