Read basketo ኤፍ 4 Bible Online

ኤፍ 4 - basketo bible

ኤፍ 4

¹ዪዚ ጎዳ̈ብ ኦ̈ኖኮታ̇ቦ ቃሺ ኣ̈ል ጌሊኖ ታ ጳውሎ̈ሲ፥ ጾ̈ሲ ዪንታ̇ ጼይጊኖ ጼይሲ̇ንቦ ማ̈ቂ̇ዝ ኮሻ̇ ዶኢ ዶኣምፔ̈ን ቴ ዪንታ̇ ጌሻ̈ሬ።

²ካንባር ዪንቲ ዎል ዎልኣ ዳንዳኢሙታ̇ ዎይ ጋላስ ዪንታ̇ ዪርክ ዎቲሙታ̇ኬ ኮሺ̇ቲባርኬ ጋርዣባር ዶኢብቴ።

³ሳሪቲባር ዎል ፔታ̇ን ማ̈ቃሪ ጌ̈ሻ̇ ኣያ̇ና ጋልዳፖ̇ ቤንታ̇ዝ ፔቲቲን̇ ዪንታ̇ ጋልዳፖ ያካ̇ይፌ̈ኒ ሚ̈ጛር ና̈ጊብቴ።

⁴ዪንቲ̇ ጼይጊንቲ̇ኖንዳ ፔቲ̇ ታስፋቦ ማ̈ቂ̇ኖንዲፌ̈ኒ ፔቲ̇ ጋል̇ኬ ፔቲ̇ ኣያ̇ና ዎ።

⁵ዪና ኢዝፌኒ ፔቲ̇ ጎድ፥ ፔቲ̇ ኣማ̇ናኬ ፔቲ̇ ጺንቃታ ዎ።

⁶ማ ዎይፖ̇ ሾ̈ክ ጌይኖ፤ ዎይ ጎይባራ ኦ̈ዛ̈፥ ዎይንባር ዎዲ ማ ዎይንቦ ባ̈ባ ማ̈ቂ̇ኖ ፔቲ̇ ጾ̈ሲ̇ ዎ።

⁷ዎቲናካሬ ክርስቶ̈ሲ ኢማ̇ንዳብ ፌ ኮዪኖንዲፌ̈ኒ ኢ̈ ኦ̈ሲን ኦ̈ንዳቦ ዳንዳኢሲዝ ኪልስ ኑ̈ ዎይንቦ ኢሚ̇ኔ።

⁸ዪ̈ዳሬ “ፉዳ ሾ̈ክ ጌዪኖ ቤስ̇ ኬሲኪኖ ኬ̈ልባራ ካ̈ቲንቲ̇ኖ ኣስ ዎይሊን ኤካ̇ር ሉኪ̇ዴ ማ ኣሳንቦ ኪልስ ኢሚ̇ዴ” ጌዪኖንዲፌ̈ኔ።

⁹ዪ̈ዶኮ ዪ̈ “ፉዳ ኬስኪ̇ዴ” ጌይዝ ቃ̈ላዲ ኣብዝ ጌንታ̇? ፉዳ ኬስኪ̇ዴ ጌንቲ̇ንዳ ኢ ቲ̈ን ቶ̈ራ ሳ̈ዝ ጻና ሶ̈ቢኖን ቤይሳ̈ሬ።

¹⁰ዪ̈ ቶ̈ራ ሶ̈ቢኖ̈ዲ ሳ̈ዝ ኤ̈ሻ̇ ዎይ ጋልዳ ኩማር ቤንታ̇ንዳቦ ኣፋ ሳ̈ዝ ዎይ̈ፖ̇ ፉዳ ሾ̈ክ ጌይኖ ቤሳ̇ ጋልዳ ኬስኪ̇ኖ ኢያ።

¹¹ኣሳንቦ “ኪልስ ኢሚ̇ኖ ኢያ”፤ ኢያሬ ፔታ̇ን ፔታ̇ናን ሃዋ̈ራታ፤ ፔታ̇ን ፔታ̇ናን ና̈ቢ፤ ፔታ̇ን ፔታ̇ናን ዎጛላ ሳባ̇ኪዝ ኣሲ፤ ፔታ̇ን ፔታ̇ናን ኣማ̇ኒዝ ኣሳን ዬ̈ጚዝ ኣስኬ ታማርሲዝ ኣስ ማ̈ቃምፔን ዎቲዴ።

¹²ዪኖ̇ ኢ ኦ̈ኖንዳ ክርስቶ̈ሳይ ማ̈ቂ̇ኖ ኣሳን ሚ̈ጛምፔ̈ንኬ ኢንቲ ጾ̈ሳ̇ ኦ̈ሳ ኦ̈ምፔ̈ኒ ጊ̈ጊንቲ̇ኖ ኣስ ማ̈ሳንዳቦ።

¹³ዪና̇ሬ ኑ ዎይን ጾ̈ሳ̇ ና̈ኣ ኤራሪ ኣማ̇ናባር ቤንቲ̇ኖ ፔቲ̇ቲንኮ ዬላ̇ሪ፥ ኑ ኣማ̇ኒንባር ሚ̈ጛሪ ክርስቶ̈ሳ ማ̈ይጻምፔ̈ኒዬ።

¹⁴ዪዚ ኑ ዓኒ̇ፖ̇ ጌዳ ኣሲ ኑ̈ና ዉጫባራ ባሊሙታ̇ኬ ቃልቂንቺ̇ሙታ ዱማ ዱማ ማቃ ቲሚርታ̇ባራ ኣይጊኬ ዋ̈ሳ ጋልዶ ዉርጊንዲፌ̈ኒ ጌዳክ ዓኒክ ኤንኢሙታ̇ ኣቂሊ̇ ናኢ ማ̈ቂ̇ባ̈ዳ።

¹⁵ዪኖ̇ ኣሻ̇ሪ ኑ̈ኒ ኪን ማ̈ቂ̇ኖባዚን ካንባር ሶ̈ሊሙታ̇ ባዝ ዎይ̈ባራ ዎይ̈ፖ̇ ሾ̈ክ ጋር ቆ̈ም ማ̈ቂ̇ኖ ክርስቶ̈ሳክ ዲጪ̇ስቶ።

¹⁶ኣሳቦ ዎ ዱማ ዱማ ጋ̈ላ̇ን ሻሽ̇ባር ዎልኣ ፔታ̇ን ኤ̈ንቲ̇ኖ̈ዲፌ̈ኒ ኣማ̇ኒዝ ኣሳን ዎልዎልኣ ኤ̈ንቲ̇ኖ̈ዲ ክርስቶ̈ሳባራ፤ ዪ̈ኮታ̇ቦ ዪን ዱማ ዱማ ጋላ̇ን ፌ̈ብ ኢሚ̇ኖ ኦ̈ሲን ኮሺንቺ̇ ፎቴጌይንዶ ጋሊ̇ ዎይ ዲጪ̇̈ሬ፥ ማ ካንባራ ሚ̈ጚ̈ሬ።

¹⁷ዪዚ ዓኒፖ̇ ጌዳ ፋባ̈ሶ ቆፊባር ዎ ጾ̈ሳ̇ ኤሪባ̈ሶ ኣሳንፌ̈ኒ ማ̈ቃር ዶኣፒ̇ቴ ጋ̈ር ጎዳ ሱ̈ምባር ቴ ዪንታ̇ብ ሶ̈ላ̈ሬ።

¹⁸ኢንታ̇ ቡ̈ዳ ሚ̇ኔ ማ ኢንቲ̇ ኣባካር ኤራካዮ̇ ጊሻ̇ብኬ ሶ̈ሊን ሲስኪ̇ባ̈ሶኮታ̇ቦ ጾ̈ሲ ኢንታ̇ብ ኢሚ̇ዝ ሼምፓ ጋልዳፖ̇ ጎ̈ቲ̇ ኣቲ̇ኔ።

¹⁹ዬ̈ላ̇ ጌይዝ ባዚ ኢንታ̇ ጋልዳፖ̇ ዪኖኮታ̇ቦ ቄ̈ ባዝ ዎይ ኦንዳቦ ፌ̈ና ኢ̈ታ ኢና̇ቦ ኣ ኢሚ̇ኔ።

²⁰ዎቲናካሬ ዪንቲ̇ ክርስቶ̈ሳ ጎይ ታማ̈ሪኖንዳ ዪንዲዝ ጊዳካ̇ዬ።

²¹ዪንቲ̇ ኪን ኢ ባዚን ሲስኪ̇ኔ፤ ዪንቲ̇ ኢባር ፔታ̇ን ማ̈ቂ̇ኖንባራ፥ ኪን ማ̈ቂ̇ኖን ዬሱ̈ሳ ቲሚርቲ̇ን ዪንቲ̇ ታማ̈ሪኔ።

²²ዪንቲ̇ ሚን ዶኢኖ ዶኢን ጎይ ዓት ታማ̈ሪኔ፤ ዪንታ̇ ባሊር ናጋራ ኦ̈ምፔን ቲ̈ናዝ ኢታ̇ ኢኒ̇ንባር ኢ̈ቲኖ ሚኖ ዪንታ̇ ኣሲቲንዶ ዪንታ̇ ጋልዳፖ̇ ጋ̈ራር ቶጚብቴ።

²³ዪንታ̇ ቡ̈ዳ ጋርታ̇ ዎ ቆፋ̈ዲ ጌ̈ሻ̇ ኣያ̇ናባር ኦራ ማ̈ቆጋ̈ቤ።

²⁴ኪን ጺሊ̇ቲባርኬ ጌ̈ሺ̇ቲባራ ጾ̈ሳ̇ ማይጻንፔ̈ኒ ኮቺ̇ንቲ̇ኖ ኦራ ኣሲቲን ማኢብቴ።

²⁵ዪ̈ኮታ̇ቦ ማ̈ቃ ሶ̈ላዚን ኣሻ̇ሪ ኑ ዎይን ክርስቶ̈ሳባራ ፔቲ̇ ጋል̇ ማ̈ቂኖኮታ̇ቦ ኣሲ ዎል ዎልኣ ኪን ሶ̈ላ ሶ̈ላጋቤ።

²⁶ዪንቲ̇ ጎይል ጎይሊ̈ርዶሪ ናጋራ ማ̈ቂዝ ባዝ ኦ̈ፒ̇ቴ፤ ዪንታ̇ ጎይሊምቦ ማ̈ሪቲ ጌላካ̇ይዶር ኣቃ̇ፒ̇ቴ።

²⁷ማ ሴ̈ጣናቦ ጎይ ፊርቃ̇ፒ̇ቴ።

²⁸ሚን ዉ̈ቂ̇ዝ ኣሲ ዓኒፖ̇ ጌዳ ዉስ ዉቃ̇ፖ̇፤ ዪ̈ፖ̇ ሜቲንቲ̇ኖንቦ ኢሚ̇ዝ ባዚ ኢ̈ብ ዶኣምፔ̈ኒ ፌ ኩሽ ጌ̈ቲምባር ኮሽ̇ ማ̈ቂ̇ኖ ባዝ ኦ̈ሙታ ዲጛንዳብ ሚ̈ጛር ዋ̈ዮጋ̈ቤ።

²⁹ዪንታ̇ ኖ̈ና ጋርታፖ ኢታ̇ ሶ̈ሎ ኬስካፖ̇ጋ̈ቤ ዎቲናካሬ ኮሺ̇ኖንዲፌ̈ኒ ሲስኪ̇ዝ ኣሳንቦ ኡፋይሲዝ ባዝኬ ሚ̈ንንዳብ ማ̈ቂ̇ዝ ባዝ ሶ̈ሊብቴ።

³⁰ጾ̈ሳ̇̇ ዪንታ̇ ፎቲ ፋዝ ቃ̈ሚንቦ ጋ̈ሪ ዪንታ̇ ጋልዳ ማይታማፌ̈ኒ ቡኪ̇ንቲ̇ኖ ጌ̈ሻ ኣያ̇ና ሺ̈ን ዎታፒቴ̇።

³¹ኢታ ቆፊ፣ ዛላ̇፣ ጎይል፣ ዉይሳ፣ ቆ̈ሳኬ ኢ̈ት ማ̈ቂ̇ኖ ባዝ ዎይ ዪንታ̇ ጋ̈ልዳፖ̇ ፋ̈ይብቴ።

³²ዪንቲ̇ ኮሽ̇ኬ ዎል ዎልኣ ሚጪ̇ንቲዝ ኣስ ማ̈ቂ̇ብቴ፤ ጾ̈ሳ̇̇̈ዲ ክርስቶ̈ሳ ጎይባር ዪንታ̇ ናጋሪን ዪንታ̇ብ ኣቶ̇ ጌይኖንዲፌ̈ን ዪንታ̇ር ዎል ዎልኣ ኣቶ̇ ጌብቴ̇።