Read basketo ኤፍ 6 Bible Online

ኤፍ 6 - basketo bible

ኤፍ 6

¹ና̈ኣን! ጎዳ ዬሱ̈ሲ ኮዪዛ ዪ ማ̈ቂ̇ኖኮታ̇ቦ ዪንታ̇ ባ̈ባብኬ ዪንታ̇ ኢንዲ̇ብ ኪ̈ቲንቲ̇ብቴ።

²“ኔ ባ̈ባክ ኔ ኢንዲ̇ክ ቦንቻ̇ቤ” ጋ̈ዝ ኪቲ̈ንዳ ኢዝ ጋርታ̇ ታስፋ ቃ̈ላ ዎ ዎይፖ ቲ̈ን ኢሚ̇ኖ ኪ̈ታ፥

³ኔ ዪኖ̇ ዎቴጌይንዶ “ዎይ ባዚ ኔ̈ብ ኮሽኪ̈ሬ፥ ኔ ላ̈ይንዳር ጳሪጛሬ።”

⁴ባ̈ቢንታ̇ን! ዪንታ̇ር ዪንታ̇ ና̈ኣን ዞሪ፥ ታማርሲ፥ ዓጊ̇ሙታ ዲቺ̇ብቴዶኬ ኢንታ̇ ማ̈ራ̇ሪሳፒ̇ቴ።

⁵ኣይላን! ዪንቲ̇ ክርስቶ̈ሳብ ኪ̈ቲንታ̇ዚንዲፌ̈ኒ ሳ̈ዝ ጋልዶ ዪንታ̇ ላ̈ንቦ ኢቺ̇ባርኬ ቦንች̇ባራ ቡ̈ዳ ጋርታ̇ፖ̇ ኪ̈ቲንቲ̇ብቴ።

⁶ጾ̈ሳ̇ ኪ̈ቲን ፎቲ ዎልቃፖ ኦ̈ዝ ክርስቶ̈ሳ ኣይላንፌ̈ን ማ̈ቃር ኦ̈ብትዶኬ ዪንታ̇ ላ̈ን ዪንታ̇ ቤቃ̇ምፔ̈ንኬ ኢንታ̇ ጋልዳፖ ኣንጃ̇ ኤካ̇ንዳቦ ጋ̈ር ኦ̈ፒ̇ቴ።

⁷ዪንቲ̇ ኣሳብ ጊዳካ̇ይዶን ጎዳ̈ቦ ኦ̈ዛዲፌ̈ን ማሃር ኮሻ̇ ቆፊባራ ቡ̈ዳ ጋርታ̇ፖ̇ ኦ̈ብቴ።

⁸ኣይላር ማ̈ቂ̇ን ላ̈ር ማ̈ቂ̇ን ዎይ ፌ ቆ̈ሚ̇ን ቆ̈ሚ̇ን ፌ ኦ̈ኖ ኮሽ̇ ኦ̈ሲምቦ ጎዳ ቲ̈ናፖ̇ ፌ ጋቲን ኤካ̇ዚን ዪንቲ̇ ኤሪ̈ሬ።

⁹ላ̈ንታን! ዪንታ̇ ኣይላን ኢ̈ሺቻ̇ዚን ኣሻ̇ሪ ኢንታ̇ቦ ኮሽ̇ ኦ̈ብቴ። ኣሳ ኣ̈ፋብ ዬልቃ̇ር ፊርዲባ̈ሶ ዪንታ̇ባሬ ኢንታ̇ባሬ ፔቲ̇ ጎዲ ኣፋ̇ዎን ቆፒ̇ብቴ።

¹⁰ዪዚ ዉርሲ ጋልዳ ቴ ዪንታ̇ክ ጋ̈ዚንዳ፥ ዪንታ̇ብ ጎዳባራ ዎ ፔቲ̇ቲ̇ንባርኬ ዪንቲ ኢ ጋልዳፖ̇ ዲጚዝ ጴች ዎልቂንባራ ሚ̈ጚብቴ̇።

¹¹ሴ̈ጣና̈ኮን ዉጫ ኦ̈ሲን ጋማንዳ̇ቦ ጾ̈ሳ̇ኮ ኦላ ማሳ̇̈ራ ዎይ ጊጺ̇ብቴ።

¹²ኑ̈ኒ ኦሊ̇ንቲ̇ዛ̈ዲ ኣሳባር ጊዳካ̇ይዶን ዓና̇ ም ኣላሚን ጋልዳ ኦ̈ዝ ዎልቃ̇ባሮንባራ፣ ጋዣንባራ፣ ኣላቃንባርኬ ኣፋ ዎ ዎልቃ̇ባሮ ኢ̈ታ ኣያ̇ናንባራ።

¹³ዪ̈ኮታ̇ቦ ኢታ̇ ቃ̈ም̇ባራ ዪንታ̇ ጻላ̈ታ ጋማንዳ̇ብኬ ኦሊንታ̇ር ዉርሲኖፖ ዓኒ ዪንታ̇ ቤሲ̇ን ጋልዳ ሚ̈ጛር ኤቃ̇ንዳብ ዳንዳኣምፔ̈ን ጾ̈ሳ̇ኮ ኦላ̇ ማሳ̇̈ራ ዎይ ኤ̈ብቴ።

¹⁴ዪዚ ዪንቲ̇ ኪን ሶ̈ሊዝ ኣስ ማ̈ቃ̇ሪ ኪንቲን ዪንታ̇ ባንቲ̇ምባራ ቃባታ̇ፌ̈ን ጊጻ̇ር፥ ኦል ኦሊዝ ኣሲ ሲላባር ኮቺ̇ንቲ̇ኖ ኣፊላ ፌ ቲራ ጋልዳ ማኣዚንዲፌ̈ኒ ዪንታ̇ር ጺሊቲ ኦ̈ሲን ዪና̇ ኢዝፌ̈ን ማኣሪ፥

¹⁵ሳሪቲ ኢማ̇ዝ ዎጛሊን ዪንታ̇ ቶ̈ህ ጋርታ ጫ̈ማፌ̈ን ኣሪ ጊ̈ጊንታ̇ሪ ኤቂ̇ብቴ።

¹⁶ዪን ጋልዳ ጉጃ̇ሪ ታ̈ማፌን ላ̈ኣዚን ሴ̈ጣና ኦ̈ሲን ዎይ ይሳ̇ንዳብ ዳንዳኣዝ ኣማ̇ኒን ጊቲምፔ̈ን ኤ̈ብቴ።

¹⁷ፋቲን ሲላባር ኮቺንቲ̇ኖ ባርኔ̈ጻፌ̈ኒ ዪንታ̇ ቆ̈ሚን ጋልዳ ጋዲ̇ብቴ፥ ጌ̈ሻ̇ ኣያ̇ና ኢማ̇ዝ ማሺ̇ን ኤ̈ብቴ ኢዛሬ ጾ̈ሳ̇ ቃ̈ሊንዶ።

¹⁸ጌ̈ሻ ኣያ̇ና ዪንታ̇ ቲ̈ናዚንዲፌ̈ኒ ዎይ ጋላስ ዎይ ባዛቦ ጾ̈ሳ̇ ዎሲ̇ ኢያ ጌሺብቴ̇። ዪና ኢዝፌ̈ኒ ጾ̈ሳ̇̇ ዎርዣ̈ቦ ዎይ ጋላስ ባርካር ሚጛር ዎ̈ሲ̇ብቴ።

¹⁹ታ̈ኒ ዎጛላ ሚስጢ̇ሪን ኢ̈ጫካ̇ይዶር ሶ̈ላምፔ̈ንኬ ማ ቴ ሶ̈ላንዳብ ኮሻ̇ዝ ቃ̈ሊን ጾ̈ሲ ታ̈ብ ኢማ̇ምፔ̈ኒ ታ̈ባር ጾ̈ሳ̇ ዎ̈ሲ̇ብቴ።

²⁰ዓት ታ̈ኒ ቃ̈ሺ ኣ̈ል ዎዶራሬ ዓና̇ ዎጛሊን ታማ̈ርሳምፔ̈ኒ ኪ̈ቲንቲ̇ኖ ኣሴ፤ ዪ̈ኮታ̇ቦ ታ̈ብ ኮሻ̇̇ዚንዲፌ̈ኒ ኢ̈ች ቤይ ሶ̈ላምፔ̈ን ታ̈ብ ዎ̈ሲ̇ብቴ።

²¹ኣማ̇ኒንቲ̇ኖ ማ̈ቃ̇ሪ ጾ̈ሳ̇ ኦ̈ሳ ኦ̈ዛ ካንቲ̇ኖ ኑ ኢሻ ቲኪቆ̈ሲ ታ ዎዛርፌ̈ን ዎኮ ማ ታ ኣብዝ ኦ̈ ሙታ̇ ዎኮ ታ ባዝ ዎይ ዪንታ̇ብ ሶ̈ሊ̈ሬ።

²²ዪዚ ኑ ዎይ ዎዛርፌ̈ን ዎኮ ዪንቲ̇ ኤ̈ራምፔ̈ንኬ ማ ዪንታ̇ ሚንምፔ̈ን ጋ̈ራ ቴ ኢያ ዪንታ̇ክ ሚሺኔ።

²³ጾ̈ሳ̇ ባ̈ባፖ̇ኬ ጎዳ ዬሱ̈ስ ክርስቶ̈ሳፖ ሳሪቲ፥ ካንኬ ጾ̈ሳ̇̇ባር ኣማ̇ኒንቲ ኑ ኢሺንታ̇ንብኬ ኑ ሚሺንታ̇ንብ ማ̈ቆ̇።

²⁴ኑ ጎዳ ዬሱ̈ስ ክርስቶ̈ሳ ዛ̈ኪ̇ባ̈ሶ ካዛንባራ ካዝ ኣሳንቦ ጾ̈ሳ̇ ኮሺ̇ቲ ኢንታ̇ባር ማ̈ቆ።