Read basketo ፊል 1 Bible Online

ፊል 1 - basketo bible

ፊል 1

¹ዬሱ̈ስ ክርስቶ̈ሳቦ ኣይላ ማ̈ቃ̇ር ኦ̈ዛን ታ ጳውሎ̈ሳ ጋልዳፔኬ ጢማ̈ቶ̈ሳ ጋልዳፖ፥ ፊልጲሶ̈ሳ ካታሚን ጋርታ ዬሱ̈ስ ክርስቶ̈ሳ ኣማ̇ኒኖ ኣሳንስቦ ዎይ፥ ማ ዎሳ ኬ̈ ጪጛ̈ሻንኬ ዳ̈ቆናንቦ፥

²ጾ̈ሳ̇ ኑ ባ̈ባ̈ዲኬ ኑ ጎዳ ዬሱ̈ስ ክርስቶ̈ሳ ኮሺ̇ቲንዲኬ ሳሪቲን ዪንታ̇ብ ማ̈ቆ̇።

³ዪንታ̇ ባዚ ታ̈ክ ኤልቅ ጌይኖ ቃም̇ ዎይ ቴ ጾ̈ሳ̇ ጋላታ̈ሬ።

⁴ቲ̈ኖ ቃሚ̇ንፖ ኤ̈ር ዓታ̇ቦ ዬሊ̇ዝ ዲራስ ታ̈ኒ ዎጛላ ኦ̈ሲን ኦ̈ምባራ ዪንታ̇ር ታባራ ኦ̈ኖኮታ̇ቦ፤ ቴ ዪንቲ ዎይንቦ ዎ̈ሳ̈ርዶራ ዎይ ጋላስ ኡፋይስባራ ዎ̈ሳ̇̈ሬ።

⁶ዪኖ̇ ኮሽ ኦ̈ሲን ኦ̈ምፔ̈ን ዪንታ̇ባር ማ̈ቃ̇ር ዣማ̇ሪኖ ጾ̈ሳ̇̇̈ዲ ዬሱ̈ስ ክርስቶ̈ሲ ማ̈ቃ̇ር ዬይዝ ቃሚ̇ን ዬሊ̇ዝ ዲራስ ፎታዚን ቴ ኣማ̇ና̈ሬ።

⁷ታ̈ኒ ቃሺ ኣ̈ል ዎምባራር ማ̈ቂ̇ን ቃቺንታ̇ናፖ ቲ̈ን ዎጛሊንኮን ኪን ቲሚርቲ̇ን ኣሳን ማቃ ቲሚርታ̇ባር ኢ̈ሲ ይሳካዮዲፌ̈ን ቴ ኢንታ̇ብ ሶ̈ላ ማሃምባርኬ ማ ኢዞ ሚ̈ን ኤሳ̇ንዳቦ ዋ̈ያምባራ ጾ̈ሲ ታ̈ብ ፌ ኮሺ̇ቲባር ኢሚ̇ኖ ኦ̈ሲንዶ ዪንቲ̇ ታባር ዎልኣ ኦ̈ኖኮታ̇ቦ ዪንቲ̇ ታ ቡ̈ዲን ጋርታ ዎ። ዪ̈ኮታ̇ቦ ቴ ዪንታ̇ ባዝ ዪኒ̇ፌ̈ኒ ቆፓ̇ዚንዳ ኪን።

⁸ዬሱ̈ስ ክርስቶ̈ሲ ኑ̈ና ካኖ ካንንባራ ቴ ዪንታ̇ ቤቃ̇ንዳብ ዎዛርፌ̈ን ሹ̈ኒታ̈ርኮ ጾ̈ሳ̇ ታ̈ቦ ማ̈ርካ።

⁹ዪንታ̇ ካንንዳ ጴች̇ ኤራባ̈ርኬ ቆ̈ፊ̈ባራ ቲ̈ኖንፖ ኣ̈ር ዲጫ̇ሙ̈ታ ሉካ̇ምፔ̈ን ቴ ጾ̈ሳ̇̇ ዎ̈ሳ̇̈ሬ።

¹⁰ዪ̈ዳሬ ዪንቲ ዎይፖ ኮሽ̇ ባዚን ዎኒ̇ኮ ኤራምፔ̈ኒ፤ ክርስቶ̈ሲ ዬ̈ይዝ ዲራስ ጌ̈ሽ̇ኬ ማዛ ኣባክ ዪንታ̇ ጋልዳ ባዮ̇ ኣስ ማ̈ቃ̇ር ዶኣኒፌ̈ኒዬ።

¹¹ማ ጾ̈ሳ̇̇̈ቦ ቦንች̇ኬ ጋላታኬ ማ̈ቃ̇ምፔ̈ኒ ዪንቲ ዬሱ̈ስ ክርስቶ̈ሳ ዎልቃባር ቤንቲ̇ዝ ኮሻ̇ ኦ̈ሳባራ ኩማሪ ቤንታምፔ̈ኒዬ።

¹²ቴ ኢሺንታ̈ን! ታ ጋልዳ ዬሊ̇ኖ ሜታን ዎጛላዲ ጌዳ ሻኪ̇ሙታ ሉካ̇ምፔ̈ኒ ዎቲኖን ዪንቲ ኤራንፔን ቴ ኮያ̈ሬ።

¹³ዪኒ̇ባራ ታ̈ናር ቃቺንቲ̇ኖንዳ ክርስቶ̈ሳ ዎጛሊን ሳባ̇ኪኖን ጊሽ̇ ማ̈ቂ̇ኖን ካ̈ታ ኣ̈ሊን ና̈ጊዝ ዎታ̈̇ዳራ̈ንኬ ማ ኢና ዎ ሜላ ኣሳ̈ንር ዎይ ኤሪ̈ኔ።

¹⁴ታ̈ኒ ቃ̈ቺንቲኖን ጎይባራ ዬሱ̈ሳ ኣማ̇ኒኖ ኣሳን ጋርታ̇ፖ ዎይሊንን ዎጛሊን ኢ̈ጫካ̇ይ ሶ̈ላንዳቦ ቲ̈ኖንፖ ሺ ሚ̈ጚንቲ̇ኔ።

¹⁵ፔቲ̇ ፔቲ̇ ኣሳ̈ን ክርስቶ̈ሳ ዎጛሊን ቂና̈ታብ ሳባ̇ኪ̈ሬ፤ ዶካን “ታ̈ኒ ኦ̈ፖ ጉ̈ጻ̈ራ?” ጋ̈ሪ ሳባ̇ኪ̈ሬ ማ ሜላን ኪን ቡ̈ዳባራ ሳባኪ̇̈ሬ።

¹⁶ታ̈ኒ ቃቺ ኣ̈ል ጌሊኖንዳ ዎጛላ ሳባ̇ኪኖኮታ̇ቦ ማ̈ቂ̇ኖን ኢንቲ̇ ኤሪዛኮታ̇ቦ፤ ዪን ኪን ቡ̈ዳባር ጾ̈ሳ̇ ዎጛሊን ሳባ̇ኪዛን ካንቦ ጌዪ ሳባ̇ኪ̈ሬ።

¹⁷ዎቲናካር ሜላ̈ን ክርስቶ̈ሳ ቃ̈ሊን ዎቢ̇ሳር ሳባ̇ኪ̇ዛን ኮሽ̇ ቆ̈ፊባር ጊዳካይዶን ፌ̈ና ካዛኮታ̇ብኬ ቴ ቃቺንቲ̇ኖ ቃ̈ሺን ጋልዳ ሜላ ሜታ ታ̈ብ ጉጃ̇ንዳቦ ኮያር ዎቲ̈ሬ።

¹⁸ዓት ሜቲን ኣባ? ማቃባራር ማ̈ቂ̇ን ኪንባራር ማ̈ቂ̇ን ዎይ ጎይባራ ዎጛላ ሳባ̇ኪንቲ̇ዛኮታቦ ታ̈ና ኡፋይሲ̈ሬ።

¹⁹ማ ሜላ ታ̈ና ኡፋ̈ይሳዚንዳ፤ ዪንቲ ታ̈ብ ዎ̈ሲ̇ኖ ዎ̈ሳባርኬ ዬሱ̈ስ ክርስቶ̈ሳ ኣያ̇ና ጋልዳፖ ቤንቲ̇ዝ ማ̈ዲባራ፥ ታ̈ና ዬሊ̇ኖ ባዚን ቴ ቴ ቃሺን ጋርታ̇ፖ ኬስ̇ካምፔ̈ን ታ̈ና ማ̈ዳ̇̈ዚን ቴ ኤሪዛኮታ̇ቦ።

²⁰ታ̈ኒ ውርሳ ዬልቃባሴ ጌያ ታስፋ̈ ጋዳ̇ር ና̈ጋ̈ሬ፤ ዎቲናካሬ ክርስቶ̈ሲ ዓኒ̇ፖ ቲ̈ን ታ ኣሲቲን ጋልዳ ቦንቺንቲ̇ኖንዲፌ̈ኒ ዓታ̇ር ማ̈ቂ̇ን ቴ ሼምፓባር ዶኢናር ዓይቂ̇ናካር ኢ ታጋልዳ ቦንቺንቲ̈ሬ ጌያ ኢ̈ጫካይ ሶ̈ላ̈ሬ።

²¹ዪዚ ታ̈ቦ ሼምፓ̇ባር ዶ̈ኢ̈ሬ ጋ̈ዚንዳ ክርስ̇ቶሳባር ዶኣዚንዶ፤ ዓይቃ ጋ̈ዚንዳር ማቂ̇ን ታ̈ብ ኮሽዶኬ ኢ̈ት ጊዳካ̇ዬ።

²²ዓኒ̇ፖ ጌዳ ቴ ሼምፓ̇ባር ዶኣ̈ርኮ ጴች ኦ̈̈ሬ፤ ማ̈ቂ̇ናካሬ ዓይቃ ጋርታፔኬ ዶኢ ጋርታፖ ዎኖ̇ ቴ ዶሳ̈ርኮ ቴ ኤራባሴ።

²³ታ̈ኒ ዪን ና̈ምኢ ቆፋን ጊዲ̇ን ጋርታ ዎ፤ ክርስቶ̈ሳባር ዶኣዚን ዎይፖ ሺ ማ̈ቂ̇ኖኮታ̇ቦ ዓንዳፖ̇ ሉካ̇ራ ኢባር ዶኣዚን ኮያሬ።

²⁴ዎቲናካሬ ታ̈ኒ ሼምፓ̇ባር ዶኣዚንዳ ዪንታ̇ብ ሺ ኮሼ።

²⁵ዪና̇ ኪን ማ̈ቂ̇ኖን ቴ ኣማ̇ኒኖኮታ̇ቦ ዓይቃ ጋልዳፖ ቡ̈ታ̇ራ፥ ዪንታ̇ ኣማ̇ኒን ሚ̈ጛምፔ̈ንኬ ዪንቲ ኡፋይታ̇ምፔ̈ኒ ቴ ዓይቃካ̇ይ ዪንቲ ዎይንባራ ዶኣዚን ቴ ኤሪኔ።

²⁶ታ̈ኒ ዪንታ̇ክ ማ̈ቃ̇ራ ሉኪ̇ኖ ጋላሲ ቴ ጊሻ̇ቦ ዪንታ̇ ኡፋይሲ̇ንዳ ዬሱ̈ስ ክርስቶ̈ሳባራ ዎይላ̈ሬ።

²⁷ዪዚ ዎይባዛ̈ፖ ሺ ዪንቲ ዶ̈ኣዝ ዶኢንዳ ዬሱ̈ስ ክርስቶ̈ሳ ዎጛሊን ቦንቺሺዛ ማ̈ቆ̇ጋ̈ቤ፤ ዪና̇ሬ ታ̈ኒ ዪንታ̇̈ኮ ሉካ̇ራር ማ̈ቆ ማ ጎት ዎዶራር ዪንቲ ፔቲ̇ ቡ̈ዳባር ሚ̈ጛር ኤቂ̇ኖንዲኬ ማ ዎል ፔታ̇ን ማ̈ቃ̇̈ሪ ዎጛላ ቃ̈ሊን ኪንንቦ ቡቲታዚን ቴ ሲስካ̈ሬ።

²⁸ዪንቲ ዪንታ̇ ታቆ̈ሚዛንቦ ኢ̈ጫፒ̇ቴ፤ ዪና̇ ኢንቲ ያዚንዶ ማ ዪንቲ̇ ጾ̈ሳ̇ባር ማ̈ቃ̇ር ፋጻዚንዶ ኤርሲዝ ማላ̇።

²⁹ክርስቶ̈ሳ̈ቦ ኦ̈ምፔ̈ን ዪንቲ ጼይጊንቲ̇ኖ̈ንዳ ዪንቲ̇ ኢያ ኣማ̇ናምፔ̈ን ሙታ̇ ጊዳካ̇ይዶን ዪንቲ̇ ኢያ ኣማ̇ኒኖኮታ̇ቦ ዪንታ̇ ጋልዳ ዬይዝ ሜታ ዎይ ኤካ̇ምፔ̈ኒዬ።

³⁰ዪንቲ̇ ዓት ታ̈ና ዬሊ̇ኖ ሜቲን ጊዳ̇ ታባር ዋ̈ዪሙታ ዎ፤ ዪና̇ ሜቲንዳ ዓኒፖ ቲ̈ን ታ̈ና ዬሊ̇ን ዪንቲ̇ ቤቂ̇ኖንዶ፤ ዓታ̇ር ታ̈ኒ ሜቲን ኢዝ ጊዳ̇ ዎን ዪንቲ̇ ሲስኪሙታ̇ ዎ።