Read basketo ፊል 2 Bible Online

ፊል 2 - basketo bible

ፊል 2

¹ክርስቶ̈ስባራ ዪንታ̇̈ብ ዎ ፔቲ̇ቲን ዪንታ̇ ሚ̈ንሬ፤ ኢ ካንንዳ ዪንታ̇ ሚ̈ንሬ፤ ጌ̈ሻ̇ ኣያ̇ናባራ ዪንታ̇ብ ፔቲ̇ቲ ዎ፤ ማ ዪንቲ̇ ዎልዎልኣ ፔታ̇ና ፔታ̇ና̈ብ ሚጪንቲ̈̇ሬ።

²ዪዚ ፔቲ̇ ቆ̈ፊባራ፣ ፔቲ̇ ቡ̈ዳባርኬ ካንባራ ዎልፔታ̇ን ማ̈ቃ̇ሪ ቴ ኡፋይሲ̇ን ፎቲ ማ̈ቃ̇ምፔ̈ን ዎቲብቴ።

³ዪንቲ̇ ኦቲርቂባ̈ሶ ማ̈ቃ̇ሪ ሜላ̈ን ዪንታ̇ፖ ሺዛ ማሃር ፋይዲብቴዶኬ ዪንቲ ዪንታ̇ ካሪ ዎይ “ታ̈ፖ ኣ̈ዛ ኦ̈ኖ” ጋ̈̈̈ሪ ኣባክ ፔቲ̇ባዝ ዎታፒ̇ቴ።

⁴ዪዚ ኣሲ ዎይ ፌ̈ና ማ̈ዲ̇ዝ ባዛብሙታ̇ ጊዳካ̇ይዶን ኣስ ሜላ̈ዳር ማ̈ዲ̇ዝ ባዝ ቆፖጋ̈ቤ።

⁵ዬሱ̈ስ ክርስቶ̈ሳብ ዎ ቆፊን ዓና̇ ዪንታ̇ ጋርታ̇ር ዶኣንዳብ ኮሻ̇̈ሬ።

⁶ዬሱ̈ስ ክርስቶ̈ሲ ኢ ፌ ቆሚ̇ን ጾ̈ስዶሪ፥ ዪኖ̇ ኢ ጾ̈ሳ̇ባራ ዎልፌ̈ን ዎንዶ “ታ̈ኒ ኣሻ̇ንዳብ ኮሻ̇ባሴ” ጋ̈ሪ ቆፓካዬ።

⁷ዪኒፖ ኢ ኣይላፌ̈ን ማ̈ቃ̇ር ቤንታ̇ሪ፥ ኣሳ ናእ ማ̈ቃ̇ር ዬሊንታ̇ሪ፤ ፌ̈ብ ዎ ባዝ ዎይ ኣሻ̇ሪ፥ ፌ̈ና ሜላ̇ ኣባክ ባዮ̇ ማ̈ሲዴ፤

⁸ኣስ ማ̈ቃር ቤንታ̇ሪ፤ ፌ̈ና ዪርክ ዪርክ ዎቲዴ፥ ዓይቃቦ ዪ̈ዳሬ ማስቃላ ጋልዳ ዓይቃቦ ዶሳር ፌ̈ና ኣ̈ ኢሚ̇ዴ።

⁹ዪ̈ኮታ̇ቦ ጾ̈ሲ ኢያ ዎይሊን ሾክ̇ ሾክ̇ ዎቲዴ፤ ማ ሱም ዎይፖ ሺዝ ሱም ኢ̈ብ ኢሚ̇ዴ።

¹⁰ዪ̈ዳሬ ኣፎ ሳ̈ዝኬ ሳ̈ዶ̇ ሳ̈ዝ፥ ማ ሳ̈ዝ ጻና ዎን ዎይሲ፥ ዬሱ̈ሳ ሱምምቦ ቡቂንታ̇ምፔ̈ኒ

¹¹ማ ኣሲ ዎይ “ዬሱ̈ሲ ጎዴ” ጌዪ ማርኪቲሙታ፥ ጾ̈ሳ̇̇̈ ባ̈ባ̈ቦ ቦንች ኢማ̇ምፔ̈ኒዬ።

¹²ቴ ላጋን! ዪንቲ ዎይ ጋላስ ኪ̈ቲንታዚንዲፌ̈ኒ፥ ቴ ዪንታ̇ባር ዎምባር ሙታ̇ ጊዳካ̇ይዶን ቴ ዓት ዪንታ̇ፖ ጎት ዎንባራር ማ̈ቂ̇ን ቲ̈ኖንፖ ሺ ጾ̈ሳ̇̇̈ብ ኢ̈ጪ̇ ጋንዲ̇ሙታ̇ ዪንታ̇ ፋቲን ፎቲ ማ̈ቃ̇ምፔ̈ን ዎቲብቴ።

¹³ኣባ ጌይን ዪንቲ̇ ኢ̈ብ ኪ̈ቲንታ̇ንፔ̈ኒ ኢ ጋ̈ዚን ኦ̈ ፎታምፔ̈ኒ ዪንታ̇ባር ማ̈ቃ̇ር ፌ ቆፊን ኦ̈ዛ̈ዲ ጾ̈ሳ̇̇̈ዳ።

¹⁴ዪንቲ̇ ዎይ ባዝ ጉንዲማካ̇ይዶርኬ ዋጫካ̇ይዶር ኦ̈ብቴ።

¹⁵ዪ̈ዳሬ ኣባቦ ጌይን ዓ ዓታባሮ ኢ̈ት ዬሊቲ ጋርታ ዪንታ̇ ጋልዳ ማዛ ባዮ̇ ኣስ ማ̈ቃ̇ሪ ቤንታ̇ምፔ̈ንኬ ጌ̈ሽ ጾ̈ሳ̇ ናኣን ማ̈ቃ̇ሪ ዓኒ̇ ኣላሚን ጋልዳ ቤ̈ርስፌ̈ን ፎኣምፔ̈ኔ።

¹⁶ዪ̈ዳር ማ̈ቂ̇ዛ̈ዲ ሼምፓ ኢማ̇ዝ ቃ̈ሊን ዪንቲ̇ ሚ̈ንር ኤ̈ጌይንዶ። ዪዚ ዪንቲ̇ ዪኖ̇ ዎቴጌይንዶ ቴ ዎንዳ ዎይ ታ ዳ̈ቡርሲንዳ ሜላ ኣታካ̇ዮኮታ̇ቦ ክርስቶ̈ሲ ዬይዝ ጋላስ ዪና̇ ታ̈ና ኦቲርሲ̇ዛ ማ̈ቃ̇̈ሬ።

¹⁷ዪንቲ ኣማ̇ኒኖኮታ̇ቦ ጾ̈ሳ̇̇̈ቦ ሺሻ̈ዝ ዣ̈ርሺን ጋልዳኬ ዪንቲ̇ ኢ̈ብ ኦ̈ዝ ኦ̈ሲን ጋ̈ልዳ ቴ ሼምፒ̇ንዳሬ ጉ̈ጂንታር ዣ̈ርሻ ማ̈ቃ̇ርካሬ ቴ ዪንቲ ዎይንባራ ዎልኣ ኡፋይታ̇̈ሬ።

¹⁸ማ ዪንታ̇ሬ ዪና̇ ኢዝፌ̈ን ታባር ዎልኣ ኡፋይቲ̇̈ሬ።

¹⁹ታ̈ኒ ዪንታ̇ ባዝ ሲስካ̇ራ ኡፋይታ̇ምፔ̈ኒ ኤሊ̇ራ ጢማ̈ቶሳ ዪንታ̇ክ ሚሻንዳብ ዳንዳኣዚን ጎዳ ዬሱ̈ሳባራ ኣማ̇ኒንታ̇̈ሬ።

²⁰ዪንታ̇ ባዝ ቡ̈ዳፖ ቆፒ̇ዛ ጢማ̈ቶሳዶኬ ሜላ ኣሲ ኦ̈ናካር ታ̈ብ ባዬ።

²¹ሜላን ፌ̈ብ ማ̈ቂ̇ዝ ባዝ ሙታ̇ ኮዪ̈ርዶኬ ዬሱ̈ስ ክርስቶ̈ሳ ባዝ ቆፒ̇ባ̈ሴ።

²²ጢማ̈ቶ̈ሲ ቴባራ ናእኬ ባ̈ባክፌ̈ኒ ማ̈ቃ̇ሪ ዎጛላ ኦ̈ሲን ኦ̈ኖንባራ ኢ ኣማ̇ኒንቲ̇ኖ ኣስ ማ̈ቃ̇ር ፌ̈ና ቤይሲኖን ዪንቲ̇ ዎይ ኤሪ̇̈ሬ።

²³ዪዚ ቴ ባዚ ኣብዝ ማ̈ቂ̇̈ርኮ ቴ ኤሪ̇ኖፖ ዓኒ ጢማ̈ቶ̈ሳ ኤሊ̇ራ ዪንታ̇̈ኮ ሚሻንዳብ ታስፋ ጋዲ̇ኔ።

²⁴ዪኒፓሬ ቴ ቴ ቆሚ̇ን ዪንታ̇ክ ኤሊ̇ር ሉካ̇ምፔ̈ን ጎዳ ታ̈ና ማ̈ዳ̇ዚን ቴ ኣማ̇ና̈ሬ።

²⁵ታ̈ቦ ኮሺ̇ዝ ባዝ ዎይባራ ታ̈ና ማ̈ዳንፔ̈ን ዪንቲ ታ̈ብ ሚሺኖ ቴባር ዎልኣ ኦ̈ዛ ማ ዎታ̇ዳራፌ̈ን ማ̈ቃ̇ር ታባር ዎልኣ ዋ̈ዪዛ ማ ዪንታ̇ባር ኪ̈ቲንቲ̇ዛ ቴ ኢሻ̈ ኣፍሮዲ̈ጣ ቴ ዪንታ̇ኮ ማ̈ሳር ሚሻንዳብ ኮሻ̇ዚን ታ̈ቦ ቤንቲ̇ኔ።

²⁶ቴ ዪንታ̇ኮ ኢያ ሚሻዚንዳ ኢ ዪንታ̇ ዎይን ቤቃ̈ንዳቦ ሹ̈ንቲኖኮታብኬ “ኢ ማ̈ኔ” ጌይኖን ዪንቲ̇ ሲስኪ̇ኖኮታቦ ኢ ጫና̇ቂንታዚንጊሼ̇።

²⁷ኪንባራ ኢ ማር ዓይቃቦ ዬላ̇ር ኣቲ̇ኔ፤ ዎቲናካሬ ጾ̈ሳ̇ ኢያ ማ̈ዲዴ፤ ኢያ ሙታ ጊዳካ̇ይዶን፥ ታ ጋልዳር ሜታ ጋልዳ ሜታ ጉጂንታ̇ካ̇ዮ̈ዲፌ̈ኒ ጾ̈ሲ ታ̈ናር ማ̈ዲ̇ኔ።

²⁸ዪዚ ዪ̈ኮታ̇ቦ ዪንቲ ኢያ ቤቃ̇ሪ ኡፋይታንፔ̈ንኬ ታ̈ናሬ ቴ ሙዲዳዚን ጋልዳፖ ሼምፓ̇ምፔ̈ን ቴ ዪንታ̇ኮ ኢያ ሚሺኔ።

²⁹ኢ ጎዳ ኣማ̇ኒኖ ኣስ ማ̈ቂ̇ኖንዲፌ̈ኒ ዪንቲ̇ ኢያ ኡፋይስባራ ሞ̈ኪ̇ ኤኪ̇ብቴ፤ ማ ኢፌ̈ኖ ኣሳ̈ን ዎይ ቦንቺ̈ብቴ።

³⁰ዪንቲ ታ̈ኮ ኡካ̇ር ታ̈ቦ ኦ̈ንዳቦ ዳንዳኣካዮን ዎይ ኢ ታ̈ብ ኩም̈ሬ ጋ̈ሪ ክርስቶ̈ሳ ኦ̈ሳቦ ፌ ሼምፒ̇ምቦ ሚጪንታካ̇ይዶር ዓይቃቦ ዬሊ̇ንዶን ኣቲ̇ኔ።