Read basketo ፊል 4 Bible Online

ፊል 4 - basketo bible

ፊል 4

¹ቴ ዪንታ̇ ካዛን፥ ታ̈ና ሹ̈ኒሺዛን፥ ቴ ኡፋይሳ̈ንኬ ቴ ኦ̈ሲምቦ ታ̈ብ ሺሊ̇ማ̈ታፌ̈ን ማ̈ቂ̇ኖ ቴ ኢሺንታ̈ን! ጎ̈ዳባራ ዪንታ̇ብ ዎ ፔቲ̇ቲንባራ ሚ̈ጛር ዶኢብቴ።

²ኤዎ̈ዳኬ ሲንጺኪኬ ኢንቲ ዎል ዎልኣ ጎዳባራ ካንታ̇ር ዶኣምፔ̈ኒ ቴ ኢንታ ዞራ̈ሬ።

³ኔ̈ናሬ ኢና ዎ ኣማ̇ኒንቲ̇ኖ ቴባር ዎልኣ ኦ̈ዛ ቴ ላጋ̇̈ዶ! ኔ̈ኒ ዪን ማጫ̇ን ማ̈ዳ̇ምፔ̈ን ቴ ኔ̈ና ጌሻ̇̈ሬ፤ ዪን ማጫ̇ን ቄላምኒጦ̈ሳባራ፥ ኢንታ ሱም ሼምፓባር ዶኢዝ ኣሳን ጻ̈ፊንቲ̇ዝ ማጻ̈ፋ ጋልዳ ጻ̈ፊንቲ̇ኖ ኣሳንባርኬ ቴባር ኦ̈ዛን ሜላንባር ዎል ማ̈ቃ̇ሪ ዎጛላ ኦ̈ሲን ሚ̈ጛር ኦ̈ኖ ኣሴ።

⁴ዎይ ጋላስ ጎዳ̈ባር ዪንታ̇ብ ዎ ፔቲ̇ቲንባር ኡፋይቲ̇ብቴ፤ ማሃር ቴ ዪንታ̇ክ ጋ̈ሬ ኡፋይቲ̇ብቴ።

⁵ዪንቲ̇ ኮሽ ኣስ ማ̈ቂ̇ኖንዳ ኣስ ዎይ ቲ̈ን ኤሪንቲ̇ኖ ማ̈ቆ̇ጋቤ፤ ጎ̈ዳ ዬንቲ̇ን ኡኪ̇ኔ።

⁶ጾ̈ሳ̇ ጌሺሙታኬ ኢያ ጋላቲሙታ ዎይባዝ ዎ̈ሳባር ጾ̈ሳ̇̇̈ኮ ሺ̈ሺ̇ብቴዶ̈ኬ ኣባክ ፔቲ ባዛባር ጫና̇ቂንታፒ̇ቴ።

⁷ኣሳ ኤሪቲ ዎይፖ ኣ̈ዛ ጾ̈ሳ̇ ሳ̈ርቲ̈ዲ ዪንታ ቡ̈ዲንዲኬ ዪንቲ ቆ̈ፊን ዬሱ̈ስ ክርስቶ̈ስባራ ና̈ጊ̈ሬ።

⁸ቴ ኢሺንታ̇ን! ዉርሲ ጋልዳ ቴ ጋ̈ዚንዳ፥ ኪን ማ̈ቂ̇ኖ ባዝ፥ ቦንቺ̇ንቲ̇ኖ ባዝ፥ ኮሽ ማ̈ቂ̇ኖ ባዝ፥ ጺላ̇ ማ̈ቂ̇ኖ ባዝኬ ካንቲ̇ኖ ባዝ ዎይ ኮሺቲር ማ̈ቂ̇ን ጋላታር ማ̈ቂ̇ን ዪንፌ̈ኖ ባዛን ቆፒ̇ብቴ።

⁹ዪንቲ ታ̈ ጋልዳፖ ታማሪኖን፥ ታ ጋልዳፖ ኤኪ̇ኖንዶ፥ ታ ጋልዳፖ ሲስኪ̇ኖንዲኬ ቤቂ̇ኖን ዎይ ኦ̈ብቴ፤ ሳሪቲ ጾ̈ሳ̇̇̈ዲ ዪንታ̇ባራ ዶኢ̈ሬ።

¹⁰ዪንቲ ዎይሊን ኬላ̇ፖ ዎሃ ዓት ታ̈ና ዬሊ̇ኖ ሜቲን ጎይ ቆፒ̇ ዣማ̇ሪኖኮታ̇ቦ ጎ̈ዳባራ ታ̈ቦ ጴች ኡፋይሲ̇ ሲስኪንቲ̇̈ሬ፤ ዪንቲ ታ̈ና ማዳ̇ንዳብ ዪንታ̇ብ ማ̈ቂ̇ዝ ኬል̇ ዲጛካ̇ዬ ጋ̈ርዶኬ ዪንቲ̇ ታ̈ና ቦቲ̈ጚኔ ጌንት ጊዳካ̇ዬ።

¹¹ማ ቴ ዪኖ̇ ጌይኖንዳ ታ̈ብ ኮሺ̇ዝ ባዚ ጉ̈ጺ̇ኔ ጌንት ጊዳ̈ካዬ፤ ታ̈ኒ “ታ̈ቦ ዎ ባዚን ኢዛ ታ̈ብ ጊዳ̈ሬ” ጋዚን ታ ታማ̈ሪኔ።

¹²ቴ ዲጛራር ቤቂ̇ኔ ማ ዪናር ቤቂ̇ኔ፤ ዎይ ጎይባራ ጋፊንቲ̇̈ሬ ጋዚን ኣብዝኮ ሚሼ̇ ጋ̈ዚን ኣብዝኮ ዲጚ̈ኔ ጋ̈ዚን ኣብዝኮ ዪ̈ኔ ጋ̈ዚን ኣብዝኮ ዎይን ኤራ̈ሬ።

¹³ዎልቃ ታ̈ብ ኢሚ̇̈ዛ ክርስቶ̈ስባራ ዎይ ባዝ ኦ̈ንዳቦ ዳንዳኣ̈ሬ።

¹⁴ዎቲናካሬ ዪንቲ ታ̈ና ዬሊ̇ኖ ሜቲንባር ታ̈ና ማ̈ዲ̇ኖንዳ ኮሼ̇።

¹⁵ማ ዪኒፓ̇ሬ ዪንቲ ፊልጲሶ̈ስ ካታሚን ጋርታ̇ ዎን ዪንቲ̇ ኤራዚንዲፌ̈ኒ ዪንቲ̇ ዓኒ̇ፖ̇ ቲ̈ን ዎጛሊን ሲስኪ̇ኖ ኬሊ̇ን ጋርታ̇ ታ̈ኒ ሜቂዶ̈ናፖ ዲንዳራ ሉካ̇ዚምባራ ታ̈ብ ኮሺ̇ዝ ባዝ ኢሚባራ ዪንታ̇ዶኬ ሜላ ዎሳ ኬ̈ ኦ̈ናካር ታ̈ና ማ̈ዲ̇ኖ ባዬ̇።

¹⁶ታ̈ኒ ታሳሎንቃ ካታሚን ጋርታ ዎምባራር ታ̈ብ ኮሺ̇ዝ ባዝባር ዎይሊን ቶህ ዪንቲ̇ ታ̈ና ማ̈ዲ̇ኔ።

¹⁷ቴ ዪና̇ ጌይኖንዳ ዪንቲ ታ̈ቦ ኢማዚ̇ን ኮያራ ጊዳካ̇ይዶን ጾ̈ሳ̇ ቲ̈ን ዪንታ̇ ጋቲን ዪንታ̇ብ ዎይላምፔ̈ን ቆፓ̇ራ ጋ̈ሬ።

¹⁸ዪንቲ̇ ታ̈ብ ኮሻ̇ዚንዲኬ ማ ኮሻ̇ዚምፓር ኣ̈ሪ ኣፍሮዲጣባር ታ̈ብ ሚሺኖን ታ ኤኪ̇ኔ፤ ዪና̇ ዪንቲ̇ ታ̈ብ ሚሺኖንዳ ኮሽ̇ ሳውቂ̇ዝ ጾ̈ሳ̇ ኡፋይታ̇ር ኤኪ̇ዝ ዣ̈ርሻ።

¹⁹ዪዚ ቴ ጾ̈ሳ̇̇̈ዲ ፌ ዱሪቲ ዎይሊን̈ዲፌ̈ኒ ዬሱ̈ስ ክርስቶ̈ሳ ጎይባራ ዪንታ̇ቦ ኮሺ̇ዝ ባዛን ዎይ ዎይሊሳር ኢሚ̇̈ሬ።

²⁰ኑ ባ̈ባ̈ብኬ ኑ ጾ̈ሳ̇̇̈ቦ ሜናብ ቦ̈ንቺ ኢቦ ማ̈ቆ̇፤ ኣሚንኤ።

²¹ዬሱ̈ስ ክርስቶ̈ሳ ኣማ̇ኒኖ ኣሳን ዎይ ታ̈ብ ሳሮ ጌብቴ፤ ታባራ ዎ ኣማ̇ኒኖ ኣሳንር ዎይ ዪንታ̇ ሳሮ ጌይኔ።

²²ማ ኣማ̇ኒኖ ኣሳን ዎይ ዎይፖ ሺ ሮማ ጋዲን ካ̈ታ ኣ̈ሎ ኣሳን ዪንታ̇ ሳሮ ጌይኔ።

²³ኑ ጎዳ ዬሱ̈ስ ክርስቶ̈ሳ ካንን ዪንታ̇ባር ማ̈ቆ̇።