Read basketo ቆላ̈ 2 Bible Online

ቆላ̈ 2 - basketo bible

ቆላ̈ 2

¹ዪንታ̇ኮታ̇ቦ፥ ሎዶ̈ቃ ካታሚን ጋርታ̇ ዎ ኣሳንብኬ ታ̈ና ቤቂ̇ ኤሪባ̈ሶ ኣሳን ዎይ ማ̈ዳ̇ንዳቦ ጋ̈ራ ታ̈ኒ ዎዛርፌ̈ን ዋ̈ያሙታ ዎኮ ዪንቲ̇ ኤራምፔ̈ን ቴ ኮያ̈ሬ።

²ዪና̇ ቴ ዎታዚንዳ ኢንቲ̇ ኢንታ̇ ቡ̈ዲንባር ሚ̈ጛርኬ ካንባራ ዎል ፔታ̇ን ማ̈ቃ̇ሪ፤ ኩም ማ̈ቂ̇ኖ ኤራ ዱሪቲን ዲጛሪ፥ ጾ̈ሳ̇ ሚስጢ̇ራ ማ̈ቂ̇ኖ ክርስቶ̈ሳ ኤራምፔ̈ኒ ዋ̈ያ̈ሬ።

³ጾ̈ሲ ኣ̈ቻ̇ር ጋዲ̇ኖ ጴች̇ ኤራኬ ኤጪቲ ዱርቲ ዎይ ክርስቶ̈ሳክ ዎ።

⁴ቴ ዪኖ̇ ጋ̈ዚንዳ ኦ̈ናካር ዪንታ̇ ኪን ማይጺዝ ሶ̈ላባራ ባሊካ̇ዮ̈ዲፌ̈ኔ።

⁵ታ̈ኒ ዓት ዪንታ̇ ጋርታ̇ ኢና ዪንታ̇ባር ባዪካሬ ቆፊባር ዪንታ̇ባር ዎ፤ ዪንቲ ጾ̈ሳ̇̇ ቃ̈ሊን ኪ̈ታ̇ዚንዲፌ̈ኒ ዎቲሙታ̇ኬ ክርስቶ̈ሳባር ዪንታ̇ብ ዎ ኣማ̇ኒንባር ሚ̈ጛር ኤቂ̇ኖን ቤቃ̇ራ ታ̈ኒ ኡፋይቲ̇ኔ።

⁶ዪዚ ዪንቲ̇ ጎዳ ዬሱ̈ስ ክርስቶ̈ሳ ኣማ̇ኒኖንዲፌ̈ኒ ኢባ̈ራ ዶኢብቴ።

⁷ዪንቲ̇ ኢ ጋልዳ ጻጳ ሚሻርኬ ሚ̈ጛር ኤቂ̇ብቴ፤ ዪንቲ ታማ̈ሪኖ ቲሚርቲ̇ንዲፌ̈ኒ ጌዳክ ዓኒክ ጋ̈ካ̇ይ ዪንታ̇ ኣማ̇ኒንባር ሚ̈ጛር ዶኢብቴ̇፤ ዎይ ባዝባራ ጋላታ ኩሚኖ ኣስ ማ̈ቂ̇̈ብቴ።

⁸ክርስቶ̈ሳ ጋልዳ ጊዳካ̇ይዶን ኣሲ ኬሲ̇ኖ ዎጋኬ ዓኒ̇ ኣላሚን ጋልዶ ኣሳን ኬሲ̇ኖ ፋባ̈ሶ ዎጋ ጋልዳ ኤቂ̇ኖ ቲሚርታባራ ማ ሜላ̇ ዓሪ ማቃባር ኦ̈ናካር ዪንታ̇ ኮራር ፌ̈ክ ኤካካ̇ዮ̈ዲፌ̈ኒ ና̈ጊንቲ̇ብቴ̇።

⁹ኣባ ጌይን ክርስቶ̈ሳ ኣሲቲን ጋልዳ ጾ̈ሲቲ ኩም ዎ።

¹⁰ዪንታ̇ሬ ዎይ ባዝ ዪንታ̇ብ ኩሚኖንዳ ላ̈ንታ̇ንብኬ ጋዣንቦ ዎይ ቆም̇ ማ̈ቂ̇̈ኖ ክርስቶ̈ሳ ጋልዳፖ̇።

¹¹ዪንቲ ክርስቶ̈ሳ ኣማ̇ኒኖኮታ̇ቦ ጋራ̇ዚንቲ̇ኔ፤ ዪና̇ ና̈ጋራንቻ ማ̈ቂ̇ኖ ዪንታ̇ ኣሲቲን ይሳ̇ንዳቦ ክርስቶ̈ሳ ኩሽባር ጋራ̇ዚንቲንዶኬ ኣሳ ኩ̈ሽባራ ጋራ̇ዚንታ̇ካ̇ዬ።

¹²ዪንቲ̇ ጻማ̇ቂንቲ̇ኖንባራ ክርስቶ̈ስባራ ዱ̈ኪንቲ̇ኔ፤ ክርስቶ̈ሳ ዓይቃ ጋርታፖ̇ ዲንኖ ጾ̈ሳ̇ ዎልቂ̈ን ዪንቲ̇ ኣማ̇ኒኖኮታ̇ቦ ኢባራ ዓይቃ ጋርታ̇ፖ ዲንዲ̇ኔ።

¹³ዪንቲ̇ ናጋራንቻ ማ̈ቃ̇ር ዎንባርኬ ናጋራንቻ ማ̈ቂ̇ኖ ዪንታ̇ ኣሲቲን ጋራ̇ዚንታ̇ካ̇ዮኮታ̇ቦ ዓይቂ̇ኖንዶን፤ ዎቲናካር ዓት ጾ̈ሳ̇̇̈ዲ ዪንታ̇ ክርስቶ̈ሳ ጎይባር ሼምፓ̇ባር ዶኢዝ ኣስ ማሂኔ፤ ዪንታ ና̈ጋሪንዳር ዎይ ዪንታ̇ቦ ኣቶ̇ ጌይኔ።

¹⁴ኑ̈ና ሞ̈ታ ኑ̈ና ታቆ̈ማዝ ሂጊ̇ን ጋልዳ ዎ ኣጫ ጹ̈ፊንዶ ቁቻ̇ር ይሲ̇ዴ፤ ማ ኢዞ ማስቃላ ጋልዳ ሶታ̇ሪ ኑ ጋልዳፖ ፋይዴ።

¹⁵ኢ ዎልቃባሮንኬ ሲልጣ̇̈ናባሮን ማስቃ̇̈ላ ጋልዳ ኦ̈ኖ ኦ̈ሳባራ ኢንታ ጋማር ኢንታ̇ ካ̈ታ̇ሪ ካ̈ቲንቲ̇ኖን ፋላ̇ ጋልዳ ኬስካ̇ር ቤንታ̈ኒፌ̈ን ዎቲዴ።

¹⁶ዪዚ ዪንታ̇ጋልዳ ኣሲ ኦ̈ናካሬ ሙንት ጎይባርኬ ኡሽ ጎይባራ፣ ዎይ ባ̈ል ቦንቺ̇ዝ ጎይ ዎይ ኣጋኒ ጼ̈ሪኖ ቃሚ̇ን ቦንቺ̇ዝ ጎይኬ ሳምባታ ቦንቺ̇ዝ ጎይ ዪንታ̇ ጋልዳ ፊርዳፖጋ̈ቤ።

¹⁷ዪን ዎይ ዚቃንታ̇ ዬይኖ ባዛንቦ ኤ̈ሻ̇ፌ̈ኔ፤ ዎቲናካሬ ኪንን ቤንታ̇ዚንዳ ክርስቶ̈ሳ ጎይባራ።

¹⁸ማቃባር ፌ̈ና ዪርክ ዪርክ ዎቲሙታ̇ኬ ማ ጾ̈ሳ̇ ኪ̈ታንቻን̇ብ ጎሽቲ̇ዛኮታ̇ቦ ኬርፊዝ ኣሲ ኦ̈ናካሬ ዪንቲ ጾ̈ሳ̇ ጋልዳፖ̇ ዲጚዝ ባዝ ጋልዳፖ ሜላ̇ ዪንታ̇ ኣሻ̇ካዮ̈ዲፌ̈ኒ ና̈ጊንቲ̇ብቴ፤ ዪ̈ፌ̈ኖ ና̈ሳዲ ታ̈ኒ ሳጻ ቤቂ̇ኔ ጌዪ ሙታ̇ ሜላ̇ ዓሪ ማ̈ዲ̇̇ባሶ ቆፊባራ ኦቲርቂ̈ሬ።

¹⁹ዪ ና̈ሳ̈ዲ ቆም̇ ማ̈ቂ̇ኖ ክሪቶ̈ሳባር ኣባካር ፔቲቲ ኢ̈ብ ባዬ̇። ጋሊ̇ ዎይ ሻሽ̇ባራ ዎል ዬልሪ ጾ̈ሲ ኢሚ̇ኖ ዲቺ̇ንዲፌ̈ኒ ዲቺ̇ዛ̈ዲ ቆማ̈̇ዳ።

²⁰ዪንቲ ክርስቶ̈ሳባራ ዓይቃ̇ር ዓኒ̇ ኣላሚን ጋልዳ ዎጋን ጋልዳፖ̇ ዉርሲ ፋጊንቲ̇ኔ፤ ዓት ዪ̈ዶኮ ዓኒ̇ ኣላሚን ጋልዶ ዎጋን ጋልዳፖ ፋጊንታ̇ካ̇ዮ ኣስፌ̈ን “ኤ̈ፔ̇፣ ኔ ኖ̈ና ኤይፔ፣ ዎ̈ሻፔ” ጌይዝ ዎጋንቦ ኣባብ ኪ̈ቲንቲ̇̈ራ?

²²ዪን ዎይ ኣሲ ኬሲ̇ኖ ዎጋኬ ኣሲ ኬሲ̇ኖ ቲሚርታ̇ ማ̈ቂ̇ኖኮታቦ ኦ̈ሳ ጋልዳ ፌ̈ሽኪ̇ኖፖ ዓኒ ያንዳብ ዎ።

²³ዪን ኪ̈ታን ኣሲ ፌ ጋልዳፖ ኮቺ̇ ኬሳ̇ሪ ጎሽቲዛ̈ዳኬ ማቃ̇ር ፌ̈ና ዪርክ ዪርክ ዎታሪ ፌ̈ና ማንቂሲሙታ ዎታዚንዳ ኢንታ̇ብ ኤጪቲ ዎ ማይጻ̈ርዶን ዎቲናካሬ ኢንቲ ፌ ኣይሺ̇ን ማንቂ̇ሳዚንዳ ኢንታ̇ ኢ̈ታ ኢኒ̇ን ኢንታ̇ ጋልዳፖ̇ ይሳንዳቦ ኣባካር ኢንታ̇ ማ̈ዳ̇ባሴ።