Read basketo ቆላ̈ 3 Bible Online

ቆላ̈ 3 - basketo bible

ቆላ̈ 3

¹ዪዚ ዪንቲ̇ ክርስቶ̈ሳባር ዓይቃ ጋርታፖ̇ ዲንዲ̇ኖኮታ̇ቦ፥ ክርስቶ̈ሲ ጾ̈ሳ̇̈̇ቦ ኡሻች̇ ጎይ ዶኢኖ̈ንኮ ኢና ኣፋ ዎ ባዛን ኮዪብቴ̇።

²ዪንታ̇ ቆፋ̈ዳሬ ኣፋ ዎ ባዛን ጋልዳዶኬ ሳ̈ዳ̇ ዎ ባዛን ጋልዳ ማ̈ቃፖ̇።

³ኣሲ ኣሳ ጋልዳፖ ዓይቃባር ፋጊንታ̇ዚንዲፌ̈ኒ ዪንቲ̇ ዓኒ̇ ኣላሚን ጋልዳፖ̇ ፋጊንቲ̇ኔ። ዪንታ̇ ሼምፒ̇ንዳ ክርስቶ̈ሳባራ ጾ̈ሳ̇ ላፍ ኣ̈ቺንቲ̇ኔ።

⁴ዪንታ̇ብ ሼምፓ ማ̈ቂ̇ኖ ክርስቶ̈ሲ ቦንችባራ ቤንታ̇ምባራ ዪንታ̇ሬ ኢባር ዎልኣ ቦንችባራ ቤንቲ̇̈ሬ።

⁵ዪ̈ኮታ̇ቦ ሳ̈ዝ ጋልዳ ዎ ባዛብ ኢኒ̇ታዝ ኢ̈ታ ኢኒ̇ን ዎይ ዎብቴ፤ ዪንሬ፦ ኦሎ̈ላ፣ ቱኒቲ፣ ዲርጊስ፣ ኢ̈ታ̇ ኢና̈ኬ ዎይባዝ ታ̈ብ ማ̈ቆ̇ ጌንት፤ ዎይባዝ ታ̈ብ ማ̈ቆ̇ ጌይዛ̈ዲኬ ኤ̈ቃብ ጎይኒዛ̈ዲክ ዎልኣ ፔታ̇ኔ።

⁶ጾ̈ሳ̇̈̇ብ ኪ̈ቲንቲ̇ባ̈ሶ ኣሳን ጋልዳ ዪንፌ̈ኖ ባዛንጊሽ̇ ጾ̈ሳ̇̇ ጎይሊን ዬ̈ሬ።

⁷ዓኒ̇ፖ̇ ቲ̈ን ዪንቲ̇ ጎዳ ኣማ̇ናካ̇ዮ ኬል̇ባራ ዪንፌ̈ኖ ባዛን ኦ̈ሙታ̇ ጋምኢ̇ኔ።

⁸ዪዚ ዓት ዪንቲ̇ ጎይል፣ ዛላ፣ ቆ̈ሳ፣ ጌስትኬ ኣስ ዬ̈ሊ̇ዝ ሶ̈ላ ዪንታ̇ ጋልዳፖ̇ ፋይብቴ̇።

⁹ዪንቲ̇ ቲ̈ኖ ዪንታ̇ ኣሲቲን ኢዝ ኦ̈ሲምባር ዎልኣ ዪንታ̇ ጋልዳፖ̇ ኬሳ̇ር ቶጚኖኮታ̇ቦ ዪንቲ ዎልዎልኣ ማቃ ሶ̈ላፒ̇ቴ።

¹⁰ዪንቲ̇ ዪንታ̇ ኮቺ̇ኖ ጾ̈ሳ̇̇ ማይጺሙታ̇ ጾ̈ሳ̇ ኤራባር ኦራ ማ̈ቂ̇ሙታ̇ ሉኪ̇ዝ ኦራ ኣሲቲ ማኢኔ።

¹¹ዪዚ ዪና̇ ኦራ ኣሲቲን ጋርታ̇ ኣይሁድ ዎይ ኣይሁድ ባዮ̇ ኣሲ፣ ጋራ̇ዚንቲ̇ኖ ኣሲ ዎይ ጋራ̇ዚንታካ̇ዮ ኣሲ፣ ኣሳ ጋዶ̇ ኣሲ ዎይ ታማ̈ራካ̇ዮ ኣሲ፣ ኣይላ ዎይ ኣይላ ጊዳካ̇ዮ ኣስ ጌይዝ ፋጊቲ ባዬ̇፤ ክርስቶ̈ሲ ዪን ዎይንስ ጋርታ̇ ዎኮታ̇ቦ ዋ̈ና̇̈ዲ ክርስቶ̈ሳ።

¹²ዪዚ ዪንቲ̇ ጾ̈ሲ ዪንታ̇ ፌዪ ማሃንዳብ ቆሪኖንኬ ኢባር ካንቲ̇ኖ ጾ̈ሳ̇̇ ዎርዣ ማ̈ቂ̇ኖኮታ̇ቦ ኣሳብ ሚጪንቲ̇፣ ኣሽኪቲ፣ ዪንታ̇ ዪርክ ዪርክ ዎቲ፣ ኮሺ̇ቲኬ ዳንዳኣ ማኢኖ ኣስ ማ̈ቂ̇ብቴ።

¹³ዪዚ ዪንቲ̇ ዎልዎልኣ ዳንዳኢብቴ፤ ዪንታ̇ ጋርታ̇ ፔታ̇ና̈ዲ ፔታ̇ና ጋልዳ ሺን ጌይኖባዝ ዎኮ ክርስቶ̈ሲ ዪንታ̇ብ ኣቶ̇ ጌይኖንዲፌ̈ኒ ዪንታ̇ር ዎልዎልኣ ኣቶ̇ ጌብቴ።

¹⁴ዪን ዎይንፖ ሺ ዎይ ባዝ ሺ̈ሻር ዎልኣ ፔታ̇ን ማሃንዳብ ዳንዳኣዚን ካንን ማኢብቴ።

¹⁵ዪንቲ̈ ፔቲ ኣስ ጋል̇ ጋልዳ ዎ ጋላ̇ንፌ̈ኒ ማ̈ቃ̇ሪ ኪን ጼይጊንቲ̇ኖንዳ ዓና̇ ሳሪቲምቦ ማ̈ቂ̇ኖኮታ̇ቦ ክርስቶ̈ሳ ሳሪቲንዳ ዪንታ̇ ጋርታ̇ ኩማጋ̈ቤ፤ ማ ጾ̈ሳ̇̇ ጋላቲዝ ኣስ ማ̈ቂ̇ብቴ።

¹⁶ክርስቶ̈ሳ ቃ̈ሊን ኩም ዪንታ̇ ጋርታ̇ ዶኣጋ̈ቤ፤ ኤራ ዎይባራ ዎልዎልኣ ታማ̈ርሲብቴ̇፤ ዎል ዎልኣ ዞ̈ሪንቲ̇ብቴ፤ ጋላታ ማዝሙራባራኬ ዎይ ኣይናታ ማዝሙራባራ ጾ̈ሳ̇̇̈ቦ ቡ̈ዳ ጋርታ̇ፖ ዬጺ̇ብቴ።

¹⁷ዬሱ̈ስ ክርስቶ̈ስ ጎይባራ ጾ̈ሳ̇ ባ̈ባ ጋ̈ላቲሙታ̇ዶ̈ሪ፥ ቃ̈ላባራር ማ̈ቆ̇ ኦ̈ሳባራ፥ ዪንቲ ኦ̈ዝ ባዛን ዎይ ጎዳ ዬሱ̈ስ ክርስቶ̈ስ ሱ̈ምባራ ኦ̈ብቴ፤ ማ ኢ ጎይባራ ጾ̈ሳ̇ ባ̈ባ̈ ጋ̈ላቲብቴ።

¹⁸ማ̈ጫ̇ን! ጾ̈ሳ̇ ቲ̈ን ኮሺ̇ዝ ባዝ ማ̈ቂ̇ኖኮታ̇ቦ ዪንቲ ኣስኒንታ̇ንቦ ኪ̈ቲንቲ̇ብቴ።

¹⁹ኣስኒንታ̇ን! ዪንታ̇ ማ̈ጫ̇ን ካብቴ፤ ኢንታ̇ብ ጋራፌ̈ን ጫ̈ጛፒ̇ቴ።

²⁰ናኣን! ጎዳ ኡፋይሲ̇ዝባዝ ማ̈ቂ̇ኖኮታ̇ቦ ዪንታ̇ ባ̈ባ̈ብኬ ዪንታ̇ ኢንዲቦ ባዝ ዎይ̈ባራ ኪ̈ቲንቲ̇ብቴ።

²¹ባ̈ቢንታ̇ን! ዪንታ̇ ናኣን ታስፋ ቃጻካ̇ዮ̈ዲፌ̈ን ኢንታ̇ ማ̈ራ̇ሪሳፒ̇ቴ።

²²ኣይላ̈ን! ሳ̈ዝ ጋልዳ ዎ ዪንታ̇ ላ̈ንቦ ባዝ ዎይባራ ኪ̈ቲንቲ̇ብቴ፤ ዪንቲ ኪ̈ቲንታ̇ዚንዳ ኣስ ኡፋይሳ̇ንዳቦ ጊዳካ̇ይዶን ጾ̈ሳ̇̇̈ቦ ኢ̈ጪ̇ሙታ̇ ኪን ቡ̈ዳባራ ኪ̈ቲንቲ̇ብቴ።

²³ዪንቲ ኦ̈ዝ ባዛን ዎይ ኣሳብ ኪ̈ቲንቲ̈ዛ̈ዲፌ̈ን ፋይዳካ̇ይዶሪ ጎዳ̈ቦ ኦ̈ዛ ማ̈ቂ̇ኖን ኤራሪ ቡ̈ዳ ጋርታፖ̇ ኦ̈ብቴ፤

²⁴ኣባ ጌይን ጾ̈ሳ̇ዲ ዪንታ̇ቦ ኢማ̇ንዳ ጌዪ ቃ̈ላ ጌሊኖን ዪንታ̇ብ ኢማ̇ዚን ዪንቲ̇ ኤሪ̈ሬ፤ ዪንቲ̇ ኦ̈ዚንዳ ጎዳ ክርስቶ̈ሳቦ።

²⁵ጾ̈ሳ̇ዲ ኪን ፊርዲዛኮታ̇ቦ ኢ̈ት ኦኖ ኣሲ ፌ ኢ̈ታ ኦ̈ሲንቦ ፌ̈ብ ኮሻ̇ዝ ቂጣ̈ቲን ኤኪ̇̈ሬ።