Read basketo ቆላ̈ 4 Bible Online

ቆላ̈ 4 - basketo bible

ቆላ̈ 4

¹ላ̈ንታን! ዪንታ̇ባር ላ̈ ኣፋ ዎን ኤራ̈ሪ ዪንታ̇ ኣይላ̈ን ኮሽ̇ ቡ̈ዳባራ ኢንታ̇ ዎልፌ̈ን ቤቃ̇ር ኣቂሲብቴ።

²ጾ̈ሳ̇ ጋላቲሙታ̇ ባርካ̇ሪ ዎ̈ሳባር ሚ̈ጚብቴ።

³ማ ኑ̈ኒ ጾ̈ሳ̇ ቃ̈ሊን ሳባኪዝ ጎይ ኑ̈ብ ፊርቃምፔ̈ንኬ ክርስቶ̈ሳ ሚስጢ̇ሪን ኣሳብ ሶ̈ላንዳብ ዳንዳኣምፔ̈ኒ ጾ̈ሳ̇ ኑ̈ብ ዎ̈ሲ̇ብቴ፤ ታ̈ናር ቃቺንቲ̇ኖንዳ ዓና̇ ሚስጢ̇ሪን ሳባኪ̇ኖኮታ̇ቦ።

⁴ታ̈ናሬ ታ̈ብ ኮሻ̇ዚንዲፌ̈ኒ ጾ̈ሳ̇ ቃ̈ሊን ፋል̇ ሶ̈ላምፔ̈ኒ ታ̈ብ ዎ̈ሲ̇ብቴ̇።

⁵ዪንታ̇ብ ቤንቲ̇ኖ ኬሊ̇ን ኢዞ ሜላ̇ ይሳካ̇ይዶር ኦ̈ሳጋልዳ ፌ̈ሺ̇ሙታ̇ ኣማ̇ናካ̇ዮ ኣሳንባራ ኤራባር ዶኢብቴ̇።

⁶ኣስ ዎይቦ ኮሻ̇ዝ ሶ̈ሊን ሶ̈ላር ማሃንዳቦ ዪንታ̇ ሶ̈ሊንዳ ዎይ ጋላስ ቃ̈ጺዝ ኮሽ̇ ሶ̈ላ ማ̈ቆ̇።

⁷ጾ̈ሳ̇ ኦ̈ሳቦ ኣማ̇ኒንቲ̇ኖ፥ ጎዳ ኦ̈ሲን ታባር ዎልኣ ኦ̈ዛ፥ ካንቲ̇ኖ ኑ ኢሻ ቲኪቆ̈ሲ ታባዝ ዎይ ዪንታ̇ብ ሶ̈ሊ̈ሬ።

⁸ታ̈ኒ ኢያ ዪንታ̇ክ ሚሺኖንዳ ኢ ኑባዝ ዪንታ̇ቦ ሶ̈ላምፔ̈ኒኬ ዪንታ̇ ቡ̈ዲን ሚ̈ንኒፌ̈ኔ።

⁹ማ ዪንታ̇ ጋዶ̇ ኣስ ማ̈ቂ̇̈ኖ ኣማ̇ኒቲ̇ኖ̈ዲኬ ካንቲ̇ኖ ኑ ኢሻ ኣና̈ሲሞሲ ኢባር ዎልኣ̈ ዪንታ̇ክ ዬይሬ፤ ኢንቲ̇ ዓንዳ ኑ ጊዳ̇ ኦ̈ሲንቲ̇ሙታ̇ ዎ ባዛን ዎይ ዪንታ̇ቦ ሶ̈ሊ̈ሬ።

¹⁰ታባራ ዎልኣ ቃሺ ኣ̈ል ዎ ኣስጥሮኮ̈ሲ ዪንታ̇ ሳሮ ጌይኔ፤ ባርናባ̈ስ ኣቢ̇ ናኣ ማ̈ርቆሳሬ ዪንታ̇ ሳሮ ጌይኔ። (ማ̈ርቆ̈ሲ ዪንታ̇ክ ሉኬ̇ጌይን ኢያ ሞኪ̇ ኤኪ̇ብቴ ዪዝ ጌይዝ ኪ̈ቶ ዪንታ̇ ዬሊ̇ኔ)

¹¹ዮስጦ̈ሳ ጌዪ ጼይጊንቲ̇ዛ ዬሱ̈ሲ ዪንታ̇ ሳሮ ጌይኔ፤ ጾ̈ሳ̇ ካ̈ቲቲ ኦ̈ሲን ታባር ኦ̈ዛን ጋርታ̇ፖ ኣይሁዳ ዜር ማ̈ቂ̇̈ኖን ዪን ሙታ̇፤ ኢንታ̇ር ጴች ታ̈ና ሚ̈ንኔ።

¹²ዬሱ̈ስ ክርስቶ̈ሳብ ኣይላ ማ̈ቂ̇ኖ ዪንታ̇ ጋዶ̇ ና̈ሳ ኤጳ̈ፍራሬ ዪንታ̇ ሳሮ ጌይኔ። ዪንቲ ጾ̈ሳ̇̇ ጎይባራ ዲጫ̇ንፔ̈ንኬ ጾ̈ሳ̇̇ ቆፊን ዎይ ኦ̈ ፎታምፔ̈ኒ ዪንታ̇ ኮታ̇ ኢ ዎይ ጋላስ ዎ̈ሳባር ዳ̈ቡሪ̈ሬ።

¹³ኢ ዪንታ̇ቦ ማ ሎዶ̈ቃ ጋዳ̇ ዎ ኣንብኬ ሂራ̈ፖ̇ሊስ ካታማ̈ን ጋርታ ዎ ኣሳንቦ ጴች ዋ̈ያዚን ቴ ኢ̈ቦ ማርኪ̇ታ̈ሬ።

¹⁴ካንቲኖ ኣኪማ ሉቃ̈ሳኬ ዴ̈ማሳኬ ዪንታ̇ ሳሮ ጌይኔ።

¹⁵ሎዶ̈ቃ ጋዳ̇ ዎ ኣማ̇ኒኖ ኣሳንቦ ማ ኒምፒ̇ኬ ኢዝ ኣ̈ል ሺ̈ቂዝ ኣማኒ̇ኖ ኣሳን ታ̈ብ ሳሮ ጌብቴ።

¹⁶ዓና̇ ጻ̈ፊኖ ኪ̈ቲን ዪንቲ̇ ናባ̇ቢኖፖ ዓኒ ሎዶ̈ቃ ጋዳ̇ ዎ ኣማ̇ኒኖ ኣሳን ቲ̈ን ናባ̇ብሲብቴ፤ ማ ዪንታ̇ሬ ሎዶቃ̈ፖ ዪንታ̇ክ ዬ̈ዝ ኪ̈ቲን ናባ̇ቢብቴ።

¹⁷ኣርኪጳ̈ሳኮ “ጎዳ ኔ̈ና ኦ̈ ጌይ ኔ̈ብ ኢሚ̇ኖ ኦ̈ሲን ኦ̈ ፎታቤ” ጋ̈ር ኢ̈ብ ሶ̈ሊብቴ።

¹⁸ዓና ሳሪቲ ኪ̈ቲን ቴ ኩሽ ጌ̈ቲንባር ጻ̈ፊኖ̈ዲ ታ ጳውሎ̈ሳ፤ ቴ ቃሺ ኣ̈ል ዎን ዪንቲ ቦቲጛፒ̇ቴ። ጾ̈ሳ̇̈ ኮሺቲን ዪንታ̇ባር ማ̈ቆ̇።