Read basketo 1 ታሳ 4 Bible Online

1 ታሳ 4 - basketo bible

1 ታሳ 4

¹ዪዚ ቴ ኢሺታ̇ን! ጾ̈ሳ̇ ኡ̈ፋይሳ̇ር ዶኣዝ ጎይን ዪንቲ ኑ ጋልዳፖ ታማ̈ሪኔ፤ ዓታ̇ር ዪንቲ ዪና̇ ኢዝፌ̈ን ዶኢሙታ̇ ዎ፤ ኑ ዓት ጎዳ ዬሱ̈ስ ክርስቶ̈ሳ ሱምባራ ዪንታ̇ ጌሻዚንዲኬ ዪንታ̇ ዞራዚንዳ ዪንቲ̇ ዓኒ̇ፖ ቲ̈ን ኦ̈ዚምፖ ሺሻር ኦ̈ምፔ̈ኔ።

²ጎዳ ዬሱ̈ስ ክርስቶ̈ሳ ሱምባራ ዎኒ̇ፌ̈ኖ ኪ̈ታ ኑ ዪንታ̇ቦ ኢሚ̇ኖኮ ዪንቲ̇ ኤሪ̈ር።

³ጾ̈ሳ̇ ዪንታ̇ ጋልዳፖ̇ ኮያዚንዳ ዪንቲ ጌሺ̇ቲባር ዶኣምፔ̈ንኬ ኦሎላ ጋልዳፖ ጎታ̇ምፔ̈ኔ።

⁴ኣሲ ዎይ ፌ̈ ጋሊ̇ንዶ ጌ̈ሺቲባርኬ ቦንችባር ና̈ጋዚን ኤሮጋ̈ቤ።

⁵ጾ̈ሳ̇ ኤሪባ̈ሶ ኣሳንፌ̈ኒ ኦሎላብ ኢና̇ ኢንታ̇ብ ዶኣፖጋ̈ቤ።

⁶ዪኒፌ̈ኖ ባዝባራ ኦ̈ናካር ማ̈ቂ̇ን ፌ ኢሻ ጋልዳ ዎይ ፌ ሚሺን ጋልዳ ኢ̈ት ኦ̈ፖጋ̈ቤ፤ ዓኒ̇ፖ ቲ̈ን ኑ ዪንታ̇ብ ሶ̈ሊኖንዲፌ̈ኒ ዪ̈ዲፌ̈ኖ ባዝ ኦ̈ዝ ኣሳን ጾ̈ሲ ኢንታ̇ ጋልዳ ፊርዲ̈ሬ።

⁷ጾ̈ሲ ኑ̈ና ጼይጊ̈ኖዲ ኑ̈ኒ ጌ̈ሺቲባር ዶኣንፔ̈ንዶኬ ና̈ጋራ ኦ̈ሙታ ዶኣምፔ̈ን ጊዳካ̇ዬ።

⁸ዪ̈ኮታ̇ቦ ዞሪን ዪኖ̇ ኢጺ̇ዝ ኣሳን ዪንታ̇ቦ ጌ̈ሻ̇ ኣያ̇ና ኢሚ̇ኖ ጾ̈ሳ̇ ኢጺ̇ንዶኬ ኣስ ኢጻ̇ካ̇ዬ።

⁹ዎልዎልኣ ካንታዚን ጎይ ዪንቲ̇ ጾ̈ሳ̇̇ ጋልዳፖ ታማ̈ሪኖኮታ̇ቦ ባዚን ዪኒ̇ ጎይ ኦ̈ናካር ዪንታ̇ብ ጻ̈ፋንዳብ ኮሺ̇ባ̈ሴ።

¹⁰ዪንቲ ማ̈ቂዶ̈ና ጋዳ̇ ዎ ኣሳን ዎይ ካሬ፤ ዎቲናካር ቴ ኢሺንታ̇ን! ኑ ዓት ዪንታ̇ ዞራዚንዳ ቲ̈ኖምፖ̇ ኣ̈ሪ ዪንቲ̇ ኢንታ̇ ካምፔ̈ኔ።

¹¹ዓኒ̇ፖ ቲ̈ን ኑ ዪንታ̇ ኪ̈ቲ̇ኖንዲፌ̈ኒ ኣስ ሜላ ዋ̈ዪካይዶር ዚምጋ̈ር ዶኣንዳብ ኮዪብቴ፤ ዪንታ̇ ጌልሲባ̈ሶ ባዝ ጋርታ ጌላፒ̇ቴ፥ ማ ዪንታ̇ ኩሽ ጌ̈ቲምባር ኦ̈ር ሙብቴ፤

¹²ዪንቲ̇ ዪኖ̇ ዎቴጌይንዶ ኣማ̇ናካ̇ዮ ኣሳን ቲ̈ን ቦንቺንቲ̇ኖ ኣስ ማ̈ቂ̇̈ሬ፤ ኣሳ ኩሽ ቤቂ ዶኢባ̈ሴ።

¹³ቴ ኢሺንታ̇ን! ታስፋ ኢንታ̇ብ ባዮ̇ ኣሳንፌ̈ኒ ዬ̈ኪ̇ ሙ̈ዲዳካ̇ይፌ̈ኒ ዓይቂ̇ኖ ኣሳን ባዚን ኪንን ዪንቲ ኤራምፔ̈ን ቴ ኮያ̈ሬ።

¹⁴ዬሱሲ ዓይቂ̇ኖንዲኬ ማ ዓይቃ ጋርታፖ̇ ዲንዲኖን ኑ ኣማ̇ኒ̈ሬ፤ ዪዚ ዪ̈ኮታ̇ቦ ጾ̈ሳ̇̇̈ዲ ዬሱ̈ሳ ኣማ̇ናሪ ዓይቂ̈ኖ ኣሳን ኢንታ ዪኒ̇ፌ̈ኒ ዬሱ̈ሳባር ዎልኣ ኤሄይሬ።

¹⁵ኑ̈ኒ ጾ̈ሳ̇̇ ጋልዳፖ̇ ሲስኪ̇ኖን ዪንታ̇ቦ ሶ̈ላዚንዳ ዓኖ፦ ጎ̈ዳ ዬይዚ ዲራስ ዓይቃካ̇ይ ሼምፓ̇ባር ዎን ኑ̈ኒ ዓይቂ̇ኖ ኣሳንፖ ቲ̈ኒቲባ̈ሴ።

¹⁶ጎዳ̈ዲ ጴች ኪ̈ታባራ፤ ኪ̈ታንቻን ኣላቃ ጊርስባርኬ ጾ̈ሳ̇ ሞይዛ ጊርሳባር ኣጃቢንታ̇ሪ ኣፋፖ ሶ̈ቢ̈ሬ፤ ክርስቶ̈ሳ ኣማ̇ናር ዓይቂ̇ኖ ኣሳን ቲ̈ኒታ̈ር ዲንዲ̈ሬ።

¹⁷ኢናፖ ዎሃ ኑ ዓይቃካ̇ይ ሼምፓባር ዎን ኣፋ ኣይጊ ጋልዳ ጎዳ ዬላ̇ንዳ̇ቦ ፉዳ ሉኪ̇̈ሬ፤ ዪዚ ሜናቦ ጎዳባር ዶኢ̈ሬ።

¹⁸ዪ̈ኮታ̇ቦ ዪና̇ ቃ̈ሊንባራ ዎልዎልኣ ሚ̈ጚንቲ̇ብቴ።