Read basketo 2 ታሳ 1 Bible Online

2 ታሳ 1 - basketo bible

2 ታሳ 1

¹ጾ̈ሳ̇ ኑ ባ̈ባዴይኬ ጎዳ ዬሱ̈ስ ክርስቶ̈ሳይ ማ̈ቂ̇ኖ ታሳሎንቃ ካታሚን ጋርታ ዎ ኣማ̇ኒዝ ኣሳንቦ ታ ጳውሎ̈ሳ ጋልዳፖ፣ ሲላ̇̈ሳ ጋልዳፔኬ ጢማ̈ቶ̈ሳ ጋልዳፖ ሚሺኖ ኪ̈ታ፦

²ጾ̈ሳ̇ ባ̈ባ̈ ጋልዳፔኬ ጎዳ̈ ዬሱ̈ስ ክርስቶ̈ሳ ጋልዳፖ ኢ ኮሺቲንዲኬ ሳሪቲ̇ን ዪንታ̇̇ቦ ማ̈ቆ̇ጋ̈ቤ።

³ኑ ኢሽንታን! ዪንታ̇ ኣማ̇ኒንዳ ዎይ ጋላስ ዲጫ̇ሙታ ሉካ̇ዚንኮታ̇ብኬ ዪንታ̇ብ ዎልዎልኣ ዎ ካንንዳ ዲጫ̇ሙታ̇ ሉኪ̇ኖምቦ ኑ̈ኒ ዪንታ̇ጊሻ̇ቦ ዎይ ጋላስ ጾ̈ሳ̇ ጋላታንዳብ ኮሺ̇̈ሬ።

⁴ዪ̈ኮታ̇ቦ ዎይሊን ሜታ ዪንታ̇ ዬሊ̇ናካሬ ዪንቲ̇ ኢዝ ጊዳ̇ ጋርታ ዎዛርፌ̈ን ጋርዢ ዪንታ̇ ኣማ̇ኒንባር ሚ̈ጚኖንዶ ዎ̈ሳ ኬ̈ንቦ ኑ ዪንታ̇ባዝ ሶ̈ሊሙታ ዪንታ̇ባር ኬርፊ̈ሬ።

⁵ዪን ዎይ ጾ̈ሳ̇ ፊርዲንዳ ጺ̇ላ ማ̈ቂ̇ኖን ቤይሳ̈ሬ። ዪኒ̇ኮታ̇ቦ ዪንቲ̇ ኢዝቦ ጋ̈ሪ ሜታ ኤኪ̇ኖ ጾ̈ሳ̇ ካ̈ቲቲን ኤካ̇ንዳብ ቤይሲኖ ኣስ ማ̈ቃ̇ር ፋይዲንቲ̇̈ሬ።

⁶ጾ̈ሲ ጺላ̇ ፊርዲዛ ማ̈ቂ̇ኖኮታ̇ቦ ዪንታ̇ ጋልዳ ሜታ ዬልኖ ኣሳን ጋልዳ ሜታ ዬልሬ።

⁷ዓት ሜታ ኤኪ̇ዛን ዪንታ̇ኬ ኑ̈ናኬ ኢ ሼምፒቺ̈ሬ። ዪና̇ ማ̈ቃ̇ዚንዳ ጎዳ ዬሱ̈ሲ ዎልቃባሮ ኢ ኪ̈ታንቻንባራ ኣፋ̈ፖ ዬይዝ ጋላ̇ሴ።

⁸ኢ ዬይዛ̈ዲ ታማ ላባራ፤ ዪኒ ጋላ̇ስ ጾ̈ሲ ኢያ ኤሪባ̈ሶ ኣሳንኬ ጎዳ ዬሱ̈ሳ ዎጛሊምቦ ኪ̈ቲንቲ̇ባ̈ ኣሳን ኢንታ ጋልዳ ፊርዲ̈ሬ።

⁹ኢንቲ ጾ̈ሳ̇ ቲ̈ናፕኬ ዎልቃባሮ ኢ ቦ̈ንቺን ጋልዳፖ ፋጊንታ̇ሪ ሜ̈ናብ ዪባራ ፊርዲንቲ̇̈ሬ።

¹⁰ኢንቲ̇ ፊርዲንታ̇ዚንዳ ኢ ፌ ጌ̈ሻ ኣሳንባር ቦንቺንታ̇ንዳብኬ ኢያ ኣማ̇ኒኖ ኣሳን ኢያ ሾክ ሾክ ዎታምፔ̈ን ዬይዝ ጋላሴ። ዪንታ̇ር ኑ ማርኪቲን ሲስካ̇ሪ ኢያ ኣማ̇ኒኖኮታ̇ቦ ዪንታ̇ሬ ዪን ኣማ̇ኒኖ ኣሳንባራ ዎልኣ ኢና ቤንቲ̇̈ሬ።

¹¹ኑ ዪኖ̇ ቆፒ̇ሙታ̇ ዎይ ጋላስ ዪንታ̇ ጊሻ̇ብ ጾ̈ሳ̇ ዎሳ̇ዚንዳ፥ ጾ̈ሳ̇ ዪንታ̇ ጼይጊኖ ጼይሲ̇ምቦ ኢ ዪንታ̇ ማ̈ቂ̇ዝ ኣስ ማሃንፔ̈ንኬ ዪንቲ̇ ኮሽ̇ ባዝ ኦ̈ንዳብ ዶሳዚንዲኬ ዪንታ ኣማ̇ኒኖኮታ̇ቦ ኦ̈ዝ ኦ̈ሲን ዎይ ኢ ፌ ዎልቂንባር ዪንታ̇ ፎቲሳምፔ̈ኒዬ።

¹²ዪና̇ ኢዝፌ̈ኒ ኑ ጎዳ ዬሱ̈ሳ ሱሚን ዪንታ̇ ጋልዳ ቦንቺንታ̇ምፔ̈ንኬ ዪንታ̇ሬ ኑ ጾ̈ሳ̇̇ዴኬ ጎዳ ዬሱ̈ስ ክርስቶ̈ሳ ኮሺ̇ቲንባራ ኢባር ቦንቺንታምፔ̈ን ኑ ዎ̈ሲ̇̈ሬ።