Read basketo 2 ታሳ 2 Bible Online

2 ታሳ 2 - basketo bible

2 ታሳ 2

¹ኑ ኢሺንታ̇ን! ኑ ጎዳ ዬሱ̈ሳ ዬንቲ̇ን ጎይኬ ኑ̈ናር ኢባር ዶኣንዳቦ ኢ̈ክ ሺ̈ቃዚን ጎይ ቴ ዪንታ̇ ጌሻዚንዳ ዓኖ̇፦

²ካ̈ያባራ ዎይ ቃ̈ላባራ ሶሊንቲ̇ኖዲፌ̈ን ቆፓ̇ሪ ዎይ ኑ ጻ̈ፋር ዪንታ̇ብ ሚሺኖ ኪ̈ታፌን ማሃሪ “ጎዳ ዬ̈ዝ ቃሚ̇ን ዬሊ̇ኔ” ጋ̈ሪ ኤሊ̇ር ዪንታ̇ ቆፊባር ጌዳክ ዓኒክ ጋ̈ፒ̇ቴ፤ ማ ሼምፓር ዶኢብቴ።

³ኦ̈ናካር ኣሲ ኣ ጎይባርካር ማ̈ቂ̇ን ዪንታ̇ ጪ̈ጪንቻፖ̇፤ ቲ̈ኒታሪ ዉጫ ኦ̈ሲን ዬ̈ካ̇ይዶንኬ ያብ ጊ̈ጊንቲ̇ኖ ውጫ ና̈ሳ ዬ̈ካ̇ይዶን ዪና̇ ቃሚ̇ን ዬ̈ባሴ።

⁴ዪ ዉ̈ጫ ና̈ሳ̈ዲ ጾ̈ሴ ጌይ ጼይጊንቲዛ̈ን ጋልዳፖኬ ኣሲ ጎሽቲ̇ዝ ባዝ ዎይ ጋልዳፖ ፌ̈ና ሾክ ሾክ ዎቲ̇̈ሬ፤ ኢ ኢ̈ጫካይ ጾ̈ሳ̇ ኬ̈ ጋርታ ዶኣሪ ፌ̈ና ጾ̈ሴ ጌይሬ።

⁵ቴ ዪንታ̇ባር ዎ ኬሊ̇ንባራ ዪኖ̇ ዪንታ̇ብ ሶ̈ሊኖን ዪንታ̇ክ ኤልቅ ጋ̈ባሳ?

⁶ኢ̈ብ ጌይኖ ቃሚ̇ንባር ኢ ቤንቲ̇ዝ ዲራስ ዓት ኢ ቤንታካ̇ይፌ̈ን ኢያ ካዪኖ ባዚን ኢዛ ኣብዝኮ ዪንቲ̇ ኤሪ̈ሬ።

⁷ዉ̈ጫ ዎልቃ̈ዲ ኣሳብ ፌ̈ና ቤይሳካ̇ይዶሪ ዓት ኦ̈ሳ ጋ̈ልዳ ዎ፤ ማ̈ቂናካር ኢ ኦ̈ካ̇ይፌ̈ን ካዪዛ̈ዲ ፋኪ̇ዝ ዲራስ ኢ ኦ̈ሳካ̇ይፌ̈ኒ ኢያ ካዪሙታ ዶኢ̈ሬ።

⁸ዪኒፖ ዎሃ ጎዳ ዬሱ̈ሲ ፌ ኖ̈ኒን ጋርታፖ ኬስካ̇ዝ ፌ̈ኒ̇ንባር ኢያ ይሲ̇ዛ̈ዲኬ ቦንችባራ ቤንታ̇ሪ ይሲዛ ዉጫ ና̈ሳ ቤንቲ̇̈ሬ።

⁹ዪ ዉጫ ና̈ሳ ዬይዛ̈ዲ ሴ̈ጣና ዎልቃባራ ኣስ ባሊዝ ታ̈ሚ̇ራ̈ታኬ ማላ̇ኬ ማ ኣስ ጋራ̇ሚሲዝ ባዝ ኦ̈ሙታ ዬይሬ።

¹⁰ማ ዪዝ ኣሳን ጪ̈ጪንቺ̇ዝ ኢ̈ታ ኦ̈ሳ ዎይ ኦ̈ሙታ̇ ዬይሬ፤ ዪን ኣሳን ያዚንዳ ኢንታ ፋንዳብ ዳንዳኣዝ ኪንን ካር ኣማ̇ናካይ ኣቲ̇ኖኮታ̇ቦ።

¹¹ዪ̈ኮታ̇ቦ ዎርዳ ባዚን ኣማ̇ናምፔ̈ኒ ጾ̈ሲ ኢንታ̇ ባሊዝ ዎልቃ ሚሺ̇̈ሬ።

¹²ዪና̇ ማ̈ቃ̇ዚንዳ ኢንቲ̇ ኪንን ኣማ̇ናብዳ ጋ̈ሪ ናጋራባር ኡፋይቲ̇ዛን ዎይ ፊርዲንታ̇ምፔ̈ኔ።

¹³ጾ̈ሳ̇ባር ካን̇ቲኖ ኑ ኢሺንታ̈ን! ኑ̈ኒ ዪንታ̇ጊሽ ዎይ ጋላስ ጾ̈ሳ̇ ጋላታንዳ̇ብ ኮሺ̇̈ሬ፤ ኑ ኢያ ጋላታዚንዳ ዪንቲ̇ ጌ̈ሻ̇ ኣያ̇ናባር ጌ̈ዥጋሪ ኪንን ኣማ̇ናሪ ፋጻምፔ̈ኒ ጾ̈ሲ ቲ̈ኒታር ዪንታ̇ ማራ̇ጺኒኮታ̇ቦ።

¹⁴ዪንቲ̇ ጎዳ ዬሱ̈ስ ክርስቶ̈ሳ ቦንቺ̇ን ኤኪ̇ዝ ኣስ ማ̈ቃ̇ምፔ̈ኒ ኑ ሳባ̇ኪኖ ዎጛሊን ጎይባራ ዪንታ̇ ጼይጊኔ።

¹⁵ዪዚ ቴ ኢሺንታ̇ን! ሚ̈ጛር ኤቂ̇ብቴ፤ ኑ̈ኒ ዪንታ̇ብ ኖ̈ናባር ሶ̈ሊኖንዳር ማ̈ቂ̇ን ጻ̈ፋር ሚሺኖ ቲሚርቲ̇ን ሚ̈ንር ኤ̈ብቴ።

¹⁶ኢ ኑ ጎዳ ዬሱ̈ስ ክርስቶ̈ሳኬ ኑ̈ና ካኖ ፌ ኮሺ̇ቲንባር ሜና ሚ̈ንቲንዲኬ ማ ኮሻ̇ ታስፋ ኢሚ̇ኖ ጾ̈ሳ̇ ኑ ባ̈ባ̈ዲ

¹⁷ዪንታ̇ ቡ̈ዲን ሚ̈ንጋቤ፤ ማ ዪንቲ̇ ኮሽ̇ ማ̈ቂ̇ኖ ባዝ ዎይ ኦ̈ምፔ̈ንኬ ሶ̈ላምፔ̈ን ዪንታ̇ ሚ̈ንጋ̈ቤ።