Read basketo 1 ጢማ̈ 1 Bible Online

1 ጢማ̈ 1 - basketo bible

1 ጢማ̈ 1

¹ኣማ̇ናባራ ታ̈ቦ ኪን ናኢ ማ̈ቂ̇ኖ ጢማ̈ቶ̈ሶ! ኑ ባ̈ባ ጾ̈ሳ̇ፔኬ፥ ኑ ታስፋ ዬሱ̈ስ ክርስቶ̈ሳ ኪ̈ታባራ ኢ̈ቦ ሃዋ̈ራ ማ̈ቂ̇ኖ ታ ጳውሎ̈ሳ ጋልዳፖ ዓና̇ ኪ̈ቲን ኔ̈ብ ሚሺኔ፤ ጾ̈ሳ̇̇̈ ኑ ባ̈ባ ጋልዳፕኬ ኑ ጎዳ ዬሱ̈ስ ክርስቶ̈ሳ ጋልዳፖ ኮሺ̇ቲ፥ ማ̈ሪቲኬ ሳሪቲ ኔ̈ብ ማ̈ቆ̇ጋ̈ቤ።

³ታ̈ኒ ሜ̈ቂዶ̈ና ሉካ̈̇ርዶራ ኔ̈ኮ ዓዳራ ጌይኖንዲፌ̈ን ፔቲ̇ ፔቲ̇ ኣሳን ማቃ ቲሚርታ ታማ̈ርሳካ̇ዮ̈ዲፌ̈ኒ ዎታንዳቦ ኔ̈ኒ ኢና ኤፍሶ̈ና ዶ̈ኣቤ።

⁴ቶሳብኬ ዉርሲ ባዮ̇ ዜ̈ር ፋይዳ ጋርታ̇ ማ̈ቃ̇ር ጌላካ̇ዮ̈ዲፌ̈ኒ ኢንታ ኪ̈ታ̇ቤ፤ ዪን ባዛን ዋች ኤሄይርዶኬ ኣማ̇ናባር ኦ̈ዝ ጾ̈ሳ̇ ኦ̈ሳቦ ማ̈ዲ̇ባ̈ሴ።

⁵ዓና ኪ̈ቲን ቆፊንዳ ኪን ቡ̈ዳ ጋርታፖ፥ ኮሽ ቆፊ ጋልዳፔኬ ኪን ኣማ̈ና ጋልዳፖ ቤንቲ̇ዝ ካ̈ንንዶ።

⁶ፔቲ̇ ፔቲ̇ ኣሳን ዪን ባ̈ዛን ኣሻ̇ሪ ማ̈ዲባ̈ሶ ዋች̇ኮ ማ̈ቂ̇ኔ።

⁷ኢንቲ̇ ጾ̈ሳ̇ ሂጊ̇ን ታማ̈ርሲዝ ኣስ ማ̈ቃ̇ንዳብ ኮዪ̈ሬ ዎቲናካሬ ፌ ሶ̈ላዝ ባዚን ኣብዝኮ ኤሪባ̈ሴ ማ “ኑ ባዝ ዪኖ̇ ኮሺንቺ ኤሪ̈ሬ” ጋር ሶ̈ሊዝ ባዚንዳር ኣብዝኮ ኤሪባ̈ሴ።

⁸ኣሲ ሂጊ̇ን ጋ̈ዚንዲፌ̈ን ታማ̈ርሲ̈ርኮ ሂጎ̇ ኮሽ ማ̈ቂ̇ኖን ኑ ኤሪ̈ር።

⁹ማ ሂጎ̇ ኬስኪ̇ኖ̈ዲ ኮሽ̇ ኦ̈ዛንቦ ጊዳካ̇ዮን ኤራንዳ̇ብ ኮሺ̇̈ሬ፤ ሂጎ̇ ኬስኪ̇ኖድ ሂጊ̇ን ና̈ጊባ̈ሶንቤኬ ዉጫንቦ፣ ጾ̈ሳ̇̇̈ቦ ኢ̈ጪባ̈ሶንቦ፣ ናጋራንቻንቦ፣ ጌ̈ሺቲ ባ̈ዮንቦ፣ ጾ̈ሳ̇ ሌቂ̇ዛንቦ፣ ፌ ባ̈ቢኬ ፌ ኢንዲ̇ክ ዎዛንቦኬ ኣስ ዎዛንቦ፣

¹⁰ኦሎላ ጋዲ̇ዛንቦ፣ ኣቲናባር ሱርቂ̇ዝ ኣቲናንቦ፣ ኣስ ኤ̈ ዎ̈ጚዛንቦ፣ ማቃ ማቂ̇ዛንቦ፣ ማቃባር ጫ̈ቂ̇ዛንቤኬ ኪን ቲሚርቲ̇ንባር ዎልፌ̈ን ሉኪ̇ባ̈ሶ ኦ̈ሳ ኦ̈ዛን ዎይንቦ።

¹¹ዪና̇ ኪን ቲሚርቲ̇ንዳ ኣንጂ̇ንቲ̇ኖ ጾ̈ሳ̇ ታ̈ቦ ዓዳራ ኢሚ̇ኖ ቦንች ዎጛሊንባር ዎልኣ ፔታ̇ኔ።

¹²ፌ ኦ̈ሳብ ሹ̈ማሪ ኣማ̇ኒንቲ̇ኖ ኣስ ማሃር ታ̈ና ፋይዲኖ ኑ ጎዳ ዬሱ̈ስ ክርስቶ̈ሳ ቴ ጋ̈ላታሬ።

¹³ዓኒ̇ፖ ቲ̈ን ታ̈ኒ ጎዳ ቆ̈ሳ̇ ኢያ ኣማ̇ኒኖ ዳካ̇ ዎቲኖ ውጫ ኣስ ማ̈ቂ̇ናካሬ ታ ዪኖ̇ ዎቲኖንዳ ኤራካ̇ይ ኣታ̇ርኬ ኢያ ኣማ̇ናካ̇ዮ ኬል̇ባራ ማ̈ቂ̇ኖጊሻ̇ቦ ኢ ታ̈ብ ኣቶ̇ ጌይኔ።

¹⁴ኑ ጾ̈ሳ̇̇̈ዲ ዬሱ̈ስ ክርስቶ̈ሳባራ ኑዪ ማ̈ቂ̇ኖ ኣማ̇ኒንዲኬ ካንንዶ ፌ ኮሺቲምባር ዎልኣ ታ̈ቦ ሺሻር ኢሚ̇ዴ።

¹⁵“ዬሱ̈ስ ክርስቶ̈ሲ ናጋራንቻ̇ን ፋንዳቦ ኣላሚን ዓኒ ጋ̈ላዳ ዬይዴ” ጋ̈ዝ ቃ̈ሊን ኪንኬ ኣሲ ዎይ ኣማ̇ናንዳብ ኮሺ̇ዝ ቃ̈ላ፤ ናጋራንች ዎይንፖ ሺ ናጋራንቻ ታ̈ና።

¹⁶ዎቲናካሬ ታ̈ብ ኣቶ̇ ጌይዴ፤ ኢ ታ̈ብ ኣቶ̇ ጌይኖንዳ፥ ዎሳሊ ባዮ̇ ፌ ዳንዳኢንዶ ዎይፖ ሺ ናጋራንቻ ቴ ጋልዳ ቤይሳሪ ኢያ ኣማ̇ኒዛንብኬ ሜናብ ሼምፓባር ዶኢ ዲጚዛንቦ ታ̈ና ሚሳ̇̈ሊፌ̈ን ማሃንዳቦ።

¹⁷ዪዚ ሜናብ ዶኢዝ ካ̈ታ̈ቦ፥ ዓይቂ̇ባ̈ሶ̈ቦ፥ ቤቂ̇ን ቤንቲ̇ባ̈ሶ̈ቢኬ ፔቲ̇ ጾ̈ሳ̇ ኢ̈ቦ ሜናብ ቦንችኬ ጋላታኬ ኢ̈ብ ማ̈ቆ! ኣሚንኤ።

¹⁸ታ ናኣ ጢማ̈ቶሶ! ዓኒፖ ቲ̈ን ኔኮታ̇ ካ̈ያባር ኔ̈ቦ ሶ̈ሊንቲ̇ኖንዲፌ̈ኒ ዓና̇ ኪ̈ቲን ቴ ኔ̈ቦ ዓዳራ ኢማ̇̈ሬ፤ ዪና̇ሬ ኔ̈ብ ጌዪንቲ̇ኖንዲፌ̈ኒ ኮሻ̇ ኦሊን ኦላምፔ̈ኒዬ።

¹⁹ኣማ̇ናኬ ኮሽ̇ ቆ̈ፊ ኔ̈ብ ዶኣጋቤ። ፔቲ̇ ፔቲ̇ ኣሳን ፌ ቆፊን ኣሻ̇̈ሪ፥ ባሃ̈ራ ጋልዳ ዉርጊ ዲንዲን ጎጚን ዉርጊንባር ያዚንዲፌ̈ኒ ኢንታ̇ር ፌ ኣማ̇ኒን ይሲ̇ኔ።

²⁰ኣሳን ዪን ጊዳ ሄማ̈ኖ̈ሲኬ ኢስኪንዲሮ̈ሳክ ዎ፤ ኢንቲ ጾ̈ሳ̇ ቆ̈ዚን ኣሻ̇ምፔ̈ኒ ቴ ኢንታ ሴ̈ጣናቦ ኣ̈ ኢሚ̇ኔ።