Read basketo 1 ጢማ̈ 2 Bible Online

1 ጢማ̈ 2 - basketo bible

1 ጢማ̈ 2

¹ዪዚ ዎይ ባዛፖ ቲ̈ን ቲ̈ኒታር ቴ ኔ̈ብ ሶ̈ላዚንዳ፥ ኣሲ ዎይቦ ዎ̈ሳኬ ጋላታኬ ጾ̈ሳ̇ ቲ̈ን ሺ̈ቃምፔ̈ኒዬ።

²ኑ̈ኒ ጾ̈ሳ̇̇̈ቦ ኪ̈ቲንቲ̇ሙታ፥ ጌ̈ሺ̇ቲባርኬ ሳሪቲባር ዶኣምፔ̈ኒ ካ̈ቲንታ̇ንብኬ ሲልጣ̈ና ጋ̈ልዳ ዎንቦ ዎይ ዎ̈ሳ̇ንዳብ ኮሺ̇̈ሬ።

³ዪና ኑ̈ና ፋኖ ጾ̈ሳ̇ ቲ̈ን ኮሽ̇ኬ ኡፋይሲ̇ዝ ባዜ።

⁴ጾ̈ሲ ኮዪዛ̈ዲ ኣ ዎይዲ ፋጻምፔ̈ንኬ ኪንን ኤራምፔ̈ኒዬ።

⁵ጾ̈ሲ ፔታ̇ኔ፥ ማ ኣሳብኬ ጾ̈ሳ̇̇ብኬ ጊዳ̇ ዶኣር ኢጊንዛ̈ዲ ፔታ̇ኔ፥ ኢያሬ ኣስ ማ̈ቂ̇ኖ ዬሱ̈ስ ክርስቶ̈ሳ።

⁶ኢያሬ ኣስ ዎይዳ ናጋራ ጋርታፖ ፋንዳ̇ቦ ፌ̈ና ኣ̈ ኢሚ̇ዴ፤ ዪ̈ዳር ጾ̈ሳ̇̇ ጌይኖ ኬሊ̇ን ዬሊ̇ን ኢ ፌ ፋቲ ኦ̈ሲን ቤይሲኖ ማርካ።

⁷ታ̈ናር ዪኖ̇ ሶ̈ላንዳብኬ ኪንን ማርኪታንዳ̇ቦ ሃዋ̈ራኬ ኣስታማ̈ሪ ማ̈ቃ̇ራ ኣይሁድ ባዮ̇ ኣሳንኮ ኪ̈ቲንታ̇ር ሉኪ̇ኖንዳ ዓኒ̇ ጊሼ̇፤ ቴ ዪኖ̇ ኪን ሶ̈ላ̈ርዶኬ ማቃ̇ባሴ።

⁸ዪዚ ዎይ ቤስ̇ ዎ ኣቲናን ጎይልኬ ዋኬ ኣሻ̇ሪ ፌ ኩሺን ናጋራ ጋልዳፖ ጌ̈ሻ̇ሪ ፉዳ ጾ̈ሳ̇̇̈ክ ዲንር ዎሳምፔ̈ን ኮያ̈ሬ።

⁹ዪና̇ ኢዝፌ̈ኒ ማጫ̇ንሬ ፌ ቆም̇ ዳዲ̇፣ ዎርቃ ኣ̈፣ ኢንቁ ጋ̈ዝ ዎይሊን ሚ̈ሽ ኤኪ̇ዝ ጌ̈ጻባራ ዎይ ዎይሊን ሚ̈ሽ ኤኪ̇ዝ ኣፊላባራ ኣሲ ታ̈ና ቤቆ̇ ጌዪ ሙታ̇ ጊዳ̈ካይዶን ፌ̈ና ዪርክ ዪርክ ዎቲሙታ̇ ፌ̈ብ ማ̈ቂ̇ዝ ኣፊላ ማኦጋ̈ቤ።

¹⁰“ቴ ጾ̈ሳ̇̇̈ቦ ጎሽታ̇̈ሬ” ጌይዝ ማጫ̇ን ዎታንዳብ ኮሻ̇ዚንዲፌ̈ኒ ኮሻ̇ ኦ̈ሳባር ፌ̈ና ጌ̈ዚንጋ̈ቤ።

¹¹ማጮ̇ ኪ̈ቲንታሙታዶራ ዚም ዶኣራ ታማ̈ሮ ጋ̈ቤ።

¹²ማጮ̇ ኣ̈ቲናኣዳ ታማ̈ርሳምፔ̈ንኬ ኣቲናኣ ጋ̈ልዳ ሲልጣና ኢዝቦ ዶኦ ቴ ጋ̈ባሴ፤ ኢዛ ዚም ዶኣጋ̈ቤ።

¹³ኣባ ጌይን ቲ̈ን ኮቺንቲኖ ኣዳ̇̈ማ፥ ሄዋ̈ና ዎሃ ኮቺንቲ̇ኔ።

¹⁴ማ ቲ̈ን ባሊቲ̇ኖንዳ ሄዋ̈ኒዶኬ ኣዳ̇ማ ጊዳካ̇ዬ።

¹⁵ማ̈ቂ̇ናካሬ ማጮ̇ ኣማ̇ናባራ፣ ካንባርኬ፣ ጌ̈ሺ̇ቲባራር ሚ̈ጛርኬ ፌ̈ና ኢ̈ት ባዝ ጋልዳፖ ና̈ጋር ዶኤጌይን ናእ ዬላባር ፋጻ̈ሬ።