Read basketo 1 ጢማ̈ 4 Bible Online

1 ጢማ̈ 4 - basketo bible

1 ጢማ̈ 4

¹ጊዳን ዬይዝ ኬላ̇ን ጋርታ̇ ፔቲ̇ ፔቲ̇ ኣሳን ፌ ኣማ̇ኒን ኣሻ̇ሪ ባ̈ልዝ ኢ̈ታ ኣያ̇ና ጎይኬ ሴ̈ጣና ቲሚርታ ዎሂን ዬዚን ጾ̈ሳ̇ ኣያ̇ና ፋል̇ ሶ̈ሊ̈ሬ።

²ዪኒ̇ፌ̈ኖ ቲሚርቲን ኬስካ̇ዚንዳ ኣሳ ቲ̈ን ኮሽ̇ ኣስ ማ̈ቃ̇ር ቤንታ̇ንዳቦ ማቃ ሶ̈ላምባራ ቆፊ ዪኖ ኢንታ ቡ̈ዲንዳ “ኔ ዪኖ̇ ኣባብ ማቃ̇̈ራ” ጋ̈ባሶ ኣሳን ጋልዳፖ ኬስካ̇̈ሬ።

³ዪንፌ̈ኖ ኣሳን ኣቲናር ማጫ̇ ኤካካ̇ይፌ̈ኒ ማጫ̇ር ኢስታካ̇ይፌ̈ኒ ካዪ̈ሬ፤ ኣማ̇ኒዛንኬ ኪንን ኤሪዛ̈ን ጾ̈ሳ̇ ኮቺ̈ኖ ፊ̈ሺን ኢያ ጋላቲሙታ ሞ̈ዚንዶ ሞ̈ካ̇ይፌ̈ኒ ካዪ̈ሬ።

⁴ዎቲናካሬ ጾ̈ሲ ኮቺ̇ኖ ባዚ ዎይ ኮሽ̇ ማ̈ቂ̇ኖኮታ̇ቦ ጾ̈ሳ̇ ጋላታር ኤኬ̇ጌይንዶ ኢዝ ጋርታ̇ ቶጚንቲዝ ባዚ ባዬ።

⁵ኣባቦ ጌዬጌይንዶ ጾ̈ሳ̇ ቃ̈ላባርኬ ዎ̈ሳባራ ኣንጂንቲ̇ኖ ማ̈ቂ̇̈ሬ።

⁶ኔ ዪና̇ ኪ̈ቲንዶ ኣማ̇ኒዝ ኣሳንቦ ኤርሴጌይንዶ ጾ̈ሳ̇ ቃ̈ላባርኬ ኔ ኤ̈ኖ ኮሽ ቲሚርቲ̇ንባራ ዲጪ̇ኖ ኣስ ማ̈ቃ̇ራ ዬሱ̈ስ ክርስቶ̈ሳብ ኮሽ ኦ̈ዝ ኣስ ማ̈ቃ̇̈ሬ።

⁷ጾ̈ሳ̇ቦ ቦንች ማ̈ቂ̇ባ̈ሶ ፋባ̈ሶ ላ̈ፋ ቶሳፌ̈ኖ ሶ̈ላ ጋልዳፖ ጎታ̇ቤ፤ ጾ̈ሳ̇̇̈ቦ ጎሽታ̇ዚን ኔ ኔ̈ና ኤርሳቤ።

⁸ኣሲ ፌ̈ ጋሊ̇ን ሚ̈ንንዳቦ ኢስፖ̈ርታ ኦ̈ዚንዳ ጊላ̇ ጊዛብ ማ̈ዳ̇̈ሬ፤ ጾ̈ሳ̇ብ ጎሽታዚን ፌ̈ና ኤርሳዚንዳ ዎቲናካሬ ዓቶ̇ ላይን ጋርታ̇ር ማ̈ቂ̇ን ጊዳክ ዬ̈ዝ ላይን ጋርታ̇ሬ ታስፋ ዎኮታ̇ቦ ዎይ ባዛብ ማ̈ዳ̇̈ሬ።

⁹ዪና̇ ሶ̈ሊንዳ ኣሲ ዎይዲ ኪን ጌዪ ኤካ̇ንዳቦ ኮሺ̇ዝ ሶ̈ላ።

¹⁰ዪዚ ዪኒ̇ቦ ጋ̈ሪ ኑ ዋ̈ዪ ዳ̈ቡሪሬ፤ ዪ̈ዳሬ ኣስ ዎይዳ ማ ዎይፖ ሺ ኣማ̇ኒዝ ኣሳን ፋዛ ሼምፓባር ዶኢዝ ጾ̈ሳ̇ ጋልዳ ታስፋ ጋዲ̇ኖኮታ̇ቦ።

¹¹ዪን ባዛን ኪ̈ታቤ፤ ታማ̈ርሳቤ፤

¹²ኔ̈ና ናኤ ጌዪ ኦናካር ሌቃ̈ፖጋ̈ቤ፤ ዎቲናካሬ ኔ̈ኒ ኣማ̇ኒዝ ኣሳን ዎይንቦ ኔ ሶ̈ሊዝ ሶ̈ላባራ፥ ካንባራ፥ ኣማ̇ናባራ፥ ጌ̈ሺቲባርኬ ኮሽ ኦ̈ሳባራ ኢንታ̇ብ ሚሳ̇̈ሊ ማ̈ቃ̇ር ቤንታ̇ቤ።

¹³ቴ ዬይዝ ድራስ ዎርዣ̈ቦ ጌ̈ሻ ማጻ̈ፋ ናባ̇ባ፥ ኢንታ ዞራንዳብኬ ታማ̈ርሳንዳቦ ሚጛ̈ቤ።

¹⁴ዎ̈ሳ ኬ̈ ጪጛሻን ፌ ኩሺን ኔ ጋልዳ ጋዳ̇ር ኔ̈ብ ዎ̈ሲ̇ን ካ̈ያባር ኔ̈ብ ኢሚ̇ንቲ̇ኖ ኣያ̇ና ኪልሲን ቦቲጛፔ።

¹⁵ኔ̈ኒ ኮሽ̇ ዲጫ̇ሙታ ዎንዶ ኣሲ ዎይ ቤቃ̇ምፔ̈ኒ ዪን ባዛን ሚጛር ኦ̈ሙታ ዶኣቤ።

¹⁶ኔ ኔ ቆሚንዴኬ ኔ ታማ̈ርሳዝ ቲሚርቲ̇ንዶ ሚ̈ጛር ና̈ጋቤ፤ ባዛን ዪንባራ ሚ̈ጛቤ፤ ኔ ዪኖ̇ ዎቴጌይንዶ ኔ ቆሚ̇ንዲኬ ኔ̈ኮን ሲስኪ̇ዝ ኣሳን ኔ ፋ̈ሬ።