Read basketo 1 ጢማ̈ 5 Bible Online

1 ጢማ̈ 5 - basketo bible

1 ጢማ̈ 5

¹ጪጚኖ ኣስ ኔ ባ̈ባፌ̈ን ቤቃ̈ር ዞ̈ራብዶኬ ጎይላፔ፤ ናኢቲ ማቂ̇ኖ ኣቲናንስ ኔ ኢሺፌ̈ን ማሃር ቤቃ̇ቤ።

²ጪጚኖ ማጫ̈ን ኔ ኢንዲፌ̈ን፣ ዉዲራ̈ን ኔ ሚሺፌ̈ን ማሃራ ጌ̈ሻ̇ ቆፊባራ ኢንታ̇ ቤቃ̇ቤ።

³ኣስኒ ዓይቂ̇ን ኪንባር ሜቲንቲ̇ዝ ማ̈ጫን ኢንታ ማ̈ዳ̇ቤ።

⁴ኣስኒ ዓይቂ̇ኖ ማ̈ጪንዳ ኢዝቦ ናኢ ዎይ ናኣ ናኢ ዎኮ ዪን ናኣን ቲ̈ኒታር ፌ ኣ̈ሎ ኣሳን ማ̈ዲ̇ዛ̈ዲኬ ፌ̈ና ዬሊኖንቦ ኮሽ ኦ̈ሳ ኦ̈ር ማሃንዳብ ኮሻ̇ዚን ኤሮጋ̈ቤ፥ ዪና̇ ጾ̈ሳ̇̇ ኡፋይሲዝ ባዜ።

⁵ኣስኒ ዓይቂ̇ን ኪንባር ሜቲንቲ̇ኖ ኣሲንዳ ፌ ታስፊን ጾ̈ሳ̇ ጋ̈ልዳ ጋዳ̇ራ ጋላሳ̇ሬ ቃማ̇ሬ ጾ̈ሲ ኦዞ ማ̈ዳ̇ምፔ̈ን ዎ̈ሳባር ሚ̈ጛር ዶኣ̈ሬ።

⁶ዓኒ̇ ኣላሚን ጋልዶ ኡፋ̈ይሲን ሙታ̇ ኮያዝ ኣስኒ ዓይቂ̇ኖ ማጪ̇ንዳ ኢዛ ሼምፓባራ ዎዶራ ዓይቂ̇ኖ ኣስፌ̈ኔ።

⁷ኢንቲ̇ ኣሲ ኢንታ ጋልዳ ኢ̈ታባዝ ሶ̈ላካይዶር ኮሽ ዶኣምፔ̈ኒ ዓና̇ ቲሚርቲ̇ን ኢንታ ታማ̈ርሳቤ።

⁸ፌ ዳባ̇ንቦ ማ ዎይፖ ሺ ፌ ኣ̈ሎ ኣሳንቦ ቆፒ̇ባሶ ኣሲ ፌ ኣማ̇ኒን ኣሺ̇ኖ ኣሴ፤ ማ ዉርሲ ኣማ̇ናካ̇ዮ ኣሳፓር ሺ ኢ̈ት ኣሴ።

⁹ኢዝቦ ሌሂ ታጳ ላይ ኩማካ̇ዮ ኣስኒ ዓይቂ̇ኖ ማ̈ጪንዶ ኣስኒ ዓይቂ̇ኖ ማጫ̇ን ጻ̈ፊንቲ̇ዝ ማጻ̈ፋ ጋልዳ ኢዝ ሱምን ጻ̈ፋፔ̇፤ ማ ኢዝ ሱምን ጻ̈ፊንታ̇ዝ ኣሲንዳ ዓኒፖ̇ ቲ̈ን ፔቲ̇ ኣስ ኣ̈ል ሙታ̇ ኢስቲ̇ኖ ኣስ ማ̈ቃ̇ንዳብ ኮሻ̇̈ሬ።

¹⁰ኮሽ ኦ̈ሳ ዎይባራ ዪ̈ዳሬ፥ ናኢ ኮሺንቻ ዲቻ̇ዚንዶ፣ ዛቃ̇ ሞካ̇ዚንዶ፣ ኣማ̇ኒኖ ኣሳን ቶሂን ሜ̈ጫ̇ዚንዶ፣ ሜ̈ቲንቲኖ̈ን ማ̈ዳ̇ዚንዴኬ ኮሽ̇ ኦ̈ሳ ዎይባራ ኤሪንቲ̇ኖ ኣስ ማ̈ቃ̇ንዳቦ ኮሻ̈ሬ።

¹¹ናኢቲዶን ኣስኒ ዓይቂ̇ኖ ማጫ̇ን ኢንታ ናኢቲ ኢኒ̇ንዳ ኢንታ ጋማራ ክርስቶ̈ሳባር ጌሊኖ ቃ̈ሊን ኣሻ̇ሪ ኢስታ̇ንዳብ ኮዪዛኮታ̇ቦ ኣስኒ ዓይቂ̇ኖ ማጫ̇ን ጻ̈ፊንቲዝ ማዝጋባ ጋልዳ ኢንታ ጻ̈ፋፔ̇።

¹²ዪን ማጫ̇ን ቲ̈ን ክርስቶ̈ሳባራ ጌሊኖን ጫ̈ቂን ኣሺኖኮታ̇ቦ ፌ ጋልዳ ፊርዳ ኤሄይሬ።

¹³ማ ኦ̈ሳ ኦ̈ዛ ኣሻ̇ሪ ኣሳ ኣ̈ል ጋርሳባር ዬሬ፤ ዪ̈ሙታ̇ ጊዳካ̇ይዶን ኣስ ጌስቲ፥ ኢንታ ጌልሲባ̈ሶ ባዝ ጋርታ ጌሊ ኢንታ̇ብ ኮሺባ̈ሶ ሶ̈ላ ሶ̈ሊዝ ኣስ ማ̈ቂ̇̈ሬ።

¹⁴ዪዚ ዪ̈ኮታ̇ቦ ኣስኒ ዓይቂ̇ኖ ናኢቲ ማ̈ቂ̇ኖ ማጫ̇ን፥ ኑ̈ና ኢጺ̇ዝ ኣሳን ኢንታ ሱምን ኢ̈ታ ባዝባር ይሳካ̇ይፌ̈ኒ ኢስታ̇ሪ ናኢ ዬላሪ ፌ ኣ̈ሊን ኮሺንቺ ኣቂሳምፔ̈ኒ ቴ ኢንታ ዞራ̈ሬ።

¹⁵ዓኒፖ ቲ̈ን ፔቲ̇ ፔቲ̇ ኣስኒ ዓይቂ̇ኖ ማጫ̇ን ሴ̈ጣ̈ና ቆ̈ፊን ኦ̈ሙታ ኣማ̇ኒን ጋልዳፖ ኬዲ̇ኔ።

¹⁶ኣማ̇ኒኖ ፔቲ̇ ኣሲንዳ ኢዝ ኣ̈ላ ጋርታ ኣስኒ ዓይቂ̇ኖ ማጫ̇ን ዎኮ ኢንቲ̇ ዎሳኬን ዋ̈ዪካ̇ዮ̈ዲፌ̈ኒ ኢዛ ኢንታ̇ ማ̈ዶ̇ጋ̈ቤ። ዪዚ ዪኒ̇ባራ ዎ̈ሳ ኬ̈ንዳ ውርሲ ማ̈ዲ̇ዝ ኣሲ ባዮ ኣስኒ ዓይቂ̇ኖ ማጫን ማ̈ዳ̇ንዳብ ዳንዳኣ̈ሬ።

¹⁷ዎ̈ሳ ኬን ኮሺንቺ̇ ኣቂሲዛ̈ን፥ ማ ዎይፖ ሺ ሲብካ̇ታባርኬ ታማ̈ርሲባራ ዳ̈ቡሪዝ ዎ̈ሳ ኬ̈ ጪጛ̈ሻንቦ ጴች ቦ̈ንች ኮሺ̇̈ሬ።

¹⁸ኣባ ጌይን ጌ̈ሻ ማጻ̈ፋ ጋልዳ “ኦ̈ዝ ጌን ኖ̈ኒን ቃቻ̈ፔ” ማ “ኦ̈ዝ ኣሳቦ ዳሞ̈ዛ ኮሺ̇̈ሬ” ጌይኔ።

¹⁹ናምኢ ዎይ ዓይዚ̇ ኣሲ ማርኪታ̈ካ̇ይ ኣቴ̇ጌይንዶ ዎ̈ሳ ኬ̈ ጪጛሻ ጋልዳ ሺ̈ቂኖ ሞታ ኪን ጌያ ኤካፔ።

²⁰ሜላን ኢ̈ጫ̇ምፔ̈ኒ ና̈ጋራ ኦ̈ኖ ኣሳን ኣስ ዎይ ቲ̈ን ጎይላቤ።

²¹ኔ̈ኒ ኦ̈ዝ ባዝ ዎይባራ ፔታ̈ናዳ ፔታ̈ናፖ ሺሻር ቤኣካ̇ይዶራ ዓና̇ ቴ ኔ̈ብ ኢሚ̇ኖ ዞሪን ዎይ ኦ̈ሳ ጋልዳ ፌ̈ሻ̇ምፔ̈ኒ ጾ̈ሳ̇ ቲ̈ን፣ ዬሱ̈ስ ክርስቶ̈ሳ ቲ̈ንኬ ማ ማራ̇ጺንቲ̇ኖ ኪ̈ታንቻ̈ን ቲ̈ን ቴ ኔ̈ቦ ዓዳ̈ራ ጋ̈ሬ።

²²ኦ ጋልዳካር ማ̈ቂ̇ን ኔ ኩ̈ሽ ጋ̈ዳራ ሹ̈ማንዳ̈ቦ ባርቢታ̇ፔ፤ ኔ ኔ̈ና ጌ̈ሺ̇ቲባር ና̈ጋብዶኬ ሜ̈ላን ናጋሪን ጋርታ̇ ጌላፔ።

²³ኔ ጋርታ ኔ̈ና ማሳዚምቤኬ ዎይ ጋ̈ላስ ዲንዳር ኔ̈ና ዋ̈ዪዝ ዓርጊምቦ ዎይና ጃ ጊላ̇ ኡሽካ̇ብዶኬ ዓኒ̇ፖ ጌዳ ዋ̈ ሙታ̇ ኡሽካፔ̇።

²⁴ፔቲ̇ ፔቲ̇ ኣሳን ናጋሪንዳ ፋላ̇ ጋልዳ ቤንታ̇ር ኤሪንቲ̇ዛኮታ̇ቦ ኢንታ ጋልዳ ዬላ̇ዝ ፊርዲንዳ ኣብዝኮ ቲ̈ኒታር ኤሪንታ̇̈ሬ ማ ሜላ ኣሳን ኦ̈ዝ ናጋሪንዳ ጋምኣር ቤንታ̇̈ሬ።

²⁵ዪና̇ ኢዝፌ̈ኒ ኮሽ ኦ̈ሳር ማ̈ቂ̇ን ፋላ̇ ጋልዳ ቤንቲ̇̈ሬ፤ ኣቺ̈ንታር ዎ ባዚ ዎካሬ ጌ̈ሚቲኖንዲፌ̈ን ኣታ̇ባሴ።