Read basketo 1 ጢማ̈ 6 Bible Online

1 ጢማ̈ 6 - basketo bible

1 ጢማ̈ 6

¹ጾ̈ሳ̇ ሱምንዲኬ ኑ ታማ̈ርሳዝ ቲሚርቲ̇ንዳ ቆ̈ንታካ̇ዮ̈ድፌ̈ኒ ኣይላ ማ̈ቂ̇ኖ ኣሳን ዎይ ፌ ላ̈ንቦ ቦንች ኮሻ̇ዚን ኤሮ̈ጋቤ።

²ኣማ̇ኒኖ ላ̈ ኢንታ̇ብ ዎ ኣይላን ጎዳ ዬሱ̈ሳባር ዎ ፔቲቲንባራ ኢንቲ̇ ኢንታ̇ብ ኢሺንታ ማ̈ቂ̇ኖኮታቦ ኢንታ̇ ሌቃፖ ጋ̈ቤ፤ ዪኒ̇ፖ ቲ̈ኖምፖ ሺ ኢንታ̇ብ ኦ̈ጋ̈ቤ ኣባ ጌይን ኢንቲ̇ ኦ̈ኖ ኦ̈ሲንባር ማ̈ዲንቲ̇ዝ ኢንታ̇ ላ̈ን ኣማ̇ኒኖ ኣስ ማ̈ቂ̇ኖኮታ̇ብኬ ማ ኢንታ̇ብ ካንቲ̇ኖ ኢሺ ማ̈ቂ̇ኖኮታ̇ቦ። ኔ̈ናር ታማ̈ርሳ̇ንዳብኬ ኮሺንቻ ዞራንዳብ ኮሻ̇ዚንዳ ዓኖ̇።

³ኪንባር ጾ̈ሳ̇ ጎሽታ̇ዝ ጎይን ኤርሳ̇ዝ ቲሚርቲ̇ንባር ዎል ዬላ̇ዝ ኑ ጎዳ ዬሱ̈ስ ክርስቶ̈ሳ ኮሻ̇ ቃ̈ሊን ኣሻ̇ሪ ማቃ ቲሚርታ ታማ̈ርሲዝ ኣሲ ዎኮ፤

⁴ዪ ና̈ሳዲ ሜላ̇ ኦቲራባር ጋቢ̇ኖ ኣባክ ኤሪባ̈ሶ ኣሴ፤ ዪ ና̈ሳ̈ዲ ቃ̈ላ ጎይ ኣሳባር ዋች ዋጫንዳብኬ ጎይል ጎይላንዳቦ ኢ̈ት ኢና̇ ኢ ጋርታ ዎ። ዪኒፌ̈ኖ ባዚንዳ ቂና̈ታ፣ ጎይል፣ ቆ̈ሳኬ ፔታ̇ና ፔታ̇ና ኣማ̇ናካይፌ̈ን ዎቲ ኤሄ̈ሬ።

⁵ማ ኢንታ ቆፊን ኢ̈ቲኖ ኣሳንኬ ኪንን ኢንታ ጋልዳፖ ዪኖ ኣሳን ጊዳ ዉሪባሶ ዋች ዲን̈ሬ፤ ዪንፌ̈ኖ ኣሳን ጾ̈ሳ̇ብ ጎ̈ሽታ̈ዚንዶ ሚ̈ሽ ዲጚዝ ጎ̈ይፌ̈ን ፋይዲ̈ሬ።

⁶“ታ̈ብ ዎን ታ̈ብ ጊዳ̈ሬ” ዪዝ ጋ̈ዚንዳ ጾ̈ሳ̇ ማይጺሙታ̇ ዶኢዝ ዶኢምባር ዎል ማ̈ቃ̇ራ ዪ ና̈ሳቦ ጴች ዱሪቲ።

⁷ኑ̈ ዬሊንቲ̈ርዶሪ ዓኒ̇ ኣላሚን ጋልዳ ኣባካ̈ር ኤካ̇ር ዬይኖ ባዚ ባዬ̇። ማ ሉኪ̇̈ርዶራር ኣባካር ኤካ̇ር ሉኪ̇ዝ ባዚ ባዬ።

⁸ኑቦ ሙ̈ይዝ ባዝኬ ማ̈ኢዝ ባዚ ዎኮ ጊዲ̈ሬ።

⁹ዱ̈ር ማ̈ቃ̇ንዳቦ ኮዪዛን ፋታና ጋርታ ጌላሪ ኬዲ̇̈ሬ፤ ኣስ ኢ̈ሲ̇ዝ ባዝኬ ይሲ̇ዛ ማ̈ቂ̇ኖ ፋባ̈ሶ ኢ̈ታ ኢና̇ ጺሂባራ ኤ̈ንቲ̇̈ሬ።

¹⁰ዪና̇ ማ̈ቃ̇ዚንዳ ሚ̈ሺ̇ ካን ኢ̈ት ባዝ ዎይ̈ቦ ጻጲን ኢዚ ማ̈ቂ̇ኖኮታ̇ቦ። ፔቲ̇ ፔቲ̇ ኣሳን ዱር ማ̈ቃ̇ንዳብ ኮዪዛኮታ̇ቦ ኣማ̇ና ጎይን ጋልዳፖ̇ ባሊ̇ታ̇ር ኬዲ̇ኔ፥ ፌ̈ና ኢ̈ታ ሜታ ጋርታ̇ር ጌልሲ̇ኔ።

¹¹ዪዚ ኔ̈ኒ ጾ̈ሳ̇ ኣሳ̈ዶ! ኔ̈ኒ ዪንፌ̈ኖ ባዛን ጋልዳፖ ጎታ̇ቤ፤ ኔ̈ኒ ጺሊ̇ቲ ጎይን፣ ጾ̈ሳ̇ ማይጻር ዶኣዚን፣ ኣማ̇ና ጎይን፣ ካን ጎይን፣ ዳንዳኣባር ሚ̈ጛዚንዴኬ ኣሽኪቲባራ ዶኣ̈ዚን ኮያቤ።

¹²ኣማ̇ና ጎይንኮን ኮሻ̇ ኦ̈ሊን ኦላቤ፤ ኔ̈ኒ ዎይሊን ኣሳ ቲ̈ን ኣማ̇ኒንቲ̇ኖ ማ̈ቃ̇ራ ማ̈ርኪቲኖንዲኬ ጾ̈ሲ ኢዝቦ ኔ̈ና ጼይጊኖ ሜና ሼምፒ̇ን ሚ̈ንር ኤ̈ቤ።

¹³ዎይቦ ሼምፓ ኢሚ̇ዝ ጾ̈ሳ̇̇ ቲ̈ንኬ ጴንጣናዋ ጲላጦ̈ሳ ቲ̈ን ኪንን ማርኪቲኖ ዬሱ̈ስ ክርስቶ̈ሳ ቲ̈ን ቴ ኔ̈ና ኪ̈ታ̇̈ሬ።

¹⁴ኑ ጎዳ ዬሱ̈ስ ክርስቶ̈ሲ ዬይዝ ዲራስ ዓና̇ ኪ̈ቲን ኢ̈ታ ባዝ ኣባክ ኔ ጋልዳ ቤንታ̇ካይዶን ኮሺንቻ ኢዝቦ ኪ̈ቲንታሙታ̇ ና̈ጋቤ።

¹⁵ክርስቶ̈ሳ ዬንቲ̇ንዳሬ ኣንጂንቲ̇ኖ̈ዲኬ ኢ ሙ̈ታ ጋ̈ዢ ማ̈ቂ̇ኖ፣ ካ̈ቲንታ̈ን ካ̈ታ፣ ጎዳንቦ ጎዳ ኢ ጌይኖ ቃሚ̇ንባር ማ̈ቃ̇̈ሬ።

¹⁶ኢ ሙ̈ታ ዓዪቂባ̈ሶ̈ዳ፤ ኦ̈ናካር ኡካ̇ንዳብ ዳንዳኢባ̈ሶ ፎኢን ጋርታ̇ ዶኢ̈ሬ፥ ኢያ ኦ̈ናካር ኣሲ ቤቃካ̇ዬ፤ ቤቃ̇ንዳባር ዳንዳኢባ̈ሴ። ዎልቃኬ ጋላታኬ ሜናብ ኢ̈ብ ማ̈ቆ̇ጋ̈ቤ፤ ኣሚንኤ።

¹⁷ዓኒ̇ ኣላሚን ጋ̈ልዶ ዱራን ኦቲርቃካ̇ዮ̈ዲፌ̈ኒ ዎይ ፌ ታስፊን ዪዝ ባዝ ጋልዳ ጋዳካ̇ዮ̈ዲፌ̈ኒ ኢንታ̇ ኪ̈ታ̇ቤ። ኑ̈ኒ ኡፋይታ̇ምፔ̈ኒ ዎይ ባ̈ዚ ሺሻር ኑ̈ብ ኢሚ̇ዝ ጾ̈ሳ̇ ጋ̈ልዳ ኢንቲ̇ ፌ ታስፊን ጋዳ̇ምፔ̈ኒ ኢንታ̇ ዞ̈ራቤ።

¹⁸ማ ኢንቲ ኮሽ ኦ̈ሳ ኦ̈ምፔ̈ን፥ ኮሽ ኦ̈ሳባር ዱር ማ̈ቃ̇ምፔ̈ኒ፥ ኢንታብ ዎ ባዝ ሜላንቦ ፋጋ̇ር ኢማ̇ንዳቦ ጊ̈ጊንቲ̇ኖ ኣስ ማ̈ቃ̇ምፔ̈ኒ ኢንታ̇ ዞራቤ።

¹⁹ኢንቲ̇ ዪኒፌ̈ን ዎቲሙታ ኪን ማ̈ቂ̇ኖ ሼምፒ̇ን ዲጛንዳቦ ዬ̈ዝ ላይምቦ ዪባ̈ሶ ቆሊን ፌ̈ብ ሺ̈ሺ̈̇ሬ።

²⁰ጢማ̈ቶ̈ሶ! ዓዳራባራ ኔ̈ቦ ኢሚ̈ንቲኖን ጌዚንር ና̈ጋ̈ቤ፤ ኪን ኤራ ጊዳካ̇ይዶን ኤራ ማይጺዝ ጾ̈ሳ̇ ቦንቺሺባ̈ሶ ዋች̇ ጋልዳፖ ጎታ̇ቤ።

²¹ፔቲ̇ ፔቲ̇ ኣሳን “ዪኒ̇ፌ̈ኖ ኤሪን ኑ̈ብ ዎ” ጋ̈ሪ ፌ ኣማ̇ኒን ጋልዳፖ ኬዲ̇ኔ። ጾ̈ሳ̇ ኮሺቲን ኔባር ማ̈ቆ̇ጋ̈ቤ።