Read basketo 2 ጢማ̈ 2 Bible Online

2 ጢማ̈ 2 - basketo bible

2 ጢማ̈ 2

¹ዪዚ ቴ ናኣ̈ዶ! ኔ̈ኒ ዬሱ̈ስ ክርስቶ̈ሲ ኔ̈ብ ኢማ̇ዝ ዎልቂንባራ ሚ̈ጛቤ።

²ዎይሊን ማርካ ቲ̈ን ኔ̈ ታ ጋልዳፖ ሲስኪ̇ኖ ቲሚርቲ̇ን ሜላን ታማ̈ርሳንዳ̇ቦ ዳንዳኢዝ ኤራ ዎንቦ ኣማ̇ኒንቲ̇ኖ ኣሳንቦ ዓዳራ ኢማ̇ቤ።

³ኔ̈ናሬ ዬሱ̈ስ ክርስቶ̈ሳብ ኮሽ ዎታ̇ዳራፌ̈ን ማ̈ቃ̇ራ ታባር ዎልኣ ሜታ ኤካ̇ቤ።

⁴ዎታ̇ዳራ ማ̈ቃ̇ር ኦ̈ዝ ኣሲ ፌ̈ና ኪ̈ቲ̇ዛ ፌ ኣላቃ ኡፋይሳ̇ንዳብ ጊ̈ጊንቲ̇ኖ ማ̈ቃንዳብ ኮሺ̇̈ርዶኬ ዎታ̇ዳራ ኦ̈ሳ ማ̈ቃካ̇ዮ ባዝ ጋርታ ፌ̈ና ቡሺባ̈ሴ።

⁵ዪና̇ ኢዝፌ̈ን ጋማንዳብ ዎጺ̇ዝ ኣሲ ዎን ሂጊ̇ን ና̈ጋካ̇ይ ኣታ̇ር ዎጼ̇ጌይን ሺሊ̇ማ̈ቲን ዲጚባሴ።

⁶ዎት ዎቲ ዳቡሪዝ ና̈ሳ̈ዲ ፌ ኦ̈ኖ ኦ̈ሲምፖ ቤንታ̇ዝ ኣ̈ፊንዶ ቲ̈ኖን ኢ ዲጛ̈ንዳቦ ኮሺ̈̇ሬ።

⁷ጎዳ̈ዲ ባዝ ዎይባራ ኔ̈ቦ ኤራ ኢሚ̇ዛኮታ̇ቦ ቴ ኔ̈ክ ጋ̈ዚን ጌ̈ዚንር ቆፓ̇ቤ።

⁸ዓይቃ ጋማ̈ር ዲንዲኖ፥ ዳ̈ዊታ ዜ̈ር ማ̈ቂ̇ኖ ዬሱ̈ስ ክርስቶ̈ሳ ቆፓ̇ቤ፤ ታ̈ናሬ ሳ̈ባ̇ካዝ ዎጛሊን ዓና̇ ኢዞ።

⁹ታ̈ናር ዓና̈ ዎጛሊን ጊሽ ኢ̈ታ ባዝ ኦ̈ኖ ኣስፌ̈ኒ ቃቺንታ̇ራ ሜታ ኤካ̇ሙታ ዎ፤ ዎቲናካር ጾ̈ሳ̇ ቃ̈ሊን ቃቺንታ̇ባሴ።

¹⁰ዪ̈ኮታ̇ቦ ኢንቲ ዬሱ̈ስ ክርስቶ̈ሳ ጎይባራ ቤንቲ̇ዝ ፋቲንዲኬ ሜናቦ ዶኣዝ ቦንቺ̇ን ዲጛ̈ምፔ̈ኒ ጾ̈ሳ̇ ማራ̇ጺኖ ኣሳንቦ ጋ̈ራ ታ̈ኒ ዎይ ባዝ ጋ̈ርዣ̈ሬ።

¹¹ዓንዲዝ ጋ̈ዝ ሶ̈ሊንዳ ኣማ̇ኒንቲ̇ኖ ሶ̈ላ፦ “ኑኒ ኢባ̈ራ ዓይቄ̇ጌይንዶ፥ ኢባራ ማ ሼምፓባር ዶኢ̈ሬ።

¹²ኑ̈ኒ ጋርዣር ኢባር ሚ̈ጜጌይን፥ ኢባር ዎልኣ ካውቲ̈ሬ። ኑ ኢያ ካ̈ዴጌይንዶ ኢያር ማ ኑ̈ና ካ̈̈ዲ̈ሬ።

¹³ኑ̈ኒ ኣማ̇ኒንትባ̈ሶን ማ̈ቃ̇ር ቤንቴጌይን ኢ ፌ̈ና ካ̈ዲባ̈ሶኮታ̇ቦ ዎይ ጋ̈ላስ ኣማ̇ኒንቲ̇ኖ ማ̈ቃ̇ር ዶኢ̈ሬ፤”

¹⁴ማ ዪን ባዛን ኢንታ̇ብ ሚ̈ንር ቆፊሳቤ፤ ቃ̈ላ ጎይ ዋጫካ̇ዮዲፌ̈ን ጾ̈ሳ̇ ቲ̈ን ኢንታ ዞራቤ፤ ዪኒ̇ፌ̈ኖ ዋቺ̇ንዳ ሲስኪ̇ዝ ኣሳን ይሳ̇̈ርዶኬ ኣባካር ማ̈ዳ̇ባሴ።

¹⁵ፌ ኦ̈ሲንባር ዬልቂባ̈ሶ፥ ኪን ቃ̈ሊን ዎቢ̇ሳካ̇ይ ሶ̈ሊዝ ኣስ ማ̈ቃ̇ራ ኔ ኔ̈ና ጾ̈ሳ̇ ቲ̈ን ሺ̈ሻ̇ንዳብ ሚ̈ጛቤ።

¹⁶ጾ̈ሳ̇ ቦንቺሺባ̈ሶ ፋባ̈ሶ ሶ̈ላ ጋልዳፖ ጎታ̇ቤ፤ ዪንፌ̈ኖ ፋባ̈ሶ ሶ̈ላን ጾ̈ሳ̇ ጋልዳፖ ኤሳ ኣስ ጎቲ̇ሲ̈ሬ።

¹⁷ዪንፌኖ ኣሳን ቲሚርቲ̇ንዳ ኮ̈ያፌ̈ን ሞ̈ሬ፤ ዪንፌ̈ኖ ኣሳን ጊዳ ሄሜኖ̈ሴኬ ፊልጦ̈ሴኬ ዎ።

¹⁸ዪን ኣሳን “ዓይቃ ጋርታ̇ፖ ዲንዳዛ̈ዲ ሚን ማቂ̇ ኣ̈ኔ” ጌይ ዋጪሙታ̇ ኪንን ጋልዳፖ ጎቲ̇ኔ፤ ማ ፔቲ̇ ፔቲ̇ ኣሳን ኣማ̇ኒንዳር ሊ̈ቂሲ̈ሬ።

¹⁹ዎቲናካር “ጎዳ̈ዲ ፌዪ ማ̈ቂ̇ኖን ኤሪ̈ሬ፤” ማ “ጎዳ ሱምን ጼይጊዝ ኣሲ ዎይ ኢ̈ት ባዝ ጋልዳፖ ጎቶ̇” ጌይዝ ማይታማ ኢዝ ጋልዳ ጋዲ̇ኖ ጾ̈ሲ ቶሊኖ ቱ̈ሲን ኤንኣባሴ።

²⁰ዱራ ኣሳ ኣ̈ል ጋርታ ዎርቃ̇ባርኬ ቢራባር ኮቺ̇ንቲኖ ኢቃሙታ̇ ጊዳካ̇ይዶን ሚባርኬ ቶቅላባር ኮቺ̇ኖ ኢቃር ዎ፤ ዪን ኢቃን ጋርታ̇ፖ ዶካ̇ን ቦንቺ̇ንቲኖ ኦ̈ሳብ ፌ̈ሽኪ̇ን ዶካን ቦንቺ ባዮ̇ ኦ̈ሳብ ፌ̈ሽኪ̇̈ሬ።

²¹ዪዚ ኣሲ ኦ̈ናካሬ ቴ ዪን ጌይኖ ኢ̈ታ ባዛን ጋልዳፖ ፌ̈ና ጌ̈ሼጌይንዶ ቦንቺንቲ̇ኖ ኦ̈ሳቦ ፌ̈ሽኪዝ፥ ጌ̈ሽ ማ̈ቂ̇ኖ ፌ ጎዳ̈ብ ማ̈ዲ̇ዝ ኮሻ ኦ̈ሳብ ዎይ ጊ̈ጊንቲ̇ኖ ኢቃ ማ̈ቂ̇̈ሬ።

²²ናኢቲ ኢ̈ታ ኢኒ̇ን ጋልዳፖ̇ ጎታ̇ቤ፤ ጌ̈ሻ ቡ̈ዳባራ ጎዳ ጼይጊዝ ኣሳንባራ ማቃራ ጺሊቲ፣ ኣማ̇ና፣ ካንኬ ሳሪቲ ጎይን ዬቤ።

²³ጎይላ ኤሄዚን ኤራራ ቦ̈ዚቲ ጋልዳፔኬ ፋባ̈ሶ ዋች ጋልዳፖ ጎታ̇ቤ።

²⁴ጎዳ ዬሱ̈ሳቦ ኣይላ ማ̈ቂ̇ኖ ኣሲ ዎይ ኣሳ ቲ̈ን ኣሽካ፥ ታማ̈ርሳንዳ̇ቦ ዳንዳኢዛዲኬ ዳንዳኣ ኢ̈ብ ዎ ኣስ ማ̈ቃ̇ንዳቦ ኮሺ̈ርዶኬ ኣሳባር ጎይል ጎይሊዝ ኣስ ማ̈ቃ̇ንዳብ ኮሺ̇ባ̈ሴ።

²⁵ኢያ ኢጺ̇ዝ ኣሳንቦ ኢ ቡ̈ዳ ዳልግ ማ̈ቃ̇ር ታማ̈ርሲ ማሃንዳብ ኮሺ̈ሬ፤ ኦ ኤሬ ኢንቲ ኪንን ኤራምፔ̈ን ጾ̈ሳ̇ ኢንታ̇ብ ማ̈ሪቲ ጌላምፔ̈ን ዎታንዳብ ዳንዳኢ̈ሬ።

²⁶ዪኒ̇ ጎይባራ ኢንታ ቆፊን ኢንታ ጋልዳ ማ̈ቂ̇ን ሴጣ̈ኒ ኢንታ ፌ ባዝ ኦ̈ሳንዳብ ኢንታ̇ ኤኖ ጺሂን ጋርታፖ̇ ቡ̈ቲ̇̈ሬ።