Read basketo 2 ጢማ̈ 4 Bible Online

2 ጢማ̈ 4 - basketo bible

2 ጢማ̈ 4

¹ጾ̈ሳ̇ ቲ̈ንኬ ማ ሼምፓባር ዎን ጋልዳኬ ዓይቂ̇ኖን ጋልዳ ፊርዳንዳብ ዬይዛ ዬሱ̈ስ ክርስቶ̈ሳ ቲ̈ን፥ ኢ ዬንቲ̇ንዲኬ ኢ ካ̈ቲቲን ቆፓሙታ ዓና̇ ባዚን ቴ ኔ̈ብ ዓዳራ ጋ̈ሬ፤

²ቃ̈ሊን ሳ̈ባ̇ካቤ፤ ኬሊ̇ን ኮሽኪ̇ናር ኢቲ̇ናር ጊ̈ጊንታ̇ር ዶኣቤ፤ ጴች ዳንዳኣባራኬ ቲሚርታባራ ዎቢ̇ኖ ጺት ዎታቤ፥ ማ ጎይላቤ ሚ̈ንቤ።

³ኣሲ ሼ̈ምፓ ኢማ̇ዝ ቲምርቲ̇ን ኢጺ̇ዚ ኬሊ̇ ዬይሬ፤ ዪኒ̇ፖ ፌ̈ብ ኮሽኪ̇ዝ ባዝሙታ ሶ̈ሊዝ ኣስታማ̈ሪ ፌ̈ብ ሺ̈ሺ̈ሬ።

⁴ዪ̈ኮታ̇ቦ ኪን ባዝ ሲስካ̇ዚን ኣሻ̇ሪ ቶሳፌ̈ኖ ሶ̈ላ ሲስካ̇ንዳብ ኮዪ̈ሬ።

⁵ዎቲናካር ኔ̈ኒ ዎይ ባዝባራ ኔ̈ና ና̈ጋቤ፤ ሜ̈ታ ጋርታ ጋርዣቤ፤ ዎጛላ ኦ̈ሲን ኦ̈ቤ፤ ኔ̈ብ ኢሚንቲ̇ኖ ኦ̈ሲን ኦ̈ ፎታቤ።

⁶ታ̈ኒ ዣ̈ርሻ ማ̈ቃ̇ንዳብ ኡኪ̇ኔ፤ ዓኒ̇ ኣላሚን ኣሻ̇ራ ቴ ሉካ̇ዚ ኬሊ̇ን ዬሊ̇ኔ።

⁷ታ̈ኒ ኮሻ̇ ኦሊን ኦሊኔ፤ ዎን ዎጻ̇ር ዉ̈ርሲኔ፤ ቴ ኣማኒ̇ንዶ ና̈ጊኔ።

⁸ዓኒፖ̈ ጌ̈ዳ ጺሊ̇ቲ ኣኪሊላ ጊ̈ጊንታ̇ር ታ̈ብ ዶኢኔ፤ ዪና̇ ኣኪሊሊንዶ ኪን ፊርዳ ፊርዲዝ ጎዳ̈ዲ ዪና̇ ኢዝ ጋላስ ታ̈̈ብ ኢሚ̇̈ሬ፤ ማ ታ̈ብ ሙታ ጊዳካ̇ይዶን ኢ ዬንቲ̇ን ኢኒ̇ቲሙታ̇ ዎንቦ ዎይ ኢሚ̇̈ሬ።

⁹ኔ̈ኒ ኤሊራ ታ̈ክ ዬ̈ቤ።

¹⁰ዴ̈ማሲ ዓኒ̇ ኣላሚን ካሪ ታ̈ና ኣሻ̇ር ታሳሎንቃ ሉኪ̇ኔ፤ ቂርቄ̈ሲ ጋላ̈ታ ሉኪ̇ዴ፤ ቲ̈ታ̇ር ዳልማ̈ጣ ሉኪ̇ዴ።

¹¹ታባር ሉቃ̈ሲ ሙታ̇ ዎ፤ ማ̈ርቆ̈ሳ ቴ ኦ̈ዝ ኦ̈ሲምቦ ታ̈ብ ኮሺ̇ዝ ኣስ ማ̈ቂ̇ኖኮታ̇ቦ ኔባር ኢያ ኮያር ታ̈ብ ኤካ̇ ዬ̈ቤ።

¹²ታ̈ኒ ቲኪቆ̈ሳ ኤፍሶ̈ና ጋዳ̇ ሚሺኔ።

¹³ኔ̈ ዬ̈ርዶ̇ራ ጢሮ̈ዳ ጋዳ̇ ካ̈ርፑሳ ኣ̈ል ታ ኣሺ̇ኖን ታ ኮ̈ቲን ታ̈ብ ኤካ̇ር ዬ̈ቤ፥ ማ ማጻ̈ፋንር ዎይፖ ሺ ቢራና[1] ማጻፋን ታ̈ብ ኤካ̇ር ዬ̈ቤ።

¹⁴ሲላ ቆጺ̇ዛ ናሳ ኢስኪንዲሮ̈ስ ጴች ሜታ ቴ ጋ̈ልዳ ዬልኔ፤ ጾ̈ሲ ኢ ኦ̈ሲንዲፌ̈ን ኢ̈ብ ኢሞ̇ጋ̈ቤ።

¹⁵ኢ ኑ ሶ̈ላዝ ሶ̈ሊን ዎይ ዎይሊን ኢጺ̇ዛኮታ̇ቦ ኔ ኔ ቆሚ̇ንቦ ና̈ሳ ዪ ጋልዳፖ ና̈ጊንታ̇ቤ።

¹⁶ታ̈ና ሞ̈ቲኖ ባዚምቦ ታ̈ኒ ማልሳ ኢሚ̇ኖ ጋላሲ̇ን ዎይን ታ̈ና ኣሻ̇ር ሉኪ̇ንዶኬ ታ̈ና ማ̈ዳ̇ንዳብ ዬይኖ ኣሲ ኦ̈ናካር ባዬ። ጾ̈ሲ ዪኖ̇ ኢንታ̇ብ ኣቶ ጌዮ ጋ̈ቤ።

¹⁷ዎቲናካሬ ጎዳ ፌ ኪ̈ቲን ዎይ ቴ ጎይባራ ኣይሁድ ዜር ማ̈ቃካዮ̈ን ዎይ ሲስካ̇ምፔ̈ኒ ታባር ማ̈ቃር ታ̈ና ሚ̇ን ኤሲ̇ዴ፤ ዞብ̇ ኖ̈ና ጋርታፖ ታ̈ና ቡ̈ቲሲዴ።

¹⁸ጎዳ ታ̈ና ኢ̈ታ ባዝ ዎይ ጋልዳፖ ቡ̈ቲሲ̈ሬ፤ ኣፎ ካ̈ቲቲምቦ ታ̈ና ዬል̈ሬ፤ ሜናብ ኢ̈ብ ቦንች ማ̈ቆ̇! ኣሚንኤ።

¹⁹ጲርስቂላ̈ኬ ኣቂ̈ላኬ ማ ኦኒስፖ̈ራ ኣ̈ሎ ኣሳንር ታ̈ብ ሳሮ ጋ̈ቤ።

²⁰ኣራስጦ̈ሲ ቆ̈ርንቶ̈ስ ካታማ ጋርታ ኣቲ̇ኔ፤ ጣራፊሞ̈ሲ ማኖኮታ̇ቦ ማ̈ሊጢ ዴሴቲን ጋ̈ልዳ ቴ ኢያ ኣሺ̇ኔ።

²¹ባ̈ርጊ ጌላካ̇ይዶን ኔ ታ̈ኮ ኤሊ̇ ዬ̈ቤ። ኤ̈ጊሎሲ፥ ጱዴሲ ማ ቄላውዲኬ ኣማ̇ኒኖ ኣሳን ዎይን ዪንታ̇ ሳሮ ጌይኔ።

²²ጎዳ ኔባር ማ̈ቆ̇ጋ̈ቤ። ጾ̈ሳ̇ ካንን ዪንታ̇ባራ ማ̈ቆ̇ጋ̈ቤ።