Read basketo ቲ̈ታ̇ 1 Bible Online

ቲ̈ታ̇ 1 - basketo bible

ቲ̈ታ̇ 1

¹ዬሱ̈ስ ክርስቶ̈ሳብ ሃዋ̈ራ ማ̈ቂ̇ኖ ጾ̈ሳ̇ ኣይላ፥ ጾ̈ሳ̇̈̇ ማራ̇ጺ̇ኖ ኣሳን ሚ̈ንንዳብኬ ኪን ኣማ̈ና ጎይን ኤርሳምፔ̈ን ሹ̈ሚንቲ̇ኖ ታ ጳ̈ውሎ̈ሳ ጋልዳፖ ጻፊንቲ̇ኖ ኪ̈ታ፦

²ዓና̇ ኣማ̇ኒንዲኬ ኤሪንዳ ሜናብ ሼምፓባር ዶኢ ታስፋ ጋልዳ ሚ̈ጛር ኤቂ̇ኖ ባዜ፤ ማቂ̇ባ̈ሶ ጎዳ̈ዲ ዪና̇ ሜናብ ዶኣዝ ሼምፒ̇ን ኢማ̇ንዳቦ ሚን ሲሳፖ ኑ̈ብ ቃ̈ላ ጌሊኔ።

³ኑ̈ና ፋዝ ጾ̈ሳ̇ ኢ ጌይኖ ኬሊ̇ን ዬሊ̇ን ኢ ኪ̈ታባራ ታ̈ኒ ኢ ቃ̈ላ ሳባ̇ካምፔ̈ን ታ̈ቦ ዓዳራ ኢሚ̇ኖ ጎይባራ ኢ ፌ ቃ̈ሊን ኣሳብ ኤርሲዴ።

⁴ኑ ኣማ̇ናዝ ኣማ̇ኒን ፔታ̇ን ማ̈ቂ̇ኖ ጎይባራ ታ̈ብ ኪን ናኢ ማ̈ቂ̇ኖ ቲ̇ቶ̇! ጾ̈ሳ̇ ኑ ባ̈ባ̈ፔኬ ኑ̈ና ፋዛ ዬሱ̈ስ ክርስቶ̈ሳፖ ኢ ኮሺ̇ቲንዲኬ ሳሪቲን ኔ̈ብ ማ̈ቆ̇።

⁵ቴ ኔ̈ና ቃርጤ̈ሳ ዴሴቲን ጋልዳ ኣሺ̇ኖንዳ፥ ኢና ኣቲ̇ኖ ጌ̈ዛካ̇ዮ ባዛን ኔ ጌ̈ዚንምፔ̈ንኬ ቴ ኔ̈ና ኪ̈ቲ̇ኖንዲፌ̈ኒ ኢና ዎ ካታማን ጋርታ̇ ዎይ ዎ̈ሳ ኬ̈ ጪጛሻን ማራጻ ጋዳ̇ምፔ̈ኒዬ።

⁶ዎ̈ሳ ኬ̈ ጪጛ̈ሺ፥ ኢ̈ት ባዝ ኦ̈ሬ ጌዪ ኣሲ ኢጋልዳ ሶ̈ሊባ̈ሶ ኣሲ፥ ማጫ ላጊካ̇ዮ ኣሲ፥ ኢ ናኣን ጾ̈ሳ̇ ኣማ̇ኒዝ ኣሲ ማ̈ቃ̇ንዳብ ኮሺ̇̈ሬ ማ “ኢንቲ ኪ̈ቲንቲባ̈ሴ፣ ዲርጊስ ዲርጊ̈ሬ” ጌዪ ኣሲ ኢንታ̇ ጌስቲ̇ባ̈ሶ ማ̈ቃ̇ንዳብ ኮሺ̇̈ሬ።

⁷ዎ̈ሳ ኬ ቲ̈ኒዝ ጪጛሺ ጾ̈ሳ̇ ኦ̈ሲን ኦ̈ንዳቦ ዓዳ̇ራ ኤኪ̇ኖ ኣስ ማ̈ቂ̇ኖኮታ̇ቦ ኣሲ ኢያ ጌስቲ̇ዝ ኣስ ማ̈ቃ̇ንዳቦ ኮሺ̇ባ̈ሴ፤ ማ ኦትርቂ̇ባሶ ኣሲ፥ ኤሊ̇ር ጎይሊባ̈ሶ ኣሲ፥ ማሲቲባ̈ሶ ኣሲ፥ ዋጪባ̈ሶ ኣሲ፥ ቢራብ ጋንዲ̇ባ̈ሶ ማ̈ቃ̇ንዳብ ኮሺ̇̈ሬ።

⁸ዪ̈ኒ̇ፖ̇ ኢ ዛቃ̇ ሞኪ̇ዝ ኣሲ፣ ኮሽ ማ̈ቂ̇ኖ ባዝ ካዝ ኣሲ፣ ኢ̈ታ ባዝ ኦ̈ዚን ጋልዳፖ ፌ̈ና ና̈ጊዝ ኣሲ፣ ጌ̈ሽ ኣስ ማ̈ቃ̇ንዳብ ኮሺ̇̈ሬ ማ ፌ ኢኒ̇ን ዎይ ኩምንዳ̇ብ ዎጺ̇ዝ ኣስ ማ̈ቃ̇ንዳብ ኮሺ̇ባ̈ሴ።

⁹ኢ ኪን ቲምርቲ̇ን ታማ̈ርሲሙታ ዞራንዳብኬ ኪን ቲምሪቲ̇ን ኢጺ̇ዝ ኣሳን ዞራር ማሃንዳ̇ቦ ፌ ታማ̈ሪኖንዲፌ̈ኒ ኣማ̇ኒንቲ̇ኖ ቃ̈ሊን ጋልዳ ሚ̈ጛር ኤቃ̇ንዳቦ ኮሺ̇̈ሬ።

¹⁰ኣኮታ̇ቦ ጌይን ዉጫ ኣሳን፥ ሜላ̇ ዓሪ ሶ̈ላ ዎይሊሲዛንኬ ኣስ ታ̈ላ̇ሊዛን ዎይሊን ዎ፤ ዪን ጋርታ̇ፖ̇ ሺን ኣይሁድ ዜርን።

¹¹ኢንቲ ማቃባር ኣባክ ዲጛንዳብ ኮያሪ ታማ̈ርሳንዳቦ ኮሺባ̈ሶ ቲሚርታ ታማ̈ርሲሙታ̇ ፌ ኣ̈ላባር ኮሽ̇ ዎ ኣሳን ኢ̈ሲ̇ዛኮታ̇ቦ ዪንፌ̈ኖ ኣሳን ዪ̈ዲፌ̈ኖ ባዝ ሶ̈ላካ̇ይፌ̈ኒ ኢንታ̇ ካያንዳ̇ብ ኮሺ̈̇ሬ።

¹²ሜላ ኣቲ̇ን ኢንታ ናባ̈ ጌ̈ታ ኢንታ̇ባዝ ሶ̈ሊ̈ርዶሪ “ቃርጤ̈ሳ ኣሳን ዎይ ጋ̈ላስ ማቃ ማቂ̇ዛን፥ ኢ̈ታ ማ̈ታባዝፌ̈ኖ ኣሴ ማ ኦ̈ሳ ኦ̈ባሶን ሙ̈ያር ሚሽኪ̇ባ̈ሶን” ጌይኔ።

¹³ዪ̈ ና̈ሳ̈ዲ ኢንታ ባዝ ማርኪቲኖንዳ ኪን፤ ዪ̈ኮታ̇ቦ ኢንታ ኣማ̇ኒንዳ ኪን ጎይም ጋልዳ ኤቃ̇ምፔ̈ንኬ፤ ኣይሁዳን ሶ̈ላ ፋባ̈ሶ ጋልዳፖ̇ ኢንቲ̇ ጎታ̇ምፔ̈ኒ ማ ኪንን ኢጺ̇ዝ ኣሳን ኪ̈ታ̇ዝ ኪ̈ቲን ሲስካካ̇ዮ̈ድፌ̈ኒ ኢንታ̇ ሚ̈ንር ጎይላቤ።

¹⁵ጌ̈ሽ ኣሳንቦ ዎይ ባዚ ጌ̈ሼ̇፤ ናጋራንቻንብኬ ኣማ̇ኒባ̈ሶ ኣሳንቦ ኢንታ̇ ቆፊንዳር ኢንታ̇ ቡ̈ዲንዳ̇ሬ ጌ̈ሽ ጊዳካ̇ዮኮታ̇ቦ ኢንታ̇ቦ ዎይ ባዚ ጌ̈ሽ ጊዳካ̇ዬ።

¹⁶“ኑ̈ኒ ጾ̈ሳ̇ ኤሪ̈ሬ” ጋ̈ሪ ኢንቲ̇ ሶ̈ሊ̈ርዶኬ ፌ ኦ̈ሲንባር ኢያ ኢጺ̇̈ሬ፤ ኢንቲ̇ ፌ ኦ̈ሲንባራ ጾ̈ሲ ኢንታ̇ ሺሪንቲ̇ኖን፥ ማ ኪ̈ቲንቲባ̈ሶንኬ ኮሻ̇ ኦ̈ሳ ኦ̈ንዳብ ዳንዳኢባ̈ሶ ኣሴ።