Read basketo ቲ̈ታ̇ 2 Bible Online

ቲ̈ታ̇ 2 - basketo bible

ቲ̈ታ̇ 2

¹ዎቲናካር ኔ̈ኒ ኪን ማ̈ቂ̇ኖ ቲሚርቲንባር ዎልፌ̈ን ሉኪ̇ዝ ቲሚርታ̇ ታማ̈ርሳቤ።

²ዶምዚኖ ኣቲናን፥ ኢ̈ታ ባዝ ኦ̈ዚን ጋልዳፖ ፌ̈ና ና̈ጊዛን፣ ኣማ̇ናባራ፣ ዳንዳኣባርኬ ካ̈ንባራ ዶኢዝ ኣስ ማ̈ቃ̇ምፔ̈ኒ ኢንታ ዞራቤ።

³ዪና̇ ኢዝፌ̈ን ዶምዚኖ ማጫ̇ን ኮሽ̇ ጻባያባሮ ኣስ ማ̈ቃ̇ምፔ̈ንዶኬ ኣስ ጌስቲ̇ዝ ኣስኬ ኡሽ̇ ካዝ ኣስ ማ̈ቃካ̇ይፌ̈ንኬ ኮሽ̇ ማ̈ቂ̇ኖ ቲሚርቲ̇ን ታማ̈ርሲዝ ኣስ ማ̈ቃ̇ምፔ̈ኒ ኢንታ ዞራቤ።

⁴ዪዚ ዶምዛን ዪኒ̇ፌ̈ን ዎቴጌይንዶ ናኢቲ̇ ማጫናኣን ፌ ኣስኒንታ̇ንኬ ፌ ናኣን ካዝ ኣስ ማ̈ቃ̇ምፔ̈ኒ ኢንታ ዞሪ ኤሪሳንዳብ ዳንዳኢ̈ሬ።

⁵ጾ̈ሳ̇ ቃ̈ላ ቆ̈ሲንታካ̇ዮ̈ዲፌ̈ኒ ናኢቲ ማ̈ቂ̇ኖ ማጫናኣን ፌ̈ና ኢ̈ታ ባዝ ጋልዳፖ̇ ና̈ጊዝ ኣሲ ማ ኦሎላ ጋዳ̇ዚን ጋልዳፖ ፌ̈ና ና̈ጊዝ ኣሲ፣ ኮሽ̇ ኣሲ፣ ፌ ኣ̈ሊን ጋርታ ኦ̈ሳባር ሚ̈ጚዝ ኣስኬ ፌ ኣስኒንታ̇ንቦ ኪ̈ቲንቲ̇ዝ ኣስ ማ̈ቃ̇ምፔ̈ኒ ዶምዛን ኢንታ̇ ታማ̈ርሶጋ̈ቤ።

⁶ዪና̇ ኢዝፌ̈ኒ ናኢቲ̇ ኣቲናኣን ፌ̈ና ኢ̈ታ ባዝ ጋልዳፖ ና̈ጋር ዶኣምፔ̈ን ኢንታ ዞራቤ።

⁷ዎይ ባዝባራ ኔ ኔ ቆሚ̇ን ኮሽ ኦ̈ሳ ኦ̈ሙታ ኢንታ̇ብ ሚሳ̇̈ሊ ማ̈ቃ̇ራ ቤይሳቤ፤ ኔ ታማ̈ርሳዝ ቲምርቲንባራር ማ̈ቂ̇ን ኪንኬ ኣማ̇ኒንቲ̇ኖ ኣስ ማ̈ቃ̇ቤ።

⁸ኔ ሶ̈ሊንዳ ማዛ ኢዝ ጋልዳ ባዮ̇ ኮሻ̇ ሶ̈ላ ማ̈ቆ̇ጋቤ። ዪና̇ሬ ኑ̈ና ኢጺዛን ኑ ጋልዳ ኢት ሶ̈ሊዝ ባዚ ኢንታ ዬጌይን ኢንቲ̇ ዬ̈ልቃምፔ̈ኒዬ።

⁹ኣይላንር ፌ ላ̈ንቦ ኪ̈ቲንታ̇ምፔ̈ኒ፣ ማ ባዝ ዎይባራ ፌ ላ̈ን ኡፋይሳምፔ̈ን፣ ኢ̈ታ ባዝ ሶ̈ሊ ማሃካ̇ዮ̈ዲፌ̈ኒ ኢንታ ዞራቤ።

¹⁰ኢንቲ̇ ፌ ላ̈ን ሚ̈ሽ ዉ̈ቃፖ̇ጋ̈ቤ፤ ዪዳሬ ኣባቦ ጌይን ኑ̈ና ፋዝ ጾ̈ሳ̇ ቲሚርቲ̇ን ዎይ ባዝባራ ቦንቺንታ̇ምፔ̈ን ኢንቲ ዎይ ጋላስ ኮሽ̇ ኦ̈ሳ ኦ̈ሙታ̇ ኢንቲ̇ ኣማ̇ኒንቲ̇ኖ ኣስ ማ̈ቂ̇ኖን ቤይሳጋ̈ቤ።

¹¹ኣባ ጌይን ኣስ ፋ̈ዝ ጾ̈ሳ̇ ካንንዳ ኣስ ዎይቦ ቤንቲ̇ኔ፤

¹²ዪና̇ ጾ̈ሳ̇̇ ካንንዳ፥ ኣሲ ናጋ̈ራ ኦ̈ ሙታ̇ ዶኣዚን ጋልዳፖኬ ኣላሚን ዓኒ̇ ጋልዳ ዎ ኢ̈ታ ኢና̇ን ኣሻ̇ሪ ኢ̈ታ ባዝ ጋልዳፖ ፌ̈ና ና̈ጊሙታ̇ ጺሊ̇ቲባርኬ ጾ̈ሳ̇ ማይጻር ዶኣምፔ̈ን ኑ̈ና ታማ̈ርሳ̈ሬ።

¹³ዪዚ ዪኒ̇ ጎይባራ ኣንጂንቲ̇ኖ ኑ ታስፋ ኢያሬ ኑ̈ና ፋዛ ጴቻ ኑ ጾ̈ሳ̇ ዬሱ̈ስ ክሪስቶ̈ሲ ፌ ቦ̈ንችባራ ማ̈ቂ̇ ዬ̈ዚን ኑ ና̈ጊሬ።

¹⁴ኢ ኑ̈ና ዉጫ ኦ̈ሳ ዎይ ጋልዳፖ ፋንዳብኬ ኮሽ ኦ̈ሳ ኦ̈ንዳቦ ሚ̈ጛር ኤቂ̇ኖንኬ ጾ̈ሳ̇̇̈ቦ ቆሪንቲ̇ኖ ዎርዣ ማ̈ቃ̇ምፔ̈ኒ ኑ̈ና ጌ̈ሻ̇ንዳ̇ቦ ፌ̈ና ዓይቃብ ኣ̈ ኢሚ̇ዴ።

¹⁵ዪዚ ኔ̈ኒ ታማ̈ርሳንዳብ ኮሺ̇ዝ ባዛን ዪን፤ ኔ̈ቦ ኢሚንቲ̇ኖ ሲልጣኒንባራ ኮሺንቻ ዞራቤ፤ ጎይላቤ፤ ኦናካ̈ር ኔ̈ና ሌቃፖጋ̈ቤ።