Read basketo ቲ̈ታ̇ 3 Bible Online

ቲ̈ታ̇ 3 - basketo bible

ቲ̈ታ̇ 3

¹ኣሲ ዎይ ጋዣንቤኬ ሲልጣ̈ና ዎ ኣሳንቦ ዪርክ ጋ̈ር ኪ̈ቲንታ̇ምፔ̈ንኬ ኮሽ̇ ኦ̈ሳ ዎይ ኦ̈ንዳቦ ጊ̈ጊንቲ̇ኖ ኣስ ማ̈ቃ̇ምፔ̈ኒ ኢንታ̇ ዞራቤ።

²ማ ኦ ጋልዳካሬ ኢ̈ታባዝ ሶ̈ላካ̇ዮ̈ዲፌ̈ኒ፣ ኣሳባር ሳሪቲባርኬ ኣሽኪቲባራ ዶኣምፔ̈ኒ፣ ኣስ ዎይባራ ፌ̈ና ዪርክ ዎታር ዶኣምፔ̈ኒ ኢንታ ዞራቤ።

³ኑ̈ኒ ኣማ̇ናናፖ̈ ቲ̈ን ኣባክ ቆፒ ኤሪባ̈ሶ ዳሻን፤ ኪቲንቲባሶ ዉ̈ጫን፤ ዎብ̇ ጎይ ሉኪ̇ዛን፥ ዱማ ዱማ ኢ̈ታ ኢና̇ብኬ ኡፋይሳቦ ኣይላ ማ̈ቃ̇ር ኣቲ̇ኖን። ዎልዎልኣ ኢጺንቲሙታ̇ኬ ጎይሊንቲሙታ̇ ኢ̈ቲቲባርኬ ኣሳብ ሚቃ̇ይና ቆፒ̇ሙታ ዎን።

⁴ማ̈ቂ̇ናካሬ ኑ̈ና ፋዝ ጾ̈ሳ̇̇ ኮሺቲንዲኬ ኢ ካንን ቤንቲ̇ን፥

⁵ኑ ኦ̈ኖ ጺሊ̇ቲ ኦ̈ሳባር ጊዳካ̇ይዶን ጾ̈ሳ̇ ፌ ማ̈ሪቲንባር ኑ̈ና ፋዴ። ኢ ኑ̈ና ፋኖንዳ ጌ̈ሻ ኣያ̇ናባራ፤ ዪ ጌ̈ሻ ኣያ̇ና̈ዲ ኑ ናጋሪን ሜ̈ጪ ጌ̈ሻ̇ር ኦራ ሼምፓ ኑ̈ብ ኢማ̇ሪ ኦራ ጎይ ዬምፔ̈ን ኑ̈ና ዎቲዴ።

⁶ጾ̈ሳ̇̇̈ዲ ሱ̈ቃ̇ ቤዪ ኑ̈ና ፋ̈ዛ ዬሱ̈ስ ክርስቶ̈ሳ ጎይባራ ፌ ኣያ̇ና ኑ ጋልዳ ዎይሊሳር ውልኢሲዴ።

⁷ዪኖ̇ ኢ ዎቲኖንዳ ኑ̈ኒ ኢ ካንንባራ ጌሻ̇ ኣስ ማ̈ቃ̇ሪ ኑ ታስፋባር ና̈ጋዚን ሜናብ ዶኣዝ ሼምፒ̇ንዶ ኤካምፔ̈ኔ።

⁸ዪና̇ ኣማ̇ኒንቲ̇ኖ ሶ̈ላ። ጾ̈ሳ̇̇̈ ኣማ̇ኒኖ ኣሳን ኮሽ̇ ኦ̈ሳቦ ሚ̈ጛምፔ̈ኒ ዪን ባዛን ጌ̈ዚንር ኔ ኢንታ̇ብ ሶ̈ላምፔ̈ኒ ቴ ኮያ̇̈ሬ፤ ዪና̇ ዎይ ኣሳቦ ማ̈ዲ̇ዝ ኮሽ̇ ባዜ።

⁹ማ̈ቂ̇ናካሬ ኔ̈ኒ ዳሻ ኣሳን ዋቺ̇ን ጋልዳፖ፥ ሜላ̇ ኮች ፋይዳዚን ጋልዳፖ፥ ሂጋ̇ ጎይ ዲንዲዝ ጎይላ ጋልዳፖ ጎታ̇ቤ፤ ኣባ ጌይን ዪን ኣባካር ፋባ̈ሶ ባዜ።

¹⁰ኣሳ ጊዳ̇ ፋጊቲ ኤሄይዝ ና̈ሳ ኢያ ፔቲ̇ ቶህ ዎይ ናምኢ ቶህ ዞሪኖፖ ዓኒ ኢ ጋልዳፖ ጎታ̇ቤ።

¹¹ዪዲፌ̈ኖ ና̈ሳ ዎብ ጎይ ሉ̈ኪዝ ናጋራንቻ ኣሴ፤ ኢ ፌ ጋ̈ልዳ ፊርዲኖ ኣስ ማ̈ቂ̇ኖን ኔ ኤራቤ።

¹²ታ̈ኒ ኣርጣሞ̈ሳ ዎይ ቲኪቆ̈ሳ ኔ̈ክ ሚሺጌይን ኔ̈ኒ ኒቆጶ̈ሊሳ ካታሚንኮ ታ̈ኮ ኤሊ̇ር ዬ̈ቤ፤ ታ̈ኒ ባርጋ ኬሊንዶ ኢና ኣ̈ንዳብ ኮዪኔ።

¹³ሂጋ̇ ኤሪዛ ዜ̈ናሳኬ ኣጵሎ̈ሳክ ኢንቲ ፌ ሉ̈ካዝ ጎይን ሉካ̇ምባራ ኢንታ̇ብ ኮሺ̇ዝ ባዝ ዎይባራ ኢንታ ማ̈ዳ̇ቤ።

¹⁴ኣማ̇ኒኖ ኑ ኣሳንሬ ማ ሜላ̇ ዓሪ ማ̈ዲባ̈ሶ ኣስ ማ̈ቃ̇ር ኣታካ̇ዮዲፌ̈ኒን ኣሳብ ኮሺ̇ዝ ባዝ ዎይ ዲጛንዳቦ ኮሻ̇ ኦ̈ሳ ሚ̈ጛር ኦ̈ዚን ታማ̈ሮጋ̈ቤ።

¹⁵ዓይዲ ታባራ ዎን ዎይ ኔ̈ና ሳሮ ጌይኔ፤ ኑ̈ኒ ጎዳ ኣማ̇ኒኖኮታ̇ቦ ኑ̈ና ካዛን ዎይ ታ̈ብ ሳሮ ጋ̈ቤ። ጾ̈ሳ̇ ኮሺቲ ዪንቲ ዎይንባር ማ̈ቆ̇።