Read basketo ፊልሞ̈ና 1 Bible Online

ፊልሞ̈ና 1 - basketo bible

ፊልሞ̈ና 1

¹ዬሱ̈ስ ክርስቶ̈ሳኮታ̇ቦ ቃሺንቲ̇ኖ ታ ጳውሎ̈ሳፕኬ ኑ ኢሻ ጢማ̈ቶ̈ሳፖ ካንቲ̇ኖ ኑ ኢሻ ኑባ̈ር ዎልኣ ዎጛላ ኦ̈ሳ ኦ̈ዛ ፊ̈ልሞ̈ና፥

²ኑ ሚሺን ኣፊ̈ባ፥ ኑ̈ባራ ዎልኣ ክርስቶ̈ሳብ ዎታ̇̈ዳራ ማ̈ቂ̇ኖ ኣኪ̇ርጳ̈ኬ ኔ ኣ̈ሊን ጋርታ̇ ሺቂ̇ዚ ኣማ̇ኒኖ ኣሳን ዎይ፥

³ጾ̈ሳ̇ ኑባ̈ባ̇ፖ̈ኬ ኑ ጎዳ ዬሱ̈ስ ክርስቶ̈ሳፖ ኢ ኮሺቲንዲኬ ሳሪቲን ዪንታ̇̇ብ ማ̈ቆ̇።

⁴ዬሱ̈ስ ክርስቶ̈ሳባር ኔ̈ብ ዎ ኣማ̇ኒንዲኬ ኣማ̇ኒኖ ኣሳን ኔ ካዚን ቴ ሲስካ̇ራ፤ ዎይ ጋላስ ጾ̈ሳ̇ ዎ̈ሳ̈̇ርዶር ኔ̈ና ቆፓሙታ ጾ̈ሳ̇ ጋላታ̈ሬ።

⁶ኑ̈ኒ ክርስቶ̈ሳይ ማ̈ቂ̇ኖኮታ̇ቦ ኑ̈ቦ ዎ ኮሽ ባዚን ዎይ ፋላ ጋልዳ ኤሪንታ̈ኒፌ̈ኒ ኔ̈ኒ ጾ̈ሳ̇ ኣማኒኖንዳ ሜ̈ላንቦ ሚጛር ሶ̈ላምፔ̈ኒ ቴ ኔ̈ብ ዎሳ̈ሬ።

⁷ቴ ኢሻዶ! ኔ̈ኒ ኣማ̇ኒኖ ኣሳንሲ ኡፋይሲ̇ኖኮታ̇ቦ ኔ ካንንዳ ታ̈ቦ ጴ̈ች ኡፋይስኬ ሚ̈ንቲ ኢሚ̇ኔ።

⁸ዪዚ ዪኒኮታ ኔ ኦ̈ዝ ኦ̈ሲን ፎታቤ ጌያ ቴ ኔ̈ና ኪ̈ታ̇ንዳቦ ክርስቶ̈ሳባራ ታ̈ ኢ̈ጫ̇ባሴ፤

⁹ማ̈ቂ̇ናካሬ ታ̈ኒ ዪኖ ዎታቤ ጌያ ኪ̈ታ̇ናፖ ቴ ዬሱ̈ስ ክርስቶ̈ሳኮታ̇ቦ ቃ̇ሺ ኣ̈ል ጋርታ̇ ዎ ቴ ጪጛሻ ጳ̈ዉሎ̈ስ ካንባራ ቴ ኔ̈ና ጌሻዚን ዶሲኔ።

¹⁰ታ̈ኒ ቃሺ ኣ̈ል ዎራ ኣማ̇ንኖ ታ̈ብ ኣማ̇ና ጎይባራ ናኢ ማ̈ቂ̇ኖ ኣና̈ሲሞ̈ስኮታ ቴ ኔ̈ና ጌሻ̈ሬ።

¹¹ዓኒ̇ፖ ቲ̇ን ኣና̈ሲሞ̈ስ ኔ̈ና ማ̈ዲባ̈ሶ ኣስዶን ዎቲናካር ዓት ኢ ኔ̈ናክ ታ̈ናክ ዎልኣ ማ̈ዲ̇ዝ ኣሴ።

¹²ቴ ዓቲ̇ ኢያ ኔ̈ክ ሚሻ̈ሬ፤ ቴ ኢያ ኔ̈ኮ ሚሺኖንዳ ቴ ቡ̈ዲን ኔ̈ቦ ኢሚ̇ኖዲፌ̈ኒ ፋይዳቤ።

¹³ታ̈ኒ ዓይዳ ቃሺ ኣ̈ሊን ጋርታ̇ ዎንባራ ኢ ኔ ቤሲ̇ን ማ̈ቃ̇ር ታ̈ና ማ̈ዳ̇ምፔ̈ን ቴባራ ዓንዳ ኢና ዶኣምፔ̈ን ኮያ̈ርዶን፥

¹⁴ዎቲናካር ኔ ታ̈ብ ኦ̈ዝ ኮሽ̇ ኦ̈ሲንዳ ዎልቃባር ጊዳካ̇ይዶን ዶሳባር ማ̈ቃ̇ምፔ̈ን ቴ ኮዪኖኮታ̇ቦ ኔ̈ና ኦይጫካ̇ይዶራ ኣባካር ዎታንዳቦ ቴ ኮያካ̇ዬ።

¹⁵ኣናስሞ̈ሲ ጊላ̇ ቃ̇ማቦ ኔ ጋልዳፖ ባያሪ ጎት ቤስ̇ ዎዲ ዓኒፖ̈ ጌ̈ዳ ኔ̈ ኢያ ማ̈ሃር ኤካ̇ራ ሜናብ ኔባር ዶኢዝ ኣስ ማ̈ሳንፔ̈ን ማ̈ቃ̇ንዳብ ዳንዳኢ̈ሬ።

¹⁶ኢ ዪዚ ኔባር ዶኢ̈ርዶሪ ኣይላፌ̈ን ማ̈ቃ̇ር ጊዳካ̇ይዶን ካን ኢሺ ማ̈ቃ̇ሪ ዶኢ̈ሬ፤ ቴ ኢያ ዎይሊን ካዝ ኢሺ ታ̈ብ ማ̈ቂ̇ኔ፤ ዎቲናካሬ ኢ ኔ̈ና ኦ̈ሳባር ማ̈ዳ̇ዚንኮታ̇ብኬ ማ ኣማ̇ና ጎይባራ ኔ̈ቦ ኢሺ ማ̈ቂ̇ኖኮታቦ ሺ ኔ̈ቦ ካን ኣስ ማ̈ቂ̇̈ሬ።

¹⁷ዪዚ ኔ ታ̈ና ኔ ኢሺፌ̈ን ማሃ̈ራ ፋይዳ̈ርኮ ኢያር ኔ ኢሺፌ̈ን ማሃር ኤካ̇ቤ።

¹⁸ኢ ኔ ጋ̈ልዳ ዬ̈ልኖ ባ̈ዝ ዎኮ ዎይ ኢ ጪጊ̇̇ዝ ኣጫ ዎኮ ኢ ኣጪ̇ን ቴ ጋ̈ልዳ ፋይዳቤ።

¹⁹ዪዚ ቴ ጳ̈ዉሎሲ “ኢ ጋልዳ ኣጫ ዎኮ ቴ ኔ̈ብ ጪጋ̇ንዳ” ጋ̈ር ቴ ኩሽ ጌ̈ቲንባር ጻ̈ፋራ ቴ ኤርሳ̈ሬ፤ ማ̈ቂ̇ናካር ኔ ሼምፒ̇ን ጎይ ኔ ታ̈ብ ጪ̈ጊ̇ዝ ባዚ ዎንዶ ቴ ኔ̈ና ቆ̇ፊሳንዳ̇ቦ ኮሻ̇ባሴ።

²⁰ዪዚ ቴ ኢሻዶ! ዪኖ̇ ኮሽ ባዚን ኦ̈ምፔን ቴ ኔ̈ና ጎዳ ሱ̈ምባራ ጌሻ̈ሬ፤ ጎዳ ሱምባራ ታ̈ና ኡፋይሳ̇ቤ።

²¹ዓኖ̇ ቴ ኔ̈ብ ጻ̈ፊኖንዳ ኔ ታ̈ቦ ኪ̈ቲንታ̈ሬ ጌያ ኣማ̇ኒ̇ኖኮታ̇ቦ፤ ማ ቴ ኔ̈ና ኪ̈ቲኖምፖ ሺ ኔ̈ኒ ኦ̈ዚን ቴ ኤራ̈ሬ።

²²ማ ዪኒ ጋልዳ ጾ̈ሳ̇ ዪንታ̇ ዎ̈ሲ̇ን ሲስካ̇ሪ ታና ዪንታ̇ክ ሉ̈ካንንፔ̈ን ዎታ̈ዚን ታ̈ቦ ታ̈ስ̇ፋ ዎኮታ̇ቦ ቴ ሉካር ሼምፒ̇ዝ ቤሲ ታ̈ቦ ጊጊሳቤ።

²³ዬሱ̈ስ ክርስቶ̈ሳኮታ ቴ ባ̈ራ ዎልኣ ቃቺንቲ̇ኖ ኤጳፍራ ኔ̈ና ሳሮ ጌይኔ፤

²⁴ማ ታባ̈ራ ዎልኣ ኦ̈ዛን ማ̈ርቆ̈ሳ፣ ኣርስጥሮኮ̈ሳ፣ ዴ̈ማ̈ሳኬ ሉቃ̈ሳክ ኔ̈ና ሳሮ ጌይኔ።

²⁵ኑ ጎዳ ዬሱ̈ስ ክርስቶ̈ሳ ኮሺ̇ቲን ዪንቲ ዎይንባር ማ̈ቆ̇።