Read basketo ኢብ 10 Bible Online

ኢብ 10 - basketo bible

ኢብ 10

¹ሂጎ̇ ቢርት ቲ̈ን ዬይዝ ኮሽ̇ ባዛንቦ ሚሳ̇̈ሊፌ̈ኒ ዎይ ኤ̈ሻ̇ፌ̈ንዶኬ ኢዛ ፌ ቆሚ̇ን ኮሺ̇ንዲ ጊዳካዬ፤ ዪ̈ኮታ̇ቦ ላይ ላይ ዎይ ጋላ ዣርሻ ኤካ̇ሪ ጾ̈ሳ̇̇̈ኮ ሺ̈ቂዝ ኣሳን ኢንታ ጋልዳ ማዛ ባዮ̇ ኣስ ማሃንዳብ ውርሲ ዳንዳኢባ̈ሴ።

²ሂጎ̇ ኢንታ ጋልዳ ኣባካር ማዛ ባዮ̇ን ማሃንዳብ ዳንዳኢኔፌ̈ንኮ ዎን ጾ̈ሳ̇ቦ ጎሽታንዳ̇ብ ሺ̈ቂዝ ኣሳን ውርሲ ናጋራ ጋርታፖ ጌ̈ዢጊ̇ኖኮታ̇ብኬ ኢንታ ጋልዳ ናጋራ ባዮ̇ንዳ ኢንታ̇ብ ኤሪንቲዛኮታ̇ቦ ዣ̈ርሻ ሺሻዚን ኣታ̇̈ርዶን።

³ዪን ዣርሻን ዎቲናካሬ ላይ ላይ ኢንቲ̇ ፌ ናጋሪን ቆፓ̇ምፔ̈ን ዎቲ̇̈ሬ።

⁴ጌን ሱ̈ኬ ዴይሻ ሱ̈ ናጋራ ይሳ̇ንዳብ ዳንዳኢባ̈ሴ።

⁵ዪ̈ኮታ̇ቦ ክርስቶ̈ሲ ሳ̈ዝ ጋልዳ ዬይኖ ኬል̇ባራ፤ “ኔኒ ዣርሻኬ ማባክ ኮያካዬ፤ ኔ ታ̈ብ ጋል̇ ጊ̈ጊሳዴ፤

⁶ታማባር ሚቺ̇ዝ ዣ̈ርሻባርኬ፤ ናጋራ ኣቶ̇ ጌይንታምፔ̈ን ሹኪ̇ዝ ዣ̈ርሻባር፤ ኔ̈ኒ ኡፋይታ̇ካዬ፤

⁷ዪና ኢዝባራ ታ̈ኒ፤ ‘ቴ ጾ̈ሳ̇ዶ! ማጻ̈ፋ ጋልዳ ቴ ባዝ ጻ̈ፊንቲ̇ኖንዲፌ̈ኒ፤ ቴ ኔ ጌይኖን ኦ̈ንዳብ ዬይኔ ጋዴ’ ” ዪዝ ጌይኔ።

⁸ዣ̈ርሺ ሺ̈ቃምፔ̈ኒ ሂጊ̇ን ኪ̈ቲናካሬ ዬሱ̈ሲ ጌይርዶሪ “ዣ̈ርሻኬ ማባኬ፤ ታማባር ሚቺ̇ዝ ዣ̈ርሻኬ ናጋራ ኣቶ ጌዪንታ̇ምፔ̈ኒ ሺ̈ሻ̇ዝ ዣ̈ርሺን ኔ ኮያካ̇ዬ፤ ዪን ዎይንባራ ኔ̈ኒ ኡፋይታ̇ካ̇ዬ” ጌይዴ።

⁹ማ ኢናፖ “ዓዲሼ፥ ታ̈ኒ ኔ ጌይኖ ባዚን ኦ̈ንዳብ ዬይኔ” ጌይዴ። ዪኒባራ ሚኖን ይሳ̇ንዳቦ ጋሶን ሚ̈ንኔ።

¹⁰ጾ̈ሳ̇̇̈ ጌይኖንዲፌ̈ኒ ዬሱ̈ሲ ማ̈ቃ̇ር ናምኢ ዓይቂ̇ባ̈ሶ ማሃሪ ፔታ̇ን ፌ̈ና ዣርሻ ሺሺኖኮታ̇ቦ ኑ̈ኒ ጌዥጊ̇ኔ።

¹¹ቄ̈ሳን ዎይ ናጋራ ማ̈ሪሳንዳብ ዳንዳኢባሶን ዪን ዣርሻን ዎይ ጋላስ ሺ̈ሺ̇ሙታ ዎይ ጋላስ ኤቃ̇ር ኦ̈ሬ።

¹²ክርስቶ̈ሲ ዎቲናካር ዎይ ጋላሳ̇ብ ማ̈ቃ̇ዚን ፔቲ ዣርሺን ሺ̈ሺ̇ኖፖ ዓኒ ጾ̈ሳ̇ ኡሻች ጎይ ዶኢኔ።

¹³ዪዚ ዓኒ̇ፖ ጌዳ ኢ ጻላ̈ታን ኢ ሲልጣ̈ና ጻና ማ̈ቂ̇ዝ ዲራስ ና̈ጊ̈ሬ።

¹⁴ዪ̈ዳር ማ̈ቂ̇ኖ̈ዲ ዪን ጌ̈ዥጊ̇ዝ ኣሳን ፔቲ̇ ዣ̈ርሺን ኢዝባራ ሜናብ ኢንታ ጋልዳ ማዛ ባዮ̇ን ማሂኖኮታ̇ቦ።

¹⁵ጌ̈ሻ ኣያ̇ና̈ዳሬ ዪኒ̇ ባዚምቦ ኑ̈ብ ማርኪቲ̈ሬ፤ ኢ ጌይርዶሪ፤

¹⁶“ዪን ቃማንፖ ዓኒ፤ ቴ ኢንታባር ጌላዝ ጫ̈ቃ ቃ̈ሊን ዓኖ̇ ጌይሬ ጎዳዲ፤ ቴ ሂጊ̇ን ኢንታ ጋርታ ጋዳ̇ንዳ፤ ኢንታ ቡ̈ዲን ጋርታ ጻ̈ፋንዳ” ጌይኔ።

¹⁷ማ ኢናፖ፥ “ቴ ኢንታ ናጋሪንዲኬ ኢንታ ኢ̈ታ ኦ̈ሲን፤ ዪዚ ዓኒ̇ፖ ጌዳ ማሃ ቆ̈ፓ̇ንዳባዬ” ጌይሬ።

¹⁸ዪ̈ኮታ̇ቦ ናጋራ ዎይ ኣቶ ጌዪንቲኖፖ ዓኒ ናጋራኮታቦ ሺ̈ሺ̇ዝ ዣርሻ ዶኢባ̈ሴ።

¹⁹ዪዚ ቴ ኢሺንታ̇ን! ኑ̈ኒ ዬሱ̈ሳ ሱ̈ን ጎይባራ ዎይፖ ሺ ጌ̈ሻ ቤሲ̇ን ጋርታ ኢ̈ች ቤይ ጌላንዳቦ ዳንዳኣዚን ኤሪኖኮታ̇ቦ፥

²⁰ዪና̇ ኑ ጌላዚንዳ̇ሬ ቄ̈ሳ ኣላቃ̈ዲ ጌ̈ሻ ቤሲ̇ንኮ ማጋራ̈ጂን ጊዲ̇ንባራ ጌላዚንዲፌ̈ኒ ኢ ፌ ኣይሺ̇ን ጎይባር ኑ̈ብ ፊርቂ̇ኖ ኦራኬ ሼምፓ ኢማ̇ዝ ጎይሚንባራ።

²¹ዪዚ ጾ̈ሳ̇ ኣ̈ላ ጋርታ̇ ሲልጣ̈ና ኢ̈ብ ዎ ጴች ቄ̈ሳ ኑ̈ብ ዎኮታ̇ቦ

²²ኢ̈ታ ቆፊ ጋልዳፖ ጌዥጋንዳቦ ኑ ቡ̈ዲን ጌ̈ሻ̇ሪ ኑ ጋሊ̇ንዳር ጺል̇ ዋ̈ባር ሜ̈ጫ̇ሪ ኮሽ̇ ቡ̈ዳባርኬ ኪን ኣማ̇ናባር ጾ̈ሳ̇ኮ ሺ̈ቂስቶ።

²³ታስፋ ቃ̈ሊን ኑ̈ብ ኢሚ̇ኖዲ ኢ ኣማ̇ኒንቲ̇ኖ ማ̈ቂ̇ኖኮታ̇ቦ ዓት ኑ ኣማ̇ናሪ ኑ ማርኪ̇ታዝ ታስፊን ጌዳር ዓናር ጋ̈ካ̇ይዶሪ ሚ̈ንሪ ኤ̈ስቶ።

²⁴ካንባርኬ ኮሽ̇ ኦ̈ሳባራ ባርካር ዶኣምፔ̈ን ፔታ̇ና̈ዲ ፔታ̇ና ቆፊሳጋ̈ቤ።

²⁵ዎል ዎልኣ ዬላ̇ሪ ዎል ዎልኣ ሚንስቶዶኬ ፔታ̇ን ፔታ̇ናን ዎል ዎልኣ ሺ̈ቃዚን ኣሺ̇ኖንዲፌ̈ኒ ኑ ዎልኣ ሺቃዚን ኣሺ̇ባ̈ዳ፤ ዪኒ̇ፖ ሺ ጎዳ ዬ̈ዚን ቃሚ̇ን ኡኪ̇ኖን ቆፒ̇ሙታዶሪ ቲ̈ኖንፖ ሺ ዪንታ̇ ሺ̈ቂን ሚ̈ንብቴ።

²⁶ኑ̈ኒ ኪንን ኤሪኖፖ ዓኒ ኤራሪ ናጋራ ኦ̈ጌይን ዓኒ̇ፖ̇ ጌዳ ናጋራኮታ̇ቦ ሺ̈ቂዝ ዣርሻ ኣባካር ዶኢባ̈ሴ።

²⁷ዪዚ ዓኒ̇ፖ ጌዳ ጊዳክ ዬይዝ ኢ̈ቺ̇ዝ ፊርዳኬ ጾ̈ሳ̇ ኢጺ̇ዝ ኣሳን ሚቺ̇ ይሲዝ ጴች ታማ ዬይሬ ጌዪ ኑ ና̈ጊ̈ሬ።

²⁸ሙ̈ሳ ሂጊ̇ምቦ ኪ̈ቲንቲ̇ባ̈ሶ ኣስ ጋልዳ ናምኢ ዎይ ዓይዚ̇ ኣሲ ማርኪቴጌይን ዪ ና̈ሳ̈ዲ ማ̈ሪቲ ቤይ ዓይቂ̇̈ርዶን፥

²⁹ዪዚ ጾ̈ሳ̇ ናኣ ሌቂ̇ኖ ኣሲ፤ ፌ̈ና ጌ̈ሺ̇ኖ ጫ̈ቃ ሱ̈ን ማ̈ዲባ̈ሶ ባዝፌ̈ን ፋይዲኖ ኣሲ፤ ኮሺቲ ኢሚ̇ዝ ኣያ̇ና ቆ̈ኖ ኣሲ ዎዛርፌ̈ን ሺ ቃጣ̇ኢንታ̇ንዳብ ኮሺ̇ዛ ዪንታ̇ብ ማይጺ̈ራ!

³⁰“ሱ ማሂዛዲ ታ̈ና፤ ታ̈ኒ ኮሻ̇ዝ ባዚን ማሃ ጪጋ̇̈ሬ” ማ “ጾ̈ሲ ፌ ዎርዣ ጋልዳ ፊርዲ̈ሬ” ጌይኖ ኦ̈ናኮ ኑ ኤሪ̈ሬ።

³¹ዪ̈ኮታ̇ቦ ሜናብ ዶኢዝ ጾ̈ሳ̇ ኢ ፊርዲን ጋልዳ ኬስካ̇ዚንዳ ዎይሊን ኢቻ̇̈ሬ።

³²ዪንቲ ጎዳ ኣማ̇ኒኖፖ ዓኒ ዎይሊን ሜታ ኤካ̇ሪ ጋርዣባር ኣ̈ኖ ዪን ሚኖ ኬላ̇ን ቆፒ̇ብቴ።

³³ዪንቲ̇ ፔቲ̇ ፔቲ̇ ጋላስ ኣሳ ቲ̈ን ቆ̈ንቲኔ፥ ዳኪንቲ̇ኔ፤ ማ ፔታ̇̈ብ ፔታ̇̈ቦ ዪኒ ፌ̈ኖ ሜታ ኤኪ̇ኖ ኣሳንባር ላጋ̇ ማ̈ቃ̇ር ዬኖኮታቦ ሜታ ኤኪ̇ኔ።

³⁴ዪንታ̇ቦ ኮሽ̇ ቆሊን ኣፋ ዎን ኤሪኖኮታ̇ቦ ዪንታ̇ ቆሊን ዎይ ኢንቲ̇ ኤኪንቲ̇ናካሬ ዪንቲ̇ ኡፋይቲ̇ኔ፤ ቃሺ ኣ̈ል ጌሊኖ ኣሳንባሬ ዪንቲ ሚጪንቲ̇ኔ።

³⁵ዪዚ ዪንታ̇ብ ጴች ሺልማ̈ታ ኤሄ̈ዚንኮታ̇ብ ዪንቲ̇ ኢ̈ችቤይ ዶኣዚን ኣሻፒ̇ቴ።

³⁶ዪንቲ̇ ጾ̈ሳ̇ ኮያዝ ባዚን ኦ̈ሪ ኢ ዪንታ̇ብ ኢማ̇ንዳብ ቃ̈ላ ጌሊኖ ባዚን ዲጛንዳብ ጋርዣር ና̈ጋንዳብ ኮሺ̇̈ሬ።

³⁷ዪዚ ባዝ ዪኒ̇ኮታ፤ “ዪ̈ ዬይዛዲ ጊላ̇ ቃማ̇ፖ ዎሃ ዬይሬ፤ ጋምኢባ̈ሴ፤

³⁸ቴዪ ማ̇ቂኖ ጺላ ኣሲ ዎቲናካሬ ኣማ̇ናባራ ሼምፓ ዲጚ̈ሬ፤ ኢ ጋስ ዴጪዝ ባዝ ማ̈ቄጌይን ቴ ኢባር፤ ኡፋይታ̇ባሴ” ጋ̈ሪ ጻ̈ፊንቲ̇ኔ።

³⁹ኑ ዎቲናካሬ ኣማ̇ናር ፋጺኖንባርዶኬ ጋስ ማ̈ቃ̇ር ዪዝ ኣሳንባር ጊዳካ̇ዬ።