Read basketo ኢብ 11 Bible Online

ኢብ 11 - basketo bible

ኢብ 11

¹ኣማ̇ና ጌይንቲ̇ዛ̈ዲ ኑ ታስፋ ጋዲ̇ኖ ባዚንዶ “ኣዓ ኪን ማ̈ቃ̇̈ሬ” ጋ̈̈ር ና̈ጊዛ̈ዳ፤ ማ ኣ̈ፍባር ቤቂ̇ን ቤንታ̇ባሶ ባዚንዶ ቤንቲዛ̈ዲፌ̈ን ማሃር ፋይዲዛ̈ዳ።

²ሚኖ ባ̈ቢንታ̈ን ጾ̈ሲ ኢንታ̇ባዝ ማርኪቲኖ̈ዲ ኢንታ ኣማ̇ኒንጊሼ።

³ኣላሚንዳ ጾ̈ሳ̇ ቃ̈ላባራ ኮቺንቲ̇ኖን ኑ ኤራዚንዳ ኣማ̇ናባራ፤ ዪ̈ኮታ̇ቦ ኣ̈ፍባር ቤንቲ̇ዝ ባዚ ዎይ ኣ̈ፍባር ቤንቲ̇ባ̈ሶ ባዝ ጋልዳፖ ኮቺንቲ̇ኖን ኑ ኤሪ̈ሬ።

⁴ኣ̈ቤ̈ሊ ቃዬ̈ሊ ሺ̈ሺ̇̈ኖ ዣ̈ርሺምፖ ሺ ጾ̈ሳ̇̇̈ቦ ዣ̈ርሻ ሺ̈ሺ̇ኖ̈ዲ ኣማ̇ናባራ፤ ጾ̈ሳ̇ዲ ኣ̈ቤ̈ላኮን ዣ̈ርሺን ኡፋይስባር ኤኪ̇ን ኣ̈ቤ̈ሊ ፌ ኣማ̇ኒምባር ጺላ̇ ማ̈ቂ̇ኖን ጾ̈ሲ ኢ̈ብ ማርኪቲዴ፤ ኣ̈ቤ̈ሊ ዓይቂ̇ናካርዶን ኢ ፌ ኣማ̇ኒን ጎይባራ ዓታ̇ር ሶ̈ሊንቲሙታ ዎ።

⁵ሄ̈ኖ̈ኪ ዓይቃ ኢያ ዬላ̇ካ̇ይፌ̈ኒ ፉዳ ኣፋ ኤኪንቲ̇ኖ̈ዲ ኣማ̇ናባራ፤ ጾ̈ሲ ኢያ ፌ̈ክ ኤኪ̇ኖኮታቦ ኢ ቤንታካ̇ዬ፤ ጾ̈ሲ ኢያ ኤካዚምፖ ቲ̈ን ኢ ጾ̈ሳ̇ ኡፋይሲ̇ኖን ጾ̈ሲ ኢ̈ብ ማርኪ̇ቲኔ።

⁶ኣማ̇ና ባዪዶን ጾ̈ሳ̇ ኡፋይሳ̇ንዳብ ዳንዳኢንቲ̇ባ̈ሴ፤ ጾ̈ሳ̇ክ ሺ̈ቂዝ ኣሲ ጾ̈ሲ ዎንዴኬ ማ ኢያ ቡ̈ዳ ጋርታ̇ፖ ኮዪዝ ኣሳንቦ ኢንታ̇ ጋቲን ኢንታ̇ብ ኢሚ̇ዛ ማ̈ቂኖን ኣማ̇ናንዳብ ኮሺ̇̈ሬ።

⁷ቢርት ኣ̈ፍባር ቤንታ̇ካዮ ባዛቦ ጾ̈ሲ ኢ̈ብ ሶ̈ሊኖ ኬል̇ ኖ̈ሂ ጾ̈ሳ̇̇̈ቦ ኢ̈ጫ̇ሪ ፌ ኣ̈ሎ ኣሳን ፋንዳቦ ጎጛ ኮቺ̇ኖንዳ ኣማ̇ናባራ፤ ኖ̈ሂ ኣማ̇ኒምባራ ኣላሚንዳ ናጋራንቻ ማ̈ቂ̇ኖን ኤሪንታራ ፊርዲንቲ̇ኔ፤ ኖ̈ሂ ኣማ̇ናባር ቤንታ̇ዝ ጺሊ̇ቲን ኤኪ̇ዴ።

⁸ኣብራሃ̈ሚ ፌ̈ብ ኢሪስታ ማሃር ኤካ̇ዝ ቤሲ̇ንኮ ሉካ̇ምፔ̈ን ጼይጊንቲ̇ኖ ኬል̇ባራ ኢ ዎይዲ ሉኪ̈ርካር ኤራካ̇ይዶር ኣማ̇ናባር ኪ̈ቲንታ̇ር ኬስካ̇ር ሉኪ̇ዴ።

⁹ኢባር ዎልኣ ጾ̈ሲ ኢሚ̇ኖ ታስፋ ቃ̈ሊን ኤኪ̇ዛን ዪሳቃፌ̈ንኬ ዓይቆባፌ̈ኒ ታስፋባር ኢሚ̇ንቲ̇ኖ ጋዲን ጋርታ ዛቃ̇ ማ̈ቃ̇ሪ ዱንካ̈ና ጋርታ ዶኢኖንዳ ኣማ̇ናባራ።

¹⁰ኢ ዪኖ̇ ዎቲኖንዳ ጾ̈ሳ̇ዲ ኢ̈ብ ቆፓ̇ር ኮቺ̇ኖ ያባሶ ካታማ ጊዳክ ዲጛንዳቦ ታስፋባር ና̈ጋዚንኮታቦ።

¹¹ሳ̈ራሬ ኢዝቦ ታስፋ ኢሚ̇ኖ ጾ̈ሳ̇̇̈ዲ ኣማ̇ኒንቲኖ ማ̈ቂ̇ኖን ኤሪኖኮታ̇ቦ ኢዛ ጪጛራ ዬላንዳ̇ብ ዳንዳባሶ ኣስ ማ̈ቂ̇ናካር ዎዳጻ̇ንዳብ ዳንዳኢኖንዳ ኣማ̇ናባራ።

¹²ዪ̈ኮታ̇ቦ ዓይቂ̇ኖ ኣስፌ̈ን ፋይዲንቲ̇ኖ ፔታ̇ና ኣብራሃ̈ማ ጋልዳፖ ኣፎ ቤርሳንፌ̈ንኬ ባሃ̈ራ ቡጊድ ጋልዳ ዎ ሻ̈ማፌ̈ን ፋይዲንቲባሶ ዜር ቤንቲ̇ዴ።

¹³ዪን ዎይ ጾ̈ሲ ኢንታ̇ብ ኢማ̇ንዳ ጌይኖን ቤኣካ̇ይዶር ፌ ኣማ̇ኒን ና̈ጊኖንዲፌ̈ን ዶኢ̈ርዶር ዓይቂ̇ዴ፤ ዎቲናካሬ ጾ̈ሲ ኢንታ̇ብ ኢማ̇ንዳብ ቃ̈ላ ጌሊኖ ባዛን ጎትዶር ቤቃ̇ሪ ዲጚኖ̈ዲፌ̈ን ፋይዳር ኡፋይቲ̇ዴ። ሳ̈ዝ ጋልዳ ኢንቲ ዛቃ̇ኬ ቤት ማ̈ቂ̇ኖን ኤሪዴ።

¹⁴ዪፌ̈ን ሶ̈ሊዝ ኣሳን ፌዪ ማ̈ቂ̇ኖ ጋዲን ጊዳክ ዲጛንዳብ ና̈ጋዚን ኤርሲ̈ሬ።

¹⁵ዪና̇ ሚን ኢንቲ ኣሻ̇ር ኬስኪ̇ኖን ጋዲን ማ̈ቃ̇ር ቆፒ̇̈ርፌንኮ ዎን ኢና ማ̈ቃር ሉካ̇ንዳብ ዳንዳኢ̈ርዶን።

¹⁶ዓት ዎቲናካሬ ኢንቲ ሺዚን ኣፋ ዎ ጋዲን ቤቃ̇ንዳብ ሹ̈ኒቲ̈ሬ፤ ዪ̈ኮታ̇ቦ ጾ̈ሳ̇ዲ ካታማ ኢንታብ ጊ̈ጊሲኖኮታቦ ኢ “ኢንታ ጾ̈ሴ” ጌይዪንታ̇ር ጼይጊንታ̇ንዳቦ ዬልቂ̇ባ̈ሴ።

¹⁷ኣብራሃማ ጾ̈ሳ̇ብ ኪ̈ቲንቲ̈ርኮ ዎይ ኪ̈ቲንቲ̇ባ̈ስኮ ኤራንዳቦ ጾ̈ሲ ኢያ ፋታ̇ኒኖ ኬሊንባራ ኢ ፌ ናኣ ዪሳ̈ቃ ዣርሻ ሹካ̇ንዳብ ሺ̈ሺ̇ኖንዳ ኣማ̇ናባራ፤ ጾ̈ሲ ኣብራሃ̈ማኮ “ኔ ዜር ጼይጊንቲ̇ዛ̈ዲ ዪሳ̈ቃ ጎይባራ” ጌይኔካሬ፥ ታስፋ ቃ̈ላ ኤኪ̇ኖ ኣብራሃ̈ሚ ፌ ናኣ ፔታ̇ና ኢያ ዣርሻ ሹካ̇ንዳብ ጊ̈ጊንቲ̇ኔ።

¹⁹ጾ̈ሳ̇̈ዲ ዪሳ̈ቃ ሜላ ኣቲ̇ን ዓይቃ ጋርታፖ ዲንንዳብ ዳንዳ̇ኢዝ ዎልቃ ኢ̈ብ ዎን ኣብራሃ̈ሚ ኣማ̇ኒኖኮታቦ ዓይቃ ጋርታፖ ዲንዲኖዲፌ̈ን ማሃር ዪሳ̈ቃ ኤኪ̇ዴ።

²⁰ዪሳ̈ቂ ቢርት ጊዳክ ማ̈ቃ̇ዝ ባዚን ቆፓ̇ሪ ዓይቆ̈ባኬ ኤ̈ሳክ ኣንጂኖንዳ ኣማ̇ናባራ።

²¹ዓይቆ̈ቢ ፌ ዓይቃ̇ዝ ቃሚ̇ን ኡካ̇ምባራ ዮ̈ሴፋ ናኣን ዎይ ኣንጃሪ ፌ ጉፊን ጋልዳ ኣጚታር ጾ̈ሳ̇̈ቦ ጎሽቲ̇ኖንዳ ኣማ̇ናራ።

²²ዮ̈ሴፋሬ ፌ ዓይቃ̇ዝ ቃሚ̇ን ኡካ̇ምባራ ኢስሬ̈ላ ናኣን ጊብጻ ጋዳ̇ፖ ኬስኪ̈̇ሬ ጌዪ ሶ̈ሊኖንዳ ማ ኢንቲ ኢ ሜቃን ጊብጻ ጋዳፖ ኤካ̇ር ኬስካምፔ̈ኒ ኢንታ̇ ኪ̈ቲ̇ኖንዳ ኣማ̇ናባራ።

²³ሙ̈ሶ ዬሊንቲ̇ኖንባራ ኢ ባ̈ባ̈ዲኬ ኢ ኢንዲንዲክ ኢ ኮሽ ቆይሲዝ ናኢ ማ̈ቂ̇ኖን ቤቃ̇ሪ ካ̈ታ ኪ̈ቲምቦ ኢ̈ጫካ̇ይዶር ዓይዚ̇ ኣጋን ኢያ ኣ̈ቺ̇ኖንዳ ኣማ̇ናባራ።

²⁴ሙ̈ሳሬ ዲጪ̇ኖፖ ዓኒ “ፋ̈ሮናብ ናኣ ናእ” ጌዪንታ̇ር ጼይጊንታዚን ኢጺ̇ኖንዳ ኣማ̇ናባራ።

²⁵ዪ̈ኮታ̇ቦ ኢ ናጋራባር ቤንታ̇ዝ ዎይ ጋላስ ዶኣባሶ ኡፋይሲምፖ ጾ̈ሳ̇ ዎርዣባር ሜታ ኤካ̇ዚን ኮዪዴ።

²⁶ጊዳክ ፌ ኤካ̇ዝ ጋቲን ቤቂ̇ኖኮታቦ ጊብጻ ጋዶ̇ ቆሊንምፖ ሺ ክርስቶ̈ሳ ጊሻ̇ቦ ጋ̈ሪ ሌቂንታ̇ዚንዳ ሺ ማ̈ቂ̇ኖን ቆፒ̇ዴ።

²⁷ኢ ካ̈ታ̈ ጎይሊምቦ ኢ̈ጫካ̇ይዶር ጊብጻ ጋዳ̇ፖ ኬስኪ̇ኖንዳ ኣማ̇ናባራ፤ ኣ̈ፍባር ቤንቲ̇ባ̈ሶ ጾ̈ሳ̇ ኣፍባር ቤቂ̇ኖዲፌ̈ን ማ̈ቃ̇ሪ ፌ ቆፊን ጋልዳ ሚ̈ጛር ኤቂ̇ዴ።

²⁸ኡስ̇ ናኣን ዎንዳብ ኪ̈ቲንቲ̇ኖ ኪ̈ታንቻዲ ኢስሬ̈ላንቦ ኡስ̇ ናኣን ዎካይፌ̈ን ጋ̈ሪ ፋ̈ሲጋ ባ̈ሊን ቦንቺኖንዲኬ ፌ ኣ̈ል ካሪን ሾ̈ንቺ̇ን ጋልዳ ሱ̈ስ ዉርጺኖንዳ ኣማ̇ናባራ።

²⁹ኢስሬ̈ላ ዎርዣ̈ዲ ዋ̈ ባዮ̇ ሳ̈ዝ ጋልዳ ዬዛ̈ዲፌ̈ኒ ኤርቲራ ባሃ̈ሪን ፊ̈ጚኖንዳ ኣማ̇ናባራ፤ ጊብጻ ጋዶ̇ ኣሳን ኢንታ̇ፌ̈ን ዎቲ̈ሬ ጋ̈ሪ ዎይን ዋ̈ ኢንታ ሙይኔ።

³⁰ኢስሬ̈ላ ኣሳን ኢያርካ ጋ̈ዝ ካታሚን ኣጺሪን ቡጉዲምባር ታብዛ ቃም̇ ቢሪንቲ̇ኖፖ ዓኒ ኣጺራን ላ̈ሊ̇ኖንዳ ኣማ̇ናባራ።

³¹ኦሎላባር ኣቃ ዎን ራ̈ቢ ጋ̈ዚንዳ ኢዝ ጋዲን ጋርታ ሜ̈ዛ ሉኪ̇ኖ ኣሳን ኮሽባር ሞካ̇ ኤኪ̇ኖኮታቦ ጾ̈ሳ̇̇̈ብ ኪ̈ቲንቲባሶ ኣሳንባር ዎልኣ ዓይቃ̇ዚን ጋርታፖ ቡ̈ቲ̇ኖንዳ ኣማ̇ናባራ።

³²ዪዚ ቴ ሜላ ኣብዝ ጋ̈ኖ? ጌ̈ዶና ባዝ፣ ባ̈ራ̈ቃ ባዝ፣ ሳምሶ̈ና ባዝ፣ ዮ̈ፊታሃ ባዝ፣ ዳ̈ዊታ ባዝ፣ ሳ̈ሞ̈ላ ባዝ፣ ናባን ባዛር ዎይ ዪንታ̇ብ ሶ̈ላንዳቦ ታ̈ብ ሳኣ̈ታ ጉጺ̇̈ሬ።

³³ኢንቲ ኣማ̇ናባራ ካ̈ቲንታን ኦላር ጋሚኔ፤ ፌ ኣሳንር ኮሽ̇ ኣቂሲኔ፤ ጾ̈ሲ ኢማ̇ንዳ ጌይኖ ታስፊንዳር ዲጚዴ፤ ዞብ̇ ኖ̈ናር ዪብጺ̇ዴ፤

³⁴ታማ ዎልቃር ጋሚዴ፤ ማሻ̇ ጋልዳፓ̇ር ቡ̈ቲ̇ዴ፤ ፌ ዳ̈ቡርሲን ጋልዳፓር ሚ̈ጚዴ፤ ኦልባራር ኢንታ ጋሚዝ ኣሲ ዪዴ፤ ኢንታ ጋዲን ኦላንዳብ ዬይኖ ጻላ̈ታን ዳኪ̇ዴ።

³⁵ማጫ̇ን ዓይቂ̇ኖ ፌ ዳባ̇ን ዓይቃ ጋርታፖ ዲንዲን ቤቂ̇ዴ። ሜላንሬ ዓኒ̇ፖ ሺ ዲንዳ ዲጛንዳብ ቆፓ̇ሪ ዱማ ዱማ ሜታ ኤኪ̇ዴ፤ ቃሺ ኣ̈ላፖ ኬስካ̇ንዳባር ኮያካ̇ዬ።

³⁶ማ ሜላን ኣሲ ኢንታ ጋልዳ ቃልዲ ኢንታ ጋራ̇ፊዴ፤ ሜላን ቶሃ ካ̈ቲናባር ቃቺንታ̇ሪ ቃሺ ኣ̈ል ጌሊዴ።

³⁷ሹችባር ቆጺንቲ̇ዴ፤ ማጋ̈ዛባር ቆ̈ቂንቲ̇ዴ፤ ማሻ̇ባር ዓይቂ̇ዴ፤ ዶሪኬ ዶርቲክ ሻ̈ች ማኣር ዓኒክ ጌዳክ ቢሪንቲ ቢጻ ቤቂ̇ዴ፤ ዎርባያኬ ቤት ማ̈ቃ̇ሪ ዎይሊን ዋ̈ዪዴ።

³⁸ባራሃ ጋርሳባራ፤ ኢንዳ ጋልባራ፤ ጋዊ ጋርታኬ ዶቻ̇ ጋርታ ዶኢዴ። ኣላሚን ዓና̇ ኢንታ̇ብ ማ̈ቃካ̇ዬ።

³⁹ዪን ዎይ ኢንታ ኣማ̇ኒንኮታ̇ቦ ጾ̈ሲ ኢንታ̇ብ ማርኪ̇ቲናካሬ ኢንታ̇ብ ኢሚንቲ̇ኖ ታስፊን ቢርት ኢንቲ̇ ዲጛካዬ።

⁴⁰ጾ̈ሲ ኑ̈ቦ ሺ ኮሽ̇ ባዝ ኢማ̇ንዳብ ቆፒ̇ኖኮታቦ ኢንቲ ኑባር ማ̈ቃ̇ርዶኬ ፌ̈ብ ሙታ̇ዶር ጾ̈ሲ ኢንታ̇ብ ቆፒ̇ኖ ባዚን ፎቲ ዲጚባ̈ሴ።