Read basketo ኢብ 12 Bible Online

ኢብ 12 - basketo bible

ኢብ 12

¹ዪዚ ዪንፌ̈ኖ ዎይሊን ማርካን ሻ̈ራፌ̈ን ኑ ቡጊዲምባር ዎኮታ̇ቦ ኑ̈ብ ቶ̈ፊፌ̈ን ማ̈ቂ̇ኖ ባዛን ዎይ፥ ኑ ጋልዳ ኑ̈ና ባቂ̇ ኤ̈ኖ ናጋሪን ፋይሪ ኑ ቲ̈ን ዎን ዎን ሚ̈ጛር ዎጺ̇ስቶ።

²ኑ ዎጻ̇ዚንዳሬ ኑ ኣማ̇ኒምቦ ዋና̇ ቲ̈ኖዳሬ ጋስ ውርሲዳሬ ኢያ ማ̈ቂ̇ኖ ዬሱ̈ሳ ቤቃ̇ሪዬ፤ ኢ ፌ ቲ̈ኖ ኢያ ና̈ጊኖ ኡፋይሲንኮታቦ ማስቃላ ጋልዶ ዬ̈ላ̇ ዓይቂን ኣባካር ማሂ ፋይዳካይዶር ዪና̇ ሜቲንዲኬ ዓይቂን ጋርዣሪ ጾ̈ሳ̇̇̈ቦ ኡሻች ጎይ ዶኢ̈ዴ።

³ዪዚ ቦ̈ሳካ̇ይዶርኬ ታስፋ ቃጻካ̇ይዶሪ፥ ናጋራንቻ̇ንቺ ኢያ ኢጻ̇ዚምባራ ዪኖ̇ ዎይ ጋርዢኖ ዬሱ̈ሳ ቤቂ̇ብቴ።

⁴ዪንቲ ናጋራ ጋማንዳ̇ብ ኦሊንታ̇ዝ ኦሊን ጋርታ ቢርት ሱ̈ ውሊንቲ̇ዝ ዲራስ ኦሊንታካ̇ዬ።

⁵ጾ̈ሲ̇ ፌ ናእፌ̈ን ማሃሪ ዪንታ̇ ዞሪኖ ዞሪን ዪንቲ ቦቲጚኔ፤ ኢ ጌይርዶሪ “ታ ናኣዶ! ጎዳ ጎይሊን ሌቃ̇ፔ፤ ኢ ጎይሌጌይን ታስፋ ቃጻፔ፤

⁶ጎዳ̈ዲ ፌ ካዛ ዓጊ̇̈ሬ፤ ፌ ናኢፌን ማሃር ቤቂ̇ዛ̈ዳ ጎይሊሬ” ጌይኔ።

⁷ጾ̈ሲ̇ ዪንታ ፌ ናኣንፌ̈ን ፋይዲዛኮታ̇ቦ ኢ ጎይሊን ጋርዣር ኤኪ̇ብቴ፤ ባ̈ቦ ጎይሊባ̈ሶ ናኢ ዎ?

⁸ኢ ናእ ማ̈ቂ̇ኖን ዎይ ኤካ̇ዝ ጎይሊን ዪንታ̇ር ኤካካ̇ይ ኣቴ̇ጌይን ዪንቲ ሜላ ኣሳ ጋልዳፖ ዬሊንታ̇ር ዬይኖ ናኢዶኬ ኢ ናኢ ጊዳካዬ።

⁹ማ ዪኒ̇ ጋልዳ ኑ ዎይንቦ ኑ̈ና ጎይሊዝ ሳ̈ዝ ጋልዳ ኑ̈ና ዬሊኖ ባ̈ባ ዎ፤ ኑ ኢንታ ቦንቺ̈ርባያ? ዓት ዪዶኮ ኑ ሼምፓባር ዶኣንዳቦ ኑባ̈ባ ኣፎ̈ቦ ዎርዛፌ̈ን ኪ̈ቲንታንዳቦ ኮሺ̇̈ራ!

¹⁰ኢንታ̇ብ ኮሽ̇ ማይጻር ቤንቲ̇ኖንዲፌ̈ኒ ሙቃ̇ ጊዛብ ኑ̈ና ጎይሊኔ፤ ዎቲናካሬ ኢ ጌሽ̇ ማ̈ቂ̇ኖንዲፌ̈ኒ ኑ̈ናር ጌ̈ሽ̇ ማ̈ቃ̇ምፔ̈ን ኑ̈ቦ ጌዪ ኑ̈ና ጎይሊ̈ሬ።

¹¹ጎይሊ ዎይ ፌ ኬሊ̇ምባራ ሺን̇ ዎቲ̈ርዶኬ ኡፋይሲዛ ማይጺባ̈ሴ፤ ዎቲናካሬ ዎሃ ማ̈ቃ̇ሪ ኢዝባር ሎሲኖ ኣሳንቦ ኣ̈ፍ ካጻ̇̈ሬ ዪና̇ሬ ጺሊ̇ቲኬ ሳሪቲኬ።

¹²ዪ̈ኮታ̇ቦ ሊ̈ቂኖ ዪንታ̇ ኩሺንዲኬ ዳቡሪኖ ዪንታ̇ ዎልቂ̇ን ሚ̈ንብቴ።

¹³ዎቢ̇ኖ ቶሂ ፋጻምፔ̈ንዶኬ ውርሲ ኢ̈ታር ኣታካ̇ዮ̈ዲፌ̈ኒ ዪንቲ̇ ዬዝ ጎይን ኮሺንቺ̇ብቴ።

¹⁴ጌ̈ሺቲ ባይ ማ̈ቄጌይን ኦ̈ናካር ጎዳ ቤቃ̇ንዳብ ዳንዳኢባሶኮታ̇ቦ ኣስ ዎይባር ሳሪቲባር ዶኢብቴ፤ ጌ̈ሺቲባር ዶኣንዳቦ ሚ̈ጚብቴ።

¹⁵ዪንታ̇ ጋርታፖ ኦናካር ጾ̈ሳ̇̈ ኮሺቲ ኢ ጋልዳፖ ጉ̈ጻካ̇ዮ̈ዲፌ̈ን ና̈ጊንቲ̇ብቴ፤ ማ ዪንታ̇ ጋርታ̇ፖ ኦ̈ናካር ጫ̈ጚዝ ኣ̈ፍ ካጺ̇ዝ ሚፌ̈ን ማ̈ቃ̇ሪ ዪንታ̇ ዋ̈ዪካዮ̈ዲፌ̈ንኬ ማ ዪንታ̇ ጋርታ̇ፖ ዎይሊንን ቄካዮዲፌ̈ን ና̈ጊንቲ̇ብቴ።

¹⁶ዪንታ̇ ጋርታ̇ ኦ̈ናካር ዓት ዪንዳ ኢና ሙይን ውራዝ ፊ̈ሺምቦ ጋ̈ሪ ፌ ባይሪቲን ዎ̈ጚኖ ጾ̈ሳ̇̇ ቦንቺ̇ባ̈ሶ ኤ̈ሳፌ̈ን ቦ̈̈ዛ ማ̈ቂኖ ኣሲ ዶኣካይፌ̈ኒ ና̈ጊንቲ̇ብቴ።

¹⁷ዎሃ ማ̈ቃ̈ሪ ኤ̈ሶ ኣንጃ ኤካ̇ንዳ ኮዪን ካዪንቲ̇ኖን ዪንቲ ኤሪ̈ሬ፤ ዬኪ̇ሙታዶሪ ኮዪናር ዲጛንዳብ ዳንዳኣካዬ፤ ማ̈ሪቲ̇ር ጌላንዳብ ኢ̈ብ ማ̈ቃካ̇ይዬ።

¹⁸ዪንቲ ኢስሬ̈ላ ናኣንፌ̈ኒ ኣሲ ኩሽባር ኤንዳብ ዳንዳኢዛ ታማ ኢ ጋል ኣፋ ኤይቲ̇ዝ ሲ̈ና ኢንዲን ጋልዳ ዬላ̇ካ̇ዬ፤ ሚ̇ንኮ፣ ቃ̈ይቃዪንኮ፣ ውርጊንኮ ዬላ̇ካ̇ዬ።

¹⁹ሞ̈ይዛ ጊርሲ ሲስኪ̇ንታ̇ዚንኮ ዎይ ጾ̈ሳ̇ ቆ̈ን ሲስኪንቲ̇ዝ ቤሲ̇ን ዪንቲ ዬላ̇ካዬ ዪና ኢ ቆ̈ን ሲስኪ̇ኖ ኣሳን “ዓኒ̇ፖ ጌዳ ጉጃር ሜላ ሶ̈ላፖ” ጋ̈ሪ ጌሺኔ።

²⁰“ሜሆ ኢንዲን ዎሼጌይን ሹችባር ቆጺንቲ ዓይቆ” ጋ̈ዝ ኪ̈ቲን ኢንታ̇ብ ጴች ዴ̈ጺ̇ኔ።

²¹ኢና ቤንቲ̇ኖ ባዚንዳ ዎይሊን ኢ̈ቺ̇ዛኮታቦ ሜላ ኣቲን ሙ̈ሶ፤ “ቴ ኢጫዴ፤ ታ̈ና ጋንዲሳዴ” ጌይኔ።

²²ዪንቲ ዎቲናካሬ ጺዮ̈ና ኢንዲንኮ ኡኪ̇ኔ፤ ኢዛሬ ሜናብ ዶኢዛ ጾ̈ሳ̇̈ ካታ̈ማ፥ ኣፎ ዬሩሳ̈ላሞ፤ ኡፋይስባር ሺቂኖንኮ፥ ዎይሊን ሙኩላ ማ̈ቂ̇ዝ ኪ̈ታንቻንኮ ዪንቲ ኡኪ̇ኔ።

²³ኢንታ ሱ̈ምን ኣፋ ጻ̈ፊንቲኖን ዎል ፔቲ̇ ቤስ̇ ሺ̈ቂኖ ኡስ̇ ናኣን ሺ̈ቂንኮ፥ ማ ዎይ ፊርዲዛ ጾ̈ሳ̇̈ኬኬ ኢንታ ጋልዳ ማዛ ባዮ̇ ኣፋ ዎ ጌ̈ሽ ኣሳንኮ ኡኪ̇ኔ።

²⁴ኦራ ጫ̈ቂምቦ ጊዳ̇ ጋርታ ኢጊንዝ ኣስ ማ̈ቂ̇ኖ ዬ̈ሱ̈ሳኮ ማ ኣ̈ቤ̈ላ ሱ̈ምፖ ሺ ኮሽ̇ ታስፋ ኢማ̇ዚንኮ ዉሊንቲ̇ኖ ኢ ሱ̈ንኮ ዪንቲ ኡኪ̇ኔ።

²⁵ዪንታ̇ብ ሶ̈ሊዝ ጾ̈ሳ̇ ዪንቲ̇ ሲስኪባዳ̈ ጋካዮዲፌ̈ኒ ና̈ጊንቲ̇ብቴ፤ ዪን ጾ̈ሳ̇̈ዲ ኣሳ ጎይባራ ሳ̈ዳ̇ፖ ሶ̈ላምባ̇ራ ሲስካ̇ብዳ ጌይኖን ቡ̈ታካ̇ይ ኣቴ̇ጌይን፥ ኑ̈ኒ ኣፋፖ ኑ̈ብ ሶ̈ሊንታ̇ዚን ሲስካካ̇ይ ኣቴ̇ጌይንዶ ኑ ዎዛ̈ርታር ቡ̈ቲ̇ራ!

²⁶ዚቃንታ ዪና̇ ኢዝባራ ኢ ቃ̈ላ̈ዲ ሳዚን ኤንኢሲኔ፤ ዓት ዎቲናካሬ “ሳ̈ዚን ሙታ̇ ጊዳካ̇ይዶን ፔቲ ቶህ ኣፋ ሳ̈ዚንዳር ጉጃ̇ር ቴ ኤንኢሳንዳ” ጋ̈ሪ ቃ̈ላ ጌሊኔ።

²⁷ዪና̇ “ፔቲ̇ ቶህ ጉጃ̇ራ” ጋ̈ዝ ቃ̈ሊን ኤንኢባሶ ባዛን ሚ̈ጛር ዶኣዚንዶ ኤንኢዛን ዎይ ኮቺንቲ̇ኖ ባዛን ፋካ̇ር ያዚንዶ ቤይሲ̈ሬ።

²⁸ዪዚ ኑ̈ኒ ኤንኢባሶ ካ̈ቲቲን ኤኪዛኮታቦ ጾ̈ሳ̇̈ ጋላቲስቶ፤ ኢያ ኡፋይሲዝ ጎይባራ ኢያ ቦንቺሙታ ኢ̈ችባር ኢ̈ብ ኦ̈ስቶ።

²⁹ኣባ ጌይን ኑ ጾ̈ሳ̇̈ዲ ሚቺ̇ዝ ታማፌ̈ኔ።