Read basketo ኢብ 7 Bible Online

ኢብ 7 - basketo bible

ኢብ 7

¹ማልካጻ̈ዲቂ ሳ̈ሌማ ካታሚንቦ ካ̈ቲኬ ዎይፖ ሾክ̇ ጌይኖ ጾ̈ሳ̇̈ቦ ቄ̈ሳ፤ ዪ ማልካጻ̈ዲቂ ኣብራሃ̈ሚ ካ̈ቲንታን ኦሊ ጋማሪ ማ̈ቃዚምባራ ጎይም ጋልዳ ዬላ̇ሪ ኢያ ኣንጂዴ።

²ኣብራሃ̈ማሬ ፌ ዲጚኖ ዎይ ባዝ ጋልዳ ታጳ ኩሽ ጋልዳፖ ፔቲ̇ ኩሽ ኬሳ̇ሪ ኢ̈ብ ኢሚ̇ዴ፤ ማልካጻ̈ዲቃ ጋ̈ዚን ኢ ሱምን ቢርሺቺን ፔታ̇ኒንዳ “ጺሊቲ ካ̈ቴ” ጌንቴ፤ ሜሊንዳ “ሳ̈ሌማ ካ̈ቴ” ዎይ “ሳሪቲ ካ̈ቴ” ጌንቴ።

³ማልካጻ̈ዲቂ ኢ̈ብ ኤሪንቲ̇ኖ ባ̈ባ ዎይ ኢንዶ ዎይ ዜር ባዬ፤ ኢ ዬሊንቲ̇ኖንዳሬ ዓይቂ̇ኖንዳሬ ኣ̈ንታ̇ኮ ኤሪንቲ̇ዝ ባዚ ባዬ፤ ዪ ማልካጻ̈ዲቂ ጾ̈ሳ̇ ናኣ ዬሱ̈ሳ ሚሳ̇̈ሊ ማ̈ቃ̇ሪ ሜናቦ ቄ̈ሳ̈ ማ̈ቃ̇ር ዶኢ̈ሬ።

⁴ዪ ና̈ሳ̈ዲ ዎዛርፌ̈ን ጴችኮ ቤቂ̇ብቴ፤ ሜላ ኣቲ̇ን ኢስሬ̈ላ ዜርን ዎይንቦ ባ̈ባ ማ̈ቂ̇ኖ ኣብራሃ̈ሚ ካ̈ታ̇ር ዲጚኖባዝ ጋልዳፖ ታጳ ኩሽ ጋርታ̇ፖ ፔቲ̇ ኩሽ ኬሳ̇ሪ ኢሚ̇ኔ።

⁵ዪን ቄ̈ሳ̈ ኦ̈ሳ ኦዝ ሌዊ ዜርን ዎርዣ ጋልዳፖ ዎይ ፌ ኢሺንታ̇ን ኣብራማ ዜርን ጋልዳፖ ታጳ ኩሽ ጋልዳፖ ፔቲ̇ ኩሽ ኤካ̇ምፔን ሂጊ̇ን ኢንታ̇ብ ኪ̈ቲ̇ኔ።

⁶ዪ ማልካጻ̈ዲቂ ሌዊ ዜር ጊዳካ̇ይካሬ ኣብራሃ̈ማ ጋልዳፖ ታጳ ኩሽ ጋልዳፖ ፔቲ̇ ኩሽ ኤኪ̇ኔ፤ ማ ጾ̈ሲ ታስፋ ቃ̈ላ ኢ̈ብ ኢሚ̇ኖ ኣብራሃማ ኣንጂዴ።

⁷ኣንጂዛ̈ዲ ኣንጂን ኤኪ̇ዛ̈ፖ ሺዛ ኤሪንቲ̇ኖ ባዜ።

⁸ፔቲ̇ ጎይባራ ቤቃ̇ምባራ፥ ታጳ ኩሽ ጋልዳፖ ፔቲ̇ ኩሽ ኤኪ̇ዛን ዓይቂዝ ኣሳን፤ ማ ሜላ ጎይባራ ቤቃ̇ምባራ፥ ታጳ ኩሽ ጋልዳፖ ፔቲ̇ ኩሽ ኤኪ̇ዛ̈ዲ ሼምፓባር ማ̈ቃ̇ር ዶኢዛ ማልካጻ̈ዲቃ።

⁹ዪና̇ ኢዝፌ̈ኒ ኣስራ̈ታ ኤኪ̇ዛ ሌ̈ዊ ፌ ቆሚ̇ን ኣብራሃ̈ማ ጎይባራ ታጳ ኩሽ ጋልዳፖ ፔቲ̇ ኩሽ ጪጊ̇ኔ ጋ̈ንዳብ ዳንዳኢ̈ሬ።

¹⁰ኣባ ጌይን ማልካጻ̈ዲቂ ኣብራሃ̈ማ ዬላ̇ምባራ ሌ̈ዊ ቢርት ዬሊንታካ̇ዬ፥ ፌ ባ̈ባ ኣብራሃ̈ማ ቡቅ ጋርታ ዎ።

¹¹ዪዚ ዎርዣ̈ቦ ሂጋ̇ ኢሚንቲ̇ኖ̈ዲ ሌ̈ዊ ቄ̈ሲቲን ጎይባራ፤ ዪን ሌ̈ዋን ቄ̈ሲቲንዳ ፎቲ ማ̈ቃ̇ር ቤንቲ̇ኖኮ ዎን ኣ̈ሮና ቄ̈ሲቲን ኣታ̇ራ ማልካጻ̈ዲቃ ቄ̈ሲቲንዲፌ̈ኒ ቄ̈ሲቲ ኢ̈ብ ዎ ሜላ ቄ̈ሳ ዬ̈ንዳብ ኮሺባ̈ስዶን።

¹²ቄ̈ሲቲ ኦ̈ሲን ላሚንቴ̇ጌዪን ሂጊ̇ንዳር ላ̈ሚንታ̇ንዳብ ኮሻ̇̈ሬ።

¹³ዪ ዎይ ኢባዝ ሶ̈ሊንቲ̇ኖ̈ ቄ̈ሳ̈ዲ ሜ̈ላ ዜር፤ ዪን ዜርን ጋርታፖ ኦ̈ናካር ዣ̈ርሻ ቤሲ̇ንኮ ኡካ̇ሪ ኦ̈ኖ ኣሲ ባዬ̇።

¹⁴ኑ ጎዳ ዬሱ̈ሲ ዪሁዳ ዜር ጋርታፖ ዬሊንቲ̇ኖን ኤሪንቲ̇ኖ ባዜ፤ ማ̈ቂ̇ናካሬ ሙ̈ሶ ቄ̈ሲቲ ኦ̈ሳባዝ ሶ̈ሊ̈ርዶሪ ዪሁዳ ዜር ባዝ ሶ̈ሊኖ ባዚ ኣባካር ባዬ̇።

¹⁵ኑ ሶ̈ሊኖ ባዚን ዓና̇ ዓት ሺ ኮሺንቻ ኤሪንታ̈ሬ፤ ኣባ ጌይን ማልካጻ̈ዲቂፌኖ ሜላ ቄ̈ሳ ቤንቲ̇ኔ።

¹⁶ኢ ቄ̈ሳ ማ̈ቂ̇ኖንዳ ዓይቃ̇ር ዪባ̈ሶ ሼምፓ ዎልቃ̇ባርዶኬ ኢ ዜር ጋርታፖ ኢያ ዬሊ̇ኖ ዎጋባር ጊዳካ̇ዬ።

¹⁷ጌ̈ሻ̈ ማ̈ጻፋ ጋልዳ፥ “ማልካጻ̈ዲቃ ቄ̈ሲቲንዲፌ̈ኒ፤ ኔ̈ኒ ሜናብ ቄ̈ሳ ማ̈ቃ̇̈ሬ” ጋ̈ር ኢባዝ ማርኪቲኔ።

¹⁸ሚኖ ኪ̈ታን ማ̈ዲባ̈ሶ ባዝ ማ̈ቂ̇ኖኮታቦ ኣቲ̇ኔ።

¹⁹ሙ̈ሳ ሂጊ̇ንዳ ኦ̈ናካር ፎቲ ማሃንዳብ ዳንዳኣካ̇ዬ፤ ዓት ኑ̈ኒ ጾ̈ሳ̇ኮ ኡኪ̇ዝ ሺ ኮሽ ታስፋ ኑ̈ብ ኢሚ̇ንቲኔ።

²⁰ዪና̇ ቄ̈ሲቲንዳ ጾ̈ሲ ጫ̈ቃካ̇ይዶን ማ̈ቂ̇ኖባዝ ጊዳካ̇ዬ፤ ዓኒ̇ፖ ቲ̈ን ቄ̈ሳ ማ̈ቂ̇ኖን ጫ̈ቃቤይ ቄ̈ሳ ማ̈ቂ̇ኔ።

²¹ዬሱ̈ሲ ቄ̈ሳ ማ̈ቂ̇ኖ̈ዲ፥ “ጎዳ̈ዲ ኢ̈ኮ ‘ኔ̈ኒ ሜናብ ቄ̈ሳ’ ጋ̈ር ጫ̈ቂኔ፤ ፌ ጌይኖን ላሚ̇ባ̈ሴ” ጋ̈ሪ ጫ̈ቂ̇ኖንዲፌ̈ኒዬ።

²²ዪና̇ ጫ̈ቂን ጊሻ̇ቦ ዬሱ̈ሲ ዎይፖ ኣ̈ዝ ጫ̈ቂምቦ ዋ̈ሳ ማ̈ቂ̇ኔ።

²³ቄ̈ሶ ፌ ኦ̈ሲን ጋልዳ ሜናብ ዶኣካ̇ይፌ̈ኒ ዓይቃ ኢያ ካያዚንኮታ̇ቦ ሚን ቄ̈ሳ ማ̈ቂ̇ኖን ዎይሊን።

²⁴ዎቲናካር ዬሱ̈ሲ ሜናብ ዶኢዛ ማ̈ቂ̇ኖኮታ̇ቦ ኢ ቄ̈ሲቲንዳ ላ̈ሚንታ̇ባሴ።

²⁵ዪ̈ኮታቦ ኢ ኢንታ ጊሽ ̇ጪጛሽ ማ̈ቃ̇ር ጌሻንዳቦ ሜናብ ሼምፓባር ማ̈ቃ̇ር ዶኢዛኮታቦ ኢ ጎይባራ ጾ̈ሳ̇ኮ ዬይዛን ዎይ ዉርሲ ፋንዳብ ዳንዳኢ̈ሬ።

²⁶ዪ̈ፌን ጌ̈ሽ፣ ኢ ጋልዳ ማ̈ዛ̈ ባዮ፣ ዪርጭ ጋ̈ር ጌ̈ዥጊኖ̈ዳ ናጋራንቻን ጋልዳፖ ጎቲ̇ኖዳ፣ ኣፋፖ ፉዳ ሾክ̇ ጌይኖ ቄ̈ሳ ኣላቃ ኑ̈ብ ኮሺ̇̈ሬ።

²⁷ኢ ሜላ ቄ̈ሳ ኣላቃንፌ̈ኒ ቲ̈ኒታር ፌ ናጋሪንቦ፥ ዎሃ ዎርዣ ናጋራ̈ቦ ዎይ ጋላስ ዣርሻ ሺ̈ሻ̇ንዳብ ኮሺ̇ባ̈ሴ፤ ኢ ፌ̈ና ዣርሻ ማሃር ኣ ኢሚ̇ኖ ኬል̇ባራ ኢንታ ናጋሪምቦ ማ̈ቂ̇ዝ ባዝ ፔቲ̇ ቶህ ዎይ ባዝ ውርሲኔ።

²⁸ሂጎ̇፥ ዳ̈ቡራንዳብ ዳንዳኢዝ ኣሳን ቄ̈ሳ ኣላቃ ማሃር ጋዲ̇̈ሬ፤ ዎቲናካሬ ሂጋ̇ፖ ዎሃ ዬይኖ ጫ̈ቃ ቃ̈ሊንዳ ሜናብ ፎቲ ማ̈ቂኖ ጾ̈ሳ̇ ናኣ ዬሱ̈ሳ ቄ̈ሳ ኣላቃ ማሂኔ።