Read basketo ዓይ 1 Bible Online

ዓይ 1 - basketo bible

ዓይ 1

¹ሳ̈ዝ ኤ̈ሻ̇ ዎይ ጋልዳ ዳርጊንታ̇ር ዎ̈ ጎዳ ዬሱ̈ሳ ክርስቶ̈ሳ ኣማ̇ኒ̇ኖ ታጶ ናምኢ ኣይሁድ ኮ̈ራን! ጾ̈ሳ̇̇̈ብኬ ጎዳ ዬሱ̈ስ ክርስቶ̈ሳብ ኣይላ ታ ዓይቆ̈ቢ ዪንታ̇ ሳሮ̈ ጋሬ̈።

²ቴ ኢሺንታ̇ን! ዪንታ̇ ኣማ̇ኒ̇ን ፋ̈ጪ̇ ቤቃ̇ንዳ ጋ̈ሪ̈ ዱማ ዱማ ሜታኬ̈ ኢ̈ት ባዝ ዪንታ̇ ጋልዳ ዬ̈ምባራ̈ ኢዞ ኡፋይስባር ኤኪ̇ብቴ̈።

³ኣባ ጌዬ̈ጌይንዶ ባዛን ዪን ዪንታ̇ ኣማ̇ኒ̇ን ፋ̈ጪ̇ ቤቃ̇ዚንዳ ዳንዳኣ ዪንታ̇ብ ዶኣምፔ̈ን ዎታዚን ዪንቲ̇ ኤሪ̈ሬ።

⁴ዪንታ̇ብ ኣባካር ዲሪጛካ̇ይዶ̈ር ኩምኬ̈ ዲጪ̇ኖ ኣስ ማ̈ቃምፔ̈ኒ ዎይ ጋላስ ዳንዳኣባር ሚ̈ጛር ፎቲብቴ።

⁵ዪንታ̇ ጋርታፖ ኤሪ ጉ̈ጺ̇ኖ ኣሲ ዎኮ ኢ ኦ̈ናካር ሌቃካ̇ይ ኣባካር ሱ̈ቂታካ̇ይ ዎይ̈ብ ኢሚ̇ዛ ጾ̈ሳ̇̇ ጌሼጌይን ኢ̈ብ ኢሚ̇ሬ።

⁶ና̈ሳ ዪ ጌሺ̈ርዶ̈ሪ “ጾ̈ሲ̇ ታ̈ብ ኢማ̇ንዳዶኔ?” ጋ̈ካ̇ይዶር ኣማ̇ናባር ኢያ ጌሾ ጋ̈ቤ̈። ኣባ ጌዬጌይንዶ ሲዝ ኣሲ ኣይጊባር ጌዳክ ዓኒክ ኤንኢዝ ባሃ̈ራ ጋልዶ ውርጊፌ̈ኒዬ።

⁷ኢ ናምኢ ቆፊባር ጌዳክ ዓኒክ ጌይዝ ኣስ ማ̈ቂ̇ኖ̈ኮታ̇ቦ̈ ጎዳ ጋልዳፖ̇ ኣባክ ፔቲ̇ ባዛር ዲጚዛ ኢ̈ብ ማይጻፖ።

⁹ኣሳ ቲ̈ን ጉ̈ጻ̇ር ቤንቲ̇ዝ ጾ̈ሳ̇̇ ኣማ̇ኒዝ ኣሲ̈፥ ጾ̈ሲ̇ ቲ̈ን ሾክ̇ ጌይኖ ማ̈ቂኖኮታ̇ቦ̈ ኢ ዪኒ̇ባር ኡፋይቶ̇።

¹⁰ዱር ኣሲ ጾ̈ሲ̇ ኢያ ዳሂጌ̈ይናሬ ኡፋዪቶ̇ጋቤ፤ ኣባ ጌዬጌንዶ̈ ኢ ቡንፌ̈ን ጋ̈ሪንቲ̈ ዪዛኮታ̇ቦ።

¹¹ኣዋ ጴች̇ ኣውቴ̇ጌይንዶ ማ̈ቲን ሹሊ̇ቻ̇̈ሬ፤ ቡኒንዳር ጋ̈ሪንታ̈ሬ፤ ኢዝ ቆይሲንንዳሬ̈ ኢ̈ታ̈ሬ፤ ዪና̇ ኢዝፌ̈ኒ ዱር ኣሳሬ ጌዳክ ዓኒክ ዎጺታምባ̇ር ሙታ̇ ዪ ኣቲ̇ሬ።

¹²ሜታ ጋርታ ሚ̈ጜጌይንዶ ጾ̈ሳ̇̇ ፌ̈ና ዶሲዝ ኣሳንቦ ኢማ̇ንዳ ጌይኖ ሼምፓ ኣኪሊ̈ላ ሺሊ̇ማ̈ቲን ዲጚ̈ዛኮታ̇ቦ ሜታ ኢያ ዬላ̇ዚምባር ዳንዳኣር ኣ̈ዝ ኣሲ ኣንጂንቲኖ̈ዳ።

¹³ጾ̈ሳ̇̇ ፋታ̇ናር ናጋራ ኦ̈ምፔ̈ን ዎቲዝ ኣሲ ባዮኮታ̇ቦ ማ ኢያ̈ር ማ̈ቂን ኣሲ ናጋራ ኦ̈ምፔ̈ን ዎቲባ̈ሶኮታ̇ቦ ኦ̈ናካር ማ̈ቂ̇ን ፋታ̇ኒንታ̇ሪ ጾ̈ሲ̇ ታ̈ና ፋታ̇ኒኔ ጋ̈ፖጋ̈ቤ፤

¹⁴ዎቲናካር ኣሲ ዎይ ፋታ̇ኒንቲ̇ዛ̈ዲ ፌ ኢ̈ታ̇ ኢኒ̇ንባራ።

¹⁵ኢኖ̇ ዎዳጻ̇ራ ናጋራ ዬላ̈ሬ̈፤ ናጋራ ዲጪ̇ኖፖ̇ ዓኒ ዓይቃ ዬላ̈ሬ̈።

¹⁶ካንቲ̇ኖ̈ ቴ ኢሺንታ̇ን! ባሊታ̇ፒቴ!

¹⁷ኮሽ̇ ኢሚቲኬ̈ ኩም ኣንጃክ ዎይ ሎክ̇ ኣፋፖ ፎኢን ዎይ ኮቺ̇ኖ̈፥ ሺፋፌ̈ኒ ጌዳክ ዓኒክ ቢሪንቲባ̈ሶ ጾ̈ሳ̇̇̈ ጋልዳፖ̇ ዬይሬ።

¹⁸ኑ̈ኒ ጾ̈ሲ̇ ኮቺ̇ኖ ኮ̈ቺ̇ንት ዎይፖ̇ ኡስ̇ ማ̈ቃ̇ምፔ̇̈ኒ ኢ ፌ̈ብ ዶሳሪ ኪን ቃ̈ላባር ኑ̈ና ዬሊዴ።

¹⁹ካንቲ̇ኖ̈ ቴ ኢሺንታ̇ን! ዪንቲ̇ ሲስካ̇ንዳብ ባርቢቲ̇ብቴዶኬ ጎይላብኬ ሶ̈ላቦ ባርቢታ̇ንዳ̇ብ ኮሺባ̈ሶን ዪኖ̇ ቆፒ̇ብቴ።

²⁰ኣባ ጌይን ጎይሊ ጾ̈ሲ̇ ኮያዝ ኮሽ̇ ባዚን ኦ̈ሲባ̈ሴ።

²¹ዪ̈ኮታ̇ቦ̈ ቄዝ ባዝኬ ዪንታ ጋርታ̇ ዎይላር ቤንቲ̇ዝ ኢ̈ቲቲ ቆፋ ፋይሪ ዪንታ ሼምፒ̇ን ፋንዳብ ዳንዳኣዚን ዪንታ̇ ጋርታ ቶኪንቲ̇ኖን ጾ̈ሳ̇̇ ቃ̈ሊን ኮሽ̇ ቡ̈ዳባር ኤኪ̇ብቴ̇።

²²ቃ̈ሊን ጋ̈ዚን ኦ̈ ፎቲዝ ኣስ ማ̈ቂ̇ብትዶኬ ሲስ̇ ሲስኪዝ ኣስ ሙታ̇ ማ̈ቃ̇ሪ̈ ዪንቲ̇ ዪንታ̇ ዳሺቻ̇ፒ̇ቴ̈።

²³ቃ̈ላ ሲስካ̇ሪ̈ ኦ̈ሳ ጋልዳ ፌ̈ሺ̇ባ̈ሶ ኣሲ ማስቶታ ጋርታ̇ ፌ̈ና ቤቃ̇ሪ ማ ጌዳ ኣ̈̇ር ፌ̈ና ቦቲጚዝ ኣስፌ̈ኔ።

²⁵ናጻ ኬሲ̇ዝ ኪን ሂጋ̇ ኮሺንቺ̇ ሲስካ̇ሪ ኢዝባር ሚ̈ጛር ኤቂ̇̈፥ ፌ ሲስኪ̇ኖን ቦቲጛካ̇ይ ኦ̈ሳ ጋልዳ ፌ̈ሺ̇ዝ ኣሲ ኢ ኦ̈ሲን ዎይ ኢ̈ብ ኣንጂንቲ̇ኖ ማ̈ቃ̇̈ሬ።

²⁶ፌ ኖ̈ኒን ና̈ጋካ̇ይዶር ፌ ቡ̈ዳባር ባሊቲ̇ሙታ̇ ፌ̈ና ኣማ̇ና ጌይዝ ና̈ሳዲ፥ ኢ ፌ̈ና ዳሺቺ̈ሬ፤ ኢ ኣማ̇ና̈ዳር ሜላ̇ ዓሪዬ̈።

²⁷ጾ̈ሳ̇̇ ባ̈ባ ቲ̈ን ጌ̈ሽ̇ኬ ኣባክ ኢ̈ት ባዚ ኢ ጋልዳ ባዮ̇ ኣማ̇ና ጌይዛ̈ዲ፥ ባ̈ቢክ ኢንዲክ ዓይቂ̇ኖ̈ ናኣንኬ̈ ኣስኒ ዓይቂ̇ኖ̈ ማጫ̇ን ሜቲንቲ̇ኖ ኬል̇ባር ማ̈ዲ̇፥ ዓኒ̇ ኣላሚን ጋልዶ̇ ቄ ባዝ ጋልዳ̇ፖ̇ ፌ̈ና ና̈ጊ ዎቲዛ̈ዳ።