Read basketo ዓይ 3 Bible Online

ዓይ 3 - basketo bible

ዓይ 3

¹ቴ ኢሺንታ̇ን! ዪንታ̇ ጋርታ̇ፖ ዎይሊንን ኣስ ታማ̈ርሲዝ ኣስ ማ̈ቃፖ̇ ጋ̈ቤ̈። ኣባ ጌይን ኑ ኣስ ታማ̈ርሲዛን ዎይ̈ፖ̇ ሺኖ̈ ፊርዳ̇ ኤካ̇ዚን ዪንቲ̇ ኤሪ̈ሬ̈።

²ኑ ዎይን ዎይሊን ባዝባር ባሊቲ̇̈ሬ። ፌ ሶ̈ሊንባር ባሊቲባ̈ሶ ኣሲ ዎኮ ኢ ፌ̈ና ና̈ጋንዳብ ዳንዳኢዝ ፎቲ ኣሴ።

³ፋራ ኑ ኮዪኖ ጎይ ሉካ̇ምፔ̈ን ዎታንዳቦ ኢ ኖ̈ና ጋርታ ሉጋ̈ማ ባ̈ርሳሪ ኤ̈ጛንዳብ ዳንዳኢ̈ሬ።

⁴ባሃ̈ራ ጋልዶ ጎጚ ኣባካር ጴች̇ ማ̈ቂናካሬ፥ ጴች ኣይጊ ኢያ ሱጊ ኤኪ̇ ሉኪ̇̈ርካራሬ፥ ኢዞ ዋ̇ዝ ና̈ሳ̈ዲ ዋ̈ ፋጊዝ ጊላ̇ ሚባራ ኢዞ ቲ̈ኒ ፌ ኮዪኖ ጎይ ኤኪ̇ ሉኪ̇̈ሬ።

⁵ዪና̇ ኢዝፌ̈ኒ ኣሳ ኢርጺን ጊላ̇ዶ̈ራ ጴች ኦቲርቃ ሶ̈ላ̈ሬ። ጊላ̇ ታሞ ጴች ባስ ዎዛ̈ርፌ̈ን ሚቻ̇ ይሳ̈ርኮ ቆፒ̇ብቴ።

⁶ኢርጺንር ታማፌ̈ኔ። ኢዛ ኢ̈ት ባዝባር ኩማር ኣሳ ጋልዳ ዎ̈ ባዜ። ኣስ ቄ̈ሬ፣ ማ ና̈ሳ ዬሊንቲኖምፖ̇ ኤ̈̇ር ኦ̈ኖ ኦ̈ሲን ኢ̈ሳ̇̈ሬ። ፌ ቆማ̇ባር ጋ̈ና̇ማ ጋርታ ጌላር ሚጫ̇ ያ̈ሬ።

⁷ማ̈ታባዝ ጌይዛ ዎይ፥ ኣፋ ፋሪዝ ካፋር ማ̈ቆ̇ ሳ̈ዝ ጋልዳ ዬ̇ዝ ባዝኬ ዋ̈ ጋርታ̇ ዶኢዝ ኮቺ̇ንት ዎይ ኣሲ ኢንታ̇ ሴ̈ሪ ማሂንዶ̈ኒ፥

⁸ኢርጺን ሴ̈ሪ ማሂዝ ኣሲ ኦ̈ናካር ባዬ̇። ኢዛ ኣስ ዎ̇ዝ ጋ̈ላ̇ ኢዝ ጋርታ ኩሚኖ ሼም̇ፓ̇ር ዶኣባሶ ኢ̈ታ ባዜ።

⁹ኑ ኑ ኢርጺንንባራ ጎዳ̈ዲኬ ጾ̈ሳ̇̇ ባ̈ባ ጋላቲ̈ሬ፤ ማ ኢዝባር ማሃሪ̈ ጾ̈ሳ̇̇ ፌ̈ና ማይጺሳር ኮቺ̇ኖ ኣሳን ባ̈ዲ̇̈ሬ።

¹⁰ፔቲ̇ ኖ̈ና ጋርታ̇ፖ ኣንጃኬ ባ̈ዲኬ ኬስኪ̈̇ሬ። ቴ ኢሺንታ̇ን! ዪኒ̇ፌ̈ን ዎታንዳ̇ብ ኮሺ̇ባ̈ሴ̈።

¹¹ፔቲ̇ ዋ̈ ኣ̈ፍ ጋርታ̇ፖ̇ ኮሽ̇ ዋ̈ኬ̈ ኢ̈ት ዋ̈ ኬስኪ̇̈ራ?

¹²ቴ ኢሺንታ̇ን! ዎሎ ኦች ኣ̈ፍ ዎይ ኦቺ̇ ሉ̈ቃ ካጻ̇ንዳብ ዳንዳኢ̈ራ̈? ዪና̇ ኢዝፌ̈ኒ ኡሽኪንቲባ̈ሶ ኢ̈ት ዋ̈ ጋርታፖ̇ ኡሽኪንቲዝ ኮሽ̇ ዋ̈ ኬስኪባ̈ሴ̈።

¹³ዪንታ̇ ጋርታ̇ፖ ኤራ ማ̈ቂ̇ኖ̈ ኣሲ ኦ̈ኖ? ዎኮ ና̈ሳ ዪ̈ዲ ፌ̈ና ዪርክ ዎታርኬ ኤራባር ኦ̈ኖ ኦ̈ሲንዶ ፌ ኮሽ̇ ዶኢንባር ቤይሳ ጋ̈ቤ።

¹⁴ዪንታ ጋርታ̇ ኢ̈ት ቂና̈ታኬ ዎይ ባዝ ታ̈ብ ማ̈ቆ̇̈ ጌይዝ ባዝ ዎኮ̈፥ ዪኒ̇ፌ̈ኖ ቆፊን ኤ̈̇ር ኦቲርቃፒ̇ቴ፤ ኪንን ኪን ባዬ̇̈ ጋ̈ፒ̇ቴ።

¹⁵ዪኒ̇ፌ̈ኖ ኤሪንዳ ኣፋ ጾ̈ሳ̇̇ ጋልዳ̇ፖ ጊዳካ̇ዬ። ኢዛ ዓኒ̇ ኣላሚን ጋልዳ̇ፖ ኣሳ ጋልዳፖኬ ኢ̈ታ ኣያ̇ና ጋልዳፖ̇ ዬ̈ሬ።

¹⁶ቂና̈ታኬ ዎይ ባዚ ታ̈ብ ማ̈ቆ̇ ጌይዝ ባዚ ዎ ቤስ̇ ጋልዳ̇ ኢና ዋች̇ኬ ኢ̈ታ ኦ̈ሶ ዪባ̈ሴ።

¹⁷ኣፋ ጾ̈ሳ̇̇̈ፖ ማ̈ቂ̇ኖ ኤሪን ኢዛ ቲ̈ኒታር ጌ̈ሼ̇፤ ኢናፖ̇ ሳሪቲ ኮያዚንዶ፣ ዳንዳኣዚንዶ̇፣ ኪ̈ቲንታዚንዶ፣ ማ̈ሪቲኬ ኮሽ̇ ኦ̈ሳባር ኩሚኖንዶ፣ ፋጊቲኬ ማይጺስ ባዮ̇ንዶ።

¹⁸ኣሳ ጊዳ̇ ሳሪቲባር ዬ̇ዝ ኣሲ ጾ̈ሳ̇̇ ቲ̈ን ፌ̈ቦ ኮሽ̇ ማ̈ቂ̇ኖ ኦ̈ስ ሺ̈ሺ̈ሬ።