Read basketo ዓይ 4 Bible Online

ዓይ 4 - basketo bible

ዓይ 4

¹ዪንታ̇ ጊዳ̇ ዎ̈ ጎይሊንዲኬ̈ ዋቺ̇ን ዎይዲፖ ዬይና? ዪንቲ̇ ኢ̈ት ኦ̈ምፔ̈ን ዪንታ ጋርታ̇ ኦላዝ ኢ̈ት ኢኒ̇ምፖ ባያ?

²ዪንቲ̇ ኮዪኖ ባዚን ዲጛንዳ̇ብ ዪንታ̇ ጋሚ ኣስ ዎ̈ሬ። ዪንቲ̇ ዎይሊን ኢኒ̇ታዝ ባዚን ዲጛንዳ̇ብ ዪንታ̇ ጋሚ ዎልዎልኣ ጎይሊንቲ ዎልዎልኣ ዎ̈ሬ። ዪንቲ̇ ዎ̈ሲባ̈ሶኮታ̇ቦ ዪንቲ̇ ኮዪኖ ባዚን ዲጚባ̈ሴ።

³ዪንቲ̇ ዎ̈ሲናካራሬ ዲጚባ̈ሶን ኣባቦ ጌዬጌይን፥ ዪንቲ̇ ዪንታ̇ ኢኒ̇ን ኩምንዳብ ጋ̈ሪ ኢ̈ታ ቆፊባር ዎ̈ሲ̇ዛ̈ኮታ̇ቦ።

⁴ጾ̈ሳ̇̇ብ ኣማ̇ኒንቲባ̈ሶ ኣሳን! ዓኒ̇ ኣላሚን ጋልዳ ዎ̈ ኢ̈ታ ባዛን ዶሲዝ ኣሳን ጾ̈ሳ̇̇ባር ጎይል ማ̈ቂኖን ኤሪባ̈ሳ። ዪ̈ኮታ̇ቦ̈ ኣላሚን ዓኖ̇ ዶሲዝ ኣሲ ጾ̈ሳ̇̇ባር ጎይሌ̈።

⁵“ጾ̈ሳ̇̇ ዪንታ̇ ጋርታ̇ ጋዲ̇ኖ ኣያ̇ና̈ዲ ዪንቲ̇ ጾ̈ሳ̇̇̈ ኢ̈ብ ሙታ̇ ማ̈ቃ̇ምፔ̈ኒ ዎይሊን ኢኒ̇ቲ̈ሬ” ጋ̈ር ጾ̈ሳ̇̇ ቃ̈ላ ጋልዳ ጻ̈ፊንቲኖ̈ ዪንታ̇ክ ሜላ̇ ማይጺ̈ራ?

⁶“ጾ̈ሳ̇̇ ፌ̈ና ሾክ̇ ሾክ̇ ዎቲዝ ኣሳን ኢጺ̇̈ሬ̈፤ ፌ̈ና ዪርክ ዪርክ ዎቲዛንቦ ፌ ኮሺቲ ሺ ቤይሲ̈ሬ” ጋ̈ሪ̈ ጾ̈ሳ̇̇ ቃ̈ላ ጋልዳ ጻ̈ፊንቲኖ̈ኮታ̇ቦ̈ ጾ̈ሳ̇̇ ኢሚ̇ዝ ኮሺቲ̇̈ዲ ዎይፖ ሺ̈ሬ።

⁷ዪዚ ዪንቲ̇ ጾ̈ሳ̇̇̈ቦ ኣቂብቴ̇፤ ሴ̈ጣና ኢጺ̇ብቴ̈ ኢ ዪንታ ጋልዳፖ ጎቲ̇̈ሬ።

⁸ዪንቲ̇ ጾ̈ሳ̇̇̈ኮ ኡኪ̇ብቴ̇፤ ኢያሬ̈ ዪንታ̇ኮ ኡኪ̇̈ሬ። ናጋራንቻ̇ን! ዪንቲ̇ ናጋራ ኦ̈ዚን ኣሺ̇ብቴ̇። ናምኢ ቆፊባር ጌዳክ ዓኒክ ጌይዛን! ዪንታ̇ ቡ̈ዲ̇ን ጾ̈ሳ̇̇̈ክ ማ̈ሂብቴ̇።

⁹ዪንታ̇ ናጋራ̈ምቦ̇ ጫና̇ቂንቲ̇ብቴ፤ ኣዛ̇ኒብቴ̇፤ ዬ̈ኪ̇ብቴ፤ ዪንታ̇ ሚ̈ቺ̇ን ዬ̈ፊ፤ ዪንታ̇ ኡፋይሲ̇ንዳሬ̈ ኣዛና ማ̈ቃ̇ ጋ̈ቤ̈።

¹⁰ጎዳ ቲ̈ን ዪንታ̇ ዪርክ ዪርክ ዎቲብቴ̇፤ ኢ ዪንታ̇ ሾክ̇ ሾክ̇ ዎቲ̈ሬ።

¹¹ቴ ኢሺንታ̇ን! ዎልዎልኣ ጌስታ̇ፒቴ። ፌ ላጋ̇ ጋልዳ̇ ኢ̈ት ሶ̈ሊ ኢ ጋልዳ ፊርዲዝ ኣሲ ጾ̈ሳ̇̇ ሂጊ̇ን ጋልዳ ኢ̈ት ሶ̈ሊ ፋራ̇ዲ̈ሬ። ሂጊ̇ን ጋልዳ ኢ̈ት ሶ̈ሊ ፊርዲ̇ ዎቲዝ ኣሲ ሂጊ̇ን ጋልዳ ፋራ̇ዲዝ ኣስዶኬ ሂጊ̇ንቦ̈ ኪ̈ቲንቲዝ ኣስ ጊዳካ̇ዬ።

¹²ሂጋ̇ ኬሲ̇፥ ፊርዲ ዎቲዛ̈ዲ ይሳ̇ንዳብኬ̈ ጋዳ̇ንዳብ ዳንዳኢዛ ፔቲ̇ ጾ̈ሳ̇̇ ሙታ̇። ዓት ዪ̈ዶኮ ኣሳ ጋልዳ ፋራ̇ዲዛ ኔ ኦ̈ኖ?

¹³ዓታ̇̈ቦ ዎይ ጊያ̈ቦ ሜላ ጋዳ̇ ሉካ̇ሪ ፔቲ̇ ላይ ኢና ዶኣንዳ ዛልኢ ዱሪታንዳ ጌይዝ ኣሳን! ዪንታ̇ ኣዬ̇።

¹⁴ጊያ̈ብ ሳ̈ዚ ዎዛርፌ̈ን ዎንቲ̈ርኮ ዪንቲ̇ ኤሪባ̈ሴ። ዪንታ̇ ሼምፒ̇ንዳ̇ ጌ̈ሽ̇ ቤንታ̇ር ጋላስ ዬላምባ̇ር ያዝ ጫልኪ̇ንዲፌ̈ን ባያ?

¹⁵“ጾ̈ሲ̇ ጌይን ኑ ሼምፓባር ዶኣዶኮ̈ ባዝ ዓና̇ሬ̈ ዪና̇ሬ̈ ኦ̈ንዳ̇” ጋ̈ንዳብ ኮሺ̈ሬ።

¹⁶ዪንቲ ዪዚ ዪኒ̇ፌ̈ን ጋ̈ዚን ኣሻ̇ሪ ኦቲራባር ኬርፊ̈ሬ። ዪ̈ ፌ̈ኖ ኬራፋ ኢ̈ቴ።

¹⁷ዪዚ ኮሽ̇ ማ̈ቂ̇ኖ ባዝ ኦ̈ንዳብ ኮሻ̇ዚን ኤሪ ሙታ̇ ኦ̈ባ̈ሶ ኣሲ̈ ናጋራ ኦ̈ኔ።