Read basketo 1 ጴጥ 2 Bible Online

1 ጴጥ 2 - basketo bible

1 ጴጥ 2

¹ዪዚ ዪንቲ ኢ̈ቲቲ ዎይ፣ ኣስ ዳሺቺዛ ዎይ፣ ኣሳ ቲ̈ን ኮሽ ማይጻር ቤንታ̇ዚንዶ፣ ቂና̈ታኬ ዚጊርስ ጌይዝ ባዝ ዎይ ኣሺ̇ብቴ፤

²ቢርት ዬሊንቲ̇ኖ ናኢ ማ̈ ኡሽካ̇ንዳብ ኢኒ̇ታዚንዲፌ̈ኒ ዪንታ̇ ፋቲንባር ዲጪ̇ሙታ̇ ሉካ̇ንዳቦ ኣያ̇ናባር ዲቻዝ ኮሻ̇ ቲሚርቲ̇ንቦ ኢኒ̇ቲብቴ።

³ዪዚ ጎዳ̇̈ዲ ኮሽ ማ̈ቂ̇ኖን ዪንቲ̇ ኤሪኔ ጌንቴ̇።

⁴ኣሳ ቲ̈ን ሌቂንቲ̇ኖ ጾ̈ሳ̇ ቲ̈ን ማራ̇ጺንቲ̇ኖ ቦንቺንቲ̈̇ኖ ሼምፓባር ዶኢዝ ሹቻ̇̈ ዬሱ̈ሳኮ ኡኪ̇ብቴ።

⁵ዪንቲ̇ ኢ̈ክ ኡካ̇ዚንዳ ሼምፓባሮ ሹቻንፌ̈ኒ ኣያ̇ና ኬ̈ ማ̈ቃ̇ር ኬ̈ጺንታ̇ንዳቦ፤ ዪኒ̇ባራ ዬሱ̈ስ ክርስቶ̈ሳ ጎይባራ ጾ̈ሳ̇ ኡፋይዝ ኣያና ዣርሻ ሺ̈ሻንዳቦ ዪንቲ̇ ጌ̈ሻ ቄ̈ሳ ማ̈ቂ̇̈ሬ።

⁶ጌ̈ሻ̇ ማጻ̈ፋ ጋልዳ፦ “ቤ̈ቂ̇ብቴ! ማራ̇ጺንቲ̇ኖ̈ዲኬ ቦንቺንቲ̇ኖ ማ̈ቂ̇ኖ ኬ̈ንቦ ቱ̈ሳፌ̈ን ማ̈ቂ̇ዝ ሹቻ̇̈ዳ ታ̈ኒ ጺዮ̇ና ካታሚን ጋልዳ ጋዳ̇ንዳ፤ ኢባር ኣማ̇ኒንቲ̇ዝ ኣሲ ዬልቂ̇ባ̈ሴ” ጌ̈ይዝ ቃ̈ላ ጻ̈ፊንታ̇ር ዎ።

⁷ዪዚ ዪና̇ ሹቺ̇ንዳ ዪንቲ ኣማ̇ኒዛንቦ ቦንቺንቲ̇ኖ ሹቼ̇፤ ኣማ̇ኒባ̈ሶንቦ “ሹች ኬ̈ ኬ̈ጺዝ ኣና̈ጻን ሌቃ̇ር ቶጚኖ ሹቺ̇ን፥ ኬ̈ምቦ ዋ̈ና̇ ቱ̈ሲምቦ ኮዪንቲ̇ዝ ሹች ማ̈ቃ̇ዴ።”

⁸ማ፥ “ኣስ ብዝ ሹች፤ ማ ኣስ ብር ቶጚዝ ዛ̈ላ̇ ማ̈ቂ̇ዴ” ኢንቲ̇ ኣማ̇ናካ̇ይ ኣቲ̇ኖኮታ̇ቦ ብንቲ̈ሬ፤ ቲ̈ናር ጾ̈ሲ ኢንታ ዓኒ̇ቦ ጌዪ ጋዲ̇ኖ ኣሴ።

⁹ዎቲናካሬ ዪንቲ ም ጋርታፖ ዎይሊን ጋራ̇ሚሲዝ ፎኢንንኮ ዪንታ̇ ጼይጊኖ ጾ̈ሳ̇̇̈ኮን ጴቻ ኦ̈ሲን ሶ̈ላምፔ̈ኒ ማራ̇ጺንቲ̇ኖ ዜ̈ርን፥ ካ̈ታቦ ቄ̈ሳንኬ፥ ጾ̈ሲ ፌ̈ቦ ጌዪ ቆሪ ኬሲ̇ኖ ዎርዣን።

¹⁰ዪንቲ ሚን ጾ̈ሳ̇ ዎርዣ ጊዳካ̇ዬ፥ ዎቲናካር ዓት ዪንቲ̇ ጾ̈ሳ̇̇ ዎርዣ፤ ሚን ዪንቲ̇ ማ̈ሪቲ ዲጛካ̇ዮን፤ ዎቲናካር ዓት ማ̈ሪቲ ዲጚኔ።

¹¹ቴ ላጋ̇ን! ዪንቲ ዓኒ̇ ኣላሚን ጋልዳ ዛቃ̇ኬ ቤት ማ̈ቂ̇ኖኮታቦ ዪንታ̇ ሼምፒ̇ን ኦላዝ ናጋራ ኢኒ̇ን ጋልዳፖ ጎታ̇ምፔ̈ን ቴ ዪንታ̇ ጌሻ̇̈ሬ።

¹²ኣሲ ዪንታ̇ “ኢንቲ̇ ኢ̈ት ኦ̈ሬ” ጌዪ ጌስቲ̇̈ርካሬ፥ ጾ̈ሳ̇ ዬይዝ ጋላስ ጾ̈ሳ̇ ኤሪባ̈ሶ ኣሳን ዪንታ̇ ኮሻ̇ ኦ̈ሲን ቤቃ̇ሪ ኢያ ጋላታምፔ̈ኒ ኢንታ̇ ጊዳ̇ ኮሽ̇ ኦ̈ሳ ኦ̈ሙታ ዶኢብቴ።

¹³ጎዳ ጊሻ̇ብ ጋ̈ሪ ሲልጣና ጋልዳ ዎ ኣሳንቦ ኪ̈ቲንቲ̇ብቴ፤ ዎይፖ ሺዛ ሲልጣ̈ና ኢንታ̇ብ ዎኮታ̈ቦ ካ̈ቲንታ̇ንቦ ኪ̈ቲንቲ̇ብቴ።

¹⁴ጋድ ኣቂ̇ሲዛንቦ ኪ̈ቲንቲ̇ብቴ፤ ኢንቲ ኢ̈ት ኦ̈ዛን ቃጣኣንዳቦ ማ ኮሽ ኦ̈ኖን ኣንጃምፔ̈ኒ ካ̈ታ ኢንታ̇ ጋዲ̇ኖ ኣሴ።

¹⁵ዪንቲ ኮሽ ኦ̈ሙታ ዳሻንኮን ኤራ ጉ̈ጺኖ ሶ̈ሊን ዚምዶኢሳምፔ̈ኒ ጾ̈ሳ̇ ኮዪ̈ሬ።

¹⁶ጾ̈ሳ̇̇̈ቦ ኦ̈ዚ ኣስ ማ̈ቂ̇ኖንዲፌ̈ኒ ናጻ ኬስኪ̇ኖ ኣስፌ̈ን ማ̈ቃ̇ር ዶኢብቴ ዎቲናካሬ ኑ ናጻ ኬስኪ̇ኔ ጋ̈ሪ ኢ̈ታ ባዝ ኦ̈ፒ̇ቴ፤

¹⁷ኣስ ዎይቦ ኮሺ̇ዝ ቦንች ኢሚ̇ብቴ፤ ኣማ̇ኒዝ ኣሳን ካብቴ፤ ጾ̈ሳ̇̇̈ቦ ኢ̈ጪ̇ብቴ፤ ጋ̈ድ ኣቂሲዝ ካ̈ታ ቦንቺ̇ብቴ።

¹⁸ኣይላንሶ! ዪንታ̇ቦ ኮሽ̇ ማ̈ቂ̇ኖ ላ̈ንቦ ሙታ̇ ጊዳካ̇ይዶን ኢ̈ት ኦ̈ዝ ላ̈ንባራር ኪ̈ቲንቲ̇ብቴ።

¹⁹ኣሲ ጾ̈ሳ̇ጊሻ̇ቦ ኣባክ ኢ̈ሳ̇ካይዶር ሜታ ኤኬ̇ጌይንዶ ጾ̈ሲ ኢያ ኣንጂ̈ሬ።

²⁰ዪንቲ ኢ̈ት ኦ̈ኖኮታ̇ቦ ሜታ ኤኪ̇ሙታ ጋ̈ርዢን ኣ ማ̈ዳ̇̈ራ? ዪንቲ ኮሽ ኦ̈ሳ ኦ̈ሪ ሜታ ኤኪ̇ሙታ̇ ጋ̈ርዤጌይን ጾ̈ሳ̇ ጋልዳፖ ኣንጃ ዲጚ̈ሬ።

²¹ዪንቲ ጼይዚንቲ̇ኖንዳ ዪኒ̇ቦ፤ ዪንቲ̇ ኢ̈ኮን ቤቃ̇ሪ ኢ̈ኮንዲፌ̈ን ዎታምፔ̈ኒ ዬሱ̈ሲ ሳ̈ዝ ጋልዳ ሜታ ኤካ̇ሪ ዪንታ̇ብ ሚሳ̇ሊ ማ̈ቂ̇ኔ።

²²ኢ ኣባካር ናጋራ ኦ̈ካ̇ዬ፤ ኢ ኖ̈ና ጋርታፓ̇ሬ ኢ̈ታ ባዝ ኬስካካ̇ዬ።

²³ኢያ ቆ̈ምባር ማሂ ቆ̈ካዬ፤ ሜ̈ታ ኤኪ̈ርዶሪ ዎይቦ ጺሊ̇ቲባር ፊርዲዝ ጾ̈ሳ̇̇̈ቦ ፌ̈ና ዓዳራ ኣ̈ር ኢሚ̇ዶ̇ኬ ኢ̈ታ ባዝ ኢንታ ጋልዳ ዬልሬ ጌዪ ኢ̈ሺቻ̇ካ̇ዬ።

²⁴ኑ̈ኒ ናጋራ ኦ̈ሲን ኣሻ̇ሪ ጺሊ̇ቲ̇ባራ ዶኣምፔ̈ን፥ ኢ ኑ ና̈ጋ̈ርን ፌ ኣሲቲምባር ቶ̈ካ̇ሪ ማስቃላ ጋልዳ ሶቲንቲ̇ዴ፤ ኢ ጫዲንቲን ዪንቲ̇ ፋጺዴ።

²⁵ዪንቲ ዪኖ ዶሪፌ̈ን ዣይቲ̇ ኣቲ̇ንዶ̈ን፤ ዎቲናካር ዓት ዪንቲ̇ ዪንታ̇ ሼምፒ̇ን ና̈ጊዛኬኬ ዬ̈ጚዛክ ኢ̈ክ ማ̈ቂ̇ኔ።