Read basketo 1 ጴጥ 3 Bible Online

1 ጴጥ 3 - basketo bible

1 ጴጥ 3

¹ዪዚ ዪንቲ ማጫ̇ን! ዪንታ ኣሲኒንታ̇ንቦ ኪ̈ቲንቲ̇ብቴ፤ ኣሲኒንታ̇ን ጋርታ ጾ̈ሳ̇ ቃ̈ሊን ኣማ̇ኒባ̈ሶን ዎኮ ጾ̈ሳ ቃ̈ሊን ሲስካካ̇ይዶር ፌ ማጫ̇ን ኮሽ̇ ጻባዪምባር ሙታ̇ ጾ̈ሳ̇̇̈ክ ሺ̈ቃንዳብ ዳንዳኢ̈ሬ።

²ዪና̇ ማ̈ቃ̇ዚንዳ ዪንቲ̇ ጌ̈ሺ̇ቲባር ዬ ኣስ ቦንቺ̇ ዎታዚን ቤቃ̇ሪዬ።

³ዪንቲ ዪንታ̇ ቆም ዳዲ̇፣ ዎርቃ ኣ̈፣ ኮሽ ኣፊላ ማኢ ዛ̈ና ኣሳብ ቤንቲ̇ዝ ባዝባር ጊዳካ̇ይዶን፤

⁴ዪንታ̇ ቆይሲንዳ ጾ̈ሳ̇ ቲ̈ን ጴች ቦንቺንቲ̇ኖ ዎይ ጋላስ ዪባ̈ሶ ጌ̈ጻንባር ማ̈ቆ̇ጋ̈ቤ። ዪንሬ ኣሽካ ማ̈ቃር ዶኢዛ̈ዲኬ ጻባያባር ዶልቆቃ ማ̈ቃ̇ር ዶኢዛ ቡ̈ዳ ጋርቶ ቆይሲ።

⁵ፌ ታስፊን ጾ̈ሳ̇ ጋልዳ̇ ጋዲ̇ኖ ሚኖ ጌ̈ሻ̇ ማጫ̇ን ፌ̈ና ጌዚን ቆይሲሲኖ̈ዲ ዪንፌ̈ኖ ባዛንባራ፤ ኢንታ̇ሬ ኣስኒንታ̇ንቦ ኪ̈ቲንቲ̇ኔ።

⁶ሳ̈ራ ፌ ኣስና ኣብራሃማኮ “ላ̈” ጌ̈ያሙታ̇ ኪ̈ቲንቲ̇ኔ፤ ዪንታ̇ር ኣባካር ኢ̈ጫካ̇ይ ዪና̇ ኢፌ̈ኒ ዎቲኖኮ ኢዝ ናኤ።

⁷ኣስኒንታ̇ን! ዪንታ̇ ማጫ̇ንባር ኮሽ ቆፊባር ዶኢብቴ̇፤ ማጫን ዪንታ̇ፌ̈ን ሚ̈ን ባዮ̇ኮታ̇ብኬ ኢንቲ̇ ሼምፓ ኣንጂንዶ ዪንታ̇ባር ዎልኣ ኤኪ̇ዛኮታቦ ዪንቲ ኢንታ ቦንቺ̇ብቴ፤ ዪንቲ̇ ዪኒፌ̈ን ዎቴጌይን ዪንታ̇ ዎ̈ሲን ጾ̈ሳ̇̇ ዋይታ̇ ኣ̈ካ̇ይፌ̈ን ካዪዝ ባዚ ዶኢባ̈ሴ።

⁸ዪዚ ውርሲ ጋልዳ ቴ ጋ̈ዚንዳ፥ ዪንቲ̇ ዎልዎልኣ ፔቲ̇ ቆፊባር ዶኢብቴ፤ ና̈ሳ ሜላ̈ኮ ሜቲ̇ን ዪንታ̇ ሜታፌ̈ን ማሃር ቤቂ̇ብቴ። ዎልኣ ኢሺክ ጌ̈ዲክፌ̈ን ማ̈ቃ̇ር ዶኢብቴ። ማ ኣሳብ ሚጪንቲ̇ዛንኬ ዪንታ̇ ዪርክ ዪርክ ዎቲዛን ማ̈ቂ̇ብቴ።

⁹ዪንታ̇ብ ኢ̈ት ኦ̈ኖ̈ቦ ኢ̈ት ኦ̈ ማሃፒ̇ቴ ዪንታ̇ ቆ̈ኖ̈ዳ ቆ̈ ማሃፒ̇ቴ ዪኒ̇ፖ ኢያ ኣንጂብቴ። ዪንቲ ጼይጊንቲ̇ኖንዳ ዪኒፌ̈ን ኦ̈ሪ ኣንጃ̇ ዲጛ̈ምፔ̈ኒዬ።

¹⁰ጌ̈ሻ̇ ማጻ̈ፋ ጋልዳ፦ “ሼምፓ̇ባር ዶኣንዳ̇ብኬ ኮሽ̇ ቃማ̇ን ቤቃ̇ንዳቦ ኮይዛ̈ዲ፥ ኢ ኖ̈ኒን ኢ̈ታ ባዝ ሶ̈ላካ̇ይፌ̈ኒ፥ ኢ ኢርጺንን ዉ̈ጫ ባዝ ሶ̈ላካ̇ይፌ̈ኒ ካዮጋ̈ቤ።

¹¹ኢ̈ት ባ̈ዝ ጋልዳፖ̇ ጎቶ̇፤ ኮሽ ባዝ ኦ̈ጋ̈ቤ፤ ሳሪቲ ኮዮ፤ ሳሪቲ ዎሂን ዬጋ̈ቤ፤

¹²ጎዳ ኣ̈ፊንዳ፤ ጺል̇ ኣሳን ቤቃ̈̇ሬ፤ ኢ ዋ̈ይን ኢንታ ዎ̈ሲን ሲስካ̇ንዳ̇ቦ ፊርቂ̈ንታ̇ር ዎ፤ ዎቲናካር ኢ̈ት ኦ̈ዝ ኣሳን ጋ̈ልዳ ጾ̈ሳ̇ ፊርዳ ዬይሬ” ጌይ ጻ̈ፊንቲ̇ኔ።

¹³ዪንቲ ኮሻ̇ ባዝ ኦ̈ንዳ̇ቦ ሚ̈ጚንቴጌይንዶ ሜታ ዪንታ̇ ጋልዳ ኤሄይዛ ኦ̈ኖ?

¹⁴ዪንቲ ኮሻ̇ ባዝ ኦ̈ር ሜታ ኤኪ̇ዝባዝ ማ̈ቄ̇ጌይንዶ ዪንቲ̇ ኣንጃ ዲጚ̈ሬ፤ ኣስ ኢ̈ሺቻ̇ብ ኢ̈ጫፒ̇ቴ፤ ኤ̈ዝጋፒ̇ቴ።

¹⁵ክርስቶ̈ሳ ዪንታ̇ ቡ̈ዲንባር ቦንቺ̇ብቴ፤ ዪንታ̇ ሼምፒ̇ምቦ ኢያ ጎድ ማሂብቴ፤ ዪንታ̇ቦ ዎ ታስፊን ጎይ ዪንታ̇ ኦይጪ̇ዝ ኣሳን ዎይንቦ ማልሳ ኢማ̇ንዳቦ ዎይ ጋላስ ጊ̈ጊንቲ̇ኖን ማ̈ቂ̇ብቴ።

¹⁶ዪንቲ ማልሳ ማሂ̈ርዶሪ ኣስ ቦንቺሙታ̇ኬ ኣሽኪቲባር ማሂብቴ፤ ዪንቲ ክርስ̇ቶ̈ሳይ ማ̈ቂ̇ኖኮታ̇ቦ ዪንታ̇ብ ዎ ኮሻ̇ ጻባዪን ኢ̈ት ማይጺሲ ሶ̈ሊዝ ኣሳን ፌ ኢ̈ታ ሶ̈ሊንባራ ዬ̈ልቃምፔ̈ኒ ዪንታ̇ቦ ኮሻ̇ ቆፊ ዶኦጋ̈ቤ።

¹⁷ጾ̈ሳ̇ ኮያዚን ዓኒ̇ኮ፥ ዪንቲ ኢ̈ታ ኦ̈ሳ ኦ̈ር ሜታ ኤካ̇ናፖ ኮሻ̇ ባዝ ኦ̈ር ሜ̈ታ ኤኪ̇̈ርኮ ዪንታ̇ብ ኮሼ̇።

¹⁸ክርስቶ̈ሲ ኑ̈ና ጾ̈ሳ̇̇̈ባር ኢጊንንዳቦ ኢ ፌቆሚ̇ን ጺ̈ላ̇̈ዶ̈ሪ ጺላ̇ ባዮ̇ን ኑ ናጋራ ጊሻ̇ቦ ናምኢባ̈ሶ ጎይባራ ሜታ ኤካ̇ሪ ፔቲ̇ ቶህ ዓይቂ̇ዴ፤ ኢ ኣይሽባር ዓይቂ̇ዴ ኣያ̇ናባራ ሼምፓባር ዎ።

¹⁹ዪ ኣያ̇ናባራ ቃ̇ሺ ኣል ዎ ሼምፓንቦ ሳባ̇ኪ̇ዴ።

²⁰ዪን ቃሺ ኣ̈ል ዎ ኣሳን ሚ̈ን ኖ̈ሂ ማርካባ ኮ̈ቺ̇ዝ ኬል̇ባራ ጾ̈ሳ̇ ኢንቲ̇ ማ̈ቃ̇ንዳዶ̈ኔ ጋ̈ሪ ዳንዳኣባር ና̈ጊሙታ̇ ዎምባራ ኢ̈ብ ኪ̈ቲንታ̇ብዳ ጌዪ ኢጺ̇ኖ ኣሳን። ዪና̇ ማርካቢን ጋርታ ጌላሪ ዋ̈ንባ̇ር ፋጺኖን ላማካይ ኣስ ሙታ።

²¹ዪና̈ ዋ̈ሲ̇ንዳ ዓት ዪንታ̇ ፋዚን ጺ̈ንቃ̇ታ ሚሳ̇̈ሊንዶ፤ ዪና̇ ጺንቃ̇ቲንዳ ኣሳ ጋልዶ ቃት ጌ̈ሻዚን ጊዳካ̇ይዶን ኮሽ ቆፊ ዲጛንዳቦ ጾ̈ሳ̇̇̈ቦ ሺ̈ቂዝ ዎ̈ሳ። ዪና ዪንታ̇ ፋዚንዳሬ ዬሱ̈ስ ክርስቶ̈ሳ ዲንዲን ጎይባራ።

²²ኢያሬ ኣፋ ሉካ̇ሪ ጾ̈ሳ̇ ባ̈ባ̈ቦ ኡሻች ጎይ ዎ፤ ኪታ̈ንቻን፥ ሲ̈ልጣናባሮንኬ ዎልቃባሮን ዎይ ኢ̈ቦ ኪ̈ቲንቲ̇ኔ።